ဂျူဗင်တပ်စ်အသင်းနည်းပြ ဆာရီက အင်တာမီလန်အသင်းမှာ ပြီးပြည့်စုံသည့်အသင်းတစ်သင်းဖြစ်ပြီး ၎င်းတို့နှစ်သင်း၏ ထိပ်တိုက်တွေ့ဆုံမှုမှာ ပွဲကြီးပွဲကောင်းဖြစ်လာမည်ဟု ပြောကြားခဲ့သည်။

အင်တာမီလန်အသင်းသည် ယခုရာသီ စီးရီးအေပွဲစဉ် (၆)အပြီးတွင် ရာနှုန်းပြည့်အနိုင်ရကာ အမှတ်ပေးဇယားကို ဦးဆောင်နေပြီး ဂျူဗင်တပ်စ်အသင်းက (၂)မှတ်အကွာဖြင့် ဒုတိယနေရာတွင် ရပ်တည်နေသည်။ 

ဂျူဗင်တပ်စ်အသင်းနည်းပြ ဆာရီကမူ ယခုပွဲစဉ်တွင် အနိုင်ရရန်ရေပန်းစားသည့်အသင်းမရှိကြောင်းနှင့် မိမိတို့အနေဖြင့် အကောင်းဆုံးစွမ်းဆောင်နိုင်ရန် လိုအပ်ကြောင်း ပြောကြားခဲ့သည်။ 

ဆာရီက "အရမ်းကောင်းတဲ့ အသင်းနဲ့ ကျွန်တော်တို့ ယှဉ်ပြိုင်ရမှာပါ။ လောလောဆယ်မှာ အင်တာမီလန်အသင်းရဲ့ စွမ်းဆောင်ရည်က တကယ်ကောင်းပါတယ်။ ဒီလိုပွဲမှာ အနိုင်ရဖို့ ရေပန်းစားတဲ့ အသင်းမရှိပါဘူး။ အသင်းကြီးနှစ်သင်း တွေ့ဆုံပွဲမှာ ဘယ်လိုကစားကြမလဲဆိုတာက စိတ်ဝင်စားဖို့ကောင်းပါတယ်။ အင်တာမီလန်က ပြီးပြည့်စုံတဲ့အသင်းပါ။ သူတို့က ကျွန်တော်တို့ကို အန္တရာယ်ပေးနိုင်တဲ့ အသင်းဖြစ်ပြီး ပွဲကြီးပွဲကောင်းတစ်ပွဲ ဖြစ်လာပါလိမ့်မယ်။ အရေးကြီးတာက ဆန်စီရိုကွင်းမှာ ကျွန်တော်တို့အနေနဲ့ ခြေစွမ်းပြနိုင်ဖို့ပါပဲ"ဟု ပြောကြားခဲ့သည်။ 

ထို့ပြင် ဆာရီက မိမိတို့အသင်းအနေဖြင့် စွမ်းဆောင်ရည်တိုးတက်နေကြောင်းနှင့် အင်တာမီလန်နှင့်ပွဲတွင် အာရုံစူးစိုက်မှုအပြည့်ဖြင့် ကစားသွားမည်ဖြစ်ကြောင်းလည်း ပြောကြားခဲ့သည်။ 

အင်တာမီလန်နှင့် ဂျူဗင်တပ်စ်အသင်းတို့သည် စီးရီးအေပွဲစဉ် (၇)အဖြစ် ယနေ့ည (မြန်မာစံတော်ချိန် တနင်္လာနေ့နံနက် ၁:၁၅ နာရီ)တွင် အင်တာမီလန်အသင်း၏ အိမ်ကွင်း ဆန်စီရိုတွင် ယှဉ်ပြိုင်ကြမည်ဖြစ်သည်။