မြန်မာနိုင်ငံအပေါ် နိုင်ငံတကာက စီး ပွားရေးကန့်သတ်ပိတ်ဆို့ရန် မကြာသေးမီက ဘင်္ဂလားဒေ့ရှ် နိုင်ငံခြားရေးဝန်ကြီးဌာန၏ တောင်းဆိုချက်အပေါ် မြန်မာနိုင်ငံက ကန့် ကွက်ကြောင်း ဇူလိုင် ၂၄ ရက်တွင် နိုင်ငံခြား ရေးဝန်ကြီးဌာနက သတင်းထုတ်ပြန်သည်။
နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးစိုးဟန်သည် မြန်မာနိုင်ငံဆိုင်ရာ ဘင်္ဂလားဒေ့ရှ်သံအမတ်ကြီး Mr. Manjurul Karim Khan Chowdhury ကို ဇူလိုင် ၂၄ ရက်တွင် နေပြည်တော်ရှိ နိုင်ငံခြားရေးဝန်ကြီးဌာနသို့ ခေါ်ယူတွေ့ဆုံ၍ ထိုသို့ ကန့်ကွက်ခဲ့ခြင်းဖြစ်ကြောင်း နိုင်ငံခြားရေးဝန်ကြီးဌာနက သတင်းထုတ်ပြန်သည်။
ဘင်္ဂလားဒေ့ရှ် နိုင်ငံခြားရေးဝန်ကြီး ဌာနက မကြာသေးမီက ထုတ်ပြန်ခဲ့သည့် သတင်းထုတ်ပြန်ချက်တွင် မြန်မာနိုင်ငံအ ပေါ် နိုင်ငံတကာမှ စီးပွားရေးကန့်သတ်ပိတ်ဆို့မှုများ ပြုလုပ်ရန် ဘင်္ဂလားဒေ့ရှ်နိုင်ငံခြား ရေးဝန်ကြီးက ပန်ကြားခဲ့ကြောင်း ထည့်သွင်းထုတ်ပြန်ချက်အပေါ် စိတ်ပျက်မိကြောင်း နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးစိုးဟန်က မြန်မာနိုင်ငံဆိုင်ရာ ဘင်္ဂလားဒေ့ရှ်သံအမတ်ကြီးနှင့်တွေ့ဆုံစဉ် ပြောကြားခဲ့သည်။
ထို့ပြင် နှစ်နိုင်ငံအရေးကိစ္စများကို ဖြေရှင်းရေးတွင် အထောက်အကူမပြုနိုင်သည့် ဘင်္ဂလားဒေ့ရှ်နိုင်ငံ၏ မလိုမုန်းထား လုပ်ရပ်များကို ကန့်ကွက်ကြောင်း နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးစိုးဟန်က ဘင်္ဂလားဒေ့ရှ်သံအမတ်ကြီးအား ပြောကြားခဲ့သည်။
အဆိုပါတွေ့ဆုံမှုတွင် မြန်မာ-ဘင်္ဂလားဒေ့ရှ် နှစ်နိုင်ငံဆက်ဆံရေးကိစ္စရပ်များနှင့် နှစ်နိုင်ငံ နယ်စပ်ရေးရာကိစ္စရပ်များကို ဆွေးနွေးခဲ့ကြကြောင်း နိုင်ငံခြားရေးဝန်ကြီးဌာနက သတင်းထုတ်ပြန်သည်။
နေရပ်စွန့်ခွာသူများအရေးနှင့်ပတ်သက်၍ မြန်မာနိုင်ငံအနေဖြင့် နှစ်နိုင်ငံအကြား ရရှိခဲ့သည့် သဘောတူညီချက်များနှင့်အညီ ဖြေရှင်းသွားရန် အဆင်သင့်ရှိကြောင်းနှင့် နှစ်ဖက်စလုံးကလည်း အဆိုပါသဘောတူညီချက်များကို တိကျစွာ အကောင်အထည်ဖော်သွားရန်လိုအပ်ကြောင်း အမြဲတမ်းအတွင်း ဝန် ဦးစိုးဟန်က အဆိုပါတွေ့ဆုံမှုတွင် ပြောကြားခဲ့သည်ဟု သတင်းထုတ်ပြန်ချက်အရ သိရသည်။
မြန်မာနှင့် ဘင်္ဂလားဒေ့ရှ် အိမ်နီးချင်း နှစ်နိုင်ငံအနေဖြင့် ချစ်ကြည်ရင်းနှီးသည့် ဆက်ဆံရေးကို ထိန်းသမ်းခြင်းဖြင့်သာ နေရပ်စွန့်ခွာသူများအရေး ပြဿနာကို ဖြေရှင်းရာ၌ ရေရှည်အဖြေကို ရရှိစေနိုင်မည်ဖြစ် ကြောင်းလည်း အမြဲတမ်းအတွင်းဝန် ဦးစိုးဟန်က ပြောကြားခဲ့သည်။
