ဂျာမနီနိုင်ငံတွင် ကိုရိုနာဗိုင်းရပ်စ်စတုတ္ထလှိုင်း ရိုက်ခတ်မှု မြင့်တက်လာသောကြောင့် ဘွန်ဒစ်လီဂါကလပ် လိုက်ပ်ဇစ်အသင်း၏ အိမ်ကွင်းပွဲစဉ်(၃)ပွဲကို ပရိသတ်မပါဘဲ ကွင်းပိတ်ယှဉ်ပြိုင်ရန် ဒေသတွင်းတာဝန်ရှိသူများက ညွှန်ကြားခဲ့ကြောင်း သိရသည်။
လိုက်ပ်ဇစ်အသင်းသည် Saxony ပြည်နယ်မှ လူဦးရေအထူထပ်ဆုံးမြို့ဖြစ်သည့် လိုက်ပ်ဇစ်မြိုတွင် အခြေစိုက်ထားသော အသင်းဖြစ်ပြီး ယင်းပြည်နယ်ကို Lockdown စတင်သတ်မှတ်ခဲ့ခြင်းကြောင့် လိုက်ပ်ဇစ်အသင်းမှာ ကွင်းပိတ်ကစားရခြင်းဖြစ်သည်။
လိုက်ပ်ဇစ်အသင်းသည် နိုဝင်ဘာ(၂၈)တွင် လေဗာကူဆင်၊ ဒီဇင်ဘာ(၇)တွင် မန်စီးတီး၊ ဒီဇင်ဘာ(၁၁)တွင် မိုချန်ဂလာဘတ်တို့နှင့် အိမ်ကွင်းပွဲစဉ်များ ယှဉ်ပြိုင်ကစားသွားရမည်ဖြစ်ပြီး ယင်း(၃)ပွဲကို ကွင်းပိတ်ကစားရန် ဒေသတွင်းတာဝန်ရှိသူများက ညွှန်ကြားခဲ့ခြင်းဖြစ်သည်။
ထို့ကြောင့် ဘွန်ဒစ်လီဂါပွဲစဉ်များသာမက မန်စီးတီးအသင်းနှင့် ယှဉ်ပြိုင်ကစားရမည့် ချန်ပီယံလိဂ်ပွဲစဉ်လည်း ပါဝင်သွားခဲ့သည်။
လိုက်ပ်ဇစ်အသင်းသည် ယင်းပွဲစဉ်အတွက် မန်စီးတီးအသင်းပရိသတ်များထံ လက်မှတ် (၁၂၀၀) ကျော် ရောင်းချထားခဲ့ပြီးပြီ ဖြစ်ကြောင်းလည်း သိရသည်။
ဂျာမနီနိုင်ငံတွင် ကိုရိုနာဗိုင်းရပ်စ်ကူးစက်မှု ပြန်လည်မြင့်တက်လာခဲ့ပြီး ပြီးခဲ့သည့်သောကြာနေ့က Positive အဖြေထွက်သူ (၅၇၃၀၂)ဦးရှိသည်အထိ စံချိန်တင်ကူးစက်ခံခဲ့ရသည်။
ထို့ကြောင့် ဂျာမန်တာဝန်ရှိသူများက အချိန်မီ ထိန်းချုပ်နိုင်ရန် စီစဉ်ခြင်းဖြစ်ပြီး ဘိုင်ယန်မြူးနစ်အသင်းအနေဖြင့်လည်း အိမ်ကွင်းတွင် ပရိသတ် (၂၅%) သာ ကြည့်ရှုခွင့်ပြုရမည်ဖြစ်ကြောင်း သိရသည်။
သို့သော် ၎င်းတို့ပြည်နယ်ကို အန္တရာယ်အရှိဆုံးအဖြစ် သတ်မှတ်ခြင်းအတွက် လိုက်ပ်ဇစ်အသင်းတာဝန်ရှိသူများက မကျေမနပ်ဖြစ်နေပြီး မေးခွန်းထုတ်ခဲ့ကြောင်း သိရသည်။
