ကမ္ဘောဇဘဏ်လီမိတက်၏ ဘဏ်ခွဲတစ်ခုတွင် ငွေရေးကြေးရေးလုပ်ငန်းများ ဆောင်ရွက်နေသည်ကို တွေ့ရစဉ် (ဓာတ်ပုံ-စည်သူအောင်)

ကမ္ဘောဇဘဏ်လီမိတက်၏ အတိုးနှုန်းလျှော့ချခြင်းနှင့် စပ်လျဉ်း၍ ကနဦးထုတ်ပြန်ချက်သည် ဗဟိုဘဏ်၏ ငွေကြေးမူဝါဒများမှ သွေဖည်သွားနိုင်ကာ ဘဏ်လုပ်ငန်းကဏ္ဍနှင့် နိုင်ငံ့စီးပွားရေးကို ထိခိုက်စေနိုင်သောကြောင့် ညွှန်ကြားချက်များ တိကျစွာလိုက်နာရန် မြန်မာနိုင်ငံတော်ဗဟိုဘဏ်က အသိပေးထားကြောင်း သိရသည်။

အဆိုပါ အသိပေးချက်ကို ၂၀၁၈ ခုနှစ် မေ ၂ ရက်တွင် ကမ္ဘောဇဘဏ်လီမိတက် ဥက္ကဋ္ဌထံ စာအမှတ်၊ မဗဘ/ဘဏ်စိစစ်/ ထွေ (၂၂၆/၂၀၁၈) ဗဟိုဘဏ်ဒုတိယဥက္ကဋ္ဌကိုယ်စား ညွှန်ကြားရေးမှူးချုပ် ဒေါ်တင်မိုးမိုးက ပေးပို့ခဲ့ခြင်းဖြစ်သည်။

မြန်မာနိုင်ငံတော် ဗဟိုဘဏ်သည် မြန်မာနိုင်ငံတော် ဗဟိုဘဏ်ဥပဒေပါ အဓိကရည်မှန်းချက်နှင့် ရည်ရွယ်ချက်များကို အောင်မြင်စေရန်အတွက် ငွေကြေးမူဝါဒနှင့် နိုင်ငံခြားငွေလဲလှယ်နှုန်းမူဝါဒများကို ချမှတ်အကောင်အထည်ဖော် ဆောင်ရွက်ရာတွင် စီးပွားရေး အဆောက်အအုံတစ်ခုလုံးအပေါ် အဆိုပါမူဝါဒများ၏ သက်ရောက်နိုင်မှုကို ထည့်သွင်းစဉ်းစား၍ ဘဏ်လုပ်ငန်းကဏ္ဍ ဖွံ့ဖြိုးတိုးတက်ရေးအတွက် မြန်မာနိုင်ငံ၏ လက်ရှိအနေအထားနှင့် သင့်လျော်နိုင်သည့် ငွေကြေးမူဝါဒနှင့် နိုင်ငံခြားငွေလဲလှယ်နှုန်း မူဝါဒများကို အစိုးရအဖွဲ့၏ ခွင့်ပြုချက်ဖြင့် ချမှတ်အကောင်အထည်ဖော် ဆောင်ရွက်လျက်ရှိသည်ဟု ဗဟိုဘဏ်က ဆိုသည်။

ထိုသို့ဆောင်ရွက်ရာတွင် မြန်မာနိုင်ငံတော် ဗဟိုဘဏ်သည် မြန်မာနိုင်ငံတော် ဗဟိုဘဏ်ဥပဒေပါ လုပ်ပိုင်ခွင့်များအား ကျင့်သုံး၍ ညွှန်ကြားချက်များ ထုတ်ပြန်ထားပြီး ညွှန်ကြားချက်အမှတ် (၁၀/၂၀၁၁) နှင့် ညွှန်ကြားချက်အမှတ် (၁၁/၂၀၁၁) အရ ဗဟိုဘဏ်၏ အတိုးနှုန်းအား တစ်နှစ်လျှင် ၁၀ ရာခိုင်နှုန်း သတ်မှတ်ထားသည်။

ထို့အတူ ဘဏ်အတိုးနှုန်းများကို ငွေစုဘဏ်အပ်ငွေ၊ ငွေစုလက်မှတ်နှင့် အချိန်စေ့မှပေးရမည့် အပ်ငွေတို့အပေါ်တွင် ပေးရမည့် အနည်းဆုံးအတိုးနှုန်းကို ဗဟိုဘဏ်အတိုးနှုန်းအောက် နှစ်ရာခိုင်နှုန်း (၁၀%-၂%=၈%) ထက်မနည်းစေရန်၊ ချေးငွေများ၊ စာရင်းပို ထုတ်ချေးငွေများအပေါ်တွင် တောင်းခံနိုင်သည့် အမြင့်ဆုံးအတိုးနှုန်းကို ဗဟိုဘဏ်အတိုးနှုန်းထက် သုံးရာခိုင်နှုန်း (၁၀%+ ၃%=၁၃%) ထက် မကျော်လွန်စေရန် သတ်မှတ်ထားခြင်းဖြစ်သည်။

အဆိုပါညွှန်ကြားချက်အရ ဘဏ်များအနေဖြင့် သတ်မှတ်ဘောင်အတွင်း အတိုးနှုန်းကို ပြင်ဆင်ပြောင်းလဲမှု ပြုလုပ်နိုင်သော်လည်း ဗဟိုဘဏ်၏ ခွင့်ပြုချက်ရယူရန်နှင့် ခွင့်ပြုချက်ရရှိမှသာ ပြင်ဆင်ပြောင်းလဲရန် ညွှန်ကြားထားသည်။

ကမ္ဘောဇဘဏ်လီမိတက်၏ အတိုးနှုန်းလျှော့ချခြင်းနှင့် နောက်ဆုံးထုတ်ပြန်ချက်သည် မြန်မာနိုင်ငံတော်ဗဟိုဘဏ်မှ ထုတ်ပြန်ထားသည့် ညွှန်ကြားချက်များနှင့်အညီ ဖြစ်သော်လည်း ကနဦးထုတ်ပြန်ချက်သည် မြန်မာနိုင်ငံတော်ဗဟိုဘဏ်မှ ချမှတ်ထားသော ငွေကြေးမူဝါဒများမှ သွေဖည်သွားနိုင်ကာ ဘဏ်လုပ်ငန်းကဏ္ဍကို ထိခိုက်နိုင်ပြီး ထိုမှတစ်ဆင့် နိုင်ငံ၏စီးပွားရေးကိုပါ ထိခိုက်စေနိုင်သောကြောင့် ကမ္ဘောဇဘဏ်လီမိတက်အနေဖြင့် အပ်ငွေနှင့် ချေးငွေအပေါ် ထားရှိရမည့် အတိုးနှုန်းများကို သတ်မှတ်ရာတွင် မြန်မာနိုင်ငံတော်ဗဟိုဘဏ်မှ ထုတ်ပြန်ထားသည့် ညွှန်ကြားချက်များနှင့်အညီ တိကျစွာ လိုက်နာဆောင်ရွက်ရန် ဗဟိုဘဏ်က အကြောင်းကြားထားကြောင်း သိရသည်။

ပြည်တွင်း ပုဂ္ဂလိကဘဏ်တစ်ခုဖြစ်သော ကမ္ဘောဇဘဏ်က စုငွေစာရင်း (Saving Account) အတိုးနှုန်းများအား ၀ ဒသမ ၂၅ ရာခိုင်နှုန်း၊ စာရင်းသေအပ်ငွေ (Fixed Deposit Account) အတိုးနှုန်းကို ၁ ရာခိုင်နှုန်းမှ ၃ ဒသမ ၂၅ ရာခိုင်နှုန်းအထိ တစ်ဦးချင်းနှင့် အဖွဲ့အစည်း ငွေစာရင်းများအလိုက် လျှော့ချခဲ့ကြောင်း ဧပြီ ၂၇ ရက်တွင် ထုတ်ပြန်ကြေညာခဲ့ခြင်းဖြစ်သည်။