မေ ၂၂ ရက်က Pukguksong – 2 ဒုံးပစ်လွှတ်မှုအား ကြည့်ရှုနေသည့် မြောက်ကိုရီးယားခေါင်းဆောင် ကင်ဂျုံအွန်၊ ရီယောင်ချို (ကင်ဂျုံအွန်၏ ယာဘက်တွင်ရပ်နေသူ)၊ ကင်ဂျုံဆစ် (ရီယောင်ချို၏ ယာဘက်တွင်ရပ်နေသူ) (Photo - AP)

ပြုံယမ်း၏ နျူကလီးယားစီမံကိန်းအတွက် အမေရိကန်နှင့် ရုရှားနိုင်ငံခြားရေးဝန်ကြီးများအကြား ဖုန်းဖြင့်ဆွေးနွေးခဲ့ချိန်တွင် ပဲ့ထိန်းဒုံးစီမံကိန်းများအတွက် မြောက်ကိုရီးယား တာဝန်ရှိသူနှစ်ဦးအား အမေရိကန်က ဒီဇင်ဘာ ၂၆ ရက်တွင် ပိတ်ဆို့အရေးယူမှုများ ချမှတ်ခဲ့ကြောင်း သိရသည်။

မြောက်ကိုရီးယားအား အထီးကျန်စေရန်နှင့် နျူကလီးယား လုံးဝကင်းစင်သော ကိုရီးယားကျွန်းဆွယ် ဖြစ်လာစေရန် ဧရာမ ဖိအားပေးမှု၏ အစိတ်အပိုင်းအဖြစ် မြောက်ကိုရီးယား ပဲ့ထိန်းဒုံးစီမံကိန်းများဆိုင်ရာ ဦးဆောင်ကြိုးပမ်းသူနှစ်ဦးကို အမေရိကန် ဘဏ္ဍာရေးဌာနက ပစ်မှတ်ထားပိတ်ဆို့ အရေးယူခဲ့ကြောင်း အမေရိကန်ဘဏ္ဍာရေးဝန်ကြီး စတိဗင်အမ်နူချင်က ကြေညာချက်တွင် ဖော်ပြခဲ့သည်။

လောင်စာအရည်မှအခဲသို့ ပြောင်းရန်ကြိုးပမ်းမှုများအပါအဝင် မြောက်ကိုရီးယား ပဲ့ထိန်းဒုံး တည်ဆောက်ရေးတွင် အဓိကကျသည်ဟု ယူဆရသည့် ကင်ဂျုံဆစ်၊ မြောက်ကိုရီးယား၏ တိုက်ချင်းပစ် ပဲ့ထိန်းဒုံး တည်ဆောက်မှုများတွင် အဓိကနေရာမှပါဝင်ခဲ့သည့် ရီယောင်ချိုတို့သည် ဒီဇင်ဘာ ၂၂ ရက်တွင် ကုလသမဂ္ဂလုံခြုံရေးကောင်စီက ချမှတ်ခဲ့သည့် ပိတ်ဆို့အရေးယူမှုများတွင် ပါဝင်ကြောင်း ယင်းကြေညာချက်၌ ဖော်ပြခဲ့သည်။

OFAC ၏ ယခုကဲ့သို့ ပိတ်ဆို့အရေးယူမှု စာရင်းတွင် ထည့်သွင်းခံခဲ့ရသူများ၏ မည်သည့်ပိုင်ဆိုင်မှု သို့မဟုတ် အကျိုးစီးပွားမဆိုသည် အမေရိကန်၏ စီရင်ပိုင်ခွင့်အတွင်းရှိပါက ပိတ်ဆို့ခံရမည်ဖြစ်ပြီး ယင်းပိတ်ဆို့ အရေးယူစာရင်းဝင်ပုဂ္ဂိုလ်များနှင့် အမေရိကန်မှ လူများအကြား ငွေကြေးလွဲှပြောင်းမှုများသည် ပိတ်ပင်ခံရမည်ဖြစ်ကြောင်း ဘဏ္ဍာရေးဌာနက ပြည်ပပိုင်ဆိုင်မှုများအား ထိန်းချုပ်ရေးဆိုင်ရာရုံးကို ရည်ညွှန်းလျက် ထုတ်ပြန်ခဲ့သည်။

မြောက်ကိုရီးယား နျူကလီးယားအရေးအား အမေရိကန်နိုင်ငံခြားရေးဝန်ကြီး ရက်တေလာဆင်နှင့် ရုရှားနိုင်ငံခြားရေးဝန်ကြီး ဆာဂေးလက်ရော့ဗ်တို့အကြား ဖုန်းဖြင့်ဆွေးနွေးခဲ့သည်အချိန်တွင် ယခုကဲ့သို့ ပိတ်ဆို့အရေးယူမှု ထုတ်ပြန်ခဲ့ခြင်းဖြစ်သည်။

မြောက်ကိုရီးယား၏ နျူကလီးယားနှင့် ဒုံးစီမံကိန်းများအတွက် အလွန်အမင်းအရေးပါသည့် ရေနံတင်ပို့မှုအား ကန့်သတ်မည့် အမေရိကန်က မူကြမ်းရေးဆွဲခဲ့သော ပိတ်ဆို့အရေးယူမှု ဆုံးဖြတ်ချက်သစ်ကို လုံခြုံရေးကောင်စီက ဒီဇင်ဘာ ၂၂ ရက်တွင် အတည်ပြုခဲ့သည်။ ပြီးခဲ့သောလတွင် တိုက်ချင်းပစ် ပဲ့ထိန်းဒုံးစမ်းသပ်ခဲ့သည့် မြောက်ကိုရီးယားအား ယခုနှစ်အတွင်း တတိယအကြိမ်မြောက် ချမှတ်ခဲ့သည့် ယင်းပိတ်ဆို့အရေးယူမှုဆုံးဖြတ်ချက်အား ပြုံယမ်း၏ အဓိကမဟာမိတ်နှင့် စီးပွားရေး အသက်သွေးကြောဖြစ်သည့် တရုတ်ကပါ ထောက်ခံခဲ့သည်။

ကင်ဂျုံအွန် အစိုးရအတွက် အလွန်အမင်း လိုအပ်နေသည့် ပြည်ပငွေကြေးများအား ရှာဖွေပေးနေသော ပြည်ပရောက် မြောက်ကိုရီးယား အလုပ်သမားများကို ပြန်ပို့ရန်လည်း ယင်းပိတ်ဆို့ အရေးယူမှုဆုံးဖြတ်ချက်သစ်တွင် ညွှန်ကြားခဲ့သည်။

Ref ; AFP