ဥရောပဘောလုံးလောကမှာသာမက၊ ကမ္ဘာ့ဘောလုံးလောကရဲ့ ဒေသအသီးသီးမှာ Treble Champion (တစ်ရာသီအတွင်း အဓိကမေဂျာ ဆုဖလား ၃ လုံးချန်ပီယံ) ဆိုတဲ့ ဝေါဟာရ ဘောလုံးကလပ်အသင်းတိုင်းအတွက် အခမ်းနားဆုံးသော အိပ်မက်ပန်းတိုင်ပါပဲ။ ဘောလုံးရာသီတစ်ရာသီအတွင်းမှာ သက်ဆိုင်ရာထိပ်တန်းလိဂ်အမှတ်ပေး ချန်ပီယံ၊ ပြည်တွင်းရှုံးထွက်ဖလားနဲ့ တိုက်ကြီးများအလိုက် အမြင့်ဆုံးသော ရှုံးထွက်ချန်ပီယံ (ဥပမာ- ဥရောပချန်ပီယံလိဂ်၊ အာရှချန်ပီယံလိဂ်နှင့် တောင်အမေရိက ကိုပါလီဘာတာဒိုးစ် ပြိုင်ပွဲများ) ဆုတွေကို တစ်ပြိုင်နက်ရယူနိုင်တဲ့ အသင်းကသာ ဘောလုံးသမိုင်းရဲ့ ပြီးပြည့်စုံသော Treble Champion အဖြစ် သတ်မှတ်ခံရတာပါ။ တိုက်ဒေသအသီးသီးရဲ့ Treble Champion အားပြိုင်မှုတွေထဲမှာမှ ပရိသတ်အရင်းနှီးဆုံးနဲ့ တန်းဖိုးအကြီးမားဆုံး Treble Champion အဖြစ် သတ်မှတ်ရမှာကတော့ ဥရောပဘောလုံးရပ်ဝန်းဖြစ်ပြီး ပြည်တွင်းထိပ်တန်းလိဂ်အမှတ်ပေးချန်ပီယံဆု၊ ပြည်တွင်းရှုံးထွက်ဖ လားနဲ့ ဥရောပချန်ပီယံလိဂ် ချန်ပီယံဆု (၃)လုံးစလုံးကို တစ်ရာသီအတွင်း ရယူနိုင်တဲ့ အသင်းတွေသာ အငြင်းပွားဖွယ်မရှိ ဖလား (၃)လုံးချန်ပီယံအဖြစ်မှတ်တမ်းဝင်နိုင်မှာပါ။ သာမန်အရကြည့်မယ်ဆိုရင် ဥရောပထိပ်တန်းအသင်းကြီးတွေအတွက် Treble Champion အောင်ပွဲဟာ ဖြစ်တန်စွမ်း မြင့်တယ်လို့ထင်စရာရှိပေမဲ့ တကယ်လက်တွေ့မှာတော့ အတော်လေးကိုစိန်ခေါ်မှုကြီးမားလွန်းတဲ့ မှတ်တမ်းပါပဲ။