ဘာစီလိုနာနည်းပြ ဇာဗီက ချန်ပီယံလိဂ်ပြိုင်ပွဲတွင် နောက်တစ်ဆင့်တက်ရေးအတွက် အုပ်စုနောက်ဆုံးပွဲစဉ်$် မြူးနစ်မြို့တွင် ဘိုင်ယန်မြူးနစ်အသင်းကို အနိုင်ကစားသွားမည်ဖြစ်ကြောင်း ဘင်ဖီကာနှင့်ပွဲအပြီးတွင် ပြောကြားခဲ့သည်။
ဘာစီလိုနာအသင်းသည် ပြီးခဲ့သည့်အင်္ဂါနေ့က အိမ်ကွင်း နူးကမ့်တွင် ကစားခဲ့သည့် ချန်ပီယံလိဂ်အုပ်စုပွဲစဉ်တွင် ဘင်ဖီကာအသင်းကို အနိုင်ရလျှင် ရှုံးထွက်(၁၆)သင်းအဆင့်သို့ တက်ရောက်နိုင်မည်ဖြစ်သည်။
သို့သော် ဘာစီလိုနာအသင်းသည် ဘင်ဖီကာအသင်းကို အိမ်ကွင်းတွင် ခြေစွမ်းအသာစီးဖြင့် ကစားနိုင်ခဲ့သော်လည်း ဂိုးသွင်းယူနိုင်ခြင်းမရှိဘဲ (၀-၀)ဂိုးဖြင့် သရေကျခဲ့သည့်အတွက် နောက်တစ်ဆင့်တက်ရန် အုပ်စုနောက်ဆုံးပွဲစဉ်အထိ ရုန်းကန်ရမည်ဖြစ်သည်။
ချန်ပီယံလိဂ်အုပ်စု (E)တွင် ပွဲစဉ် (၅)ပွဲ ကစားပြီးချိန် ဘိုင်ယန်မြူးနစ်အသင်းက (၁၅)မှတ်ဖြင့် အုပ်စုဗိုလ်အဖြစ် နောက်တစ်ဆင့်တက်ရောက်သွားပြီဖြစ်ပြီး လက်ကျန်တစ်နေရာအတွက် ဘာစီလိုနာ(၇ မှတ်)နှင့် ဘင်ဖီကာ(၅ မှတ်)တို့ အပြိုင်လုရမည်ဖြစ်သည်။
ဘာစီလိုနာအသင်းသည် ချန်ပီယံလိဂ် အုပ်စုနောက်ဆုံးပွဲစဉ်တွင် ဇယားထိပ်ဆုံးမှ ဘိုင်ယန်မြူးနစ်အသင်းကို အဝေးကွင်း ကစားရမည်ဖြစ်ပြီး ဘင်ဖီကာအသင်းမှာမူ ဇယားအောက်ဆုံးမှ ဒိုင်နမိုကိဗ်အသင်းကို အိမ်ကွင်း ကစားမည်ဖြစ်သည်။
အကယ်၍ ဘင်ဖီကာအသင်းသာ ဒိုင်နမိုကိဗ်ကို အနိုင်ရခဲ့ပါက(ဘင်ဖီကာကို Head to Head အရ ရှုံးနိမ့်ထားသည့်)ဘာစီလိုနာအနေဖြင့် နောက်တစ်ဆင့်တက်ရေးအတွက် ဘိုင်ယန်မြူးနစ်အသင်းကို မဖြစ်မနေ အနိုင်ကစားရတော့မည်ဖြစ်သည်။ ဘာစီလိုနာအသင်းသည် ဘိုင်ယန်မြူးနစ်အသင်းနှင့် ချန်ပီယံလိဂ်ပြိုင်ပွဲ$ နောက်ဆုံး(၂)ကြိမ် တွေ့ဆုံရာ တွင် (၂-၈)ဂိုး၊ (၀-၃)ဂိုးဖြင့် ရှုံးနိမ့်ခဲ့သော်လည်း မြူးနစ်တွင် အနိုင်ကစားမည်ဟု ဇာဗီက ဆိုခဲ့ခြင်းဖြစ်သည်။
ဇာဗီက ''ဘင်ဖီကာနဲ့ပွဲမှာ ဂိုးမသွင်းနိုင်လို့ အနိုင်မရခဲ့ပေမဲ့ အသင်းရဲ့ကစားပုံက ကျေနပ်စရာပါ။ ဒီပုံစံနဲ့ ဘယ်အသင်းကိုမဆို ယှဉ်နိုင်ပါတယ်။ ကျွန်တော်တို့အနေနဲ့ မြူးနစ်မှာ ဘိုင်ယန်မြူးနစ်ကို အနိုင်ကစားမှာပါ။ ကိုယ့်ကံကြမ္မာကို ကိုယ်ဖန်တီးခွင့်ရှိတာ ကောင်းပါတယ်''ဟု ဆိုခဲ့သည်။
