သင်္ဃန်းကျွန်းမြို့နယ် အောင်ဇေယျ ၅ လမ်းရှိ တိုက်တစ်ခန်း ဖောက်ထွင်းခံရပြီး ငွေကျပ်သိန်းနှစ်ဆယ်ကျော်တန်ဖိုးရှိ ပစ္စည်းများခိုးယူခံရမှု ဇန်နဝါရီ ၁၇ ရက်က ဖြစ်ပွားခဲ့ကြောင်း သိရသည်။
ဇန်နဝါရီ ၁၇ ရက် ၊ မွန်းလွဲ ၁၂ နာရီကျော်ခန့်တွင် သင်္ဃန်းကျွန်းမြို့နယ် ၊ ရန်ကုန်သစ်ရပ်ကွက် ၊ အောင်ဇေယျ ၅ လမ်းရှိ တိုက်ခန်းတစ်ခန်းသော့အား ဖျက်ကာ နေအိမ်အတွင်းသို့ ဝင်ရောက်ပြီး ပစ္စည်းများ ခိုးယူခဲ့ခြင်းဖြစ်ကြောင်း အဆိုပါနေရာအနီးနေသူများထံမှ သိရသည်။
(အပေါ်ဆုံးထပ်ရဲ့အောက်ခန်းပါ။အဲ့အချိန်မှာက တိုက်ခန်းမှာ လူမရှိတဲ့အချိန်ပါ။နှစ်ယောက်က လှေကားကနေအရင်တက်သွားတယ်။နောက်နှစ်ယောက်က နောက်ကနေအခြေအနေကြည့်ပြီး တက်တယ်။ပြီးတော့ အိမ်ထဲကို ဝင်ပြီး ခိုးယူသွားတာ)ဟု အဆိုပါတိုက်နေသူတစ်ဦးက ပြောကြားသည်။
အဆိုပါတိုက်ခန်းတွင် သုံးဦးနေထိုင်ပြီး ၄င်းတို့အပြင်သွားသည့်အချိန်တွင် သော့ဖျက်ကာ ခိုးယူခံရခြင်းဖြစ်ကြောင်း သိရသည်။
(လင်မယားနှစ်ယောက်က အလုပ်သွားတယ်။ပြီးတော့ သူတို့ အမေတစ်ယောက်လည်းနေတယ်။သူတို့အမေကလည်း အပြင်ထွက်သွားတဲ့အချိန်မှာ ဖြစ်တာပါ။လာခိုးတဲ့သူတွေက AD Van အငှားယာဉ်နဲ့လာတာပါ။စီစီတီဗီမှတ်တမ်းအရသိရတာပါ)ဟု အဆိုပါတိုက်နေသူတစ်ဦးက ပြောကြားသည်။
ပြီးခဲ့သည့် ဒီဇင်ဘာလအတွင်းက အဆိုပါတိုက်၏ အခြားတိုက်ခန်းမှာလည်း ဖောက်ထွင်းခံရကြောင်း ၊ တစ်လအတွင်း နှစ်ကြိမ်ဖောက်ထွင်းခံရကြောင်း အဆိုပါတိုက်နေသူတစ်ဦး၏ ပြောကြားချက်အရသိရသည်။
(ပြီးခဲ့တဲ့ ဒီဇင်ဘာလတုန်းကလည်း ဒီတိုက်က တိုက်ခန်းတစ်ခန်း ဖောက်ထွင်းခံရသေးတယ်။အဲ့တုန်းကလည်း လာဖောက်တဲ့သူတွေက Probox အငှားယာဉ်နဲ့လာတာ။သူတို့က လာရင် လမ်းကိုကားနဲ့အရင်ပတ်ကြည့်တယ်)ဟု အဆိုပါတိုက်နေသူတစ်ဦးက ပြောကြားသည်။
တိုက်ခန်းအတွင်းမှ ငွေကျပ် ၁၇ သိန်းခန့်တန်ဖိုးရှိ လပ်တော့ပ်တစ်လုံး ၊ ကျောက်စိမ်းအလုံးသေးအချို့နှင့် ဖုန်းအဟောင်းသုံးလုံး ၊ တန်ဖိုးစုစုပေါင်း ငွေကျပ် ၂၅ သိန်းတန်ဖိုးရှိကြောင်း သိရသည်။
