ဘာစီလိုနာအသင်းတိုက်စစ်မှူး အဂွဲရိုးက နှလုံးအခြေအနေကြောင့် ကစားသမားဘဝ အဆုံးသတ်သွားနိုင်သည့် ခန့်မှန်းမှုများကို ငြင်းဆန်ပယ်ချခဲ့ပြီး သုံးလအကြာတွင် ပြန်ကစားနိုင်ရန် မျှော်လင့်ထားကြောင်း တုံ့ပြန်ပြောကြားခဲ့သည်။
အသက် ၃၃ နှစ်ရှိပြီဖြစ်သည့် အာဂျင်တီးနားလက်ရွေးစင် ကစားသမား အဂွဲရိုးသည် အောက်တိုဘာ ၃၀ ရက်က အလာဗတ်စ်အသင်းနှင့်ကစားသည့် လာလီဂါပွဲစဉ်တွင် အသက်ရှူရ ခက်ခဲသည့်အခြေအနေ ကြုံတွေ့ခဲ့ရပြီးနောက် ဆေးရုံသို့ပို့ဆောင် ခဲ့ရသည်။
၎င်း၏နှလုံးအခြေအနေကို စစ်ဆေးပြီးနောက် လက်ရှိအချိန်တွင် အဂွဲရိုးအား လူစာရင်းအတွက် ရွေးချယ်ရန် မဖြစ်နိုင် သေးကြောင်းနှင့် လာမည့်သုံးလအတွင်း ကုသမှုရလဒ်အပေါ် မူတည်၍ ဆုံးဖြတ်သွားမည်ဖြစ်ကြောင်း ဘာစီလိုနာအသင်းက ထုတ်ပြန်ထားသည်။ သို့သော် ဘာစီလိုနာအခြေစိုက် Catalunya Radio က အဂွဲရိုး၏ နှလုံးအခြေအနေမှာ ပြင်းထန်သောကြောင့် ဘောလုံးပြန်ကစားရန် မဖြစ်နိုင်တော့ကြောင်း ထုတ်လွှင့်ခဲ့သည်။ သို့ဖြစ်ရာ အဂွဲရိုးက ယင်းသတင်းများ အား Twitter မှတစ်ဆင့် ငြင်းဆန်ပယ်ချခဲ့ခြင်းဖြစ်သည်။
" ကောလာဟလတွေ ထွက်နေတာပါ။ အသင်းရဲ့ ဆေးဘက်ဆိုင်ရာတာဝန်ရှိသူတွေ ညွှန်ကြားတဲ့အတိုင်း ကျွန်တော်လိုက်နာနေတယ်ဆိုတာ အသိပေးပါရစေ။ စစ်ဆေးမှုတွေ၊ ကုသမှုတွေ ပြုလုပ်နေပြီး ရက် ၉၀ အတွင်း တိုးတက်မှုအခြေအနေကို စောင့် ကြည့်နေပါတယ်။ ကျွန်တော်ကတော့ အမြဲတမ်း အပြုသဘောပဲ တွေးပါတယ်" ဟု အဂွဲရိုးက တုံ့ပြန်ပြောကြားခဲ့သည်။
အဂွဲရိုးသည် ပြီးခဲ့သည့် နွေရာသီအပြောင်းအရွှေ့ကာလတွင် မန်စီးတီးအသင်းမှ ဘာစီလိုနာသို့ ပြောင်းရွှေ့ကြေးအလွတ် ဖြင့် ရောက်ရှိလာသူဖြစ်ပြီး ခြေသလုံးကြွက်သားဒဏ်ရာကြောင့် ရာသီအစပွဲစဉ်များကို လွဲချော်ခဲ့ရသည်။ ၎င်းသည် လာလီဂါ ပြိုင်ပွဲတွင် ပွဲထွက်ကစားသမားအဖြစ် နှစ်ပွဲ၊ လူစားဝင်အဖြစ် နှစ်ပွဲသာ ကစားခွင့်ရသေးပြီး တစ်ဂိုးသွင်းယူထားသည်။
