မြန်မာနိုင်ငံဘောလုံးအဖွဲ့ချုပ်သည် ဂျာမနီလူမျိုး အန်တွမ်နီဟေး အားတစ်နှစ်ခွဲသက်တမ်းရှိ စာချုပ်တစ်ရပ်ဖြင့် မြန်မာလက်ရွေးစင်နည်းပြချုပ် ရာထူးအားခန့်အပ်ခဲ့ကြောင်းသိရသည်။ မြန်မာနိုင်ငံဘောလုံးအဖွဲ့ချုပ် (MFF)သည် အန်တွမ်နီဟေးနှင့် အပြီးသတ်ဆွေးနွေးခဲ့ပြီး နောက် မေလ(၁၆)ရက် နေ့နေ့လည်ပိုင်းကမြန်မာနိုင်ငံဘောလုံးအဖွဲ့ချုပ် တွင်စာချုပ်ချုပ်ဆိုကာ မီဒီယာများနှင့် တွေ့ဆုံပွဲ စီစဉ်ပေးခဲ့ကြောင်းသိရသည်။
''ကျွန်တော်ရဲ့ နည်းပြအဖွဲ့နဲ့ပူးပေါင်းပြီးး မြန်မာအသင်းအတွက် အကောင်းဆုံးဖြစ်အောင် ကြိုးစားသွားမှာပါ။ အာရှ က အသင်းကို ပထမဦးဆုံးကိုင်တွယ်ရတာဖြစ်ပေမဲ့ အခုလို ပူးပေါင်းဆောင်ရွက်ခွင့်ရတဲ့ အပေါ်ဝမ်းမြောက်မိပါတယ်။''ဟု အန်တွမ်နီဟေးက သတင်းစာရှင်းလင်းပွဲတွင်ပြောကြားသွားခဲ့သည်။ မြန်မာနိုင်ငံဘောလုံးအဖွဲ့ချုပ်သည်နည်းပြချုပ်အဖြစ် ဆောင်ရွက်မည့် အန်တွမ်နီဟေး၊ လက်ထောက်နည်းပြ ဟာလက်၊ ဂိုးနည်းပြ ဟာဇော့တို့ကို ၂၀၁၈ ခုနှစ် မေလ၁၆ ရက်နေ့မှ ၂၀၁၉ ခုနှစ် ဒီဇင်ဘာလအထိ သက်တမ်းရှိသော စာချုပ်များကို ချုပ်ဆိုခဲ့ခြင်းဖြစ်သည်။အန်တွမ်နီဟေးသည် မြန်မာ့လက်ရွေးစင်အသင်းအပြင်မြန်မာ ယူ-၂၃ အသင်းကိုပါ ကိုင်တွယ်သွားရမည်ဖြစ်ကြောင်းသိရသည်။
အသက် (၄၇) နှစ်အရွယ် ဂျာမန်နည်းပြ အန်တွမ်နီဟေး သည် နည်းပြအဖြစ် ဂမ်ဘီယာ၊ လိုက်ဘေးရီးယား၊ ကင်ညာ၊ ရဝမ်ဒါစသည့် အာဖရိကနိုင်ငံလက်ရွေးစင်အ သင်းများကို ကိုင်တွယ်ခဲ့ကာ နည်းစနစ်ဒါရိုက်တာအဖြစ် ဘာရိန်း ဘောလုံးအဖွဲ့ချုပ်နှင့် လိုက်ဘေး ရီးယားဘောလုံးအဖွဲ့ချုပ်တို့တွင် တာဝန်ထမ်းဆောင်ခဲ့သူဖြစ်ကြောင်းသိရသည်။
