အင်တာမီလန်အသင်း၏ အာဂျင်တီးနားကြယ်ပွင့်တိုက်စစ်မှူး လော်တာရိုမာတီနက်ဇ် (၂၆ နှစ်)သည် အသင်းနှင့် အမြန်ဆုံးသက်တမ်းတိုးနိုင်ရန် ဆန္ဒရှိနေပြီး လာမည့်တစ်ပတ်အတွင်း ဆွေးနွေးသွားဖွယ်ရှိနေကြောင်း အီတလီအားကစားသတင်းစာ Football Italia ကဖော်ပြခဲ့သည်။
အင်တာမီလန်အသင်း၏ အသင်းခေါင်းဆောင်ဖြစ်သူ လော်တာရိုမာတီနက်ဇ်သည် အသင်း၏ ၂၀၂၃-၂၄ ဘောလုံးရာသီ စီးရီးအေချန်ပီယံဆုအောင်ပွဲအတွက် သွင်းဂိုးများဖြင့် ကူညီပေးနိုင်ခဲ့သလို၊ ကစားသမားဘဝ ပထမဆုံးအကြိမ် စီးရီးအေရွှေဖိနပ်ဆုရယူနိုင်ရန်လည်း အခွင့်အရေးကောင်းလျက်ရှိနေသည်။
လော်တာရိုမာတီနက်ဇ်အား ခေါ်ယူရန်အတွက် ဥရောပထိပ်တန်းအသင်းကြီးများစွာက ပစ်မှတ်ထားနေသော်လည်း ကစားသမားကိုယ်တိုင်ကမူ အင်တာမီလန်အသင်းတွင် ပျော်ရွှင်နေပြီး ချန်ပီယံလိဂ်ဆုဖလားအတွက် တိုက်ပွဲဝင်သွားရန် ပစ်မှတ်ထားနေကြောင်း အီတလီမီဒီယာများက ဖော်ပြခဲ့ကြသည်။
လော်တာရိုမာတီနက်ဇ်သည် အင်တာမီလန်အသင်းအတွက် (၆)ရာသီအတွင်း ပြိုင်ပွဲစုံ (၂၈၁)ပွဲကစားခဲ့ရာတွင် (၁၂၉)ဂိုးအထိ သွင်းယူပေးနိုင်ခဲ့သည်။
