၂၀၁၈ခုနှစ် နိုဝင်ဘာ ၃ရက်တွင် ကျင်းပမည့် ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်မည့်လွှတ်တော်ကိုယ်စားလှယ်လောင်းများစာရင်းကို သြဂုတ် ၆ ရက်တွင် ထုတ်ပြန်ကြေညာသွားမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်အဖွဲ့ ဝင် ပြောရေးဆိုခွင့်ရှိသူ ဦးမြင့်နိုင်က ပြောကြားသည်။
အဆိုပါကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်ရန် အမည်စာရင်းတင်သွင်းထားသည့် တစ်သီးပုဂ္ဂလခုနစ်ဦး အပါအဝင် နိုင်ငံရေးပါတီ ၂၄ ပါတီမှ လွှတ်တော်ကိုယ်စားလှယ်လောင်း ၆၉ ဦးရှိကြောင်း ပြည်ထောင်စု ရွေးကောက်ပွဲကော်မရှင်က ပြော ကြားထားသည်။
အဆိုပါကိုယ်စားလှယ်လောင်းများအနက် သက်ဆိုင်ရာလွှတ်တော်ရွေးကောက်ပွဲဥပဒေများအရ စစ်ဆေးရာတွင် အရည်အချင်း သတ်မှတ်ချက်နှင့် မကိုက်ညီသောကိုယ်စားလှယ်လောင်းများကို မတွေ့ရှိကြောင်း ဦးမြင့်နိုင်က ပြောကြားသည်။
“အရည်အချင်းသတ်မှတ်ချက်နှင့် မကိုက်ညီသော ကိုယ်စားလှယ်လောင်းများ အခုထိတော့ မပေါ်သေးပါဘူး။ လာမယ့် ၆ ရက်မှာ ကပ်ပါ့မယ်။ အောက်ကတော့ လုပ်နေကြပါပြီ။ သြဂုတ် ၆ ရက်မှာ ထုတ်ပြန်ပါမယ်။ ထုတ်ပြန်တယ်ဆိုတာကလည်း သက်ဆိုင်ရာ ကော်မရှင်အဖွဲ့ခွဲရုံးတွေ ကပ်ပါမယ်။ ရပ်ကွက်အထိ ကပ်ပါမယ် အကုန်လုံး ပုံစံ ၁၀ နဲ့ ကပ်ပါမယ်” ဟု ဦးမြင့်နိုင်က ပြောကြားသည်။
၂၀၁၈ ခုနှစ် ကြားဖြတ်ရွေးကောက်ပွဲတွင် လစ်လပ်မဲဆန္ဒနယ် ၁၃ နေရာရှိသည်။ ကြားဖြတ်ရွေးကောက်ပွဲတွင် လစ်လပ်မဲဆန္ဒနယ်များမှာ ပြည်သူ့လွှတ်တော်မဲဆန္ဒနယ်များတွင် ကန်ပက်လက်၊ လဲချား၊ တာမွေနှင့် မြင်း ခြံတို့ဖြစ်ကာ အမျိုးသားလွှတ်တော်မဲဆန္ဒနယ်မှာ ကချင်ပြည်နယ် အမျိုးသားလွှတ်တော် မဲဆန္ဒနယ်အမှတ်(၂) (အကျုံးဝင်သော မြို့နယ် မြစ်ကြီးနား) ဖြစ်သည်။
ထို့အတူ လစ်လပ်တိုင်းဒေသကြီးနှင့် ပြည်နယ်လွှတ်တော်မဲဆန္ဒနယ်များမှာ မတူပီ၊ တမူး၊ အုတ်တွင်း၊ သပိတ်ကျင်း၊ ရသေ့တောင်၊ မင်းဘူး၊ ဆိပ်ကမ်းနှင့် မန္တလေးတိုင်းဒေသကြီး လွှတ်တော် ရှမ်းတိုင်းရင်းသားလူမျိုးမဲဆန္ဒနယ်တို့ဖြစ်ကြသည်။
ပါတီကြီးများဖြစ်ကြသော အမျိုးသား ဒီမိုကရေစီအဖွဲ့ချုပ် (NLD) က မဲဆန္ဒနယ် အားလုံးတွင် ဝင်ရောက်ယှဉ်ပြိုင်မည်ဖြစ်ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) က မဲဆန္ဒနယ် ၁၀ နေရာတွင် ဝင်ရောက်ယှဉ်ပြိုင်သွားမည်ဖြစ်သည်။
ကြားဖြတ်ရွေးကောက်ပွဲအတွက် မဲစာရင်းကို ပထမအကြိမ်အဖြစ် ဇူလိုင် ၉ ရက်မှ ၂၂ ရက်အထိ သက်ဆိုင်ရာရွေးကောက်ပွဲ ကော်မရှင်အဖွဲ့ခွဲရုံးများတွင် ကပ်ထားကြေညာထားပြီး အောက်တိုဘာလတွင် နောက်ဆုံးအကြိမ် ၁၄ ရက်ကြာ ထပ်မံကပ်ထား ကြေညာမည်ဖြစ်ကြောင်း ပြည်ထောင်စုရွေး ကောက်ပွဲကော်မရှင်က ထုတ်ပြန်ထားသည်။
မဲစာရင်းများကြေညာကပ်ထားခြင်းနှင့် ပတ်သက်၍ အငြင်းပွားမှုများ မတွေ့ရသေးကြောင်း ဦးမြင့်နိုင်က ပြောကြားသည်။
