အိပ်မက်ဆုံရာ ရာသက်ပန် အစီအစဉ်၏ ပထမဆုံး အစီအစဉ်ဖြစ်သည့် Season 1 တွင် ဝင်ရောက် ယှဉ်ပြိုင်ခဲ့ပြီးနောက် အားပေးသည့် ဂီတပရိသတ် အခိုင်အမာ ရရှိလာကာ အဆိုတော် တစ်ဦးအဖြစ် ရပ်တည်လာခဲ့သူ အိပ်မက်ဆုံရာ ရာသက်ပန်Season 1\ Winner ဆုရှင် အောင်ထက်အား ၂၀၁၅ ခုနှစ်အတွင်း ထင်ရှားသည့် လူငယ် အဆိုတော် တစ်ဦးအဖြစ် ရွေးချယ် ဖော်ပြအပ်ပါသည်။ အဆိုတော် အောင်ထက်သည် အိပ်မက်ဆုံရာ ရာသက်ပန် အစီအစဉ် Season 1 ၏ ပြိုင်ပွဲတစ်လျှောက်တွင် ယှဉ်ပြိုင်ရသည့်Theme အမျိုးမျိုး၌ အကောင်းဆုံး ယှဉ်ပြိုင်နိုင်ခဲ့သူဖြစ်ပြီး ပြိုင်ပွဲဝင် တေးသီချင်းပေါင်းများစွာကို ကိုယ်ပိုင်ဟန်ဖြင့် Creation ပြန်လည်ပြုလုပ်ကာ ရသအသစ်တစ်မျိုး ခံစားရရှိစေရန် သီဆိုယှဉ်ပြိုင်နိုင်ခဲ့သူ ဖြစ်သည်။ပြိုင်ပွဲကာလ တစ်လျှောက်လုံးတွင် ပရိသတ် အားပေးမှု အခိုင်အမာ ရရှိခဲ့ပြီးနောက် We Love Aung Htet Fun အဖွဲ့များက များစွာအားပေး ကူညီခဲ့သူ ဖြစ်သည်။ အောင်ထက်သည် အိပ်မက်ဆုံရာ ရာသက်ပန် အစီအစဉ်၏ နောက်ဆုံးအဆင့် ပြိုင်ပွဲတွင် တစ်ကိုယ်တော် တေးစီးရီးတစ်ခွေ ထုတ်ဝေခွင့် အပါအဝင် ဆုများစွာ ရယူပိုင်ဆိုင်နိုင်ခဲ့သည်။ အဆိုတော် အောင်ထက်သည် အိပ်မက်ဆုံရာ ပြိုင်ပွဲအပြီးတွင် စင်မြင့်ဖျော်ဖြေပွဲပေါင်း များစွာ၌ ပါဝင်ဖျော်ဖြေခွင့် ရရှိလာသည့်အပြင် Ponds Cosmetic ၏ Ambassador တစ်ဦးအဖြစ်လည်း ခန့်အပ်ခြင်း ခံခဲ့ရသည်။“ဂီတကတော့ ငယ်ငယ်ကတည်းက ဝါသနာ ပါခဲ့တာပါ။ ကျွန်တော့်ဘဝရဲ့တစ်ခုတည်းသော အိပ်မက်လို့လည်း ပြောလို့ရတယ်။ သီချင်း မဆိုဘဲနဲ့ နေကိုမနေနိုင်ဘူးလို့လည်း ပြောလို့ရပါတယ်။ ဒီလမ်းကြောင်းကို လျှောက်ဖို့အတွက်ကတော့ ကျွန်တော့်အတွက် အရမ်းခက်ခဲခဲ့ပါတယ်။ ဒါပေမဲ့ ကျွန်တော် အားမလျှော့ဘဲ ကြိုးစားခဲ့ပါတယ်။ ကျွန်တော့်ကို ချစ်ခင်အားပေးခဲ့ကြတဲ့ ပရိသတ်တွေရဲ့ ကူညီပံ့ပိုးပေးမှုကြောင့်လည်း ဆက်လက် လျှောက်လှမ်းနိုင်ခဲ့တယ်လို့ ဆိုရမှာပါ” ဟု အဆိုတော် အောင်ထက်က ရှင်းပြခဲ့သည်။