၂၀၁၅ ခုနှစ်တွင် ရုပ်ရှင်နှင့် ဗီဒီယိုဇာတ်ကားများ စတင်ရိုက်ကူးလာပြီး မျက်နှာသစ် သရုပ်ဆောင်များကြားတွင် ပရိသတ် အားပေးမှု များပြားလာသည့်အပြင် ဇာတ်ကားများ ဆက်တိုက် ရိုက်ကူးခွင့် ရရှိလာသည့် သရုပ်ဆောင် မော်ဒယ် ပက်ထရစ်ရှာအား ၂၀၁၅ ခုနှစ်တွင် ထင်ရှားသည့် မျက်နှာသစ် လူငယ်အနုပညာရှင် တစ်ဦးအဖြစ် ရွေးချယ် ဖော်ပြအပ်ပါသည်။ ပက်ထရစ်ရှာသည် ဆယ်ကျော်သက် ကျောင်းသူ အရွယ်ကပင် မော်ဒယ်တစ်ဦးအဖြစ် အနုပညာ လောကအတွင်းသို့ စတင်ရောက်ရှိလာသူ ဖြစ်သည်။ မော်ဒယ်ရှိုးပွဲ စင်မြင့်များထက်တွင်လည်း ထင်ရှားသည့် မော်ဒယ်တစ်ဦး ဖြစ်သည်။ ၂၀၁၅ ခုနှစ်အတွင်းတွင်မူ သရုပ်ဆောင် အကယ်ဒမီ ပြေတီဦးနှင့် တွဲဖက်၍ “ဦးရဲ့အရုပ်” ဇာတ်ကားတွင် ပါဝင်သရုပ်ဆောင်ကာ သရုပ်ဆောင် လောကအတွင်းသို့  စတင်ရောက်ရှိလာခဲ့ခြင်း ဖြစ်သည်။ပက်ထရစ်ရှာသည် “ဦးရဲ့အရုပ်”၊ “မကြွေပါနဲ့ ဆာကူရာ”၊ “အဲဒီလောက်နဲ့ တက်မလာနဲ့ တောက်ချလိုက်မယ်”၊ “ပွဲစားကတုံး” အပါအဝင် ဖန်စီဇာတ်ကားများ ဆက်တိုက် ထွက်ရှိလာပြီးနောက် ပရိသတ် အားပေးချစ်ခင်မှု အများအပြား ရရှိလာခဲ့သည်။ ထို့အပြင် ၂၀၁၅ ခုနှစ်အတွင်း ပထမဆုံး ရုပ်ရှင်ဇာတ်ကားကြီးအဖြစ် ဒါရိုက်တာ အကယ်ဒမီ မောင်မျိုးမင်း (ရင်တွင်းဖြစ်) ရိုက်ကူးသည့် “ရာဇဝင် ရိုင်းသူများ” ရုပ်ရှင်ဇာတ်ကားတွင်လည်း သရုပ်ဆောင် အကယ်ဒမီ ပြေတီဦး၊ မြင့်မြတ်၊ လိုင်လာခန်းတို့နှင့် တွဲဖက်ကာ ပါဝင်သရုပ်ဆောင်ခွင့် ရရှိခဲ့သူ ဖြစ်သည်။“ပက်ထရစ်ရှာ သရုပ်ဆောင်တစ်ယောက် ဖြစ်ချင်တာကတော့ ငယ်ငယ်ကတည်းကပါပဲ။ ဒါပေမဲ့ ၂၀၁၅ မှာတော့ မထင်မှတ်ဘဲ အခွင့်အရေး ရခဲ့တယ်ပေါ့။ စီနီယာတွေ အားလုံးကလည်း အများကြီး ကူညီပံ့ပိုးပေးကြတယ်။ ဒါကြောင့် ဇာတ်ကားတွေထဲမှာ ပက်ထရစ်ရှာ အကောင်းဆုံး ကြိုးစားခွင့် ရခဲ့ပါတယ်။ အသစ်တစ်ယောက် အနေနဲ့ လိုအပ်တာတွေ ရှိနေပေမယ့် ပရိသတ်တွေ အားလုံးကလည်း နားလည်ပြီးတော့ ချစ်ခင်အားပေးခဲ့ကြတယ်။ ဒါကြောင့် ၂၀၁၅ ကတော့ ပက်ထရစ်ရှာအတွက် အရမ်းကို ကံကောင်းတဲ့ နှစ်တစ်နှစ်လို့ ဆိုရမှာပါ။ ကျေနပ်တယ်လို့လည်း ပြောလို့ရပါတယ်” ဟု သရုပ်ဆောင် ပက်ထရစ်ရှာက ပြောပြသည်။“သရုပ်ဆောင်ပိုင်းကို သေချာအာရုံစိုက်ပြီး ဆက်လုပ်ဖြစ်သွားမှာပါ။ ဇာတ်ကားတွေ ရိုက်ကူးရင်းနဲ့လည်း လိုအပ်ချက်တွေရှိရင် လေ့လာသင်ယူသွားပါမယ်။ ဇာတ်ကောင် စရိုက်ကိုလည်း ကွဲပြားတဲ့ ပုံစံလေးတွေ သရုပ်ဆောင်ခွင့် ရချင်ပါတယ်။ လောလောဆယ်တော့ အနုပညာ အလုပ်တွေမှာ ပရိသတ် အားပေးရကျိုးနပ်အောင် အကောင်းဆုံး ကြိုးစားနေပါတယ်” ဟု ပက်ထရစ်ရှာက ဆက်လက် ပြောပြခဲ့သည်။