ပထမဆုံးရုပ်ရှင်ဇာတ်ကား ‘ရန်သူ’ ဖြင့်ပင် ပရိသတ်များကြား၌ ပိုမိုထင်ရှားလာခဲ့ပြီး စိတ်ဝင်စားဖွယ် သတင်းစကားများစွာဖြင့် ပရိသတ်စိတ်ဝင်စားစေခဲ့သူ သရုပ်ဆောင် Beauty Blogger နေခြည်ဦးအား ၂၀၁၈ ခုနှစ် အတွင်း ထင်ရှားသည့် လူငယ်အနုပညာရှင်တစ်ဦးအဖြစ် ရွေးချယ်ဖော်ပြအပ်ပါသည်။ သရုပ်ဆောင် Beauty Blogger နေခြည်ဦးသည် အလှအပနှင့် ဖက်ရှင်အမြင်များအား ညွှန်းဆိုပေးလေ့ရှိသူ Beauty Blogger တစ်ဦးအဖြစ် ပရိသတ် စတင်သိရှိလာသူဖြစ်ကာ သရုပ်ဆောင် အောင်ရဲလင်း၏ ချစ်သူအဖြစ် ပိုမိုသတိထားမိစေခဲ့သူ တစ်ဦးဖြစ်သည်။ ၂၀၁၈ ခုနှစ်အတွင်းတွင် အနုပညာလုပ်ငန်းများ ဆက်တိုက်ပါဝင်ခဲ့သည့်အပြင် စိတ်ဝင်စားဖွယ် သတင်းစကားများစွာဖြင့် ပရိသတ်စိတ်ဝင်စား စောင့်ကြည့်အားပေးခံခဲ့ရကာ ပထမဆုံးရုပ်ရှင်ဇာတ်ကား ‘ရန်သူ’ ရုံတင်ပြသရာတွင်လည်း အမူအရာပီပြင် သူတစ်ဦးအဖြစ် အသိအမှတ်ပြုခံခဲ့ရသည်။
သရုပ်ဆောင် Beauty Blogger နေခြည်ဦးသည် ၂၀၁၈ ခုနှစ်အတွင်းတွင် ပထမဆုံးရုပ်ရှင်ဇာတ်ကား ‘ရန်သူ’ အပါအဝင် ရုပ်ရှင်ဇာတ်ကား အချို့အား လက်ခံရိုက်ကူးခဲ့ပြီး ကုန်ပစ္စည်းမိတ်ဆက်ပွဲများ၊ ဖက်ရှင်ရှိုးပွဲများစွာသို့ တက်ရောက်ခဲ့သည်။ ယခုနှစ်အတွင်းတွင်ပင် မျက်နှာအစိတ်အပိုင်းအချို့အား ကိုရီးယားနိုင်ငံသို့ သွားရောက်ကာ ခွဲစိတ်ပြုပြင်ခဲ့ပြီး ယင်းပြုပြင်မှုအားလည်း ပရိသတ်များထံ ပွင့်လင်းစွာတင်ပြခဲ့သည်။ ထို့ပြင် နေခြည်ဦး၏ လက်ရှိနေထိုင်လျက်ရှိသောအိမ်မှ ၎င်းနေထိုင်ရာအခန်းကို ပြင်ဆင်ထားမှုများ အပါအဝင် ပိုင်ဆိုင်မှုများကို ရိုက်ကူးပြသခဲ့သည့်အတွက်လည်း စိတ်ဝင်စားမှု များပြားခဲ့သည့်အပြင် ဝေဖန်မှုအချို့လည်း ထွက်ပေါ်ခဲ့သည်။
နေခြည်ဦးသည် ၂၀၁၈ ခုနှစ်အတွင်း ချစ်သူဖြစ်သူ သရုပ်ဆောင်အောင်ရဲလင်းနှင့် ပြတ်စဲခဲ့ပြီးနောက် ချစ်သူသစ်ရရှိခဲ့ရာ ယင်းချစ်သူသစ်နှင့်ပတ်သက်၍လည်း ဝေဖန်တိုက်ခိုက်မှုအချို့ ကြုံတွေ့ခဲ့ရသည်။ လက်ရှိတွင်မူ ချစ်သူသစ်နှင့်လည်း နှစ်ဦးသဘောတူ လမ်းခွဲထားပြီးဖြစ်ကြောင်း မီဒီယာအချို့တွင် ဖြေကြားထားခဲ့သည်။ လက်ရှိတွင် ယခင်ချစ်သူဟောင်းအောင်ရဲလင်းနှင့် ရုပ်ရှင်ဇာတ်ကား တစ်ကားတွဲဖက်ရိုက်ကူးရန် လက်ခံထားကြောင်း ပရိသတ်များထံ အသိပေးထားသည်။
နေခြည်ဦးသည် ပထမဆုံးဇာတ်ကားအဖြစ် ‘ရန်သူ’ ရုပ်ရှင်ဇာတ်ကားတွင် သရုပ်ဆောင်နေမင်း၊ အကယ်ဒမီ ဝတ်မှုန်ရွှေရည်တို့နှင့် တွဲဖက်ပါဝင်ထားပြီး မိမိအားချဉ်းကပ်လာသည့် ယောကျ်ားစိတ်ဝင်နေသူ မိန်းကလေးတစ်ဦး၊ မိမိက စိတ်ဝင်စားတွယ်တာရသည့် အမျိုးသားတစ်ဦးတို့ကြားတွင် တစ်ဦးနှင့် တစ်ဦး မာနယှဉ်ပြိုင်ရသည့် ဇာတ်ရုပ်ဖြင့် ပါဝင်ထားခြင်းဖြစ်သည်။ ‘ရန်သူ’ ဇာတ်ကားပထမဆုံးပြသသည့်နေ့တွင် ပွဲစဉ်တစ်ပွဲအတွက် သမ္မတရုပ်ရှင်ရုံ တစ်ရုံလုံးအား လက်မှတ်ဝယ်ယူကာ ချစ်ခင်သူများ၊ ပရိသတ်များအား ပြသခဲ့သည့်အတွက် ပိုမိုစိတ်ဝင်စားစရာဖြစ်စေခဲ့သည်။
