စပါးအသင်း၏အီတလီလူမျိုးနည်းပြ ဖြစ်သူ ကွန်တီသည် လာမည့်အပြောင်းအ ရွှေ့ကာလများအတွင်း စီးရီးအေအခြေစိုက် ကစားသမားအချို့ကို ခေါ်ယူနိုင်ရန် ပစ်မှတ် ထားလျက်ရှိကြောင်း Goal.com က ဖော်ပြခဲ့သည်။
ကွန်တီ စိတ်ဝင်စားနေသည့် ကစားသမားစာရင်းတွင် ဖီအိုရင်တီးနားအသင်းမှ ဆားဘီးယားတိုက်စစ်မှူး ဗလာဟိုဗစ်၊ အေစီမီလန်အသင်းမှ အိုင်ဗရီကို့စ်ကွင်းလယ်လူ ကက်ဆီးနှင့် အင်တာမီလန်အသင်းမှ ခရိုအေးရှားကွင်းလယ်လူ ဘရိုဇိုဗစ်တို့ကို အဓိကခေါ်ယူရန် စိတ်ဝင်စားနေခြင်းဖြစ်သည်။
အပြောင်းအရွှေ့စျေးကွက်တွင် ငွေကြေးကို စိစိစစ်စစ် အသုံးပြုတတ်သူ စပါးအသင်းဥက္ကဋ္ဌ ဒန်နီယဲလ်လီဗီသည် အသင်းနည်းပြ ကွန်တီနှင့် အားကစားဒါရိုက်တာ ပါရာတီချီ တို့စိတ်ကြိုက် ကစားသမားခေါ်ယူနိုင်ရန်အတွက် ငွေကြေးအမြောက်အမြား သုံးစွဲခွင့် ပေးသွားဖွယ်ရှိနေသည်ဟုလည်း သတင်းများ ပေါ်ထွက်လျက်ရှိသည်။
အထက်ပါကစားသမား သုံးဦးအနက် ဖြစ်နိုင်ခြေအရှိဆုံးမှာ ဗလာဟိုဗစ်ဖြစ်ပြီး ဖီအိုရင်တီးနားအသင်းကလည်း စာချုပ်သက်တမ်းတိုးတော့မည်မဟုတ်ဟု တရားဝင်ကြေညာထားသူဖြစ်သည်။ သို့သော် ဗလာဟိုဗစ်ကို ဖီအိုရင်တီးနားအသင်းက ပရီးမီးယားလိဂ်တစ်သင်းသင်းသို့ ရောင်းချရန်သာ ဆန္ဒရှိနေသော်လည်း ကာယကံရှင်ဖြစ်သူ ကစားသမားကိုယ်တိုင်မှာမူ ဂျူဗင်တပ်စ်အသင်းသို့ ပြောင်းရွှေ့ရန် ဆန္ဒပြင်းပြနေကြောင်း သိရသည်။
ကက်ဆီး၊ ဘရိုဇိုဗစ် တို့မှာ ကလပ်အသင်း၏အမာခံကစားသမားများဖြစ်သော်လည်း မိခင်ကလပ်အသင်းမှ ပြောင်းရွှေ့ကြေးအမြောက်အမြားရရှိလျှင် ရောင်းချဖွယ်ရှိနေသည်။
