၂၀၁၆ ခုနှစ် ဖီဖာကမ္ဘာ့ အကောင်းဆုံး ဘောလုံးသမားဆုနှင့် နည်းပြဆုများအတွက် ဆန်ခါတင် (၃) ဦး စာရင်းကို ကမ္ဘာ့ဘောလုံးအဖွဲ့ချုပ်(ဖီဖာ)မှ ပြီးခဲ့သည့် သောကြာနေ့က ထုတ်ပြန် ကြေညာခဲ့ကြောင်း သိရသည်။ဖီဖာ တစ်နှစ်တာ အကောင်းဆုံး ဘောလုံးသမားဆုအတွက် ဆန်ခါတင် (၃) ဦး စာရင်းတွင် ဆုရရှိရန် ရေပန်းစားနေသည့် စီရော်နယ်လ်ဒို၊ မက်ဆီတို့နှင့်အတူ အက်သလက်တီကိုအသင်းမှ ပြင်သစ်လက်ရွေးစင် တိုက်စစ်မှူး ဂရစ်ဇ်မန်းတို့ ပါဝင်ခဲ့သည်။ထို့ပြင် ဖီဖာကမ္ဘာ့အကောင်းဆုံး နည်းပြဆုအတွက် ဆန်ခါတင်(၃)ဦး စာရင်းတွင်မူ ရာနီရေးရီ(လက်စတာ)၊ ဖာနန်ဒိုဆန်းတို့စ် (ပေါ်တူဂီ) နှင့် ဇီဒန်း(ရီးယဲလ်) တို့ ပါဝင်ခဲ့ကြောင်းသိရသည်။ဖီဖာသည် အမျိုးသမီး အကောင်းဆုံး ဘောလုံးသမားဆုနှင့် နည်းပြဆုများအတွက် ဆန်ခါတင်(၃)ဦးစာရင်းကို တစ်ပါတည်း ထုတ်ပြန် ကြေညာခဲ့ကြောင်း သိရသည်။ အမျိုးသမီး အကောင်းဆုံး ဘောလုံးသမားဆု ဆန်ခါတင်စာရင်းတွင် ကာလီလွိုက်(အမေရိကန်)၊ မာတာ(ဘရာဇီးလ်)၊ ဘာရင်ဂါ(ဂျာမနီ)တို့ ပါဝင်ခဲ့ပြီး နည်းပြစာရင်း၌မူ ဂျီးလ်အဲလစ် (အမေရိကန်)၊ ဆယ်လ်ဗီယာနိဒ်(ဂျာမနီ)၊ ပီယာဆန်းဟေ့ချ်(ဆွီဒင်)တို့ ပါဝင်ခဲ့ကြသည်။ဖီဖာ တစ်နှစ်တာ အကောင်းဆုံးဆုများအတွက် ဆုပေးပွဲအခမ်းအနားကို လာမည့်နှစ်၊ ဇန်နဝါရီလ ၉ ရက်တွင် ဇူးရစ်ချ်မြို့၌ ကျင်းပပြုလုပ်သွားမည်ဖြစ်ကြောင်း သိရသည်။