မန်စီးတီးအသင်း၏ အင်္ဂလန်လက်ရွေးစင်တိုက်စစ်ကစားသမား ဂရီးလစ်ရှ်သည် Puma ကုမ္ပဏီနှင့် တစ်နှစ်ပေါင် (၁၀)သန်းတန် ဘောလုံးကန်ဖိနပ်စပွန်ဆာစာချုပ် ချုပ်ဆိုလိုက်ပြီး ဗြိတိန်ဘောလုံးသမားများထဲ၌ တန်ဖိုးအကြီးဆုံးဖိနပ် စပွန်ဆာပိုင်ဆိုင်သူ ဖြစ်လာခဲ့ကြောင်း သိရသည်။
ဂရီးလစ်ရှ်(၂၇ နှစ်)သည် ဆယ်ကျော်သက်အရွယ်ကတည်းက လက်တွဲလာခဲ့သော Nike ကုမ္ပဏီနှင့် လမ်းခွဲကာ Puma နှင့် ပြောင်းလဲလက်တွဲခဲ့ခြင်းဖြစ်သည်။ ဂရီးလစ်ရှ် သည် အက်စတွန်ဗီလာအသင်းမှ မန်စီးတီးအသင်းထံ ပြောင်းရွှေ့ခဲ့ပြီးနောက် ၎င်း၏ ကျော်ကြားမှုပုံရိပ်မှာ ပိုမိုမြင့်တက်လာခဲ့ပြီး စပွန်ဆာများစွာနှင့် လက်တွဲနိုင်ခဲ့သည်။ ယခုအခါ ဘောလုံးသမားများအတွက် အဓိကဝင်ငွေရပေါက်ရလမ်းတစ်ခုဖြစ်သော ဘောလုံးကန်ဖိနပ်စပွန်ဆာကို တန်ဖိုးမြင့်မားစွာဖြင့် ရယူနိုင်ခဲ့ခြင်းဖြစ်သည်။
Puma သည် မန်စီးတီးအသင်း၏ ဝတ်စုံစပွန်ဆာအဖြစ် ရပ်တည်နေသည့် ကုမ္ပဏီဖြစ်ပြီး ဂရီးလစ်ရှ်ကို (၅)နှစ်စာချုပ် ချုပ်ဆိုလိုက်ခြင်းဖြစ်သည်။ Puma ကုမ္ပဏီ၏ အားကစားစျေးကွက်အရာရှိချုပ် ဂျိုဟန်အဒမ်ဆန်က "ကျွန်တော်တို့ ဂျက်(ဂရီးလစ်ရှ်)ကို ဘောလုံးလောကနဲ့ ဒီနေ့ခေတ်အခါရဲ့ အရေးအပါဆုံးပုံရိပ်တစ်ခုဖြစ်လာအောင် လုပ်ဆောင်ပေးသွားချင်ပါတယ်"ဟု ပြောကြားခဲ့သည်။
လက်ရှိဘောလုံးလောက၌ တန်ဖိုးအကြီးဆုံး ဘောလုံးကန်ဖိနပ်စပွန်ဆာ ပိုင်ဆိုင်ထားသူမှာ Puma နှင့် တစ်နှစ် ပေါင်(၂၃)သန်းတန် စာချုပ်ချုပ်ဆိုထားသည့် နေမာဖြစ်ပြီး ဂရီးလစ်ရှ်အနေဖြင့် တန်ဖိုးအကြီးဆုံးစာရင်းတွင် နံပါတ်(၅) နေရာသာ ရပ်တည်နိုင်မည်ဖြစ်သော်လည်း ဗြိတိန်ဘောလုံးသမားများထဲတွင်မူ တန်ဖိုးအကြီးဆုံးဖိနပ်စပွန်ဆာပိုင်ဆိုင်သူအဖြစ် ပြတ်သားစွာ ရပ်တည်နိုင်ခဲ့ကြောင်း သိရသည်။
ဗြိတိန်ဘောလုံးသမားများထဲ၌ ယခင်က တန်ဖိုးအကြီးဆုံးဖြစ်ခဲ့သူမှာ တစ်နှစ်ပေါင်(၃)သန်းဝန်းကျင်ရရှိသည့် ဂါရတ်ဘေးလ်နှင့် ဟာရီကိန်းတို့ဖြစ်ကြောင်း သိရသည်။ ဂရီးလစ်ရှ် သည် Puma နှင့် တရားဝင်စာချုပ်မချုပ်ဆိုရသေးမီ ပြီးခဲ့သည့်ရက်သတ္တပတ်များကတည်းက အပြာရောင်ဖိနပ်အသစ်ကို စတင်ဝတ်ဆင်နေခဲ့ကြောင်းလည်း သိရသည်။
