တောင်ပြုန်းပွဲတော် (ဝါခေါင်လဆန်း ၁၅)ရက် လပြည့်နေ့ ပခန်းမင်းပို့နေ့တွင် အနယ်နယ်အရပ်ရပ်မှ လာရောက်သူများဖြင့် စည်ကားကြောင်း သိရသည်။
"ဒီနေ့ ပခန်းမင်းပို့ပွဲနေ့က အရင်ရက်တွေထက် ရထားပိုစီးတဲ့သူများတာကို တွေ့ရတယ်။ အရင်နှစ်တွေထက်စာရင် လူမများဘူး။ လူနည်းနေတာကို တွေ့ရတယ်"ဟု မန္တလေးမြို့ရှိ တောင်ပြုန်းဘူတာမှ ဝန်ထမ်းတစ်ဦးက ဆိုသည်။
ဝါခေါင်လတွင် နှစ်စဉ်ကျင်းပပြုလုပ်လေ့ရှိသည့် တောင်ပြုန်းပွဲတော် အခမ်းအနားကို ဝါခေါင်လဆန်း ၈ ရက်နေ့တွင် ပထမနေ့အဖြစ် ကန်တော့ခံ။ ဝါခေါင်လဆန်း ၉ ရက်နေ့တွင် ဒုတိယနေ့ ကန်တော့ခံ။ ဝါခေါင်လဆန်း ၁၀ ရက်နေ့တွင် ည ညီလာခံ။ ဝါခေါင်လဆန်း ၁၁ ရက်နေ့တွင် ချိုးရေတော်သုံး။ ဝါခေါင်လဆန်း ၁၂ ရက်နေ့တွင် နန်းတက်ပွဲများ။ ဝါခေါင်လဆန်း ၁၃ ရက်နေ့တွင် ယုန်ထိုး။ ဝါခေါင်လဆန်း ၁၄ ရက်နေ့တွင် ထိန်ခုတ်။ ဝါခေါင်လဆန်း ၁၅ ရက်နေ့တွင် ပခန်းမင်းပို့။ ဝါခေါင်လပြည့်ကျော် ၁ ရက်နေ့တွင် ရွှေဘုံဆင်းပွဲများ ကျင်းပကြောင်း သိရသည်။
ဝါခေါင်လဆန်း ၁၅ ရက် (လပြည့်နေ့)တွင် ပခန်းမင်းပို့ပွဲကို ညပိုင်းတွင် ကျင်းပပြီး တောင်ပြုန်းပွဲတော်သို့ ကြွလာကြသည့် ပခန်းမင်းအား ပွဲတော်နောက်ဆုံး ညတွင် နှုတ်ဆက်ကန်တော့ပွဲ ကျင်းပခြင်း ဖြစ်ကြောင်း။ ဝါခေါင်လပြည့်ကျော် ၁ ရက်နေ့တွင် ရွှေဘုံဆင်းပွဲ အခမ်းအနားသည် မင်းနှစ်ပါးအား ရွှေချကြကြောင်း သမိုင်းမှတ်တမ်းများအရ သိရသည်။
တောင်ပြုန်းပွဲတော်ကျင်းပရန် ပြင်ဆင်မှုသည် ယခင်နှစ်များထက် နောက်ကျခဲ့ကြောင်း ရာသီတုပ်ကွေးရောဂါ ဖြစ်ပွားမှု အခြေအနေများကြောင့် ပွဲတော် ဖြစ်မဖြစ် သံသယများ ရှိသည့်အတွက် အနယ်နယ်အရပ်ရပ်မှ လာရောက်သည့် လူဦးရေမှာ ယခင်စည်ကားခဲ့သော နှစ်များထက်လျော့နည်းကြောင်း နန်းထိန်းများထံမှ သိရသည်။