ရန်ကုန်မြို့ ကမ်းနားလမ်းတွင် ကုန်သေတ္တာတင်ယာဉ်များ သွားလာနေသည်ကို တွေ့ရစဉ် (ဓာတ်ပုံ-ကြည်နိုင်)
ရန်ကုန်မြို့၏ စီးပွားရေးကဏ္ဍ ဖွံ့ဖြိုးစေရေးနှင့် ကုန်သွယ်မှုစရိတ်များ သက်သာစေရေးအတွက် မေ ၁၅ ရက်မှစ၍ အရေးကြီး Export/Import ပို့ကုန်သွင်းကုန် ကုန်စည်များအား လမ်းကြောင်းရှင်းယာဉ်ဖြင့် ဆိပ်ကမ်းနှင့် ချိတ်ဆက်ပို့ဆောင်နေကြောင်း မြန်မာနိုင်ငံ ကုန်သေတ္တာတင် မော်တော်ယာဉ်များအသင်းမှ သိရသည်။
အဆိုပါ ကိစ္စနှင့်ပတ်သက်၍ ဘုရင့်နောင် လမ်းကြောင်းအတွင်း (နေ့ပိုင်း) အရေးကြီး Export/Import ကုန်စည်များအား လမ်းကြောင်းယာဉ်ဖြင့် ဖြတ်သန်းပို့ဆောင်ရန် ဆောင်ရွက်မည် ဖြစ်ခြင်းကြောင့် စနစ်တကျ သွားလာနိုင်ရေး ပူးပေါင်းဆောင်ရွက်ပေးနိုင်ရန် သက်ဆိုင်ရာ ကုန်စည်အသင်းများကိုလည်း အကြောင်းကြားထားသည်။
ရန်ကုန်တိုင်းဒေသကြီး အစိုးရအဖွဲ့၏ စီမံခွင့်ပြုချက်အရ စီးပွားရေးကဏ္ဍ ဖွံ့ဖြိုးတိုးတက်စေရေး၊ ကုန်သွယ်မှုကဏ္ဍ စရိတ်စကများ လျော့နည်းသက်သာစေရေးများနှင့် အများပြည်သူ သွားလာရေးကို မထိခိုက်စေဘဲ ယာဉ်ကြောကျပ်တည်းမှု နည်းပါးသည့် အချိန်အတွင်း အရေးကြီး ကုန်စည် Export/Import ကုန်သေတ္တာယာဉ်များအား သွားလာပို့ဆောင်ရန် ခွင့်ပြုချက်အရ ယာဉ်ထိန်းတပ်ဖွဲ့နှင့်အတူ မြန်မာနိုင်ငံ ကုန်သေတ္တာတင် မော်တော်ယာဉ်များအသင်းက စီစဉ်ဆောင်ရွက်နေခြင်း ဖြစ်သည်။
အဆိုပါ အရေးကြီး Export/Import ကုန်စည်များအား အနောက်ဘက်လမ်းကြောင်း ဖြစ်သော ဘုရင့်နောင် လမ်းကြောင်းပေါ်မှ Export ကုန်သေတ္တာများအတွက် အင်းစိန်သံမဏိစက်ရုံရှေ့ နေရာအား စုရပ်အဖြစ် ထားရှိ၍ နံနက် ၁၁ နာရီတွင် လမ်းကြောင်းရှင်း ယာဉ်များဖြင့် ဆိပ်ကမ်းသို့ ပို့ဆောင်သွားမည် ဖြစ်သည်။ ထို့အတူ Import ကုန်သေတ္တာများအတွက် ရန်ကုန်ဆိပ်ကမ်း (Asia World) ထိပ်စုရပ်မှ မွန်းလွဲ ၁ နာရီတွင် လမ်းကြောင်းရှင်းယာဉ်ဖြင့် ပို့ဆောင်သွားနိုင်ရေးများကို ၂၀၁၈ ခုနှစ် မေ ၁၅ ရက်မှစတင်၍ သွားလာနိုင်ရန် ဆောင်ရွက်ထားကြောင်း သိရသည်။
ထို့ကြောင့် Exporter/Importer ပို့ကုန်သွင်းကုန်လုပ်ငန်းရှင်များ အနေဖြင့် မိမိတို့၏ အရေးကြီး ကုန်စည်များအား အဆိုပါ ခရီးစဉ်များအတွင်း ပါဝင်ပို့ဆောင်နိုင်ရေးအတွက် ကြိုတင်ပြင်ဆင်မှုများ ဆောင်ရွက်နိုင်ရန်နှင့် စနစ်တကျ သွားလာနိုင်ရေး ပူးပေါင်းဆောင်ရွက်ပေးရန် မြန်မာနိုင်ငံ ကုန်သေတ္တာတင် မော်တော်ယာဉ်များ အသင်းက သက်ဆိုင်ရာ အသင်းအဖွဲ့များကို အသိပေးထားသည်။
ရန်ကုန်မြို့အတွင်း တစ်ကီလိုမီတာအတွက် ကုန်စည်သယ်ယူပို့ဆောင်ရေး စရိတ်သည် စိုက်ပျိုးထုတ်လုပ်ရာ မူရင်းဒေသမှ ရန်ကုန်မြို့သို့ ရောက်ရှိသည့် တစ်ကီလိုမီတာအတွက် ကျသင့်သော သယ်ယူပို့ဆောင်ရေး စရိတ်ထက် ခြောက်ဆမှ ရှစ်ဆအထိ များပြားနေကြောင်း ကမ္ဘာ့ဘဏ်အဖွဲ့၏ ကုန်သွယ်ရေးနှင့် ယှဉ်ပြိုင်နိုင်စွမ်း ကဏ္ဍမှ အထောက်အပံ့ ပြုထားသည့် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ပြန်တမ်းဝင် အရာရှိများ ပြုစုထားသော အမျိုးသား ကုန်သွယ်ရေးလမ်းကြောင်း တစ်လျှောက် ထောက်ပံ့ပို့ဆောင်ရေး လုပ်ဆောင်မှုအား လေ့လာအကဲဖြတ်ခြင်း စာတမ်းတွင် သုံးသပ်ထားသည်။
