အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ စီမံ/ဘဏ္ဍာဝန်ကြီးဟောင်း ဦးကျော်ဝင်းနှင့် ဦးစိုးဝင်း၊ ဒုတိယဝန်ကြီးဟောင်း ဦးဆက်အောင်နှင့် သြစတြေးလျနိုင်ငံသား ရှောင်တာနယ်တို့ကို အစိုးရလျှို့ဝှက်ချက် များ အက်ဥပဒေဖြင့်တရားစွဲထားသည့်အမှုနှင့် ပတ်သက်၍ စီမံ/ဘဏ္ဍာဝန်ကြီးဟောင်း ဦးစိုးဝင်း ကျန်းမာရေးမကောင်းသဖြင့် စစ်ဆေးခဲ့ခြင်းမရှိကြောင်း တရားရုံးနှင့် နီးစပ်သည့် အသိုင်းအဝိုင်းမှ သိရသည်။
ဒီဇင်ဘာ ၁၆ ရက်က ဒက္ခိဏခရိုင်တရားသူကြီး တာဝန်ယူဆောင်ရွက်သည့် နေပြည်တော်ရှိ ဇမ္ဗူသီရိအထူးတရားရုံးတွင် အစိုးရလျှို့ဝှက်ချက်များ အက်ဥပဒေပုဒ်မ ၃(၁)(ဂ)ဖြင့် တရားစွဲဆိုခြင်း ခံထားရသည့် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ စီမံ/ဘဏ္ဍာဝန်ကြီးဟောင်း ဦးကျော်ဝင်းနှင့် ဦးစိုးဝင်း၊ ဒုတိယဝန်ကြီးဟောင်း ဦးဆက်အောင်နှင့် သြစတြေးလျနိုင်ငံသား ရှောင်တာနယ်တို့ကို စစ်ဆေးရန် ချိန်းဆိုထားခြင်းဖြစ်သော်လည်း ဦးစိုးဝင်း၏ ကျန်းမာရေးအခြေအနေကြောင့် အမှုကို စစ်ဆေးခဲ့ခြင်းမရှိကြောင်း တရားရုံးနှင့် နီးစပ်သည့် အသိုင်းအဝိုင်းမှ သိရသည်။
အထက်ပါအမှုနှင့်ပတ်သက်၍ တရားလိုဖြစ်သူအား အဓိကစစ်မေးခြင်းနှင့် ပြန်လှန်စစ်မေးခြင်းများ စစ်ဆေးပြီးစီးပြီဖြစ်ခြင်းကြောင့် ဒီဇင်ဘာ ၁၆ ရက် ရုံးချိန်းတွင် တရားလိုပြသက်သေအား စစ်ဆေးရန် ချိန်းဆိုထား ထားခြင်းဖြစ်ကြောင်း တရားရုံးနှင့်နီးစပ်သည့် အသိုင်းအဝိုင်းမှ သိရသည်။
ဝန်ကြီးဟောင်းဦးစိုးဝင်း၏ ကျန်းမာရေးမကောင်းသဖြင့် အမှုအားစစ်ဆေးခဲ့ခြင်း မရှိသော်လည်း သြစတြေးလျနိုင်ငံသား ရှောင်တာနယ် တစ်ဦးတည်းအား လဝကအက်ဥပဒေဖြင့် တရားစွဲဆိုထားသည့် အမှုအတွက် တရားလိုပြသက်သေတစ်ဦးကို စစ်ဆေးခဲ့ကြောင်း တရားရုံးနှင့်နီးစပ်သည့် အသိုင်းအဝိုင်းမှ သိရသည်။
အထက်ပါအမှုများနှင့်ပတ်သက်၍ ဒီဇင်ဘာ ၂၃ ရက်တွင် ထပ်မံရုံးထုတ်စစ်ဆေးရန် ချိန်းဆိုထားကြောင်း သိရသည်။