လီဗာပူးလ်တောင်ပံကစားသမား မာနေက မိမိတို့အနေဖြင့် မန်ယူအသင်းကို လေးစားမှုအပြည့်ရှိသော်လည်း အနိုင်ယူနိုင်စွမ်းရှိကြောင်း ပြောကြားခဲ့သည်။
လီဗာပူးလ်အသင်းသည် ဖေဖော်ဝါရီလ (၂၄) ရက်နေ့တွင် ပရီးမီးယားလိဂ်ပွဲစဉ်အဖြစ် မန်ယူအသင်းကို အဝေးကွင်း၌ သွားရောက်ယှဉ်ပြိုင်ရမည်ဖြစ်သည်။
လီဗာပူးလ်အနေဖြင့် အဆိုပါပွဲစဉ်တွင် အနိုင်ရရှိခဲ့ပါက အမှတ်ပေးဇယားထိပ်ဆုံးသို့ ပြန်လည်တက်လှမ်းနိုင်မည်ဖြစ်ပြီး ပထမအကျော့က အန်ဖီးလ်ကွင်းတွင် (၃-၁) ဂိုးဖြင့်အနိုင်ရခဲ့သော်လည်း လာမည့်ပွဲစဉ်တွင် ပုံစံကောင်းရနေသည့် မန်ယူအသင်းကြောင့် ရုန်းကန်ရဖွယ်ရှိသည်ဟု မီဒီယာများက ဖော်ပြခဲ့သည်။
မာနေက '' ကျွန်တော် အမြဲတမ်းပြောနေကျစကားအတိုင်းပါပဲ။ ကျွန်တော်တို့အနေနဲ့ ကိုယ့်ကိုယ်ကိုယ်ဖိအားတွေပေးတာက ဘာအကူအညီမှ မဖြစ်ပါဘူး။ မန်ယူနဲ့ ကစားမယ့်ပွဲစဉ်ဟာ အခြားပွဲကြီးတွေနဲ့ အတူတူပါပဲ။ မန်ယူအသင်းကို ကျွန်တော်တို့ လေးစားမှုအပြည့်ရှိပါတယ်။ ဒါပေမဲ့ ကျွန်တော်တို့အနေနဲ့ ဘယ်အသင်းကိုမဆို အနိုင်ယူနိုင်စွမ်းရှိတယ်လို့လည်း ယုံကြည်ပါတယ်။ မန်ယူနဲ့ကစားမယ့်ပွဲက ခက်ခဲလာမှာသေချာပါတယ်။ ဒါပေမဲ့ တခြားပွဲကျပ်တွေမှာ အနိုင်ရခဲ့သလိုမျိုး မန်ယူအသင်းကိုလည်း အနိုင်ယူသွားမှာပါ။ လွယ်ကူမှာမဟုတ်ဘူးဆိုပေမယ့် အနိုင်ရဖို့အတွက် ကျွန်တော်တို့ အစွမ်းကုန်ကြိုးစားသွားမှာပါ'' ဟုဆိုခဲ့သည်။
လီဗာပူးလ်အသင်းသည် မန်ယူအသင်းနှင့် ပွဲစဉ်အပြီးတွင် ဝက်ဖို့ဒ်၊ အဲဗာတန်တို့နှင့် ပရီးမီးယားလိဂ်ပွဲစဉ်များကို ဆက်တိုက်ကစားရမည်ဖြစ်ပြီး အဆိုပါပွဲစဉ်များကို တစ်ပွဲချင်းချဉ်းကပ်ကာ အနိုင်ရလဒ်ရရှိအောင် ကြိုးစားသွားမည်ဟုလည်း မာနေက ပြောကြားခဲ့သည်။
