PSG အသင်း၏ ဘရာဇီးလ်နာမည်ကျော် တိုက်စစ်မှူး နေမာသည် စိန့်အက်တီယန်အသင်းနှင့် ကစားခဲ့သည့် ပြင်သစ်လီဂူးပွဲစဉ်တွင် ပြိုင်ဘက်ကစားသမား၏ ဖျက်ထုတ်မှုကြောင့် ဒဏ်ရာရရှိခဲ့ပြီး (၁)လခွဲခန့် အနားယူရမည်ဖြစ်ကြောင်း သိရှိရသည်။
နေမာသည် ယင်းဖြစ်ရပ်ဖြစ်ပွားချိန်တွင် အလွန်နာကျင်နေသည့် ပုံစံပေါက်ခဲ့ပြီး PSG ဆေးအဖွဲ့ဝန်ထမ်းများက သူ၏ ဒဏ်ရာကို ကုသမှု ပြုလုပ်နေစဉ် စိုးရိမ်သည့်ပုံစံ ပေါ်လွင်နေခဲ့သဖြင့် ပရိသတ်များက ဒဏ်ရာအခြေအနေ အလွန်ဆိုးရွားနေမည်ကို စိတ်ပူခဲ့ကြသည်။
ထို့ပြင် နေမာသည် ဆေးအဖွဲ့ဝင်များ၏ အကူအညီဖြင့် ကွင်းအတွင်းမှ ထွက်ခွာသွားခဲ့ရပြီး သူ၏ ဒဏ်ရာအခြေအနေကို အသေးစိတ်မသိရှိရသေးချိန်တွင် ရာသီကုန်အထိ အနားယူရဖွယ်ရှိသည်ဆိုသည့် ခန့်မှန်းမှုများလည်း ရှိခဲ့သည်။
သို့ရာတွင် ဒဏ်ရာကို ဆေးစစ်ဆေးမှုများပြုလုပ်ပြီးချိန်တွင်မူ ဒဏ်ရမှာ ဆိုးရွားသော်လည်း မူလထင်မှတ်ထားသလောက် ပြင်းထန်မှုမရှိဘဲ (၁)လခွဲခန့်သာ အနားယူရလိမ့်မည်ဟု သိရှိရသည်။
ယခု စစ်ဆေးမှုသည် ပဏာမစစ်ဆေးမှုဖြစ်ပြီး အသေးစိတ်စစ်ဆေးမှုများ ပြုလုပ်ပြီးချိန်တွင်လည်း ကြီးမားစွာ ပြောင်းလဲသည့် အဖြေထွက်ပေါ် ဖွယ်မရှိဟု သိရှိရသည်။
နေမာကိုယ်တိုင်ကမူ သူ၏ ဒဏ်ရာနှင့် ပတ်သက်ပြီး ''ပိုကောင်းပြီး၊ ပိုကြံ့ခိုင်တဲ့ ပုံစံနဲ့ ကျွန်တော်ပြန်လာခဲ့ပါမယ်။ ကံမကောင်းစွာပဲ ဒဏ်ရာပြဿနာဆိုတာ ဘောလုံးသမားဘဝရဲ့တစ်စိတ်တစ်ပိုင်းဖြစ်နေပါတယ်''ဟု သူ၏ Instagram တွင် ရေးသားခဲ့သည်။
နေမာသည် PSG အသင်းက စိန့်အက်တီယန်အသင်းကို (၃-၁)ဂိုးဖြင့် အနိုင်ရရှိခဲ့သည့်ပွဲတွင် ပွဲပြီးခါနီး (၁၀)မိနစ်အလိုတွင် ယင်းဒဏ်ရာ ရရှိခဲ့ခြင်းဖြစ်ကာ PSG အသင်းအတွက် ဂိုးများကို မာကင်ဟို့စ်က (၂)ဂိုးနှင့် ဒီမာရီယာက (၁)ဂိုးသွင်းယူပေးခဲ့သည်။
