မန်ယူအသင်း နည်းပြရာထူးမှ ထုတ်ပယ်ခံခဲ့ရသည့် နည်းပြဟောင်း ဆိုးလ်ရှားက အသင်းနှင့် နောက်ဆုံး ပြုလုပ်ခဲ့သည့် နှုတ်ဆက်အင်တာဗျူးအစီအစဉ်တွင် မန်ယူအသင်းနည်းပြအဖြစ် ဆောင်ရွက်ခဲ့စဉ်အတွင်း အသင်းတွင် ရှိနေခဲ့သည့် စက္ကန့်တိုင်းအတွက် ဂုဏ်ယူမိသည်ဟု ပြောကြားခဲ့သည်။
ဆိုးလ်ရှားက ''ကျွန်တော့်အတွက် ဂုဏ်ယူစရာလည်းကောင်း၊ အထူးအခွင့်အရေးတစ်ခုကို ရရှိခဲ့သလိုလည်း ခံစားရပါတယ်။ ပြန်လှည့်ကြည့်လိုက်ရင် အသင်းနဲ့အတူ ရှိနေတဲ့ စက္ကန့်တိုင်းက ဂုဏ်ယူစရာအပြည့်ပါ။ ကျွန်တော် မန်ယူအသင်းကို နည်းပြခဲ့ချိန်အတွင်း ဆုဖလားတွေ မရယူနိုင်ခဲ့ပေမဲ့ ဆုဖလားတွေက အရာရာမဟုတ်ပါဘူး။ လူတစ်ယောက်ရဲ့ ဘဝမှာ အိပ်မက်ကိုယ်စီရှိကြတယ်ဆိုရင် မန်ယူနည်းပြဘဝဆိုတာ ကျွန်တော့်ရဲ့အိပ်မက်တစ်ခုဖြစ်ပြီး ဒီအိပ်မက်က တကယ်ပြည့်ဝခဲ့ပါတယ်။ နည်းပြဖြစ်လာတဲ့ ပထမဆုံးမိနစ်ကနေ နောက်ဆုံးမိနစ်အထိ ကျွန်တော် ပျော်ရွှင်ခဲ့ရပါတယ်။ ကျွန်တော်နဲ့အတူ လက်တွဲခဲ့ကြသူအားလုံးကိုလည်း ကျေးဇူးတင်ပါတယ်''ဟု ဆိုခဲ့သည်။
