■ အဝေးကွင်းမှာ ဘာစီလိုနာကို အနိုင်ယူပြီး စပိန်စူပါဖလားဆွတ်ခူးဖို့ အခြေအနေကောင်းသွားတဲ့ ရီးယဲလ်

Published 14 August 2017

စပိန်စူပါဖလားပထမအကျော့အဖြစ် ဘာစီလိုနာနဲ့ရီးယဲလ်တို့ ယှဉ်ပြိုင်ကစားခဲ့တဲ့ပွဲမှာ
ရီးယဲလ်က (၃-၁)ဂိုးနဲ့ အနိုင်ရခဲ့လို့ စပိန်စူပါဖလားကို ရယူဖို့အခြေအနေကောင်းသွားပါတယ်။ ဘာစီလိုနာ
အသင်းအနေနဲ့ မဟာပြိုင်ဘက် ရီးယဲလ်ကို အနိုင်ရဖို့အတွက် အဓိက ကစားသမားတွေ အစုံအလင်
ပွဲထုတ်ခဲ့ပြီး အသင်းက ထွက်သွားတဲ့ နေမာနေရာမှာ ဒယ်လိုဖူကို အသုံးပြုခဲ့တယ်။ နေမာမရှိတဲ့
ဘာစီလိုနာတိုက်စစ်မှာ မက်ဆီနဲ့ ဆွာရက်ဇ်တို့နှစ်ဦးထဲ ရုန်းကန်ခဲ့ရသလိုဖြစ်ခဲ့ရတယ်။

ရီးယဲလ်အသင်းနည်းပြဇီဒန်းဟာ စီရော်နယ်လ်ဒိုကို ဒုတိယပိုင်းမှ အသုံးပြုခဲ့ပြီး အရင်ကစားနေကျ (၄-၃-၃)
ပုံစံအစား (၄-၃-၁-၂)ကစားကွက်ကို ခင်းကျင်းခဲ့တယ်။ တိုက်စစ်မှာ ဘေးလ်နဲ့ ဘန်ဇီမာကို တည်ကစားပြီး
အစ္စကိုကို ကွင်းလယ်တိုက်စစ်ပုံစံ အသုံးပြုခဲ့တယ်။ ဒုတိယပိုင်း (၄၉)မိနစ်မှာ ရီးယဲလ် အဖွင့်ဂိုးရခဲ့ပြီး မာဆယ်
လိုရဲ့ ဖြတ်တင်ဘောကို ပီကေး တားဆီးရာက ကိုယ့်ဂိုးကိုယ် သွင်းသလိုဖြစ်သွားခဲ့ပါတယ်။ ဘာစီလိုနာ
အတွက် ချေပဂိုးကို (၇၇)မိနစ်မှာ ဆွာရက်ဇ်ကြောင့်ရတဲ့ ပယ်နယ်တီက မက်ဆီက ကန်သွင်းခဲ့တာပါ။
ရီးယဲလ်အတွက် ဒုတိယဂိုးကို လူစားဝင်လာတဲ့ စီရော်နယ်လ်ဒိုက မိနစ်(၈၀)မှာ ပီကေးကို တစ်ချက်လှည့်
ပြီး အဝေးကန်ချက်နဲ့ လှလှပပကန်သွင်းခဲ့တာဖြစ်ပါတယ်။ စီရော်နယ်လ်ဒိုဟာ ဂိုးသွင်းအပြီး အင်္ကျီချွတ်
အောင်ပွဲခံခဲ့လို့ အဝါကတ်ပြခံခဲ့ရသလို၊ နှစ်မိနစ်အကြာမှာ ပယ်နယ်တီဧရိယာအတွင်း ဟန်ဆောင်လဲှချ
ခဲ့လို့ ဒုတိယအဝါပြခံခဲ့ရပြီး အနီကတ်နဲ့ထုတ်ပယ်ခံခဲ့ရပါတယ်။ စီရော်နယ်လ်ဒိုအနေနဲ့ အနီကတ်ပြသခံခဲ့
ရလို့ ဒိုင်လူကြီးကို တွန်းခဲ့တာကြောင့် အဲဒီအပြုအမူအတွက် အရေးယူခံရမယ့်အနေအထားရှိနေပါတယ်။

ရီးယဲလ်အသင်းအတွက် ပွဲသိမ်းဂိုးကို ပြိုင်ပွဲကြီးတွေမှာဆို ခြေစွမ်းပြဂိုးသွင်းလေ့ရှိတဲ့ အဆန်စီယိုက မိနစ်
(၉၀)မှာ ပယ်နယ်တီ ဧရိယာအတွင်းက အပြင်းကန်သွင်းခဲ့တာပါ။ ဘာစီလိုနာပေးလိုက်ရတဲ့ နှစ်ဂိုးက တန်
ပြန်တိုက်စစ်တွေကနေ ပေးလိုက်ရတာလည်းဖြစ်ပါတယ်။ အခုပွဲရှုံးနိမ့်ခဲ့လို့ ဘာစီလိုနာအသင်း
ဟာ ဘာနေဗျူးမှာ ရုန်းကန်ရတော့မှာဖြစ်ပြီး နည်းပြသစ်ဗယ်လ်ဗာဒီအတွက်လည်း အဓိကပြိုင်ပွဲအဖြစ်
ကစားရတဲ့ ပထမဆုံး El Clasicoပွဲမှာမျက်နှာပျက်စရာဖြစ်ခဲ့ရတယ်။