ရီးယဲလ်မက်ဒရစ်အသင်းနှင့် စာချုပ်သက်တမ်းတစ်နှစ်သာကျန်ရှိတော့သည့် ဂျာမန်ကွင်းလယ်လူ တိုနီကရို့စ်၏ မက်ဒရစ်အနာဂတ်မှာ အချက်(၃)ချက်သာ ဖြစ်နိုင်ဖွယ်ရှိကြောင်း စပိန်အားကစားသတင်းစာ AS ကဖော်ပြခဲ့သည်။
အသက် (၃၂)နှစ်အရွယ်ရှိ တိုနီကရို့စ်သည် ရီးယဲလ်မက်ဒရစ်အသင်း၏ အဓိကကွင်းလယ်ကစားသမားအဖြစ် ရာသီပေါင်းများစွာခြေစွမ်းပြခဲ့သူဖြစ်ပြီး ၎င်းနှင့် ရီးယဲလ်အသင်း၏ လက်ရှိစာချုပ်မှာ လာမည့် ၂၀၂၃ နွေရာသီတွင် ကုန်ဆုံးမည်ဖြစ်သည်။
ပြီးခဲ့သည့် ရက်သတ္တပတ်အတွင်းက ရီးယဲလ်အသင်းသည် တိုနီကရို့စ်အား စာချုပ်သက်တမ်းတိုးရန်နှင့်ပတ်သက်၍ ဆွေးနွေးခဲ့ရာတွင် တိုနီကရို့စ်က ငြင်းဆန်ခဲ့ကြောင်း သိရသည်။
တိုနီကရို့စ်က လာမည့်ရာသီ ၎င်း၏ခြေစွမ်းနှင့် စွမ်းဆောင်ရည်ကို စောင့်ကြည့်ပြီးမှသာ စာချုပ်သစ်အတွက် ဆုံးဖြတ်လိုကြောင်း တုံ့ပြန်ပြောကြားခဲ့ခြင်းအပေါ် AS က ယခုကဲ့သို့ ဖော်ပြခဲ့ခြင်း ဖြစ်သည်။
AS ၏ဖော်ပြမှုတွင် တိုနီကရို့စ်အနေဖြင့် ပထမရွေးချယ်မှုတွင် ရီးယဲလ်နှင့်စာချုပ်သစ်ချုပ်ဆိုမည်။ ဒုတိယရွေးချယ်မှုတွင် စာချုပ်သက်တမ်းကုန်ဆုံးပါက ကစားသမားဘဝမှ အနားယူမည်ဖြစ်ပြီး၊ တတိယရွေးချယ်မှုတွင် စာချုပ်သက်တမ်းမတိုးတော့ဘဲ မေဂျာလိဂ်သို့ ပြောင်းရွှေ့လိမ့်မည်ဟု ပါရှိခဲ့ကာ ယင်း (၃)ချက်ထဲမှ တစ်ချက်ကိုသာ ရွေးချယ်ဆုံးဖြတ်လိမ့်မည်ဖြစ်ကြောင်း သိရသည်။
