ဝက်စ်ဟမ်းအသင်း၏ ဘုတ်အဖွဲ့သည် ယခုတစ်ပတ်ပရီးမီးယားလိဂ်ပွဲစဉ်တွင် စပါးအသင်းကို ရှုံးနိမ့်ခဲ့ပြီးနောက် အသင်းမှာတန်းဆင်းဇုန်အတွင်း ကျရောက်သွားခဲ့သော်လည်း နည်းပြ ဒေးဗစ်မွိုက်စ်ကို အပြည့်အဝထောက်ခံနေဆဲဖြစ်ကြောင်း BBC က ဖော်ပြခဲ့သည်။
ဒေးဗစ်မွိုက်စ်သည် ဝက်စ်ဟမ်းအသင်းကို ၂၀၁၉ ခုနှစ်မှစ၍ ဒုတိယအကြိမ် ပြန်လည်ကိုင်တွယ်ခဲ့ခြင်းဖြစ်ပြီး ၂၀၂၀-၂၁ ရာသီတွင် အဆင့်(၆)၊ ၂၀၂၁-၂၂ ရာသီတွင် အဆင့်(၇)နေရာများ ရရှိခဲ့သော်လည်း ယခုရာသီတွင်မူ ရုန်းကန်ခဲ့ရသည်။ ပရီးမီးယားလိဂ် (၂၃)ပွဲကစားအပြီးတွင် နိုင်ပွဲ(၅)ပွဲသာ ရရှိခဲ့သလို၊ ကမ္ဘာ့ဖလားအလွန်ကာလမှစ၍ တန်းဆင်းဇုန်ဝန်းကျင်တွင်သာ ကျင်လည်နေခဲ့ရသည်။
ထို့ကြောင့် ရာထူးမှ ထုတ်ပယ်ခံရတော့မည့် နည်းပြတစ်ဦးအဖြစ် ထင်ကြေးပေးခံခဲ့ရသော်လည်း ဝက်စ်ဟမ်းအသင်းဘုတ်အဖွဲ့က ဆက်လက်အခွင့်အရေးပေးထားခြင်းဖြစ်သည်။ သို့သော် ၎င်းအနေဖြင့် လာမည့်ပရီးမီးယားလိဂ်ပွဲစဉ်တွင် နော်တင်ဟမ်ဖောရက်စ်အသင်းကို အိမ်ကွင်း၌ အနိုင်မကစားနိုင်ခဲ့ပါက ရာထူးမှထုတ်ပယ်ခံရမည်ဖြစ်ကြောင်း ဗြိတိန်မီဒီယာများက သုံးသပ်ထားသည်။
ဝက်စ်ဟမ်း အသင်း၏ တာဝန်ရှိသူများသည် ဒေးဗစ်မွိုက်စ်ကို ရာထူးမှထုတ်ပယ်ရန် အစီအစဉ်မရှိဟု ပြောကြားထားသော်လည်း နောက်ထပ်အမှားအယွင်းအဖြစ်ခံတော့မည် မဟုတ်ကြောင်း၊ လာမည့် နော်တင်ဟမ်နှင့်ပွဲမှာ ၎င်းအတွက် အဆုံးအဖြတ်ဖြစ်ကြောင်းလည်း သုံးသပ်ထားသည်။ ဝက်စ်ဟမ်းနည်းပြရာထူးကို ဘင်နီတက်ဇ်က ချိန်ရွယ်နေကြောင်း သိရသည်။
