ပြီးခဲ့သည့် စနေနေ့က ယှဉ်ပြိုင်ကစားခဲ့သော ပရီးမီးယားလိဂ်ပွဲစဉ်၌ ဘုန်းမောက်ကွင်းလယ်လူ ဘီလင်းသွင်းယူခဲ့သည့် သွင်းဂိုးသည် ပရီးမီးယားလိဂ်၏ ဒုတိယအမြန်ဆုံးဂိုးအဖြစ် မှတ်တမ်းဝင်ခဲ့ကြောင်း သိရသည်။
ဒိန်းမတ်ကွင်းလယ်ကစားသမားဘီလင်းသည် ပွဲအစ(၉.၁၁)စက္ကန့် အကြာမှာပင် အသင်းအတွက် ဦးဆောင်ဂိုးကို စတင်သွင်းယူနိုင်ခဲ့ခြင်းဖြစ်ပြီး ရှိန်းလောင်း၏ဂိုးပြီးနောက် ဒုတိယအမြန်ဆုံးဂိုးအဖြစ် မှတ်တမ်းဝင်ခဲ့ခြင်းဖြစ်သည်။
ပရီးမီးယားလိဂ်ပြိုင်ပွဲ၏ အမြန်ဆုံးသွင်းဂိုးမှာ ၂၀၁၈-၁၉ ရာသီ၌ ဝုလ်ဗ်နှင့်ပွဲတွင် ဆောက်သမ်တန်တိုက်စစ်မှူး ရှိန်းလောင်း သွင်းယူခဲ့သည့်ဂိုးဖြစ်ပြီး ပွဲအစ(၇.၆၉)စက္ကန့် ၌ သွင်းယူခဲ့ခြင်းဖြစ်သည်။
ပရီးမီးယားလိဂ်ပြိုင်ပွဲ၏ အမြန်ဆုံးသွင်းဂိုး(၃)ဂိုးမှာ ပွဲအစ(၁၀)စက္ကန့်မပြည့်မီ သွင်းယူခဲ့ကြခြင်းဖြစ်ပြီး တတိယနေရာ၌ ရပ်တည်ခဲ့သည့် စပါးနောက်ခံလူ လက်ဒလေကင်း၏ဂိုးမှာလည်း(၉.၈၂)စက္ကန့်တွင် သွင်းယူခဲ့ခြင်းဖြစ်သည်။
ထူးခြားသည်မှာ ပရီးမီးယားလိဂ်၏ အမြန်ဆုံး သွင်းဂိုး(၁၀)ဂိုးထဲ၌ (၂)ဂိုးကိုသာ အိမ်ရှင်အသင်းမှ ကစားသမားများက သွင်းယူခဲ့ခြင်းဖြစ်ပြီး ကျန်(၈)ဂိုးကို အဝေးကွင်းအသင်းမှ ကစားသမားများက သွင်းယူခဲ့ခြင်းဖြစ်သည်။
ထို့ပြင် အမြန်ဆုံးဂိုးသွင်းယူသူ (၁၀)ဦးစာရင်း၌ စပါးနှင့် ဆောက်သမ်တန်အသင်းတို့မှ ကစားသမားနှစ်ဦးစီပါဝင်ပြီး အများဆုံးဖြစ်ခဲ့ကြောင်း သိရသည်။
