ကုန်သည်စက်မှု အသင်းချုပ်မှ ကိုယ်စားလှယ်များနှင့် မြန်မာနိုင်ငံဆိုင်ရာ အိန္ဒိယ သံအမတ်ကြီး H.E.Mr.Vikram Misri တို့ သြဂုတ်၂၆ ရက်က ဆွေးနွေးစဉ် (ဓာတ်ပုံ-ကုန်သည်စက်မှု အသင်းချုပ်)

မြန်မာနှင့် အိန္ဒိယနိုင်ငံ နှစ်နိုင်ငံအကြား တည်ငြိမ်သော ပဲကုန်သွယ်မှု ရရှိနိုင်ရေးနှင့် မြန်မာနိုင်ငံမှ အိန္ဒိယသို့ ပဲတင်ပို့ရာ၌ လမ်းခုလတ်တွင် ရောက်ရှိနေသည့် ကုန်သေတ္တာများအား ဖြေရှင်းပေးနိုင်ရေး ကုန်သည်စက်မှု အသင်းချုပ်နှင့် ညီနောင်အသင်းများမှ ကိုယ်စားလှယ်များနှင့် မြန်မာနိုင်ငံဆိုင်ရာ အိန္ဒိယ သံအမတ်ကြီး H.E.Mr.Vikram Misri တို့ သြဂုတ်၂၆ ရက်က ဆွေးနွေးခဲ့ကြောင်း ကုန်သည်စက်မှု အသင်းချုပ်မှ သတင်းထုတ်ပြန်ခဲ့သည်။

အိန္ဒိယနိုင်ငံ အစိုးရက ပြည်ပမှ ပဲတင်သွင်းမှုအပေါ် တန်ချိန်ကန့်သတ်ခဲ့ရာ အိန္ဒိယ ဈေးကွက်ကို ရာနှုန်းပြည့်နီးပါးအား ထားနေရသည့် မြန်မာပဲလုပ်ငန်းရှင်များ အထူးသဖြင့် မြန်မာ့တောင်သူ လယ်သမားများအတွက် အခက်အခဲ ကြုံနေရကြောင်း သိရသည်။

ထုတ်လုပ်ပြီးပဲများနှင့် လာမည့် ဒီဇင်ဘာလ ဝန်းကျင်တွင် ထွက်ရှိမည့် ပဲစင်းငုံ တင်ပို့ရောင်းချရန် ဈေးကွက်ရရှိရေး အခက်အခဲအပြင် မတ်ပဲနှင့် စားတော်ပဲ စိုက်ပျိုးရာသီတွင် ဆက်လက်စိုက်ပျိုး သင့်မသင့် ဆုံးဖြတ်ရန်မှာလည်း တောင်သူများအတွက် အခက်အခဲ ဖြစ်နေကြောင်း သိရသည်။

အဆိုပါ အခက်အခဲများအား ဖြေရှင်းနိုင်ရန်အတွက် အိန္ဒိယ-မြန်မာ နှစ်နိုင်ငံအကြား တည်ငြိမ်သော ပဲကုန်သွယ်မှု ရရှိရန် ကုန်သည်စက်မှု အသင်းချုပ်နှင့် ညီနောင်အသင်းများမှ ကိုယ်စားလှယ်များက မြန်မာနိုင်ငံဆိုင်ရာ အိန္ဒိယနိုင်ငံ သံအမတ်ကြီး H.E.Mr.Vikram Misri နှင့် သြဂုတ် ၂၆ ရက်က ကုန်သည်စက်မှု အသင်းချုပ်တွင် ညှိနှိုင်းကြခြင်းဖြစ်သည်။

အဆိုပါ အစည်းအဝေးတွင် သံအမတ်ကြီးက အိန္ဒိယနိုင်ငံ၏ ယခုနှစ် ပဲထွက်ရှိမှုသည် ယခင်နှစ်များထက် ရာခိုင်နှုန်း ၄၀ ဝန်းကျင် ပိုမိုထွက်ရှိရာ ပြည်တွင်းပဲဈေးနှုန်းများ ကျဆင်းလာပြီး ပဲစိုက်တောင်သူများ ထိခိုက်မည့် အခြေအနေ ဖြစ်နေသဖြင့် ပြည်ပမှ ပဲတင်သွင်းမှုကို တန်ချိန်ကန့်သတ်လိုက်ရခြင်းဖြစ်ကြောင်း ပြောကြားသည်။

မြန်မာနိုင်ငံ ပဲမျိုးစုံနှင့် နှမ်းကုန်သည်များ အသင်းကလည်း မြန်မာ့ပဲကဏ္ဍနှင့် တောင်သူများ၏ အခြေအနေနှင့် အခက်အခဲများကို သံအမတ်ကြီးအား တင်ပြခဲ့ကြောင်း၊ ၁၉၈၇ ခုနှစ် အိန္ဒိယနိုင်ငံ ဝန်ကြီးချုပ် ရာဂျစ်ဂန္ဒီ၏ မြန်မာနိုင်ငံ ခရီးစဉ်မှ စတင်ခဲ့သည့် နှစ် ၃၀ ကြာ နှစ်နိုင်ငံ ပဲကဏ္ဍ ပူးပေါင်းဆောင်ရွက်မှုတွင် ယခုကဲ့သို့ မတွေ့ကြုံခဲ့ဖူးကြောင်း၊ ကြိုတင် အသိပေး ညှိနှိုင်းခြင်း မရှိဘဲ ကန့်သတ်ချက် ရုတ်ခြည်းထုတ်ပြန်ခဲ့ခြင်းကြောင့် ဖြေရှင်းရန် ပိုမိုခက်ခဲကြောင်း အသင်းဥက္ကဋ္ဌ ဦးထွန်းလွင်က ပြောကြားသည်။

ဆွေးနွေးရာတွင် နှစ်နိုင်ငံအကြား ပုံမှန်ပဲကုန်သွယ်မှု ရရှိနိုင်ရေးအတွက် နှစ်ဖက် အစိုးရများအကြား သဘောတူညီချက် ရေးထိုးနိုင်ရေးကို အလျင်အမြန် ဆောင်ရွက်ရန် ညှိနှိုင်းကြကြောင်း၊ ထို့ပြင် မြန်မာမှ အိန္ဒိယသို့ ပဲတင်ပို့ခြင်း လမ်းခုလတ်တွင် ရောက်နေသည့် ကုန်သေတ္တာများအား ဖြေရှင်းစီစဉ်ပေးနိုင်ရေး ဆွေးနွေးကြကြောင်း သိရသည်။

အိန္ဒိယနိုင်ငံ ဝန်ကြီးချုပ် မိုဒီ၏ မြန်မာနိုင်ငံသို့ စက်တင်ဘာ ခရီးစဉ်အတွင်း နှစ်ဖက်နိုင်ငံ ခေါင်းဆောင်များတွေ့ဆုံချိန် တင်ပြဆွေးနွေးရန်နှင့် လက်ရှိ အခက်အခဲများအား နှစ်ဖက်ပူးပေါင်း၍ ကျော်လွှားနိုင်မည့် နည်းလမ်းများ ရှာဖွေရန် သဘောတူညီခဲ့ကြကြောင်း သိရသည်။

အဆိုပါ အစည်းအဝေးကို မြန်မာနိုင်ငံ ဆန်စပါးအသင်းချုပ်၊ ရန်ကုန်တိုင်း ကုန်စည်ဒိုင်၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနနှင့် စိုက်ပျိုးရေး ဦးစီးဌာနမှ တာဝန်ရှိသူများ တက်ရောက်ဆွေးနွေးခဲ့သည်။

နှစ်နိုင်ငံ သဘောတူ စာချွန်လွှာကို အလျင်အမြန် ရေးထိုးချမှတ်ရန် လိုပြီဖြစ်ကြောင်း ကုန်သည်စက်မှု အသင်းချုပ် ဥက္ကဋ္ဌ ဦးဇော်မင်းဝင်းက ပြောကြားခဲ့သည်။

နီလာ