ဘောလုံးကမ္ဘာရဲ့ တိုက်ကြီးများအလိုက်အား ပြိုင်မှုတွေထဲမှာ ဗဟိုချက်အကျဆုံးနဲ့ ရင်ခုန်စရာအကောင်းဆုံးအားပြိုင်မှုလို့ဆိုရမှာက ဥရောပဘောလုံးလောကနဲ့ တောင်အမေရိကဘောလုံးလောကရဲ့ပြိုင်ဆိုင်မှုပါပဲ။ ဘောလုံးဖွံ့ဖြိုးတိုးတက်မှု၊ အရည်အသွေးပြည့်ဝမှု၊ အောင်မြင်မှုနဲ့ အစဉ်အလာကြီးမားမှုတွေမှာ ဥရောပနဲ့ တောင်အမေရိကဟာ တခြားတိုက်ကြီးတွေထက် ခေါင်းတစ်လုံးမက အသာရနေပြီး ဒီတိုက်ကြီးနှစ်ခုရဲ့ ရှုထောင့်ပေါင်း စုံအားပြိုင်မှုတွေကပဲ ဘောလုံးသမိုင်းရဲ့အရေးပါဆုံးအခိုက်အတန့်တွေဖြစ်ခဲ့တာပါ။ အမြင်သာဆုံး ဥပမာပေးရရင် ပြီးခဲ့တဲ့ကမ္ဘာ့ဖလား(၂၂)ကြိမ်မှာ ဥရောပတိုက်ကိုယ်စားပြုအသင်းတွေက ချန်ပီယံဆုကို (၁၂)ကြိမ်ရယူထားသလို၊ တောင်အမေရိ ကိုယ်စားပြုအသင်းတွေက (၁၀)ကြိမ်အထိရယူထားပါတယ်။ ဒါ့ပြင် အဆိုပါတိုက်ကြီး (၂)တိုက်က သက်ဆိုင်ရာကလပ်အသင်းတွေရဲ့ ကျော်ကြားမှု နဲ့ ကြွယ်ဝချမ်းသာမှုမှာတော့ ဥရောပကလပ်အသင်းတွေက ပြတ်ပြတ်သားသားအသာရထားပေမယ့် တောင်အမေရိက ကစားသမားတွေကပဲ ဥရောပဘောလုံးသမိုင်းရဲ့ အဓိကထောက်တိုင်တွေထဲကတစ်ခုအဖြစ် လက်ရှိအချိန်ထိကို အသုံးတော်ခံခဲ့တာပါ။