‘ယုံကြည်ထားတာက ကျွန်တော်အရှုံးမပေးရင် မရှုံးသေးဘူးဆိုတာပါပဲ။ မဖြစ်သေးလည်း ဆက်လုပ်တယ်’

မကြာခင်က ကျင်းပပြီးစီးခဲ့ပြီးနောက် ပရိသတ် စိတ်ဝင်စားအားပေးမှု များပြားခဲ့သည့် သီချင်းဆိုပြိုင်ပွဲတစ်ခုဖြစ်သော Galaxy Star Myanmar သီချင်းဆိုပြိုင်ပွဲတွင် ပရိသတ်အားပေးမှု များပြားခဲ့သည့် ပြိုင်ပွဲဝင်တစ်ဦးမှာ Key ဖြစ်သည်။ လူရွေးချယ်ပွဲ အဆင့်ဆင့်မှစတင်ကာ ဆွဲဆောင်မှုရှိသည့်အသံ၊ ရိုးသားသည့်ဟန်ပန်တို့ဖြင့် ယှဉ်ပြိုင်မှုကြောင့် ပရိသတ် သတိထားမိစေခဲ့သူဖြစ်ပြီး ကိုရီးယား Training Camp ကာလတွင် ကိုရီးယားအကဲဖြတ်ဒိုင်များ၊ လေ့ကျင့်သင်ကြားသူများက အားနည်းချက်များ ထောက်ပြခဲ့မှုကြောင့် စိတ်ဖိစီးမှုများစွာဖြင့် ဆက်လက်ယှဉ်ပြိုင်ခဲ့သူလည်းဖြစ်သည်။ Top 10 Finalist ၁၀ ဦးတွင် ပါဝင်ယှဉ်ပြိုင်ခဲ့ပြီးနောက် နိုင်ငံတကာ တေးသီချင်းများအား ကျွမ်းကျင်ပိုင်နိုင်စွာ ယှဉ်ပြိုင်နိုင်သူတစ်ဦးအဖြစ် ပရိသတ်များက အသိအမှတ်ပြုအားပေးခဲ့ပြီး နောက်ဆုံးအဆင့်ပြိုင်ပွဲတွင်မူ အကဲဖြတ်ဒိုင်များကပါ မတ်တပ်ရပ် အားပေးရသည်အထိ အကောင်းဆုံး ယှဉ်ပြိုင်နိုင်ခဲ့သူတစ်ဦးဖြစ်သည်။ Galaxy Star Myanmar Winner ဆုနှင့် လွဲချော်ခဲ့သော်လည်း ပရိသတ်ချစ်ခင်အားပေးမှု အခိုင်အမာရရှိထားသူ Key နှင့်တွေ့ဆုံ၍ ပြိုင်ပွဲကာလ အတွေ့အကြုံများ၊ ရှေ့ဆက်လုပ်ဆောင်သွားမည့် အနုပညာလုပ်ငန်းများအကြောင်းကို မေးမြန်းဖြစ်ခဲ့ပါသည်။

■ မေး - Galaxy Star Myanmar မှာမပြိုင်ခင် ဂီတလုပ်ငန်းနဲ့ ပတ်သက်လို့ အတွေ့အကြုံရှိခဲ့ဖူးလား။
ဖြေ - အဲဒီလိုတော့ အတွေ့အကြုံတွေမရှိခဲ့ပါဘူး။ ဂီတနဲ့ပတ်သက်တဲ့ လုပ်ချင်တာကတော့ အရင်ကတည်းကရှိခဲ့တယ်။ ဝါသနာလည်း အရမ်းပါတယ်ပေါ့။

■ မေး - ဒီပြိုင်ပွဲကို ဝင်ပြိုင်မယ်ဆိုတဲ့အခါမှာ ဘာတွေအဓိကပြင်ဆင်ခဲ့လဲ။
ဖြေ - ဘာတွေပြင်ဆင်ခဲ့လဲဆိုတော့ သီချင်းတွေအများကြီး နားထောင်ခဲ့တဲ့အတွက် အရမ်းကြီးတော့ ပြင်ဆင်စရာမလိုဘူး။ အင်္ဂလိပ်သီချင်းကတော့ အရင်ကတည်းက ဆိုကျင့်ရှိတဲ့အတွက် အရမ်းမစိုးရိမ်ဘူး။ အိမ်မှာဆိုလည်း အမေက သီချင်းမျိုးစုံဖွင့်သလို ညီမကလည်း သီချင်းအရမ်းဖွင့်တယ်။ အဲဒီအတွက် သီချင်းပေါင်းစုံက နားယဉ်နေတော့ အများကြီးတော့ မပြင်ဆင်လိုက်ရပါဘူး။

■ မေး - လူရွေးပွဲအဆင့်ဆင့်မှာ ကိုယ့်ရဲ့အားနည်းချက်၊ အားသာချက်က ဘာတွေဖြစ်မယ်ထင်လဲ။
ဖြေ - အားနည်းချက်ကတော့ ပြိုင်ပွဲအတွေ့အကြုံမရှိတော့ သီချင်းရွေးတဲ့အပိုင်းမှာ အားနည်းသွားတာတွေရှိတယ်။ အားသာတာကတော့ ကျွန်တော်ပြောတာထက် သူများပြောတာက ပိုကောင်းမယ်ထင်ပါတယ်။ အတွေ့အကြုံတွေကတော့ အများကြီးရခဲ့ပါတယ်။ လည်ချောင်းနဲ့ သီချင်းဆိုတယ်ဆိုပြီး ထောက်ပြတာတွေ ကြားခဲ့ရတယ်။ အခုထိလည်း ပြင်နေရတုန်းပဲ။ သတိမထားရင် လည်ချောင်းချည်းပဲသုံးနေတော့ ဆက်တိုက်ဆိုရင် လည်ချောင်းနာတာတွေရှိတယ်။ ပါဖောမန့်စ်ပိုင်းဆိုရင်လည်း အရင်ကဆို ကျွန်တော်သီချင်းဆိုရင် ဂစ်တာနဲ့ဆိုနေကျလေ။ အခုကျတော့ ကတာတွေပါပါလာတော့ အခက်အခဲတွေရှိခဲ့တယ်။ ဒါပေမဲ့ တစ်ဆင့်ချင်းမှာတော့ ကြိုးစားခဲ့သလို အခုလည်းဆက်ပြီး ကြိုးစားနေပါတယ်။

■ မေး - ကိုရီးယား Camp မသွားခင်မှာ ကိုယ့်ကိုယ်ကိုယ် ယုံကြည်မှုအပြည့်နဲ့ ဆိုနေကျပေမယ့် အဲဒီရောက်တဲ့အခါ စိတ်ဖိစီးမှုတွေ များလာတာကိုမြင်ရတယ်နော်။ အဲဒီအတွေ့အကြုံလေးတွေ ပြောပါဦး။
ဖြေ - ကိုယ်တစ်သက်လုံး လုပ်လာတာကို သူတို့ကပြောင်းခိုင်းတယ်။ ဒါပေမဲ့ ကျွန်တော်လည်းကြိုးစားပေမယ့် ချက်ချင်းကြီးမလုပ်နိုင်ဘူး။ သူတို့ကလည်း နေ့တိုင်းဒါပဲပြောတယ်။ အဲဒီတော့ ဖိအားတွေဝင်ခဲ့တယ်။ မလုပ်နိုင်ဘူးဆိုတဲ့အရာက စိတ်ထဲမှာ အမြဲတမ်းဝင်ခဲ့တယ်။ ပြီးတော့ ဂစ်တာတီးပြီး သီချင်းဆိုနေကျဆိုတော့ ဂစ်တာမရှိတော့တဲ့အချိန်မှာ လက်တွေက ဘယ်လိုထားရမှန်းမသိဘူး။ အဲဒါတွေ ခဏခဏထောက်ပြခံရတော့ ငါလိုအပ်ချက်တွေ အများကြီးရှိတယ်ဆိုတာ ပိုသိလာတယ်။ အဲဒီအခါ ကိုယ့်ကိုယ်ကိုယ် စိတ်ပျက်လာတဲ့ အခြေအနေတွေရှိတယ်။ ဒါပေမဲ့ ယုံကြည်ထားတာက ကျွန်တော်အရှုံးမပေးရင် မရှုံးသေးဘူးဆိုတာပါပဲ။ မဖြစ်သေးလည်း ဆက်လုပ်တယ်။ တစ်ရက်တော့ ရောက်မယ်ဆိုတာ ကျွန်တော်သိတယ်လေ။

■ မေး - Top 10 Finalist ထဲမှာရွေးချယ်ခံရပြီး ယှဉ်ပြိုင်တဲ့အခါ ဘယ်လိုခွန်အားတွေနဲ့ လုပ်ခဲ့ရလဲ။
ဖြေ - ပထမဆုံးတော့ ကျွန်တော်က ခရစ်ယာန်ဖြစ်တယ်။ ယုံကြည်သူဖြစ်တယ်။ ဂီတနဲ့ပတ်သက်လို့ သင်ယူထားတာလည်းမရှိဘူး။ ကျွန်တော်က အမြဲတမ်းရယ်နေတတ်တဲ့သူ။ နောက်လိုက် စလိုက်နေတယ်။ တစ်ယောက်တည်း ဖြစ်တဲ့အချိန်မှာတော့ ကျမ်းစာဖတ်တယ်။ ကျွန်တော်ကမတော်ဘူး။ လိုအပ်ချက်တွေ ရှိမှန်းသိတယ်။ ဒါပေမဲ့ ဘုရားသခင်ဆီမှာ ဆုတောင်းတယ်။ အဲဒီအတိုင်းပဲ ဆက်သွားခဲ့ပါတယ်။

■ မေး - International Song မှာတော့ ဒိုင်တွေက အရမ်းသဘောကျပေမယ့် မြန်မာသီချင်းဆိုရင် စကားလုံးမပီဘူးဆိုပြီး ဝေဖန်ကြတော့ အဲဒါက စိတ်ဖိစီးမှုပြန်ဖြစ်လား။
ဖြေ - ကျွန်တော်အရင်ကလည်း သီချင်းတွေဆိုခဲ့တယ်။ ဒါပေမဲ့ စကားမပီဘူးဆိုပြီး အပြောမခံရဘူး။ အခုဒီပြိုင်ပွဲမှာ အဲဒီလိုအပြောခံရတယ်။ မြန်မာသီချင်းဆိုတိုင်းမှာ စကားလုံးတိုင်းကို သတိထားပါတယ်။ အင်္ဂလိပ်သီချင်းဆိုရင်တော့ ပေါ့ပေါ့ပါးပါးဖြစ်တယ်။ မြန်မာသီချင်းဆိုရင်တော့ သတိထားရတာပေါ့။ အဲဒါလေးပါပဲ။

■ မေး - Top 2 ထဲမှာပါတယ်လို့ ကြေညာလိုက်တုန်းက အရမ်းအံ့အားသင့်သွားတယ်နော်။
ဖြေ - အဲဒီနေ့က ကျွန်တော်စာသားမေ့သွားတယ်။ ရက်ပ်ဆိုရမယ့် တစ်ပုဒ်ကလည်းရှိတော့ အဲဒီအပေါ် အာရုံစိုက်ထားတော့ ပြိုင်ပွဲဝင်ရတဲ့သီချင်းမှာ စာသားမေ့သွားရော။ အဲဒီသီချင်းဆိုပြီးတာနဲ့ သွားပြီလို့ပဲ ထင်လိုက်တာ။ ရက်ပ်ကိုတော့ အမှားမပါဘဲဆိုမယ်ဆိုပြီး လုပ်ခဲ့တယ်။ ဒါပေမဲ့ နောက်ဆုံးရွေးလိုက်တဲ့အထဲပါလာတော့ ဘာသိလိုက်လဲဆိုရင် ပြိုင်ပွဲဝင်တဲ့သူတွေတိုင်းမှာ နောက်မှာထောက်ခံပေးနေတဲ့ ပရိသတ်တွေရှိတယ်။ အဲဒါကို တကယ်သိလိုက်တယ်။ ပရိသတ်မဲကြောင့် တက်လာတာပါ။ စာသားမေ့သွားတာ ကျွန်တော်တစ်ယောက်တည်းလေ။ သူတို့ကို တကယ်ကျေးဇူးတင်ပါတယ်။

■ မေး - နောက်ဆုံးအဆင့် ပြိုင်ပွဲနဲ့ပတ်သက်တဲ့ ခံစားချက်ဆိုရင်ရော။
ဖြေ - ကိုနေမင်းအိမ်နဲ့က အရမ်းခင်ကြတယ်။ အဲဒီတော့ပြိုင်တဲ့စိတ်မရှိဘူး။ အကောင်းဆုံး အမှားမပါအောင် လုပ်မယ်ဆိုတဲ့စိတ်ပဲရှိတယ်။ ဘယ်သူပဲရရအတူတူပဲလို့ သဘောထားတယ်။

■ မေး - ပြိုင်ပွဲတစ်လျှောက်လုံးမှာ အချိုးအကွေ့တွေ အများကြီးဖြတ်သန်းခဲ့ရတော့ ပြန်စဉ်းစားရင်ရော ကျေနပ်စရာဖြစ်ရဲ့လား။
ဖြေ - ကိုယ့်ကိုယ်ကိုယ် မကျေနပ်တာတွေတော့ရှိတယ်။ လုပ်နိုင်ရက်နဲ့ မလုပ်ပြနိုင်လိုက်တာလည်း ရှိတယ်လေ။ နောင်တရတာတွေရှိတယ်။ ကျွန်တော်တို့ကို မျှော်လင့်ထားတဲ့သူတွေအတွက် အားနာမိတာတွေလည်းရှိတယ်။

■ မေး - နောက်ထပ်ရော ဂီတနဲ့ပတ်သက်လို့ ဘာတွေထပ်လုပ်ဖို့ စိတ်ကူးထားတာရောရှိမလဲ။
ဖြေ - မျှော်လင့်ချက်တွေတော့ရှိတယ်။ အင်္ဂလိပ်သီချင်းက ရေးမယ်ဆိုရင်တော့ အရမ်းမကျွမ်းကျင်သေးဘူး။ ပုံစံကွဲလေးတွေလုပ်ချင်တယ်။ Cover Song လုပ်ရတာ အရမ်းကြိုက်တယ်။ သီချင်းပုံစံပြောင်းပြီးဆိုရတာ အရမ်းကြိုက်တော့ အဲဒီလိုလုပ်ဖို့တွေရှိပါတယ်။