ချယ်လ်ဆီးအသင်းသည် ရာသီကုန်တွင်ကစားသမားဘဝမှ အနားယူတော့မည့် အသင်းဂိုးသမားဟောင်း ပီတာချက်အား ရာထူးတစ်နေရာပေးပြီး ခေါ်ယူသွားရန် စီစဉ်နေလျက်ရှိသည်။
ပီတာချက်အနေဖြင့် ချယ်လ်ဆီးအသင်း၏နည်းစနစ်ပိုင်းဆိုင်ရာအဖွဲ့တွင် ရာထူးတစ်ခုခုဖြင့် ကမ်းလှမ်းခံရဖွယ်ရှိသည်ဟု ဗြိတိန်သတင်းစာ Telegraph က ဖော်ပြခဲ့သည်။
ချယ်လ်ဆီးအသင်းမှာ နည်းပြ မော်ရီဇီယိုဆာရီလက်အောက် လက်ရှိတွင် ဖိအားဒဏ်အောက် ရောက်နေပြီး လာမည့်ရာသီ ချန်ပီယံလိဂ်ဝင်ခွင့် ရုန်းကန်နေရသောကြောင့် လာမည့်ရာသီတွင် အပြောင်းအလဲများစွာ ပြုလုပ်ဖွယ်ရှိနေသည်ဟုလည်း သတင်းများက သုံးသပ်ခဲ့သည်။
ချယ်လ်ဆီးအနေဖြင့် ပြီးခဲ့သည့်(၂)နှစ်ခန့်က အီမန်နာလို အသင်းမှထွက်ခွာသွားပြီးနောက် နည်းစနစ်ဒါရိုက်တာ လစ်လပ်နေရာ ပီတာချက်ကို တိုက်ရိုက်အစားထိုးဖွယ်မရှိသော်လည်း ယင်းရာထူး၏လုပ်ငန်းဆောင်တာအစိတ်အပိုင်းအချို့ကို တာဝန်ပေးသွားဖွယ်ရှိနေသည်။
ချယ်လ်ဆီးပရိသတ်များ သဘောကျနှစ်ခြိုက်သည့် ပီတာချက်မှာလည်း အသင်းဟောင်းသို့ တစ်ကျော့ပြန်ရန် နီးစပ်နေကြောင်း သိရသည်။
