မုဒိမ်းမှုစွဲချက်မှ လွတ်မြောက်သွားသည့် လူငယ်တိုက်စစ်ကစားသမား ဂရင်းဝုဒ်၏ အခြေအနေကို အသင်းကဆုံးဖြတ်သွားမည်ဟု မန်ယူအသင်းက ထုတ်ပြန်ခဲ့ပြီး ပထမအသင်းလူစာရင်းတွင် ပြန်လည်ထည့်သွင်းထားကြောင်း သိရသည်။

အသက် ၂၁ နှစ်အရွယ် အင်္ဂလန်လက်ရွေးစင် တိုက်စစ်ကစားသမား ဂရင်းဝုဒ်သည် အမျိုးသမီးတစ်ဦးကို အဓမ္မပြုကျင့်ရန် ကြိုးပမ်းမှု၊ ကိုယ်ထိလက်ရောက်ကျူးလွန်မှု၊ လိင် ပိုင်းဆိုင်ရာစော်ကားရန် သံသယရှိမှု၊ လူသတ်ရန် ခြိမ်းခြောက်မှု စသည့်စွဲချက်များဖြင့် ၂၀၂၂ ခုနှစ် ဇန်နဝါရီ ၃၀ ရက်တွင် ဂရိတ်မန်ချက်စတာရဲတပ်ဖွဲ့၏ ဖမ်းဆီးခြင်းခံခဲ့ရသည်။ 

၎င်းအနေဖြင့် ရက်ပိုင်းအကြာမှာပင် အာမခံဖြင့် လွတ်မြောက်လာသော်လည်း တရားစွဲဆိုသူကို ဆက်သွယ်ခဲ့သောကြောင့် အာမခံချိုးဖောက်မှုဖြင့် အောက်တိုဘာ ၁၅ ရက်တွင် ပြန်လည်ဖမ်းဆီးခံရသည်။ ထို့ပြင် ဂရင်းဝုဒ် အနေဖြင့် ယင်းနေ့မှာပင် ၂၀၂၁ ခုနှစ် အောက်တိုဘာ ၂၂ ရက်တွင် အဓမ္မပြုကျင့်ရန် ကြိုးပမ်းမှု၊ ၂၀၂၁ ခုနှစ် ဒီဇင်ဘာတွင် ဖြစ်ပွားခဲ့သည့် ခန္ဓာကိုယ်ထိခိုက်စေသော တိုက်ခိုက်မှု၊ ၂၀၁၈ ခုနှစ် နိုဝင်ဘာမှစ၍ အတင်းအကျပ်စေခိုင်းမှု စသည့်စွဲချက်များဖြင့် စွဲချက်တင်ခံခဲ့ရသည်။ 

အစောပိုင်းတွင် ၎င်းအား နိုဝင်ဘာ ၂၁ ရက်အထိ ဖမ်းဆီးထားရန် ရမန်ယူထားသော်လည်း အောက်တိုဘာ ၁၉ ရက်က သီးသန့်ကြားနာမှုပြုလုပ်ပြီးနောက် အာမခံဖြင့် ထပ်မံလွတ်မြောက်လာခဲ့သည်။ ထို့နောက် သက်သေများ နုတ်ထွက်ခြင်းအပါအဝင် ထပ်မံရရှိသည့် တွေ့ရှိချက်များအရ ဂရင်းဝုဒ်အပေါ် စွဲဆိုထားသည့် စွဲချက်အားလုံး ပယ်ဖျက်လိုက်ပြီဖြစ်ကြောင်း Crown တရားစွဲဆိုရေးဌာနက ဖေဖော်ဝါရီ ၂ ရက်တွင် ထုတ်ပြန်ခဲ့သည်။

ယင်းကြေညာချက် ထွက်ပေါ်လာပြီးနောက် မန်ယူအသင်းက "အသင်းအနေနဲ့ လာမယ့်အဆင့်တွေအတွက် မဆုံးဖြတ်ခင် ကိုယ်ပိုင်လုပ်ငန်းစဉ်ကို ယခုလုပ်ဆောင်သွားမှာ ဖြစ်ပါတယ်။ အဲဒီလုပ်ငန်းစဉ်မပြီးမချင်း နောက်ထပ်မှတ်ချက်တစ်စုံတစ်ရာ ပြောကြား မှာ မဟုတ်ပါဘူး"ဟု ထုတ်ပြန်ခဲ့သည်။

မန်ယူအသင်းသည် ဂရင်းဝုဒ်အား ရဲတပ်ဖွဲ့က စတင်ဖမ်းဆီးခဲ့သည့် ၂၀၂၂ ခုနှစ် ဇန်နဝါရီ ၃၀ ရက်ကတည်းက အကန့်အသတ်မရှိ စာချုပ်ရပ်ဆိုင်းထားခြင်းဖြစ်သည်။ စွဲချက်များ လွတ်မြောက်သွားပြီးနောက် ပထမအသင်း၏ တိုက်စစ်ကစားသမားစာရင်းတွင် မန်ယူအသင်းက ပြန်လည်ထည့်သွင်းထားခြင်းဖြစ်ပြီး ၎င်း၏လက်ရှိစာချုပ်မှာ ၂၀၂၅  ခုနှစ် ဇွန်လအထိဖြစ်သလို တစ်နှစ်တိုးမြှင့်နိုင်သည့်အချက်လည်း ပါဝင်ကြောင်း သိရသည်။