ကမ္ဘာတစ်ဝန်းမှ ဘောလုံးပရိသတ်အဖွဲ့များသည် ကမ္ဘာ့ဖလားပြိုင်ပွဲအား (၄)နှစ်တစ်ကြိမ်အစား (၂)နှစ်တစ်ကြိမ် ကျင်းပရန် စီစဉ်နေသည့် ကမ္ဘာ့ဘောလုံးအဖွဲ့ချုပ်(FIFA) ၏ အစီအစဉ်ကို လက်မခံကြောင်း စုပေါင်းလက်မှတ်ရေးထိုးကာ ကြေညာချက်တစ်စောင် ထုတ်ပြန်ခဲ့ကြောင်း သိရှိရသည်။
FIFA ဥက္ကဋ္ဌ အင်ဖန်တီနိုနှင့် ကမ္ဘာလုံးဆိုင်ရာဘောလုံးဖွံ့ဖြိုးတိုးတက်ရေးအကြီးအကဲအဖြစ် ဆောင်ရွက်နေသည့် အာဆင်နယ်နည်းပြဟောင်း အာစင်ဝင်းဂါးတို့သည် ကမ္ဘာ့ဖလားပြိုင်ပွဲကို ပုံမှန်ကျင်းပနေသည့် (၄)နှစ်တစ်ကြိမ်အစား (၂)နှစ်တစ်ကြိမ် ပြောင်းလဲကျင်းပရန် ဆန္ဒရှိနေကြပြီး လာမည့်ရက်သတ္တပတ်များအတွင်း တရားဝင်အဆိုပြုချက်တင်သွင်း၍ သဘောထားရယူသွားရန် စီစဉ်နေကြောင်း သိရှိရသည်။
ထို့ပြင် အာစင်ဝင်းဂါးက ဘောလုံးပရိသတ်များသည် ကမ္ဘာ့ဖလားပြိုင်ပွဲအား (၂)နှစ်တစ်ကြိမ် ကျင်းပရန် အလိုရှိနေသည်ဟု ပြောဆိုခဲ့ရာ ဘောလုံးပရိသတ်များသည် ၎င်း၏အဆိုပါပြောဆိုမှုကို ဒေါသထွက်ခဲ့ကြကြောင်း သိရှိရသည်။
ထို့ကြောင့် ယခုအခါ FIFA လက်အောက်ရှိ တိုက်ကြီး(၆)ခုမှ ဘောလုံးပရိသတ်အဖွဲ့ (၅၈)ဖွဲ့တို့သည် စုပေါင်းလက်မှတ်ရေးထိုးကာ ကမ္ဘာ့ဖလားပြိုင်ပွဲကို (၂) နှစ်တစ်ကြိမ် ကျင်းပရန် စီစဉ်နေသည့် FIFA ၏အစီအစဉ်ကို ရှုတ်ချကြောင်း ထုတ်ပြန်ခဲ့ခြင်းဖြစ်သည်။
၎င်းတို့ ၏ထုတ်ပြန်ချက်တွင် '' ဘောလုံးပရိသတ်အများစုအနေဖြင့် ကမ္ဘာ့ဖလားပြိုင်ပွဲအား (၂)နှစ်တစ်ကြိမ် ကျင်းပမည်ဆိုခြင်းကို ကန့်ကွက်ကြောင်း၊ FIFA အနေဖြင့် ကမ္ဘာ့ဖလားပြိုင်ပွဲကို (၂)နှစ်တစ်ကြိမ် ကျင်းပမည့်အစီအစဉ်တွင် ဘောလုံးပရိသတ်များကို ဆွဲမထည့်သင့်ကြောင်း၊ များပြားလှသည့် ကလပ်နှင့် နိုင်ငံတကာပွဲစဉ်များကြောင့် ဘောလုံးပြက္ခဒိန် ကမောက်ကမဖြစ်နေချိန်တွင် ယခုကဲ့သို့စီစဉ်ခြင်းမှာ ပျက်စီးခြင်းသို့ တွန်းပို့ရာရောက်ကြောင်း၊ (၂)နှစ်တစ်ကြိမ်ကျင်းပမည်ဆိုလျှင် ကမ္ဘာ့ဖလားပြိုင်ပွဲမှာ တန်ဖိုးကျသွားမည်ဖြစ်ကြောင်း'' ဖော်ပြပါရှိသည်။
ကမ္ဘာ့ဖလားပြိုင်ပွဲကို FIFA ၏ အစီအစဉ်အတိုင်း (၂)နှစ်တစ်ကြိမ်ကျင်းပမည်ဆိုပါက တိုက်ကြီးများအလိုက် ကျင်းပနေသည့် ပြိုင်ပွဲများမှာလည်း အခက်တွေ့မည်ဖြစ်ပြီး ယင်းအစီအစဉ်ကို UEFA အပါအဝင် ဘောလုံးအဖွဲ့ချုပ်များကလည်း လက်မခံကြောင်း သိရှိရသည်။
