အီတလီအာဏာပိုင်များသည် ၂၀၁၉ မှ ၂၀၂၁ ခုနှစ်အထိ သုံးနှစ်တာကာလအတွင်း သံသယဖြစ်ဖွယ် ဖောင်းပွခဲ့သည့် ယူရို ၂၈၂ သန်းတန်ဖိုးရှိ ကစားသမားအပြောင်းအရွှေ့များကို စုံစမ်းစစ်ဆေးလျက်ရှိကြောင်း သိရသည်။

အီတလီဘောလုံးအဖွဲ့ချုပ် (FIGC) သည် သံသယဖြစ်ဖွယ် အပြောင်းအရွှေ့များကို အောက်တိုဘာလတွင် စတင်စစ်ဆေးခဲ့ပြီး ယင်းအပြောင်းအရွှေ့ကိစ္စများအနက် ဂျူဗင်တပ်စ်အသင်းအပါအဝင် အဓိကအပြောင်းအရွှေ့များအား အသေအချာစောင့်ကြည့်စစ်ဆေးလျက်ရှိကြောင်း သိရသည်။

ယင်းကဲ့သို့ စစ်ဆေးခြင်းမှာ ဘဏ္ဍာရေးစာရင်းကိစ္စအတွက် ကစားသမားများ၏တန်ဖိုးကို မြှင့်တင်ရန် ရည်ရွယ်သည်ဟု သံသယဖြစ်ခြင်း၊ ဘဏ္ဍာရေးမျှခြေဖြစ်စေရန် ကစားသမားများ အလဲအလှယ်ပြုလုပ်ခြင်း စသည့်ဖြစ်ရပ်များကို ဖော်ထုတ်နိုင်ရန် ရည်ရွယ်ထားသည်။

Sky Sports Italia သတင်းဌာန၏ ဖော်ပြမှုအရ အစိုးရ ရှေ့နေများသည် ဂျူဗင်တပ်စ်အသင်းအပါအဝင် ယူရို ၂၈၂ သန်းတန်ဖိုးရှိ အပြောင်းအရွှေ့သဘောတူညီမှုများကို စစ်ဆေးနေကြောင်း သိရသည်။

ANSA သတင်းဌာနကလည်း အစိုးရရှေ့နေများ၏ စစ်ဆေးမှုတွင် ၂၀၁၈ ခုနှစ် နွေရာသီက ယူရိုသန်း ၁၀၀ ဖြင့် ရောက်ရှိလာပြီး ယခုနှစ် နွေရာသီတွင် မန်ယူအသင်းသို့ ပြန်လည်ပြောင်းရွှေ့သွားသည့် စီရော်နယ်လ်ဒို၏ အပြောင်းအရွှေ့လည်း ပါဝင်ကြောင်း စနေနေ့ နံနက်ပိုင်းတွင် ဖော်ပြခဲ့သည်။

အီတလီဘဏ္ဍာရေးရဲတပ်ဖွဲ့ (Guardia di Finanza) သည် တူရင်နှင့် မီလန်မြို့ရှိ ဂျူဗင်တပ်စ်အသင်း၏ ရုံးခန်းများကို ကြာသပတေးညပိုင်းနှင့် သောကြာနေ့ နေ့လယ်ပိုင်းတွင် နှစ်ရက်ဆက်တိုက် ဝင်ရောက်စီးနင်းရှာဖွေမှုများ ပြုလုပ်ခဲ့ကြောင်း သိရသည်။

ဂျူဗင်တပ်စ်အသင်းအနေဖြင့် ရှယ်ယာများကို မီလန်စတော့အိတ်ချိန်းတွင် ရောင်းချထားသောကြောင့် အပြောင်းအရွှေ့ကိစ္စနှင့် ဝင်ငွေစာရင်းများမှာ အီတလီဘဏ္ဍာရေးရဲတပ်ဖွဲ့၏ ထိန်းချုပ်မှုအောက်တွင်ရှိနေပြီး အခြားစစ်ဆေးခံရသည့်ကလပ်များထက် အန္တရာယ် ပိုရင်ဆိုင်နေရခြင်းဖြစ်သည်။

ထို့ပြင် ဘောလုံးကြီးကြပ်ရေးကော်မရှင် (COVISOC) ၏ သတင်းရင်းမြစ်တစ်ဦးထံမှ ပြောကြားမှုအရ ပြီးခဲ့သည့်နှစ် ဆောင်းဦးရာသီကတည်းက အီတလီစတော့အိတ်ချိန်းတွင် စာရင်းသွင်းထားသော ဂျူဗင်တပ်စ်အသင်း၏ ဒါဇင်နှင့်ချီသည့် သဘော တူညီမှုများကို ဖော်ထုတ်နိုင်ခဲ့ခြင်းဖြစ်ကြောင်း ANSA သတင်းဌာနက ဖော်ပြထားသည်။

ဘဏ္ဍာရေးရဲတပ် ဖွဲ့သည် ဂျူဗင်တပ်စ်အသင်း၏ ရုံးခန်းများကို ဝင်ရောက်စီးနင်းရှာဖွေခဲ့သလို ဒါရိုက်တာအဖွဲ့ဝင်(၆)ဦးမှာလည်း စုံစမ်းစစ်ဆေးမှုများခံနေရကြောင်း သိရသည်။

၎င်းတို့(၆)ဦးမှာ ဥက္ကဋ္ဌ အက်ဂ်နယ်လီ၊ ဒုဥက္ကဋ္ဌ နက်ဗက်၊ ဘဏ္ဍာရေးအရာရှိချုပ် စတီဖာနိုချာရာတို၊ စပါးအသင်းသို့ ပြောင်းရွှေ့သွားပြီဖြစ်သည့် အားကစားဒါရိုက်တာဟောင်း ပါရာတီချီ အပါအဝင် အကြီးတန်းတာဝန်ရှိသူများဖြစ်သည်။

ယင်းကဲ့သို့ စစ်ဆေးခံရကြောင်း ဂျူဗင်တပ်စ်အသင်းက စနေနေ့တွင် ကြေညာချက်ထုတ်ပြန်၍ အတည်ပြုခဲ့ပြီး စုံစမ်းစစ်ဆေးမှုကို ပူးပေါင်းဆောင်ရွက်လျက်ရှိကြောင်းနှင့် ဘဏ္ဍာရေးဆိုင်ရာ စစ်ဆေးမှုတွင် မိမိတို့၏ရပ်တည်မှုကို ဖြေရှင်းနိုင်မည်ဟု ယုံကြည်ကြောင်း ဖော်ပြထားသည်။

''ဂျူဗင်တပ်စ်အသင်းအနေဖြင့် ကစားသမားများ မှတ်ပုံတင်မူပိုင်ခွင့်ရငွေကိစ္စနှင့်ပတ်သက်၍ တူရင်တရားရုံးလက်အောက်ရှိ အစိုးရရှေ့နေရုံး၏ စုံစမ်းစစ်ဆေးမှု စတင်ပြုလုပ်ခံနေရပြီး လက်ရှိတာဝန်ယူထားသူအချို့ (အက်ဂ်နယ်လီ၊ နက်ဗက်၊ ချာရာတို) နှင့် အရာရှိဟောင်းများ ပါဝင်နေပါသည်။

ကုမ္ပဏီအနေဖြင့် စုံစမ်းစစ်ဆေးသူများနှင့် ပူးပေါင်းဆောင်ရွက်လျက်ရှိပြီး ငွေကြေးဆိုင်ရာ အစီရင်ခံစာများ ပြင်ဆင်ခြင်းဆိုင်ရာ ဥပဒေနှင့် စည်းမျဉ်းစည်းကမ်းများကို လိုက်နာဆောင်ရွက်ခဲ့သည်ဟု ယုံကြည်သောကြောင့် မည်သည့်ကဏ္ဍမဆို ဖြေရှင်းနိုင်မည်ဟု ယုံကြည်ပါသည်'' ဟု ထုတ်ပြန်ချက်တွင် ဖော်ပြထားသည်။