ဘာစီလိုနာအသင်း၏ အာဂျင်တီးနားဝါရင့်တိုက်စစ်မှူး အဂွဲရိုးသည် နှလုံးပြဿနာကြောင့် ဘောလုံးသမားဘဝမှ အနားယူတော့မည်ဖြစ်ပြီး ယခုရက်သတ္တပတ်အတွင်း အတည်ပြုကြေညာမည်ဟု သတင်းများထွက်ပေါ်လျက်ရှိသော်လည်း ယင်းသတင်းများအပေါ် ဘာစီလိုနာအသင်း၏နည်းပြဖြစ်သူ ဇာဗီက ငြင်းဆန်ခဲ့ကြောင်း စပိန်မီဒီယာများက ဖော်ပြခဲ့ကြသည်။
အသက် (၃၃)နှစ်အရွယ်ရှိ အဂွဲရိုးသည် ပြီးခဲ့သည့် အောက်တိုဘာလကုန်ပိုင်းက ယှဉ်ပြိုင်ကစားခဲ့သော အလာဗတ်စ်အသင်းနှင့် (၁-၁)ဂိုးသရေကျခဲ့သည့် လာလီဂါပွဲစဉ်တွင် ပွဲကစားနေစဉ်အတွင်း နှလုံးအမောဖောက်သည့် အခြေအနေကိုကြုံတွေ့ခဲ့ရသည့်အတွက် ပွဲဆက်ကစားနိုင်ခြင်းမရှိတော့ဘဲ လူစားလဲခဲ့ရသည်။
ထို့နောက် အဂွဲရိုး၏နှလုံးကျန်းမာရေးအခြေအနေအား ဆေးရုံတွင် စောင့်ကြည့်ကုသမှုများပြုလုပ်ခဲ့ပြီး မူလက (၃)လခန့်အနားယူရမည်ဟု သတင်းများထွက်ပေါ်ခဲ့သည်။
သို့သော် ပြီးခဲ့သည့်ရက်သတ္တပတ်ကတည်းက အဂွဲရိုးအနေဖြင့် ဘောလုံးကစားသမားဘဝမှ အနားယူရတော့မည်ဟု သတင်းများ ခပ်စိပ်စိပ်ထွက်ပေါ်ခဲ့ပြီး လက်ရှိအချိန်တွင်မူ စပိန်အားကစားသတင်းစာ Marca ၏ အားကစားက လောင်ရှင်တစ်ဦးဖြစ်သူ ဂျရတ်ရိုမဲရိုးက အဂွဲရိုးအနေဖြင့် ဘောလုံးသမားဘဝမှအနားယူကြောင်း လာမည့်ရက်သတ္တပတ်အတွင်း သတင်းစာရှင်းလင်းပွဲပြုလုပ်ကာ ကြေညာလိမ့်မည်ဟု ၎င်း၏ Twitter တွင် ရေးသားခဲ့သည်။
ရိုမဲရိုး၏ ရေသားမှုကို ကိုးကားကာ ဥရောပမီဒီယာများက အဂွဲရိုးအနားယူမည့်သတင်းအား ဖော်ပြခဲ့ကြပြီး ဘာစီလိုနာအသင်းနည်းပြ ဇာဗီကမူ ယင်းသတင်းများကို မိမိ မသိရှိကြောင်းနှင့် အဂွဲရိုးအနေဖြင့် ဘောလုံးလောကသို့ ပြန်လာနိုင်လိမ့်မည်ဟု မျှော်လင့်ထားကြောင်း တုံ့ပြန်ပြောကြားခဲ့သည်။
ဇာဗီက ''အဂွဲရိုးရဲ့အကြောင်းလား။ ကျွန်တော်ကတော့ သတင်းတွေအားလုံးကို မသိရှိပါဘူး။ ပြီးခဲ့တဲ့ရက်တွေမှာ ကျွန်တော့်အနေနဲ့ သူ (အဂွဲရိုး)နဲ့ စကားပြောခဲ့ပြီး သူ့အနေနဲ့ သက်သောင့်သက်သာရှိနေပါတယ်။ ကျွန်တော်တို့အနေနဲ့လည်း အဂွဲရိုးရဲ့အခြေအနေကို စောင့်ကြည့်နေပါတယ်။ ဒါပေမဲ့ ကျွန်တော်တို့အားလုံး သူ (အဂွဲရိုး) အကောင်းဆုံးပုံစံနဲ့ပြန်လာပြီး ဘောလုံးပြန်ကစားနိုင်ဖို့ မျှော်လင့်ထားပါတယ်''ဟု ပြောကြားခဲ့သည်။
ထို့ပြင် ဇာဗီက သတင်းများအားလုံးမှာ မှန်ကန်မှု မရှိနိုင်ကြောင်း၊ ဘာစီလိုနာအသင်းကို အားပေးသူအားလုံးမှာ အဂွဲရိုး ပြန်လည်ကျန်းမာလာမည့် အချိန်ကို မျှော်လင့်နေကြောင်း ပြောကြားခဲ့သည်။
ပရီးမီးယားလိဂ်ကလပ် မန်စီးတီးအသင်းသမိုင်းတစ်လျှောက် သွင်းဂိုးအများဆုံးသွင်းယူသူ (၂၆၀ ဂိုး) အဖြစ် စံချိန်တင်ထားသည့် အဂွဲရိုးသည် ပြီးခဲ့သည့်နွေရာသီအပြောင်းအရွှေ့က ဘာစီလိုနာအသင်းသို့ အလွတ်ပြောင်းရွှေ့ကြေးဖြင့် ပြောင်းရွှေ့လာသူ ဖြစ်သည်။
အဂွဲရိုးသည် ဘာစီလိုနာသို့ ရောက်ရှိခဲ့ပြီး ဒဏ်ရာပြဿနာကြောင့် ရာသီအစ (၂)လခန့်ကို လွဲချော်ခဲ့သလို၊ ပွဲများပြန်လည်ကစားနိုင်ချိန်တွင်လည်း နှလုံးပြဿနာ ကြုံတွေ့ခဲ့ရပြီး ဘောလုံးလောကမှ အနားယူရန် နီးစပ်သည်အထိ ဆိုးရွားသည့်အခြေအနေနှင့် ကြုံတွေ့နေခြင်းဖြစ်သည်။
