ဂရိတ်ဟော်ခမ်းကုမ္ပဏီအနေဖြင့် ယခု ၂၀၁၈ ခုနှစ်အတွင်း ရန်ကုန်စတော့အိတ်ချိန်း၏ စာရင်းဝင်ကုမ္ပဏီတစ်ခု ဖြစ်လာမည်ဖြစ်ကြောင်း မေ ၅ ရက်ကပြုလုပ်သည့် Myanmar Development Summit 2018 အခမ်းအနားတွင် ငွေကြေးသက်သေခံလက်မှတ်လုပ်ငန်း ကြီးကြပ်ရေးကော်မရှင်၏အဖွဲ့ဝင် ဦးဌေးချွန်က ပြောကြားသည်။
“ဂရိတ်ဟော်ခမ်းက Power Purchase Agreement ထိုးပြီးရင် ပြောရတာတော့ တော်တော်တော့ကြာနေပြီ။ နောက်ဆုံးသိရသလောက်တော့ Power Purchase Agreement လျှပ်စစ်ဝန်ကြီးဌာနနဲ့ ထိုးခါနီးနေပြီ။ ထိုးပြီးရင် လုပ်ငန်းစဉ်ပိုင်းလာမယ်။ ပြီးရင် စာရင်းဝင် (Listed) သွားမယ်။ နောက်ထပ်နှစ်ခုကလည်း လုပ်နေဆဲ။ လာမှာ။ ဂရိတ်ဟော်ခမ်းကတော့ ဒီနှစ်ထဲမှာ။ ဒီနှစ်ဆိုတာက အခု ၂၀၁၈ ခုနှစ်ထဲမှာ ဖြစ်နိုင်တယ်။ အခု Power Purchase Agreement ထိုးဖို့ကို တော်တော်လေးညှိပြီးသွားပြီ။ လျှပ်စစ်ဝန်ကြီးဌာနနဲ့ လက်မှတ်ထိုးဖို့ပဲ ကျန်တော့တယ်” ဟု ဦးဌေးချွန်က ဆိုသည်။
ရန်ကုန်စတော့အိတ်ချိန်း စာရင်းဝင်လိုသည့် ကုမ္ပဏီများကိုကူညီရန် Listing Consulting Division ကို စတင်ထူထောင်လိုက်ပြီး ၂၀၁၈ ခုနှစ် ဧပြီ ၂ ရက်တွင် စတင်အကူအညီပေးမည်ဖြစ်ကြောင်း ရန်ကုန်စတော့အိတ်ချိန်းက သတင်းထုတ်ပြန်သည်။
မတ် ၂၅ ရက်တွင် ကျင်းပသည့် ရန်ကုန်စတော့အိတ်ချိန်း ဒါရိုက်တာအဖွဲ့အစည်း အဝေးအရ Listing Consulting Division ကို မတ် ၂၆ ရက်တွင် Listing and Trading Participant Department ၏ ဌာနခွဲတစ်ခုအဖြစ် ဖွဲ့စည်ခဲ့ပြီး ဧပြီ ၂ ရက်တွင် စတင်မည်ဖြစ်သည်။
ရန်ကုန်စတော့အိတ်ချိန်းတွင် စာရင်းဝင်လိုသော ပြည်တွင်းပြည်ပ ကုမ္ပဏီများ၊ ဆက်စပ်အဖွဲ့အစည်းများဖြစ်သော ငွေချေးသက်သေခံလက်မှတ် ကုမ္ပဏီများ၊ ဥပဒေအကျိုးဆောင်ကုမ္ပဏီများနှင့် စာရင်းစစ်အဖွဲ့အစည်းများမှ သိရှိလိုသော စာရင်းဝင်စံနှုန်းများ၊ စာရင်းဝင်စည်းမျဉ်းများနှင့် စာရင်းဝင်စစ်ဆေးခြင်း လုပ်ထုံးလုပ်နည်းများအပြင် အခြားဆက်စပ်သော ကိစ္စရပ်များကို အဆင်ပြေချောမွေ့စွာ ညှိနှိုင်းတိုင်ပင်နိုင်ရေးအတွက် ရည်ရွယ်ထားခြင်းဖြစ်ကြောင်း Listing Consulting Division ဖွဲ့စည်းခြင်းဆိုင်ရာ ထုတ်ပြန်ချက်တွင် ဖော်ပြထားသည်။
လက်ရှိတွင် ရန်ကုန်စတော့အိတ်ချိန်း၌ First Myanmar Investment Co.,Ltd (FMI)၊ Myanmar Thilawa SEZ Holdings Public Ltd (MTSH)၊ Myanmar Cityzens Bank Ltd (MCB)၊ First Private Bank Ltd (FPB)၊ TMH Telecom Public Co.,Ltd စာရင်းဝင်ကုမ္ပဏီ ငါးခုအထိရှိကြောင်း သိရသည်။
ယခင်က ရန်ကုန်စတော့အိတ်ချိန်းတွင် စတော့ရှယ်ယာ အရောင်းအဝယ်ပြုလုပ်ခြင်းကို နံနက် ၁၁ နာရီတွင်တစ်ကြိမ်နှင့် မွန်းလွဲ ၁ နာရီတွင်တစ်ကြိမ် တစ်နေ့လျှင် အရောင်းအဝယ်နှစ်ကြိမ်သာ ပြုလုပ်နေခြင်းဖြစ်ပြီး လက်ရှိတွင်မူ မနက် ၁၀ နာရီတွင်တစ်ကြိမ်၊ နံနက် ၁၁ နာရီတွင်တစ်ကြိမ်၊ မွန်းတည့် ၁၂ နာရီတွင်တစ်ကြိမ်နှင့် မွန်းလွဲ ၁ နာရီတွင်တစ်ကြိမ်ဖြင့် အသီးသီး အရောင်းအဝယ်ပြုလုပ်နေခြင်း ဖြစ်သည်။
