လီဗာပူးလ်အသင်းသည် ချန်ပီယံလိဂ် (ယခင်ဥရောပဖလား) သမိုင်းတွင် ဆီမီးဖိုင်နယ်အဆင့်၌ ပထမအကျော့ (၃)ဂိုးပြတ်ရှုံးနိမ့်ခဲ့သော်လည်း ဗိုလ်လုပွဲတက်ရောက်နိုင်သည့် တတိယမြောက်အသင်းအဖြစ် မှတ်တမ်းဝင်ခဲ့ကြောင်း သိရသည်။

လီဗာပူးလ်အသင်းသည် မေလ (၇)ရက်နေ့က ကစားခဲ့သည့် ချန်ပီယံလိဂ်ဆီမီးဖိုင်နယ် ဒုတိယအကျော့ပွဲစဉ်တွင် ပထမအကျော့က (၀-၃)ဂိုးဖြင့်ရှုံးနိမ့်ခဲ့သည့် ဘာစီလိုနာအသင်းကို အိမ်ကွင်းတွင် (၄-၀)ဂိုးဖြင့် အနိုင်ယူကာ နှစ်ကျော့ပေါင်း (၄-၃)ဂိုးဖြင့် ဗိုလ်လုပွဲသို့ တက်ရောက်နိုင်ခဲ့ခြင်းဖြစ်သည်။

ယခင်က ချန်ပီယံလိဂ် (ယခင်ဥရောပဖလား) ပြိုင်ပွဲသမိုင်းတွင် ဆီမီးဖိုင်နယ်အဆင့်၌ ယင်းကဲ့သို့ ပထမအကျော့တွင် (၃)ဂိုးပြတ်ရှုံးနိမ့်ပြီးနောက် ဗိုလ်လုပွဲတက်ရောက်နိုင်သည့် အသင်း (၂)သင်းရှိခဲ့ဖူးပြီး ယင်းအသင်းများမှာ ဂရိကလပ် ပင်နာသီနာကော့စ်အသင်းနှင့် စပိန်ကလပ် ဘာစီလိုနာအသင်းတို့ဖြစ်သည်။

ပင်နာသီနာကော့စ်အသင်းသည် ၁၉၇၀-၇၁ ဘောလုံးရာသီက ဥရောပဖလားဆီမီးဖိုင်နယ်တွင် ဆားဘီးယားကလပ် ဇဗက်ဒါအသင်းကို ပထမအကျော့အဝေးကွင်းတွင် (၁-၄)ဂိုးဖြင့်ရှုံးနိမ့်ခဲ့သော်လည်း ဒုတိယအကျော့အိမ်ကွင်းတွင် (၃-၀)ဂိုးဖြင့် ပြန်လည်အနိုင်ယူကာ နှစ်ကျော့ပေါင်း (၄-၄)ဂိုးဖြင့်သရေကျခဲ့သည်။

သို့သော် ပင်နာသီနာကော့စ်အသင်းက အဝေးဂိုးစည်းမျဉ်းဖြင့် ဗိုလ်လုပွဲသို့တက်ရောက်နိုင်ခဲ့ခြင်းဖြစ်သည်။

ဘာစီလိုနာအသင်းမှာမူ ၁၉၈၅-၈၆ ဘောလုံးရာသီက ဥရောပဖလားဆီမီးဖိုင်နယ်အဆင့်တွင် ဆွီဒင်ကလပ် ဂိုသင်ဘတ်ချ်အသင်းကို အဝေးကွင်းတွင် (၀-၃)ဂိုးဖြင့်ရှုံးနိမ့်ခဲ့သော်လည်း ဒုတိယအကျော့အိမ်ကွင်းတွင် (၃-၀)ဂိုးဖြင့် ပြန်လည်အနိုင်ယူခဲ့ခြင်းဖြစ်သည်။

နှစ်ကျော့ပေါင်း (၃-၃)ဂိုး ဖြစ်နေသည့်အတွက် ပယ်နယ်တီအဆုံးအဖြတ်ခံယူခဲ့ရာ ဘာစီလိုနာအသင်းက (၅-၄)ဂိုးဖြင့် အနိုင်ရကာ ဗိုလ်လုပွဲသို့တက်ရောက်နိုင်ခဲ့ခြင်းဖြစ်သည်။

ယခု လီဗာပူးလ်အသင်းမှာမူ ဘာစီလိုနာအသင်းကို ပွဲချိန်အတွင်း ပြတ်သားသည့်ရလဒ်ဖြင့် အနိုင်ယူကာ ဗိုလ်လုပွဲသို့ တက်ရောက်နိုင်ခဲ့ခြင်းဖြစ်သလို၊ ၁၉၉၂ - ၉၃ရာသီမှစတင်ကာ ချန်ပီယံလိဂ်ဟု အမည်ပြောင်းလဲပြီးနောက်ပိုင်း ဆီမီးဖိုင်နယ်အဆင့်တွင် ပထမအကျော့ (၃)ဂိုးပြတ်ရှုံးနိမ့်ခဲ့သော်လည်း ဗိုလ်လုပွဲကိုတက်ရောက်နိုင်ခဲ့သည့် ပထမဆုံးအသင်းအဖြစ်လည်း မှတ်တမ်းဝင်ခဲ့သည်။