ပြီးခဲ့တဲ့ ရက်ပိုင်းအတွင်းမှာပဲ  ရီးယဲလ်မက်ဒရစ်အသင်းဟာ စီနီယာကစားသမား (၃)ဦးဖြစ်တဲ့ ဘန်ဇီမာ၊ ဟာဇက်နဲ့ အဆန်စီယိုတို့ ဒီနွေရာသီမှာ အသင်းက ထွက်ခွာတော့မယ့်အကြောင်း အတည်ပြုကြေညာခဲ့ပါတယ်။ ဒီအခြေအနေအပေါ် စပိန်မီဒီယာတွေကတော့  ရီးယဲလ်မက်ဒရစ်နဲ့ အသင်းဥက္ကဋ္ဌဖလော်ရန်တီနိုပီရက်ဇ်တို့ရဲ့ ခေတ်သစ်တစ်ခု၊ အပြောင်းအလဲသစ်တစ်ခုဆီချီတက်ဖို့ ပြင်ဆင်ခြင်းလို့ သုံးသပ်ခဲ့ကြပြီး မာရီယာနိုဒီယက်ဇ်၊ စီဘယ်ယော့စ်တို့လို ကစားသမားတွေ ထပ်မံထွက်ခွာဖို့ရှိနေတာ၊ မိုဒရစ်၊ တိုနီကရို့စ်တို့လို စာချုပ်သက်တမ်းကုန်ဆုံးနေပြီဖြစ်တဲ့ ဝါရင့်ကွင်းလယ်လူတွေကို စာချုပ်သစ်ထပ်မံချုပ်ဆိုဖို့ အဆင်မပြေ ဖြစ်နေသေးတဲ့ အခြေအနေတွေအရ ၂၀၂၃နွေ ရာသီအပြောင်းအရွှေ့ဈေးကွက်ဟာ ရီးယဲလ်မက်ဒရစ်ပေါက်ကွဲထွက်ပြမယ့်ကာလလို့လည်း ထင်ကြေးပေးထားကြပါတယ်။