ကမ္ဘာ့အင်အားကြီး နိုင်ငံများဖြစ်သည့် အမေရိကန်နှင့် တရုတ်နိုင်ငံတို့၏ စီးပွားရေးဆိုင်ရာ ပြိုင်ဆိုင်မှုပြင်းထန်မှု၊ အကျိုးစီးပွား ကာကွယ်သည့် လုပ်ငန်းစဉ်များနှင့် မူဝါဒများကြောင့် မြန်မာအပါအဝင် အိမ်နီးချင်းအာ ဆီယံနိုင်ငံများသို့ ရင်းနှီးမြှုပ်နှံမှုစီးဝင်မှု တုံ့ဆိုင်းလျက်ရှိကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ သိရသည်။

မြန်မာနိုင်ငံသို့ အဓိကအားဖြင့် တရုတ်နိုင်ငံ၊ ဟောင်ကောင်၊ ကိုရီးယား၊ ဂျပန်နိုင်ငံနှင့် အာဆီယံနိုင်ငံများဖြစ်သည့် စင်ကာပူ၊ ထိုင်း၊ ဗီယက်နမ်၊ မလေးရှားစသည့်နိုင်ငံများမှ ရင်းနှီးမြှုပ်နှံမှု အများဆုံးဝင်ရောက်ခြင်း ဖြစ်သည်။

ယခုနှစ်တွင် ကမ္ဘာ့အင်အားကြီးနိုင်ငံများဖြစ်သည့် အမေရိကန်နိုင်ငံနှင့် တရုတ်နိုင်ငံကြား၌ စီးပွားရေးဆိုင်ရာပြိုင်ဆိုင်မှုပြင်း ထန်သောဖြစ်စဉ် (Economic Tension ) များဖြစ်ပေါ်လျက်ရှိပြီး မိမိနိုင်ငံ၏ အကျိုးစီးပွားကာကွယ်သည့် အယူအဆများနှင့် လုပ်ငန်းစဉ်များဆောင်ရွက်နေသဖြင့် နိုင်ငံခြားရင်းနှီးမြှုပ်နှံမှု အဓိကဆောင်ရွက်လျက်ရှိသော ယင်းနိုင်ငံများ၏မူဝါဒများကြောင့် မြန်မာနိုင်ငံအပါအဝင် အာဆီယံနိုင်ငံများ၌ပါ ရင်းနှီးမြှုပ်နှံမှု စီးဝင်မှုတွင် တုံ့ဆိုင်းမှုအခြေအနေများ ကြုံတွေ့လျက်ရှိကြောင်း သိရသည်။

မြန်မာနိုင်ငံအတွင်းသို့ နိုင်ငံခြားရင်းနှီးမြှုပ်နှံမှု ဝင်ရောက်မှုနှင့် ပတ်သက်၍ အမှန်စာရင်းများ ရရှိရေး IMF ၏နည်းပညာ အကူအညီဖြင့် FDI Survey များပြုလုပ်လျက်ရှိကြောင်း သိရသည်။

မြန်မာနိုင်ငံ ရင်းနှီးမြှုပ်နှံမှုကော်မရှင်အနေဖြင့် ရင်းနှီးမြှုပ်နှံမှုလုပ်ငန်းများအား စိစစ်ခွင့်ပြုရုံ သာမက အမှန်ဝင်ရောက်မှုနှင့် ပတ်သက်၍ လက်ရှိအချိန်တွင် ခွင့်ပြုထားသော လုပ်ငန်းများ၏ သုံးလတစ်ကြိမ်တင် ပြသည့်အစီရင်ခံစာများအရ နိုင်ငံခြားရင်းနှီးမြှုပ်နှံမှု အမှန်စာရင်းများ ပြုစုလျက်ရှိရာ ၂၀၁၇ – ၂၀၁၈ ဘဏ္ဍာနှစ်အတွက် ဒေါ်လာ ၄၃၃၄ ဒသမ ၇၇၉ သန်းဝင်ရောက်ခဲ့သည်။

၂၀၁၈ ခုနှစ် ဧပြီမှ စက်တင်ဘာလအထိ ကြားကာလခြောက်လအတွင်း ရင်းနှီးမြှုပ်နှံမှုများ ခွင့်ပြုပေးလျက်ရှိရာတွင် ဧပြီနှင့် မေနှစ်လအတွင်း သီလဝါအထူးစီးပွားရေးဇုန်တွင် ဝင်ရောက်ရင်းနှီးမြှုပ်နှံမှု၊ ရင်းနှီးမြှုပ်နှံမှု တိုးမြှင့်ခြင်းအပါအဝင် နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၁၉၃ ဒသမ ၃၅၆ သန်းအထိ ဝင်ရောက်မြှုပ်နှံထားသည်။

၂၀၁၈ ခုနှစ် ဧပြီလမှ စက်တင်ဘာလ ခြောက်လအတွင်း မေလအထိ နိုင်ငံခြားရင်းနှီးမြှုပ်နှံမှု ခွင့်ပြု/ အတည်ပြုပေးခဲ့မှုမှာ နိုင်ငံခြားရင်းနှီးမြှုပ်နှံမှုလုပ်ငန်း ၁၅ ခု၊ ရင်းနှီးမြှုပ်နှံမှု ပမာဏဒေါ်လာ ၉၇ ဒသမ ၁၃၆ သန်း ဖြစ်ကြောင်းဖြစ်သည်။ ရင်းနှီးမြှုပ်နှံမှု တိုးမြှင့်ခြင်းအပါအဝင် စုစုပေါင်းရင်းနှီးမြှုပ်နှံမှု ပမာဏ ဒေါ်လာ ၁၄၈ ဒသမ ၀၅၆ သန်းဖြစ်ကြောင်း သိရသည်။