မြောက်ကိုရီးယားနိုင်ငံ၌ ပေါ့ပ်ယဉ်ကျေးမှု စတင်လာပြီဟု ဆိုနိုင်သည်။ အာဏာရှင်စနစ်အောက်၌ ပေါ့ပ်ယဉ်ကျေးမှုနှင့် အနုပညာများမှာ အပေါစားအနုပညာ၊ အရင်းရှင်ယဉ်ကျေးမှုအနုပညာ၊ ပြည်သူလူထုအတွက် အဆိပ်အတောက်ဖြစ်စေသော အနုပညာအဖြစ် သတ်မှတ်ထားခဲ့သည်။ ယခုအခါ၌ မြောက်ကိုရီးယားနိုင်ငံ ယဉ်ကျေးမှုအနု ပညာပြောင်းလဲမှုများရှိလာပြီဖြစ်သည်။

ယင်းသို့ ပြောင်းလဲမှုများကို ရုပ်သံဒရာမာ ဇာတ်လမ်းများနှင့် အင်နီမေးရှင်းများ၌ တွေ့မြင်လာရသည်။ ယင်းကဲ့သို့ ပြောင်းလဲမှုကို ကင်ဂျုံအွန်က ပြုလုပ်ခဲ့ခြင်းဖြစ်သည်။ ဤသို့ ယဉ်ကျေးမှုနှင့် အနုပညာဆိုင်ရာ ပြောင်းလဲမှုများမှာ တောင်ကိုရီးယားနိုင်ငံမှ နေ၍ ထိုးဖောက်ဝင်ရောက်လာသော ယဉ်ကျေးမှုနှင့် အနုပညာများကို ကာကွယ်ရန် လုပ်ဆောင်ခြင်းလော၊ သို့တည်းမဟုတ် ကင် ဂျုံအွန်က အနောက်နိုင်ငံ၏ စားသုံးသူယဉ်ကျေးမှုကို လက်ခံလိုက်သည့်သဘောပေလော ခွဲခြား၍မရပေ။

“အရေးအကြီးဆုံးအချက်တစ်ခုက တော့ ကျွန်တော်တို့ရဲ့ထုတ်ကုန်တွေဟာ ပြည်သူလူထုတွေရဲ့ အကြိုက်နဲ့ ကိုက်ညီဖို့ပဲ ဖြစ်ပါတယ်” ဟု ကင်ကျုံဟွီးက ပြောကြားလိုက်သည်။ သူမက Ryuwon ဖိနပ်စက်ရုံမှ တာဝန်ရှိသူတစ်ဦးဖြစ်သည်။ မကြာသေးမီက ဖိနပ်စက်ရုံမှ ထုတ်လုပ်သော ဖိနပ်များကို ပြသရာ၌ ဘောလီဘောနှင့် စားပွဲတင် တင်းနစ်ကစားရာတွင် စီးနင်းသော ဖိနပ်များနှင့် ဘောလုံးကန်ဖိနပ်များကို ပြသထားသည်။ ယင်းကဲ့သို့ ခေတ်မီအားကစားဖိနပ်များကို ချုပ်လုပ်နိုင်ရန်အတွက် လေးစားအပ်သော ခေါင်းဆောင် ကင်ဂျုံအွန်၏ ညွှန်ကြားချက်အရ လုပ်ဆောင်ခဲ့ခြင်းဖြစ်ကြောင်းနှင့် နိုင်ငံတကာ အားကစားသမားများ အသုံးပြုနေသည့် အားကစားဖိနပ်များကို နမူနာယူပြီး ပြည်တွင်း၌ ထုတ်လုပ်ခြင်းဖြစ်ကြောင်း သူမက ပြောကြားခဲ့သည်။

မြောက်ကိုရီးယားနိုင်ငံသည် ကမ္ဘာပေါ်တွင် အထီးကျန်နေသော နိုင်ငံတစ်နိုင်ငံဖြစ်သည်။ ယင်းကဲ့သို့သော နိုင်ငံတစ်နိုင်ငံ၌အစိုးရကိုလည်းကောင်း၊ အာဏာရှိသူကိုလည်းကောင်း ဝေဖန်မှုများ ပြုလုပ်ခဲ့ပါက ပြင်းပြင်းထန်ထန် ဖိနှိပ်ခြင်းခံခဲ့ရသည်။ ယင်းကဲ့သို့သော နိုင်ငံ၌ အပြောင်းအလဲတစ်ရပ် ပြုလုပ်ဖို့ဆိုသည်မှာ မလွယ်ကူ။ ခေါင်းဆောင်ကြီး ကင်၏ ခွင့်ပြုချက်မရရှိဘဲ အပြောင်းအလဲ လုပ်၍မရ။ ယခုကဲ့သို့ အားကစားဖိနပ်များကို ခေတ်မီပုံစံဖြင့် စမ်းသပ်တီထွင်မှုကို ပြုလုပ်ရာတွင် ကင်က ခွင့်ပြုချက်ပြု၍သာ လုပ်ဆောင်နိုင်ခြင်းဖြစ်သည်။

အပြောင်းအလဲတစ်ရပ်ကို သိိသိသာသာ မြင်တွေ့ရသည်မှာ ရုပ်သံ၌ဖြစ်သည်။ များသောအားဖြင့် ရုပ်မြင်သံကြားအစီအစဉ်များ၌ ၀ါဒဖြန့်ချိရေးနှင့်ပတ်သက်သော အစီအစဉ်များနှင့် ကင်နှင့်တကွသော နိုင်ငံ့ခေါင်းဆောင်ကြီးများအကြောင်းကို တခမ်းတနား ချီးကျူးထားသည့် အစီအစဉ်များသာ လေ့ရှိသည်။ မြောက်ကိုရီးယားနိုင်ငံ၌ အစိုးရပိုင် ရုပ်သံတစ်ခုတည်းသာရှိသည်။

ယခုအခါတွင် The Wild Ginseng Gatherers of the Imjin War အမည်ရှိ ၁၆ ရာစုနောက်ခံ သမိုင်းဇာတ်လမ်းနောက်ဆုံးတွဲကို မြောက်ကိုရီးယားရုပ်သံ၌ ပြသလျက် ရှိသည်။ ယင်းဇာတ်လမ်းမှာ ဂျပန်ကျူးကျော်ရေးစစ်ပွဲကို ကိုရီးယားပြည်သူများက ဆန့်ကျင်တိုက်ခိုက်ခဲ့ခြင်းကို ဖော်ကျူးထားခြင်း ဖြစ်သည်။ မြောက်ကိုရီးယားနိုင်ငံ၌ ဂျပန်ဆန့်ကျင်ရေးမျိုးချစ်စိတ်ဓာတ် ဖော်ပြသည့် ဇာတ်လမ်းမှာ မထူးဆန်းလှပေ။ သို့သော် ကင်ဂျုံအွန်က သူ့ဖခင်လက်ထက် ခေတ်ကာလကို ရည်ညွှန်းထားသည့် The Boy General အမည်ရှိ အင်နီမေးရှင်းဇာတ်လမ်းတွဲတစ်ခုကို ရိုက်ကူးစေခဲ့ခြင်းဖြစ်သည်။ ပြီးခဲ့သည့်နှစ် ဇူလိုင်က စတင်ပြသခဲ့သော ယင်း အင်နီမေးရှင်းဇာတ်လမ်းမှာ ကုန်ကျစရိတ်ကြီးမားခဲ့သည်။

ယင်းဇာတ်လမ်းတွဲ၌ အသုံးပြုသော ဆက်တင်များနှင့် အဝတ်အစားများမှာ ယခင်ရုပ်သံဇာတ်လမ်းတွဲများနှင့် သိသိသာသာ ကွဲပြားနေသည်။ ကွန်ပျူတာအထူးပြုလုပ်ချက်များ ပြုလုပ်ထားသဖြင့် စိတ်ဝင်စားမှု မြင့်တက်လာခဲ့သလို ကမ္ဘာပေါ်တွင် ထင်ရှားသော အထူးပြုလုပ်ချက် အင်နီမေးရှင်းများထဲတွင် တစ်ခုအပါအဝင် ဖြစ်လာခဲ့သည်။

ယင်းကဲ့သို့ ယဉ်ကျေးမှုနှင့် အနုပညာ ပြောင်းလဲမှုဖြစ်လာခြင်းမှာ ပြည်ပမှ ပေါ့ပ်ယဉ်ကျေးမှုများ၏ လှိုင်းဂယက်ကြောင့်ဖြစ်သည်။ မြောက်ကိုရီးယားအစိုးရက ပြည်သူများကို ပြည်ပထွက်ခွာခွင့် ပိတ်ပင်ထားသည်။ ထို့ပြင် နိုင်ငံခြားရုပ်ရှင်များ၊ တေးဂီတများနှင့် စာအုပ်များ ဖတ်ရှုခွင့်ကိုလည်း ပိတ်ပင်ထားသည်။

သို့သော် မြောက်ကိုရီးယားနိုင်ငံမှ အခွင့်ထူးခံ လူတန်းစားများအတွက်ကတော့ အနောက်နိုင်ငံမှ ခေတ်မီအသုံးအဆောင်ပစ္စည်းများကို ဝယ်ယူခွင့်ရှိနေသည်။ သူတို့အတွက် ပြုံယမ်းတွင် သီးသန့်ဆိုင်ဖွင့်လှစ် ပေးထားသည်။ ကျေးလက်နေ ပြည်သူများကတော့ စျေးထဲမှာ ရောင်းချနေသည့် တရုတ်လုပ်ပစ္စည်းတွေကိုသာ ဝယ်ယူနေကြရသည်။

တောင်ကိုရီးယား ရုပ်ရှင်ကြည့်ခြင်းနှင့် တေးဂီတများ နားထောင်ခြင်းကို တရားဝင် ခွင့်မပြုပေ။ သို့သော် နယ်စပ်များမှ တရားမဝင် ဝင်ရောက်လာသည့် တောင်ကိုရီးယားရုပ်ရှင်နှင့် တေးဂီတများကို ပြည်သူတွေ တိုးတိိုးတိတ်တိတ် ဝယ်ယူနေကြသည်။

ဘောလီဝုဒ်ရုပ်ရှင်များကိုမူ မြောက်ကိုရီးယားအစိုးရက တရားဝင်ပြသခွင့်ပြုထားသည်။ ကင်အီဆွန်ရင်ပြင်နှင့် မလှမ်းမဝေးရှိ ရုပ်ရှင်ရုံ၌ ဘောလီဝုဒ်ရုပ်ရှင်ဖြစ်သော Three Idiots ရုပ်ရှင်ကား ပြသနေသည်။ ထို့ပြင် အစိုးရရုပ်သံ၏ ပညာပေးကဏ္ဍ၌ ပညာရေးနှင့်ပတ်သက်သော ပြင်ပမှ သတင်း မှတ်တမ်းရုပ်ရှင်များကို ပြသပေးနေသည်။ ထို့ပြင် မြောက်ကိုရီးယားနိုင်ငံရှိ အကြီးမားဆုံးသော People’s Grand Study House စာကြည့်တိုက်တွင် ဟယ်ရီပေါ်တာ ဝတ္ထုများ ထားရှိပေးသည်။

ကင်ဂျုံအွန်လက်ထက်တွင် ပေါ့ပ်ယဉ်ကျေးမှုနှင့်ပတ်သက်၍ စတင်တွေ့မြင်ရသည်မှာ ၂၀၁၁ ခုနှစ်ကဖြစ်ပြီး မြောက်ကိုရီးယားနိုင်ငံရှိ အမျိုးသမီးတေးသံရှင်များနှင့် တေးဂီတပညာရှင်များ ပါဝင်သော Moranbong တေးဂီတအဖွဲ့ကို စတင်ဖွဲ့စည်းခဲ့ခြင်းဖြစ်သည်။ ယင်းအဖွဲ့၌ ပါဝင်သူများမှာ ကိုရီးယား ပြည်သူ့တပ်မတော်မှ အမျိုးသမီးစစ်သည်တော်များဖြစ်ကြသည်။ ထူးခြားသည်က အမျိုးသမီးများသည် စကတ်များ ဝတ်ဆင်ထားကြပြီး ဆံပင်တွေမှာလည်း ခပ်တိုတို ညှပ်ထားကြခြင်းဖြစ်သည်။ သူတို့တစ်တွေသည် နိုင်ငံအတွင်း လှည့်လည်ဖျော်ဖြေမှုတွေ ပြုလုပ်ခဲ့ကြသည်။ သူတို့ သီဆိုတီးခတ်မှုများကို ရုပ်သံမှ လွှင့်ခဲ့သည်။ ဒီဗီဒီအချပ်များဖြင့်လည်း ဖြန့်ဝေခဲ့သည်။

ပြီးခဲ့သည့်နှစ် ဖေဖော်ဝါရီလက မြောက်ကိုရီးယား အမျိုးသမီးတေးဂီတအဖွဲ့သည် တောင်ကိုရီးယားနိုင်ငံ ပြုံချန်ဆောင်းရာသီ အိုလံပစ်ပွဲတော်သို့ သွားရောက်ပြီး ကပြခဲ့သည်။ နှစ်လခန့်အကြာတွင် တောင်ကိုရီးယားမှ K Pop အဖွဲ့ ပြုံယမ်းသို့ လာရောက်ဖျော်ဖြေခဲ့စဉ်က ကင်သည် ပွဲကြည့်ပရိသတ်တစ်ဦးအဖြစ် ပါဝင်ခဲ့သည်။

သို့သော် မြောက်ကိုရီးယားနိုင်ငံ၌ စစ်တေးဂီတအဖွဲ့သည် အင်အားကောင်းနေဆဲဖြစ်ပြီး အစဉ်အလာ Choson-ot တေးဂီတများကို သင်ကြားပေးလျက်ရှိသည်။ ထို့ပြင် ယဉ်ကျေးမှုအနုပညာကို နိုင်ငံရေးနှင့် မသက်ဆိုင်ဘဲ သီးသန့်ထားရှိဖို့ဆိုသည်ကို ခွင့်မပြုသေးပေ။ ပေကျင်းသို့ သွားရောက်ကပြခဲ့သော စစ်သမီးများ ပါဝင်သည့် တေးဂီတအဖွဲ့ နိုင်ငံကို ပြန်လည်ရောက်ရှိသည့်အခါ၌ ပါတီ၏ အယူဝါဒကို ဖော်ဆောင်ပေးနိုင်သည့် ယဉ်ကျေးမှုများကို ဆက်လက်ဖော်ထုတ်ဖို့လို ကြောင်း၊ ပါတီအာဘော်ကို သတ္တိရှိရှိ ထုတ်ဖော်ရမည်ဖြစ်ကြောင်း ကင်ဂျုံအွန်ကမှာ ကြားခဲ့သည်ဟု အစိုးရပိုင်မီဒီယာက ဖော်ပြခဲ့သည်။