ပြင်သစ်လက်ရွေးစင်တိုက်စစ်ကစားသမားဟောင်း အွန်နရီက ရီးယဲလ်နည်းပြဟောင်း ဇီဒန်းသည် မန်ယူအသင်းကို ကိုင်တွယ်မည်မဟုတ်ဘဲ ၎င်းအနေဖြင့် ပြင်သစ်လက်ရွေးစင်နည်းပြရာထူးကိုသာ စောင့်မျှော်နေသည်ဟု ထင်မြင်ကြောင်း ပြောကြားခဲ့သည်။

မန်ယူအသင်းသည် ပြီးခဲ့သည့် တနင်္လာနေ့တွင် နယ်သာလန်နည်းပြ အဲရစ်တန်ဟက်ဂ်ကို     ရာထူးမှ ရုတ်တရက်ထုတ်ပယ်ကာ လက်ထောက်နည်းပြ နစ္စတယ်ရွိုင်းကို ယာယီနည်းပြအဖြစ် တာဝန်ပေးခဲ့သည်။

နစ္စတယ်ရွိုင်းသည် မန်ယူအသင်း၏  အမြဲတမ်းနည်းပြအဖြစ် တာဝန်ပေးခံရနိုင်သည့်စာရင်းထဲတွင် ပါဝင်နေသော်လည်း ထိပ်တန်းနည်းပြတစ်ဦးဦးကိုသာ ခန့်အပ်ဖွယ်ရှိကြောင်းလည်း သတင်းထွက်နေသည်။

လက်ရှိအချိန်၌ မန်ယူအသင်း၏ နည်းပြရာထူးအတွက် နည်းပြများစွာ လျာထားခံနေရရာ ရီးယဲလ်နည်းပြဟောင်း ဇီဒန်းလည်း ပါဝင်နေခြင်းဖြစ်သည်။

ဇီဒန်းသည် ရီးယဲလ်အသင်းတွင် အောင်မြင်မှုများစွာ ရယူနိုင်ခဲ့သောကြောင့် အသင်းလက်မဲ့ဖြစ်နေစဉ်ကာလအတွင်း ၎င်းကို နည်းပြသစ်အဖြစ် ခန့်အပ်ရန် လိုလားနေသည့် ကလပ်အသင်းများစွာလည်း ရှိနေသည်။

ယင်းအသင်းများထဲတွင် မန်ယူအသင်းလည်း ပါဝင်ခဲ့ပြီး အွန်နရီကမူ ''ကျွန်တော်ကတော့ သူ လက်ရွေးစင်အသင်းကို စောင့်နေတယ်လို့ပဲ ထင်ပါတယ်။ ဂျူဗင်တပ်စ်အသင်းကို သွားမယ်လို့လည်း မထင်ပါဘူး။ ရီးယဲလ်နဲ့ ချန်ပီယံလိဂ်ဖလား (၃)လုံးရယူခဲ့ပြီးတဲ့နောက် တခြားကလပ်ကို ကိုင်တွယ်မှာမဟုတ်တော့ပါဘူး''ဟု ဆိုခဲ့သည်။