မကြာမီအချိန်အတွင်း ထောင်နှင့်ချီသည့် မြောက်ကိုရီးယားစစ်သားများသည် ယူကရိန်းစစ်ပွဲအတွင်း ဝင်ရောက်လာလိမ့်မည်ဟု အမေရိကန်ကာကွယ်ရေးဝန်ကြီး လွိုက်အော်စတင်က နိုဝင်ဘာ ၂၂ ရက်တွင် ပြောကြားခဲ့သည်။
မြောက်ကိုရီးယားစစ်သား ၁၀၀၀၀ ခန့်သည် ရုရှား၏နယ်စပ် ကာ့စ်ဒေသတွင် တပ်စွဲထားသည်ဟုယူဆရပြီး ထိုစစ်သားများသည် ရုရှားတပ်ရင်း၊ တပ်ဖွဲ့များနှင့် ပေါင်းစပ်နေကြောင်း အော်စတင်က ပြောသည်။
"သူတို့ရဲ့ စစ်သင်တန်းလေ့ကျင့်မှုတွေအပေါ် အခြေခံပြီး သူတို့ဟာ ရုရှားတပ်ရင်း၊ တပ်ဖွဲ့တွေထဲကို ပူးပေါင်းဝင်ရောက်ခဲ့ပါတယ်။ မကြာခင်အချိန်အတွင်းမှာ သူတို့ဟာ တိုက်ပွဲထဲမှာဝင်ပါလာတော့မယ်လို့ ကျွန်တော်အခိုင်အမာ ယူဆထားပါတယ်"ဟု အော်စတင်က ပစိဖိတ်ကျွန်းနိုင်ငံဖြစ်သည့် ဖီဂျီသို့ရောက်ရှိချိန်တွင် သတင်းထောက်များကို ပြောကြားခဲ့သည်။
လက်ရှိအချိန်အထိ မြောက်ကိုရီးယားစစ်သားများ ယူကရိန်းနှင့်ဖြစ်ပွားသည့်တိုက်ပွဲများတွင် ပါဝင်နေသည့် သိသာထင်ရှားသည့် သတင်းများ မတွေ့ရသေးကြောင်း အော်စတင်က ပြောသည်။
မြောက်ကိုရီးယား၏ စစ်ကူအတွက် ရုရှားက အပြန်အလှန်အနေဖြင့် မြောက်ကိုရီးယားကို ရေနံ၊ လေယာဉ်ပစ်ဒုံးကျည်းများနှင့် စီးပွားရေးအကူအညီများ ထောက်ပံ့ပေးခဲ့ကြောင်း တောင်ကိုရီးယားနှင့် အမေရိကန်က ပြောကြားခဲ့သည်။
လက်ရှိတွင် ယူကရိန်းတပ်ဖွဲ့များ စီးနင်းသိမ်းပိုက်ထားသည့် ရုရှားနယ်စပ် ကာ့စ်ဒေသ၏ အချို့နေရာအစိတ်အပိုင်းများကို ပြန်လည်သိမ်းယူရန် မြောက်ကိုရီးယားစစ်သားများနှင့်အတူ ရုရှားစစ်သားအင်အား ၅၀၀၀၀ ခန့် တပ်စုထားကြောင်း ယူကရိန်းက ပြောကြားခဲ့သည်။
Ref : AFP
