ပြည်ပမှ တရားမဝင် ကုန်စည်များ တင်သွင်းမှုများကို တားဆီးကာကွယ်ရာတွင် ဝန်ထမ်းစွမ်းဆောင်ရည် အားနည်းမှု၊ အခွန်ရှောင်တိမ်းလိုမှုများနှင့် တရားမဝင် လမ်းကြောင်းများကြောင့် ဌာနတစ်ခုတည်းဖြင့် လုပ်ဆောင်ရန် ခက်ခဲနေကြောင်း စီမံကိန်းနှင့် ဘဏ္ဍာရေး ဝန်ကြီးဌာန ပြည်ထောင်စုဝန်ကြီး ဦးစိုးဝင်းက ပြောကြားသည်။
“တရားမဝင် ကုန်သွယ်မှုကို ကြည့်မယ်ဆိုရင် တင်သွင်းသူ၊ တင်ပို့သူများဟာ အခွန်ရှောင်တိမ်းလိုခြင်း၊ တင်သွင်း/တင်ပို့မှုတွေနဲ့ ပတ်သက်ပြီး ကန့်သတ်ချက်တွေ ရှိနေတာ၊ နိုင်ငံတကာ ကုန်သွယ်မှု လုပ်ထုံးလုပ်နည်းတွေကို လိုက်နာလိုမှု အားနည်းခြင်း၊ အကျိုးစီးပွား တစ်ခုတည်းကိုကြည့်ပြီး ဆောင်ရွက်လိုခြင်း၊ နယ်စပ်ဝင်ပေါက်/ထွက်ပေါက်က တရားဝင် တစ်ခုသာရှိပြီး တရားမဝင် ဝင်ပေါက်/ထွက်ပေါက်တွေက အရမ်းများနေတာ၊ ဒီလို တရားမဝင် လမ်းကြောင်းတွေကို နယ်မြေစိုးမိုးမှု အခြေအနေအရ ထိန်းချုပ်နိုင်မှု မရှိခြင်း၊ ဝန်ထမ်းတွေရဲ့ စွမ်းဆောင် ရည် အားနည်းခြင်းနဲ့ ကုန်သွယ်မှုနဲ့ ဝန်ဆောင်မှု ဆောင်ရွက်နေသူ အဖွဲ့အစည်းတွေရဲ့ လိုက်နာမှု အားနည်းတာကြောင့် ဌာနတစ်ခုတည်းနဲ့ လုပ်ဆောင်လို့ မရပါဘူး။ သက်ဆိုင်ရာဌာနများ၊ ပုဂ္ဂလိကလုပ်ငန်းရှင်များနဲ့ ပေါင်းစပ်ညှိနှိုင်းပြီး ဆောင်ရွက်မှသာ တရားမဝင် ကုန်သွယ်မှု လျော့နည်းကျဆင်းသွားမှာ ဖြစ်ပါတယ်” ဟု ဦးစိုးဝင်းက ဆိုသည်။
ထို့ပြင် တရားမဝင် ကုန်သွယ်မှုကို ပြည်နယ်နှင့်တိုင်းအလိုက် ထိရောက်စွာ ကာကွယ်တားဆီးနိုင်ရန် တရားမဝင် တားဆီးထိန်းချုပ်ရေး စီမံချက်ကို အကောက်ခွန် ဦးစီးဌာနက ရေးဆွဲနေကြောင်း သိရသည်။
အခွန်ပေးဆောင်မှု မရှိဘဲ တရားမဝင် လမ်းကြောင်းမှ ဝင်ရောက်လာသည့် ကုန်စည်များကို ပြည်တွင်းရှိ အသေးစားနှင့် အလတ်စား လုပ်ငန်းများမှ ယှဉ်ပြိုင်နိုင်စရာ အကြောင်း မရှိသဖြင့် တရားမဝင်ကုန်စည် တင်သွင်းမှုများကို ပြည်နယ်နှင့် တိုင်းအားလုံးတွင် အထူးအဖွဲ့ဖွဲ့၍ ဖမ်းဆီးရန် ညွှန်ကြားထားကြောင်းနှင့် လက်ရှိတွင် တနင်္သာရီတိုင်း၊ မူးယစ်ဆေးဝါးထွက်ရှိမှု များပြားနေသည့် ရခိုင်ပြည်နယ်တို့တွင် ဆက်လက် ဆောင်ရွက်သွားမည် ဖြစ်ကြောင်း သိရသည်။
“နယ်စပ်ဒေသကနေ ခိုးဝင်ခိုးထွက် လုပ်နိုင်တဲ့ နေရာတွေမှာ အထူးသဖြင့် တိုင်းဒေသကြီး၊ ပြည်နယ်အစိုးရ အဖွဲ့တွေနဲ့ ညှိပြီး အထူးအဖွဲ့တွေနဲ့ သက်ဆိုင်ရာ နယ်စပ်၊ တိုင်းနဲ့ ပြည်နယ်တွေမှာ လုပ်ငန်းတွေ ဆောင်ရွက်ဖို့ ညွှန်ကြားထားပြီး ဖြစ်ပါတယ်။ လက်ရှိတော့ ကချင်ပြည်နယ်၊ ရှမ်းပြည်နယ်၊ မွန်ပြည်နယ်၊ ကယားပြည်နယ်နဲ့ ကရင်ပြည်နယ်တို့မှာ အထူးအဖွဲ့တွေ ဖွဲ့စည်းပြီး စတင်ဆောင်ရွက်နေပြီ ဖြစ်ပါတယ်။ ကျန်တဲ့တိုင်းဒေသကြီး တွေမှာလည်း ဥပမာ တနင်္သာရီတိုင်းလိုဟာမျိုး၊ ပြည်နယ်တွေဆို ရခိုင်ပြည်နယ်ကဟာမျိုး။ ရခိုင်ပြည်နယ်ဆိုရင် တော်တော်များများ သိတဲ့အတိုင်း မူးယစ်ဆေးဝါးတွေ တော်တော်လေးကို များပြားနေတဲ့ အနေအထားတွေနဲ့။ ကျွန်တော်တို့ အထူးအဖွဲ့ ဖွဲ့ပြီးမှ နှိမ်နင်းနိုင်မှာ ဖြစ်ပါတယ်” ဒုတိယသမ္မတ ဦးမြင့်ဆွေက ပြောကြားသည်။
ပုဂ္ဂလိကကဏ္ဍ ဖွံ့ဖြိုးတိုးတက်ရေး ကော်မတီဥက္ကဋ္ဌ ဒုတိယသမ္မတ ဦးမြင့်ဆွေကို ကုန်သည်စက်မှု အသင်းချုပ်ရုံးတွင် အသေးစားနှင့် အလတ်စား စီးပွားရေးလုပ်ငန်းများနှင့် စက်မှုလက်မှုလုပ်ငန်းများ ဖွံ့ဖြိုးတိုးတက်ရေး ကော်မတီဥက္ကဋ္ဌ ဒေါက်တာအောင်သိန်းက SME လုပ်ငန်းများမှာ ပြည်ပသွင်းကုန် ပစ္စည်းများနှင့် တရားမဝင် တင်သွင်းလာသော ကုန်စည်များကြောင့် စျေးကွက်ယှဉ်ပြိုင်ရန် အခက်အခဲ ကြုံတွေ့နေမှုများနှင့် ပတ်သက်၍ တင်ပြခဲ့သည်။ ထိုသို့တင်ပြမှုအပေါ် ဒုတိယသမ္မတ ဦးမြင့်ဆွေက နိုင်ငံတော်သမ္မတနှင့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်စသည့် တာဝန်ရှိသူများကို ဆက်လက်တင်ပြကာ တရားမဝင် ကုန်စည်တင်သွင်းမှုများကို ပြည်နယ်နှင့် တိုင်းဒေသကြီး အားလုံးတွင် အထူးအဖွဲ့ဖွဲ့၍ ဖမ်းဆီးရန် ညွှန်ကြားခဲ့ခြင်းဖြစ်ကြောင်း သိရသည်။
“အခွန်ပေးရတဲ့သူက အခွန်မပေးရတဲ့သူကို ဘယ်လိုမှ ယှဉ်နိုင်စရာ အကြောင်းမရှိဘူး” ဟု ဒုတိယသမ္မတက ဆိုသည်။
ဖြိုးဝေ
