အက်စတွန်ဗီလာအသင်း၏ နည်းပြသစ် စတီဗင်ဂျရတ်က အသင်းဟောင်း လီဗာပူးလ် နှင့် အန်ဖီးလ်ကွင်းတွင် ပြန်လည်ရင်ဆိုင်ရချိန်တွင် အကောင်းဆုံးဖြစ်အောင် လုပ်ဆောင်သွားမည်ဟု ကြုံးဝါးခဲ့သည်။ ထို့ပြင် ဂျရတ်က အက်စတွန်ဗီလာနည်းပြရာထူးမှာ ငြင်းပယ်ရန်ခက်သော အခွင့်အလမ်းတစ်ရပ်ဖြစ်ကြောင်း Villa TV နှင့် တွေ့ဆုံရာတွင် ပြောကြားခဲ့သည်။
ဂျရတ်သည် စကော့တလန်ကလပ် ရိန်းဂျားစ်အသင်းကို ကိုင်တွယ်နေရာမှ အက်စတွန်ဗီလာအသင်း၏ ကမ်းလှမ်းမှုကို လက်ခံကာ ပရီးမီးယားလိဂ်သို့ နည်းပြအဖြစ် တစ်ကျော့ပြန်ခြေချရန် ဆုံးဖြတ်ခဲ့ခြင်းဖြစ်သည်။
ဂျရတ်က "အက်စတွန်ဗီလာအသင်းကို အပြင်ပန်းအရ အစဉ်အလာကြီးတဲ့ အသင်းတစ်သင်းအဖြစ် သိထားပြီး အခုအတွင်းကျကျ ပတ်သက်ရမယ့်အခြေအနေအတွက် စိတ်လှုပ်ရှားမိပါတယ်။ ကျွန်တော်က စိန်ခေါ်မှုကို နှစ်သက်သလို၊ စွန့်စားမှုကိုလည်း နှစ်သက်ပါတယ်။ ဒါကြောင့် ဒီအသင်းက ကျွန်တော်နဲ့ သင့်လျော်မယ်လို့လည်း ထင်ပါတယ်။ ဘာကြောင့်လဲဆိုတော့ ဒီအသင်းပရိသတ်တွေက အလွန်စိတ်ဓာတ်ပြင်းထန်သူတွေဖြစ်ပြီး နိုင်ပွဲရဖို့ ဖိအားပေးတတ်၊ တောင်းဆိုတတ်တာကြောင့်ပါ။ ဗီလာအသင်းက ကျွန်တော့်ကို စိတ်ဝင်စားတယ်လို့ သတင်းကြားပြီး မြန်မြန်ဆန်ဆန်ဖြစ်ပျက်ခဲ့ပါတယ်။ ဒါဟာ ငြင်းပယ်ဖို့ခက်တဲ့ ကြီးမားတဲ့အခွင့်အလမ်းပါ"ဟု ပြောကြားခဲ့သည်။
