စာရင်းစစ်အဖွဲ့ရဲ့ အစီရင်ခံစာနဲ့ မေးခွန်းထုတ်ရတော့မယ့် ရန်ကုန်အစိုးရအဖွဲ့ရဲ့ ပြည်သူ့ဘဏ္ဍာရှင်းတမ်း

ဓာတ်ပုံ – ပြည့်ဖြိုးအောင်

ဒုတိယအကြိမ် ရန်ကုန်တိုင်းဒေသကြီးလွှတ်တော် သတ္တမပုံမှန် အစည်းအဝေးတွင် ရန်ကုန်တိုင်းဒေသကြီး အစိုးရအဖွဲ့၏ ဘဏ္ဍာငွေ သုံးစွဲမှုနှင့် ပတ်သက်ပြီး စာရင်းစစ်အဖွဲ့၏ အစီရင်ခံစာ ထွက်ပေါ်လာခဲ့သည်။

ယင်းအစီရင်ခံစာအား လွှတ်တော်သို့ တင်သွင်းအပြီးတွင် ရန်ကုန်တိုင်းဒေသကြီး လွှတ်တော် ကိုယ်စားလှယ်များ၏ ဆွေးနွေးမှုများမှာ ပြည်သူများအကြား ကျယ်ကျယ်လောင်လောင် ထွက်ပေါ်လာ ခဲ့သည်။

ထွက်ပေါ်လာသည့် အစီရင်ခံစာတွင် ရန်ကုန်တိုင်းဒေသကြီး အစိုးရအဖွဲ့၏ ပြည်သူ့ဘဏ္ဍာသုံး စွဲမှုများအပေါ်တွင် ဝေဖန်မှုများ ဖြစ်သည်။ ယင်းတို့အနက် ဝေဖန်ခံ ရမှုအများဆုံးဖြစ်သည့် အကြောင်း အရာများမှာ ရန်ကုန်တိုင်းဒေသ ကြီးအစိုးရအဖွဲ့က ၂၀၁၆-၂၀၁၇ ဘဏ္ဍာနှစ် ဖြည့်စွက်ခွင့်ပြုငွေ (အဖွဲ့အစည်းများတွင် ရင်းနှီးငွေ ခေါင်းစဉ်) မှ ခွင့်ပြုငွေ ကျပ် ၁၃၄ ဘီလျံအား Yangon Metropoliton Development Public Co.,Ltd တွင် ၅၄ ဘီလျံ၊ New Yangon Development Co.,Ltd တွင် ၁၀ ဘီလျံ၊ ရန်ကုန်ဘတ်စ်ကား အများနှင့် သက်ဆိုင်သော ကုမ္ပဏီလီမိတက် (YBPC) တွင် ၃၅ ဘီလျံ၊ ရန်ကုန်မြို့ပြ အများပြည်သူ သယ်ယူပို့ဆောင်ရေး အများနှင့် သက်ဆိုင်သော ကုမ္ပဏီလီမိတက် (YUPT) တွင် ၃၅ ဘီလျံ စုစုပေါင်း ကျပ် ၁၃၄ ဘီလျံနှင့် ကျောင်းကားများအတွက် ကျပ် ၁၀ ဒသမ ၅ ဘီလျံနှင့် ရန်ကုန်ညဈေးအတွက် ကျပ်သိန်းပေါင်း ၁၈၀၀ ရင်းနှီးမြှုပ်နှံ ထားမှုပင်ဖြစ်သည်။

“ဒီအစီရင်ခံစာကတော့ ပွဲတော်တော် ဆူသွားတယ်။ အထဲမှာပါတဲ့ တွေ့ရှိချက်တွေ အကုန်လုံးက မေးခွန်းထုတ်စရာတွေ ချည်းပဲလေ” ဟု ဒဂုံမြို့နယ် တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက ပြောကြားသည်။

အမျိုးသား ဒီမိုကရေစီအဖွဲ့ချုပ် အစိုးရလက်ထက်တွင် ရန်ကုန်တိုင်းဒေသကြီး အစိုးရအဖွဲ့၏ စာရင်းစစ်ချုပ် အစီရင်ခံစာမှာ ဒုတိယအကြိမ် ထွက်ရှိလာခြင်းဖြစ်ပြီး ယင်းသို့ထွက်ရှိလာခြင်းမှာ သတ်မှတ်ကာလထက်များစွာ နောက်ကျပြီးမှ ထွက်ရှိလာခြင်းဖြစ်သည်။

“ကာလအားဖြင့်တော့ နောက်ဆုံးကာလအထိ စစ်ထားတာကို တွေ့ရတယ်။ အခုအခြေအနေက အစိုးရအဖွဲ့ရဲ့ ပကတိအခြေအနေကို မြင်သာစေတယ်” ဟု ရန်ကုန်တိုင်းဒေသကြီး လွှတ်တော် ပြည်သူ့ငွေစာရင်း ကော်မတီဥက္ကဋ္ဌ ဦးတင့်လွင် (ခ) မောင်လွင်မွန်က ပြောကြားသည်။

အစီရင်ခံစာမှာ ဘာတွေပါလဲ

ထွက်ရှိလာသည့် အစီရင်ခံစာတွင် ပြည်သူပိုင်မြေများကို ငှားရမ်းထားသည့် ဌားရမ်းခများ၊ ရုပ်ရှင်ရုံများ၊ ပန်းခြံများ၊ ဟိုတယ်များ စသည့်နေရာများကို ငှားရမ်းထားသည့် ဈေးနှုန်းများ၊ အစိုးရအဖွဲ့က သုံးစွဲထားသည့် ဘဏ္ဍာငွေများ၊ အစိုးရ အဖွဲ့က ပုဂ္ဂလိကဘဏ်များမှ ချေးယူထားသည့် ငွေကြေးများ၊ စီမံကိန်းများ ဆောင်ရွက်ရာတွင် ကုန်ကျမည့် ငွေကြေးများကို ဖော်ပြထားသည်ကို တွေ့ရသည်။

ယင်းကိစ္စရပ်များတွင် လက်ရှိပြဿနာများလည်း ပါဝင်သကဲ့သို့ ယခင်ပြဿနာများလည်း ပါဝင်သည်ကို တွေ့ရသည်။ ယခင်ပြသာနာများတွင် ပြည်သူပိုင် မြေကွက်များအား အစိုးရတစ်ခုနှင့် တစ်ခုအကြားတွင် ဂရန်အမည် ဖောက်ခဲ့သည့် ဖြစ်စဉ်များ၊ ပန်းခြံများတွင် မူလပေါက်ဈေးထက် များစွာလျော့နည်းကာ ငှားရမ်းထားမှုများ၊ အကြွေးမပေးသည့် လုပ်ငန်းရှင်များလည်း ပါဝင်သည်။

ယင်းဖြစ်စဉ်များနှင့် ပတ်သက်ပြီး လက်ရှိအစိုးရအနေဖြင့် ငှားရမ်းခ လျော့နည်းနေသည့် အခြေအနေများအား ထိုက်သင့်သည့် ဈေးနှုန်းများ ရရှိအောင် ဆောင်ရွက်သင့်ကြောင်း၊ အကြွေးမပေးသည့် လုပ်ငန်းရှင်များထံမှ အကြွေးများရရှိစေရန် တောင်းသင့်ကြောင်း ငွေစာရင်း အစီရင်ခံစာတွင် ဖော်ပြထားသည်ကို တွေ့ရသည်။

လက်ရှိပြဿနာများနှင့် မေးခွန်းထုတ်ရမည့် ပြဿနာများတွင် ရန်ကုန်အစိုးရအဖွဲ့ ပြုပြင်ပြောင်းလဲမှုတွင် အကြီးမားဆုံးဖြစ်သည့် ရန်ကုန်မြို့ပြ သယ်ယူပို့ဆောင်ရေးစနစ် YRTA မှာ ထိပ်ဆုံးမှ ပါဝင်နေသည်ကို တွေ့ရသည်။ လွှတ်တော်တွင် ကိုယ်စားလှယ်များ၏ ဆွေးနွေးချက်များတွင်လည်း ယင်းအကြောင်းအရာမှာ ထိပ်ဆုံးမှ ပါဝင်နေသည်ကို တွေ့ရသည်။

“YBS စတုန်းက ဘယ်သူမှ မနေရဘူး။ ဒီစနစ်ကို အောင်မြင်စေချင်လို့ အစိုးရက ဘာတာဝန်ပေးပေး အကုန်လုံး လုပ်ခဲ့တယ်။ ၀ရုန်းသုန်းကားနဲ့ပဲ။ အခုချိန်မှာတော့ ငွေရေးကြေးရေး ပြဿနာက ပါလာပြီ” ဟု ရန်ကုန်တိုင်းဒေသကြီး လွှတ်တော် တိုင်းဒေသကြီးအစိုးရ၏ ကတိက၀တ်၊ အာမခံချက်များနှင့် လွှတ်တော်အခွင့်အရေး ကော်မတီအဖွဲ့ဝင် ဒေါ်ကြည်ပြာက ပြောကြားသည်။

စာမျက်နှာ ၃၀၀ ကျော်ပါဝင်သည့် ယင်းအစီရင်ခံစာအား ရန်ကုန်တိုင်းဒေသကြီး လွှတ်တော်တွင် ကိုယ်စားလှယ် ၂၀ ကျော်က ၀င်ရောက်ဆွေးနွေးရန် စာရင်းပေးထားခြင်းဖြစ်ပြီး အစီရင်ခံစာအရ ရန်ကုန်တိုင်းဒေသကြီး အစိုးရအနေဖြင့် စာရင်းရှင်းလင်းရန်နှင့် လွှတ်တော်ကိုယ်စားလှယ်များ၏ မေးခွန်းများကို ဖြေကြားရန် လိုအပ်လျက်ရှိသည်။

လွှတ်တော်ခွင့်ပြုချက် မရယူဘဲနဲ့ အစိုးရအဖွဲ့က ငွေလုံးငွေရင်း မြှုပ်နှံထားသည့် ကုမ္ပဏီနှစ်ခု

ဓာတ်ပုံ – နေ၀န်းထက်

ရန်ကုန်မြို့တွင် အိမ်ရာစီမံကိန်း အပါအ၀င် စီမံကိန်းများ လုပ်ဆောင်ရန်အတွက် ရန်ကုန်တိုင်းဒေသကြီး အစိုးရအဖွဲ့က အများပိုင်ကုမ္ပဏီနှစ်ခု ထူထောင်ထားသည်။ ယင်းကုမ္ပဏီများမှာ Yangon Metropoliton Development Public Co.,Ltd နှင့် New Yangon Development Co.,Ltd တို့ဖြစ်သည်။

Yangon Metropoliton Development Public Co.,Ltd အတွက် ထည့်ဝင်ရင်းနှီးငွေ ကျပ်သန်း ၆၄၀၀၀ ရှိပြီး ယင်းတို့အနက် စီမံခန့်ခွဲမှု စရိတ်အဖြစ် ကျပ်သန်း ၁၁ ဒသမ ၄၆၀ ရှိသည်။ ယင်းကြောင့် အသားတင်အရှုံးမှာ ၁၁ ဒသမ ၄၆၀ သန်းဖြစ်သည်။ ယင်းငွေကြေးများမှာ ၂၀၁၇ ခုနှစ် မတ် ၃ ရက်မှ မတ်လကုန်အထိ ရုံးလုပ်ငန်းနှင့် စီမံခန့်ခွဲရေး လုပ်ငန်းများအတွက် အသုံးပြုထားခြင်းဖြစ်သည်။ သို့သော် လုပ်ငန်းမစတင်နိုင်သေးပေ။

ယင်းကုမ္ပဏီတွင် ရန်ကုန်တိုင်းဒေသကြီး အစိုးရအဖွဲ့ဝင် ဘဏ္ဍာရေးဝန်ကြီး ဦးမြင့်သောင်း၊ လမ်းပန်းဆက်သွယ်ရေးဝန်ကြီး ဒေါ်နီလာကျော်၊ ဦးမျိုးအောင်ဌေး၊ ဒေါ်မေမေသွယ်၊ ဦးမြင့်နိုင်တို့က အစိုးရအဖွဲ့ကိုယ်စား အစုရှင်အဖြစ် ပါဝင်နေပြီး ဦးဝင်းအောင်က စီးပွားရေး လုပ်ငန်းရှင်အဖြစ် အစုရှယ်ယာ ၀င်ထားသည်ကို တွေ့ရသည်။

အစုတစ်စုလျှင် ကျပ်တစ်သိန်းနှုန်းဖြင့် ထူထောင်ထားပြီး အများဆုံး ပိုင်ဆိုင်သူမှာ ဦးမြင့်သောင်းဖြစ်ကာ အစုရှယ်ယာပေါင်း ၆၃၉၅၀၀ အထိ ပိုင်ဆိုင်ထားပြီး ကျန်သူများမှာ အစု ၁၀၀ စီသာ ပါဝင်သည်။

ကုမ္ပဏီ စည်းမျဉ်းစည်းကမ်းနှင့်အညီ ထူထောင်ထားသည်ဟု ဆိုသော်လည်း အစုရှယ်ယာ အများအပြား ပိုင်ဆိုင်ထားသူမှာ အစိုးရအဖွဲ့ ၀န်ကြီးတစ်ဦးဖြစ်နေပြီး နောက်ပိုင်းတွင် ငွေကြေးအရှုပ်အရှင်းများ ပေါ်လာနိုင်မည်ဖြစ်ကြောင်း လွှတ်တော်ကိုယ်စားလှယ်များက ထောက်ပြသည်။

“အစုရှယ်ယာတွေကို အစိုးရရဲ့ အများပိုင်ငွေတွေနဲ့ အစုရှယ်ယာ ၀ယ်တဲ့အခါမှာ ပုဂ္ဂလိကနာမည် တွေနဲ့ သုံးထားမယ်ဆိုရင် အကြောင်း တစ်စုံတစ်ခုခုကြောင့် အလွဲ အမှား ဖြစ်ခဲ့မယ်ဆိုရင် ပြည်သူ့ဘဏ္ဍာ ငွေဆုံးရှုံးနိုင်မယ်လို့ သုံးသပ်လို့ရပါတယ်” ဟု ဦးသိန်းစိန် အစိုးရလက်ထက်က ရန်ကုန်တိုင်းဒေသကြီး အစိုးရအဖွဲ့တွင် လုံခြုံရေးနှင့် နယ်စပ်ရေးရာ ၀န်ကြီးဖြစ်ခဲ့သူ ဦးတင်ဝင်းက ပြောကြားသည်။

ယင်းကုမ္ပဏီတွင် အစုရှယ်ယာအဖြစ် ထည့်ဝင်ထားသည်မှာ ပြည်သူ့ဘဏ္ဍာငွေများဖြစ်ပြီး ၀န်ကြီးဌာန အနေဖြင့် ၀ယ်ယူထားခြင်း မဟုတ်ဘဲ အမည်ပေါက်ဖြင့် ၀ယ်ယူထားခြင်း ဖြစ်သည်။

အလားတူ ရန်ကုန်မြို့ တစ်ဖက်ကမ်းတွင် အကောင်အထည်ဖော်မည့် ရန်ကုန်မြို့သစ် စီမံကိန်း လုပ်ဆောင်ရန်အတွက် New Yangon Development Co.,Ltd ကို တည်ထောင်ခဲ့ပြီး ယင်းကုမ္ပဏီကို ရန်ကုန်အစိုးရက ရာခိုင်နှုန်း ၁၀၀ ပိုင်ဆိုင်သည်။

ကုမ္ပဏီဥက္ကဋ္ဌအဖြစ် လမ်းပန်း ဆက်သွယ်ရေးဝန်ကြီး ဒေါ်နီလာကျော်က တာဝန်ယူထားပြီး စီးပွား ရေးလုပ်ငန်းရှင် တစ်ဦးဖြစ်သည့် ရိုးမလုပ်ငန်းစုပိုင်ရှင် ဦးသိမ်းဝေ(ခ) Serge Pun က ဒုဥက္ကဋ္ဌ၊ ရန်ကုန် တိုင်းအစိုးရအဖွဲ့ဝင်ဝန်ကြီး ဦးဟန် ထွန်း၊ စင်ကာပူနိုင်ငံခြားရေး ၀န်ကြီးဟောင်း Mr George Yeo နှင့် ဦးထွန်းမြတ်တို့က ဒါရိုက်တာများအဖြစ် တာဝန်ယူထားသည်ကို တွေ့ရသည်။

ရင်းနှီးမြှုပ်နှံငွေမှာ ကျပ် ၁၀ ဘီလျံဖြစ်ပြီး ၂၀၁၈ ခုနှစ် ဧပြီ ၄ ရက် အထိ ၀င်ငွေမရရှိသေးဘဲ အသုံးစရိတ်မှာ လစာစရိတ် ကျပ် ၄၉ ဒသမ ၅၇၀ သန်းဖြစ်ပြီး အထွေထွေစရိတ်အဖြစ် ကျပ် ၇ ဒသမ ၁၄၄ သန်းဖြစ်ကာ စုစုပေါင်း ကျပ် ၉၂ ဒသမ ၆၁၁ သန်း သုံးစွဲထားသည်။

လက်ကျန်ငွေများကို ကမ္ဘောဇ ဘဏ်တွင် ကျပ် ၃၉၀၆ ဒသမ ၈၄၄ သန်းနှင့် ဧရာဝတီဘဏ်တွင် ၅၉၈၈ ဒသမ ၅၇၄ သန်း အပ်နှံထားသည်။ Cash In Hand အဖြစ် ကျပ် ၁၁ ဒသမ ၁၂၁ သန်း ကိုင်ဆောင်ထားသည်။

ရန်ကုန်မြို့သစ် စီမံကိန်းအား အကောင်အထည်ဖော်ရန် ယခင်အစိုးရ လက်ထက်တွင် စီစဉ်ခဲ့ခြင်းဖြစ်ပြီး လက်ရှိအစိုးရ လက်ထက်တွင် ယခင်အစီအစဉ်များကို ဖျက်သိမ်းကာ လုပ်ငန်း Plan အသစ်များ ချမှတ်ကာ ဆောင်ရွက်ခဲ့ခြင်း ဖြစ်သည်။

ယင်းကုမ္ပဏီနှစ်ခုတွင် တူညီသည့်အချက်မှာ ကုမ္ပဏီများ၏ ငွေကြေးလည်ပတ်မှုနှင့် သုံးစွဲမှုများကို ပြင်ပစာရင်းစစ် အဖွဲ့ဖြင့် အသေးစိတ် စစ်ဆေးထားခြင်း မရှိသေးဘဲ ရန်ကုန်တိုင်းဒေသကြီး အစိုးရအဖွဲ့က လွှဲပြောင်းရယူထားသည့် နိုင်ငံပိုင် မရမ်းကုန်း ဗီလာရှိ မြေ ၁၁ ဒသမ ၈၉ ဧကနှင့် ဆူးလေဘုရားလမ်းရှိ နိုင်ငံပိုင် အဆောက်အအုံအား ကုမ္ပဏီက ပြင်ဆင်ဆောင်ရွက်မှုများ ပြုလုပ်ထားခြင်းဖြစ်သည်။

ယင်းကြောင့် အစိုးရအဖွဲ့က တည်ထောင်ထားသည့် ကုမ္ပဏီများတွင် နောင်ကာလများ၌ အရှုပ်အရှင်းများ ပေါ်ထွက်လာနိုင်ကြောင်း တိုင်းဒေသကြီး စာရင်းစစ်ချုပ်က ထောက်ပြထားသည်။

ထို့ပြင် စီမံကိန်းများ လုပ်ဆောင်ရာတွင် သေချာစိစစ်ပြီးမှသာ လုပ်ဆောင်ရန်နှင့် လက်ရှိစီမံကိန်းများကိုသာ အာရုံစိုက် လုပ်ဆောင်ရန် နိုင်ငံတော်သမ္မတ ဦးဝင်းမြင့်က မှာကြားထားသော်လည်း ရန်ကုန်မြို့တွင် စီမံကိန်းများ ဆောင်ရွက်ရန် ပြည်သူ့ဘဏ္ဍာငွေဖြင့် ကုမ္ပဏီများကို တည်ထောင်ထားပြီး ရှေ့ဆက်လုပ်ဆောင်မည့် အခြေအနေများကိုလည်း တွေ့မြင်နေရသည်။

ပြည်သူများထံမှ ရရှိသည့် အခွန်ငွေကြေးများကို ဖွံ့ဖြိုးရေး လုပ်ငန်းများတွင် အနည်းငယ်သာ အသုံးပြုထားပြီး စီမံကိန်းများ လုပ်ဆောင်ရန် ကုမ္ပဏီများ ထူထောင်နေခြင်းက သမ္မတ၏ ညွှန်ကြားချက်နှင့် ဆန့်ကျင်ရာ ရောက်နေသည်။

“သမ္မတက မှာထားတာလည်း ရှိတယ်။ အခုက အချိန်ကလည်း မရှိတော့ဘူး။ ပြည်သူတွေအတွက် ထင်သာမြင်သာ အကျိုးရှိမယ့် လုပ်ဆောင်ချက်ပဲ လုပ်ရတော့မှာ” ဟု မင်္ဂလာတောင်ညွန့် မဲဆန္ဒနယ်မှ တိုင်းဒေသကြီး လွှတ်တော်ကိုယ်စားလှယ် ဦးလှဌေးက ဝေဖန်သည်။

လုပ်ငန်းစီမံကိန်းများမှာလည်း ကြီးမားကျယ်ပြန့်ပြီး ယခုအစိုးရ လက်ထက်တွင် အကောင်အထည် ဖော်နိုင်ရန် အလားအလာနည်းပါးပြီး စွန့်စားမှုများစွာဖြင့် လုပ်ကိုင်ရမည့် စီမံကိန်းများလည်း ဖြစ်ရာ မမျှော်လင့်နိုင်သည့် ပြဿနာများ ပေါ်ပေါက်လာပါက နိုင်ငံတော် ဘဏ္ဍာငွေ ဆုံးရှုံးသွားမည့် အခြေအနေများလည်း ရှိနေသည်။

ထို့ပြင် New Yangon Development Co.,Ltd ကုမ္ပဏီတွင် ထည့်သွင်းထားသည့် ငွေကြေးများမှာလည်း လွှတ်တော်သို့ အသိမပေးဘဲ အစိုးရအဖွဲ့၏ ဆုံးဖြတ်ချက်ဖြင့်သာ ဆောင်ရွက်ခဲ့ခြင်းဖြစ်သည်။

ယင်းသို့လုပ်ဆောင်မှုမှာ အာဏာကို အလွဲသုံးစား ပြုလုပ်ခြင်း ဖြစ်သည်ဟု ဆိတ်ကြီးခနောင်တိုမြို့နယ်မှ တိုင်းဒေသကြီး လွှတ်တော်ကိုယ်စားလှယ် ဒေါ်စန္ဒာမင်းက လွှတ်တော်တွင် ဝေဖန်ခဲ့သည်။

“နိုင်ငံပိုင် ပိုက်ဆံတွေကို သူတို့ကိုယ်ပိုင်လို သဘောထားပြီး သုံးစွဲတဲ့ လုပ်ရပ်တစ်ခု ဖြစ်ပါတယ်။ တိုင်း အစိုးရက သူ့ကိုပေးအပ်ထားတဲ့ အခွင့်အာဏာထက် ကျော်လွန်ပြီး လုပ်ဆောင်နေပါတယ်” ဟုဒေါ်စန္ဒာမင်းက ဆိုသည်။

လုပ်ပိုင်ခွင့်ရှိသူများက မိမိနိုင်ငံရေး ရည်မှန်းချက် ပြည့်ဝစေရန် ရည်ရွယ်လုပ်ဆောင်မှု များကိုလည်း တွေ့နေရကြောင်း Yangon Watch အဖွဲ့မှ တိုင်းဒေသကြီးလွှတ်တော် ကိုယ်စားလှယ်ဟောင်း ဒေါ်ညိုညိုသင်းက ဆိုသည်။

“လုပ်ပိုင်ခွင့်ရှိတဲ့သူတွေက နိုင်ငံရေး ရည်မှန်းချက်အတွက် လုပ်နေတာလား။ လွှတ်တော်က မသိဘဲနဲ့ ဒီလိုလုပ်လိုက်တာတော့ ဥပဒေတွေကို ချိုးဖောက်နေပြီ” ဟု ဒေါ်ညိုညိုသင်းက ပြောကြားသည်။

ရန်ကုန်အစိုးရအဖွဲ့၏ ပထမဆုံးခြေလှမ်းဖြစ်သည့် YBS (သို့မဟုတ်) ရှုံးနေသည် ဟုဆိုသည့် ရန်ကုန်မြို့၏ အကြီးမားဆုံး စီးပွားရေး

ရန်ကုန်တိုင်းဒေသကြီး အစိုးရအဖွဲ့၏ ဒုတိယတစ်နှစ်တာ လုပ်ငန်းဆောင်ရွက်မှု မှတ်တမ်း အခန်း (၈) အမှတ်စဉ် ၁၈ တွင် YBS စနစ်သစ် ဆောင်ရွက်ချက်များကို ဖော်ပြထားသည်။

ယင်းစာမျက်နှာတွင် YBS နှင့် ပတ်သက်သည့် ဆောင်ရွက်ချက်များကို ဓာတ်ပုံများဖြင့် ဝေေ၀ဆာဆာ ဖော်ပြထားသည်ကို တွေ့ရမည် ဖြစ်သည်။ နည်းပညာ အထောက်အကူပြု ပစ္စည်းများ အသုံးပြုပြီး စီမံခန့်ခွဲမှု မြှင့်တင်ခြင်း၊ Complain Center ဖွင့်လှစ်ပြီး စည်းကမ်းထိန်းသိမ်းမှုနှင့် ပြည်သူများ တိုင်ကြားခြင်းကို ဖြေရှင်းပေးခြင်း၊ စစ်ဆေးရေး အဖွဲ့များဖြင့် ယာဉ်လိုင်းများကိုလည်း စစ်ဆေးကာ စည်းကမ်းထိန်းသိမ်းခြင်း  စသည့် ခေါင်းစဉ်များဖြင့် ရေးသားထားသည်ကိုလည်း တွေ့မြင်ရမည် ဖြစ်သည်။

သို့သော် စက်တင်ဘာ ၁၃ ရက် တွင် ပြုလုပ်သည့် တိုင်းဒေသကြီး လွှတ်တော်ကျင်းပချိန်တွင်မူ ရန်ကုန်တိုင်း အစိုးရအဖွဲ့၏ YBS မှာ လွှတ်တော်ကိုယ်စားလှယ်များ အကြားတွင် ရေပန်းစားခဲ့သည့် စကားလုံးဖြစ်ပြီး နောက်ဆက်တွဲ အနေဖြင့် ကျောင်းကားကိစ္စလည်း ပါဝင်ခဲ့သည်။

ယခင် မ.ထ.သ စနစ်မှ YBS စနစ်သို့ ၂၀၁၆ ခုနှစ် ဇန်န၀ါရီ ၁၆ ရက်တွင် စတင်ပြောင်းလဲခဲ့သည်။ ယခင်က အဆိုပါ နေ့ရက်ထက် စောကာ ဇန်န၀ါရီလဆန်းပိုင်းတွင် စတင်ရန် စီစဉ်ခဲ့သော်လည်း ယာဉ်ပိုင်ရှင်များ အဆင်သင့် မဖြစ်သေးခြင်းကြောင့် နောက်ဆုတ်ခဲ့ခြင်းဖြစ်သည်။ သို့သော် ယင်းနေ့တွင်လည်း ရန်ကုန်တစ်တိုင်းလုံးရှိ လွှတ်တော်ကိုယ်စားလှယ်များပါမကျန် လူမှုအသင်းအဖွဲ့များ၊ ပရဟိတ လုပ်ကိုင်သူများသာမက ပြည်သူအများအပြားက ကူညီဆောင်ရွက် ခဲ့ကြသည်။

YBS စနစ်ကို ဖော်ဆောင်ရာတွင် မထသမှ လွှဲပြောင်းရယူထားသည့် ကျပ်သိန်းခြောက်သောင်း ရရှိခဲ့သည်။ ယာဉ်လိုင်းများ ပြေးဆွဲနေသည့် လမ်းကြောင်းများတွင် အများပိုင်ကုမ္ပဏီများ ဖွဲ့စည်းကာ ပြေးဆွဲစေခဲ့သည်။ ထို့ပြင် အချို့သော ယာဉ်လိုင်းများတွင်မူ ကုမ္ပဏီအဖြစ် ဖွဲ့စည်းထားခြင်း မရှိသေးဘဲ Operator အဖြစ် ပြုလုပ်ပြီး ပြေးဆွဲခဲ့သည်။

ရန်ကုန်တိုင်းအစိုးရအဖွဲ့မှ YBS စနစ်အကောင်အထည် ဖော်ရာတွင် ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ (YRTA) ကို ဖွဲ့စည်းပြီး ရန်ကုန်တိုင်းဝန်ကြီးချုပ် ဦးဖြိုးမင်းသိန်းက နာယကအဖြစ် တာဝန်ယူကာ ဥက္ကဋ္ဌအဖြစ် လျှပ်စစ်နှင့် စက်မှုလက်မှု လမ်းပန်းဆက်သွယ်ရေးဝန်ကြီး ဒေါ်နီလာကျော်က တာဝန်ယူခဲ့သည်။

လက်ရှိတွင် YBS စနစ်၌ ရန်ကုန်တိုင်းဒေသကြီး အစိုးရအဖွဲ့က ရင်းနှီးငွေ ထည့်ဝင်ထားသည့် ကုမ္ပဏီ နှစ်ခုအပါအ၀င် ကုမ္ပဏီ ၂၅ ခု က ယာဉ်စီးရေ ၆၂၇၂ ဖြင့် သယ်ယူပို့ဆောင်ရေး လုပ်ငန်းများကို လုပ်ကိုင်လျက်ရှိသည်။

ယာဉ်လိုင်းများတွင် ပြေးဆွဲနေသည့် ယာဉ်များမှာ တစ်ရက်လျှင် ကျပ် ၄၀၀၀ နှုန်းဖြင့် YRTA သို့ စီမံခန့်ခွဲမှု စရိတ်အဖြစ် ပေးသွင်းရသည်။ ကောက်ခံမှု စတင်သည် ဟုဆိုသည့် ၂၀၁၇ ခုနှစ် ဇန်န၀ါရီ ၁ ရက်မှ ၂၀၁၈ ခုနှစ် မတ် ၃၀ ရက်အထိ YBS ယာဉ်လိုင်းများမှ ပေးသွင်းငွေ ကျပ်သန်း ၆၁၇၂ ဒသမ ၄၃၂ ရရှိခဲ့သည်ဟု စာရင်းစစ်ချုပ်၏ အစီရင်ခံစာတွင် ဖော်ပြထားသည်။

အစိုးရက ထည့်ဝင်ရင်းနှီးထားသည့် ငွေမှာ ကုမ္ပဏီနှစ်ခုတွင် ကျပ်ဘီလျံ ၇၀ ရှိပြီး ထွက်ပေါ်လာသည့် စာရင်းစစ်ချုပ် အစီရင်ခံစာတွင် ဧရာဝတီဘဏ်မှ ကျပ်ရှစ်ဘီလျံ ချေးယူထားကြောင်း ဖော်ပြထားသည်။

ကနဦး ထည့်ဝင်ထားသည့် ကျပ်ဘီလျံ ၇၀ ဖြင့်  မော်တော်ယာဉ်များ ၀ယ်ယူရာတွင် လုံလောက်မှုမရှိ ဟုဆိုကာ ထပ်မံချေးယူခဲ့ခြင်းဖြစ်သည်။

YBS ယာဉ်လိုင်းများတွင် ပြေးဆွဲမည့် မော်တော်ယာဉ် အစီးရေ ၁၀၀ ၀ယ်ယူခဲ့ခြင်းဖြစ်ပြီး တစ်စီးလျှင် Yutong အမျိုးအစားနှင့် Anaki အမျိုးအစား ယာဉ်များဖြစ်သည်။ တစ်စီးလျှင် အမေရိကန်ဒေါ်လာ ၅၆၀၀၀ တန်ဖိုးရှိပြီး စုစုပေါင်းမှာ အမေရိကန်ဒေါ်လာ ၅၆ သန်းကျော် ကုန်ကျခဲ့သည်။ ငွေလဲနှုန်း ၁၃၇၆ ကျပ်ဖြင့် တွက်ပါက ကျပ်သန်းပေါင်း ၇၇၀၀၀ ကုန်ကျခဲ့သည်ဟု စာရင်းစစ်ချုပ် အစီရင်ခံစာတွင် ဖော်ပြထားသည်။ ၀ယ်ယူရာတွင် တရုတ်နှင့် မြန်မာအစိုးရ အချင်းချင်း ၀ယ်ယူမှုဖြစ်သည်။

အရှုံးအမြတ်များကို တွက်ချက်ရာတွင် ကုမ္ပဏီများက တင်ပြသည့် ၂၀၁၇-၂၀၁၈ ခုနှစ် ဘဏ္ဍာရေးအတွက် အနှစ်ချုပ် စာရင်းများအရ ရန်ကုန်ဘတ်စ်ကား အများနှင့်သက်ဆိုင်သော ကုမ္ပဏီလီမိတက် (YBPC) သည် ၂၀၁၅-၂၀၁၆ ဘဏ္ဍာနှစ်တွင် ကျပ် ၄၉ ဒသမ ၃၄၄ သန်း၊ ၂၀၁၆-၂၀၁၇ ဘဏ္ဍာရေးနှစ်တွင် ကျပ် ၁၀၉၂ ဒသမ ၅၂၀ သန်း၊ ၂၀၁၇-၂၀၁၈ ဘဏ္ဍာနှစ်တွင် ကျပ် ၂၉၃၈ ဒသမ ၉၃၉ သန်း အရှုံးပေါ်ခဲ့ကြောင်း၊ ရန်ကုန်မြို့ပြ သယ်ယူပို့ဆောင်ရေး အများပိုင်ကုမ္ပဏီ (YUPT) သည် ၂၀၁၆ -၂၀၁၇ ဘဏ္ဍာနှစ်တွင် ကျပ် ၂၅ ဒသမ ၅၄၁ သန်း အမြတ်ရရှိသော်လည်း ၂၀၁၇-၂၀၁၈ ဘဏ္ဍာရေးနှစ်တွင် ကျပ် ၆၀၃ ဒသမ ၀၇၉ သန်း အရှုံးပေါ်ခဲ့ကြောင်း တိုင်းဒေသကြီး စာရင်းစစ်ချုပ် ဒေါ်ခင်သန်းလှက ပြောကြားသည်။

ဓာတ်ပုံ – ကြည်နိုင်

အလားတူ YBS နှင့်အပြိုင် ဆောင်ရွက်ခဲ့သည့် လုပ်ငန်းတစ်ခုမှာ ကျောင်းကားဖြစ်သည်။ ကျောင်းကားအတွက် ရန်ကုန်တိုင်းဒေသကြီး အစိုးရအဖွဲ့က ယခင် မ.ထ.သ စနစ်မှ လွှဲပြောင်းရယူခဲ့သည့် ငွေကြေးများအနက်မှ ကျပ်ငါးဘီလျံဖြင့် ကျောင်းကားများကို ၀ယ်ယူခဲ့သည်။

သို့သော် လောက်ငှမှုမရှိ ဟုဆိုကာ ကမ္ဘောဇဘဏ်မှ ကျပ် ၅ ဒသမ ၅ ဘီလျံကို ထပ်မံချေးယူခဲ့သည်။ ကျောင်းကားများကို ကိုရီးယားနိုင်ငံ ဟွန်ဒိုင်းကုမ္ပဏီထံမှ အစီးရေ ၂၀၀ ၀ယ်ယူခဲ့သည်။ တစ်စီးလျှင် အမေရိကန်ဒေါ်လာ ၃၆၈၄၀ ကုန်ကျသည်။

သို့သော် ၀ယ်ယူထားသည့် ကျောင်းကားအစီး ၂၀၀ တွင် ၅၆ စီးသာ ကျောင်းနှစ်ကျောင်းတွင် ပြေးဆွဲနိုင်ခဲ့ပြီး ကျန်ရှိသည့် ကျောင်းကားများမှာ လွှတ်တော်ဝင်းအတွင်း ရပ်နားထားရသည်ကို တွေ့ရသည်။

အဆိုပါ YBS ယာဉ်များ ၀ယ်ယူရန်နှင့် ကျောင်းကားများ ၀ယ်ယူရန် လိုအပ်သည့် ငွေကြေးများကို ပုဂ္ဂလိကဘဏ် နှစ်ဘဏ်မှ ချေးယူခဲ့ ရာတွင် လူတစ်ဦး တစ်ယောက်က ချေးယူထားကြောင်း လွှတ်တော် ကိုယ်စားလှယ်များက ပြောကြားသည်။

အစိုးရအဖွဲ့က လိုအပ်သည့် ငွေကြေးအား လွှတ်တော်သို့ အသိပေးခြင်း မရှိဘဲ မိမိသဘောဖြင့် မိမိ ချေးယူခြင်းမှာ ဖွဲ့စည်းပုံ အခြေခံဥပဒေအား ချိုးဖောက်ရာရောက်ကြောင်း နိုင်ငံရေး လေ့လာသူများနှင့် လွှတ်တော် ကိုယ်စားလှယ်များက ဆိုသည်။

“တော်တော်စိတ်ပျက်စရာ ကောင်းတယ်။ လုပ်နည်းလုပ်ဟန်တွေက လွဲနေတယ်” ဟု ကျောက်တံတားမြို့နယ်မှ တိုင်းဒေသကြီး လွှတ်တော်ကိုယ်စားလှယ် ဒေါ်ကြည်ပြာက ဆိုသည်။

တိုင်းဒေသကြီး အစိုးရအနေဖြင့် ခွင့်ပြုငွေ မလုံလောက်၍ ထပ်မံလိုအပ်သဖြင့် အခြားမှ ချေးငွေယူရမည်ဆိုလျှင် ဖွဲ့စည်းပုံ အခြေခံဥပဒေ ပုဒ်မ ၂၃၀ အရ လွှတ်တော်သို့ တင်ပြအတည်ပြုချက် ယူရမည်ဖြစ်ကြောင်း၊ သို့သော် ဧရာဝတီဘဏ်နှင့် ကမ္ဘောဇဘဏ်တို့မှ ချေးငွေရယူထားခြင်းကို လွှတ်တော်၏ ခွင့်ပြုချက်မရှိကြောင်း ဒေါ်စန္ဒာမင်းက ပြောကြားခဲ့သည်။

ထို့ပြင် ကျောင်းကားများအတွက် လိုအပ်သည့် ငွေကြေးအား ချေး ယူရာတွင် မည်သူက ချေးယူထားသလဲ ဆိုသည်မှာ မေးခွန်းထုတ်ရမည့် အခြေအနေ ဖြစ်နေသည်။

ကျောင်းကားလုပ်ငန်း လုပ်ကိုင်ရန်အတွက် ရန်ကုန်တိုင်းဒေသကြီး အစိုးရအဖွဲ့က ရွှေလက် (Golden Hand) ဆိုသည့် ကုမ္ပဏီအား လုပ်ပိုင်ခွင့် ချထားပေးခဲ့သည်။ သို့သော် တစ်နှစ်ကျော်ကြာချိန်တွင် စီးပွားရေး တွက်ခြေကိုက်မှု မရှိဟုဆိုကာ အဆိုပါကုမ္ပဏီက ပြန်လည်အပ်နှံခြင်းကြောင့် ရန်ကုန်အစိုးရအဖွဲ့က အစားထိုး ပြေးဆွဲပေးမည်ဟု ဒုတိယအကြိမ် ရန်ကုန်တိုင်းဒေသကြီး လွှတ်တော် ပဉ္စမပုံမှန် အစည်းအဝေး ၂၂ ရက် မြောက်နေ့တွင် တိုက်ကြီးမြို့နယ် မဲဆန္ဒနယ် အမှတ် (၁) တိုင်းဒေသကြီး လွှတ်တော် ဦးတင်ရှိန်၏ မေးခွန်းအား ၀န်ကြီး ဒေါ်နီလာကျော်က ပြန်လည် ဖြေကြားခဲ့သည်။

ယင်းကြောင့် ကျောင်းကားအတွက် ချေးငွေရယူရာတွင် ရန်ကုန် အစိုးရအဖွဲ့က ချေးယူခြင်းလား၊ ရွှေလက်ကုမ္ပဏီက ချေးယူခြင်းလား ဆိုသည်မှာ တိတိကျကျ မသိရှိသေးပေ။ အောက်တိုဘာ ၅ ရက်ကလည်း လွှတ်တော်သို့ လာရောက်ဖြေကြား သည့် YRTA ဥက္ကဋ္ဌ ၀န်ကြီး ဒေါ်နီလာကျော်မှာလည်း တိတိကျကျ ဖြေကြားနိုင်ခြင်း မရှိခဲ့ချေ။

ထို့ပြင် ကျောင်းကားနှင့် ပတ်သက်ပြီး တိတိကျကျ ဖြေဆိုနိုင်ခြင်း မရှိသည့်အပြင် ၀န်ကြီးဒေါ်နီလာကျော်၏ ဖြေကြားချက်မှာ ရှေ့နောက် လွဲနေကြောင်း ဒဂုံမြို့နယ် တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက ဆိုသည်။

“လွဲတာကတော့ တော်တော်လွဲတယ်။ ရွှေလက်ကုမ္ပဏီက ဘယ်ကနေ ၀င်လာပြီး လုပ်သွားလဲ ဆိုတာကို ကိုယ်စားလှယ်တွေ ဂဃနဏ မသိရဘူး” ဟု ဦးကျော်ဇေယျက ဆိုသည်။

လွှတ်တော်တွင် ၀န်ကြီး ဒေါ်နီလာကျော်က ဖြေဆိုရာတွင် ချေးငွေကိစ္စနှင့် ပတ်သက်ပြီး တိတိကျကျ မသိသေးကြောင်း၊ ဘဏ္ဍာရေး တာဝန်ခံကို မေးမြန်းမှသာ ဖြေကြားနိုင်မည်ဖြစ်ကြောင်း ပြောကြားခဲ့သည်။

ယင်းကြောင့် ကျောင်းကားအတွက် ကမ္ဘောဇဘဏ်မှ ချေးယူ ထားသည့် ငွေမှာ မည်သူချေးယူထား မှန်းမသိသည့် ငွေများဖြစ်နေသည်။ ယင်းကြောင့် ပွင့်လင်းမြင်သာမှုနှင့် ပတ်သက်ပြီး မေးခွန်းထုတ်ရမည့် အခြေအနေ ဖြစ်နေသည်ကို တွေ့ရသည်။

လွှတ်တော်၏ အတည်ပြုချက် ရယူခြင်းမရှိ၊ လွှတ်တော်ကိုယ်စားလှယ်များကို ဆွေးနွေးခြင်းမရှိဘဲ ငွေချေးယူခဲ့သည့် ရန်ကုန်တိုင်းဒေသကြီး အစိုးရအဖွဲ့၏ လုပ်ဆောင်ချက်မှာ မေးခွန်းထုတ်ရမည့် အနေအထား ဖြစ်သည်။

လမ်းဘေးဈေးသည် ၁၆၀၀ အတွက် ကျပ်သိန်းပေါင်း ၁၈၀၀၀ အသုံးပြုခဲ့ပြီး အောင်မြင်မှုမရသည့် လမ်းဘေးညဈေးတန်း

အမျိုးသား ဒီမိုကရေစီ အဖွဲ့ချုပ် အစိုးရတက်ပြီး မကြာမီတွင် ရန်ကုန်ကမ်းနားညဈေးအား ၂၀၁၆ ခုနှစ် နိုဝင်ဘာ ၂၃ ရက်တွင် ဈေးသည်ပေါင်း ၁၆၀၀ ကျော်ဖြင့် စတင်ဖွင့်လှစ်ခဲ့သည်။

ရန်ကုန်မြို့ လသာလမ်းရှိ လမ်းဘေးဈေးသည်များနှင့် ဆူးလေပတ်ဝန်းကျင်ရှိ လမ်းဘေးဈေးသည်များ အတွက် ရည်ရွယ်လုပ်ဆောင်ခဲ့ပြီး ကျပ်သိန်းပေါင်း ၁၈၀၀၀ ကျော် သုံးစွဲခဲ့သည်။

ညဈေးအတွက် ရေပေးဝေရေးစနစ်၊ အိမ်သာစနစ်၊ လျှပ်စစ်မီးရရှိရေး စသည့်လုပ်ငန်းများအတွက် ရန်ကုန်မြို့တော် စည်ပင်သာယာရေး ကော်မတီက ဦးဆောင်က၍ လုပ်ဆောင်ခဲ့ခြင်းဖြစ်သည်။

ကမ်းနားလမ်း ညဈေးတွင် ဈေးဌာနမှ  ငွေလုံးငွေရင်း ကျပ်သန်း ၆၀၀ ကျော်နှင့် ရေသန့်ဌာနမှ ငွေလုံးရင်း ကျပ်သန်း ၉၀၀ ကျော် စုစုပေါင်း ကျပ်သန်း ၁၅၀၀ ကျော်သုံးစွဲထားပြီး အခြားသော ဌာနများကလည်း သုံးစွဲမှုများရှိသည်။

သို့သော် ရန်ကုန်တိုင်းဒေသကြီး စာရင်းစစ်ချုပ်၏၂၀၁၆-၂၀၁၇ ဘဏ္ဍာနှစ် စစ်ဆေးတွေ့ရှိချက် အစီရင်ခံစာအပေါ် ပြည်သူ့ငွေစာရင်း ကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာနှင့် စပ်လျဉ်းပြီး ရန်ကုန်မြို့ ညဈေးတန်း ကုန်ကျငွေအား တွေ့ရှိခဲ့ခြင်း ဖြစ်သည်။

သို့သော် ညဈေးအကောင်အထည်ဖော်ရာတွင် ကုန်ကျငွေများကို အသေးစိတ် တင်ပြထားခြင်း မဟုတ်ဘဲ ငွေလုံးငွေရင်း ကုန်ကျငွေများကိုသာ ဖော်ပြထားခြင်းဖြစ်သည်။

“လမ်းဘေးဈေးသည် ၁၆၀၀ အတွက် အဲဒီငွေပမာဏ ကုန်ကျသွားတယ်ဆိုတာက တော်တော်အံ့အားသင့်စရာ ကောင်းတယ်။ အခုတော့ အောင်မြင်မှုရလား မရလားဆိုတာ မြင်တဲ့အတိုင်းပဲလေ” ဟု ကျောက်တံ တားမြို့နယ်မှ တိုင်းဒေသကြီး လွှတ်တော်ကိုယ်စားလှယ် ဒေါ်ကြည်ပြာက ဆိုသည်။

လက်ရှိတွင် လွှတ်တော်ကိုယ်စားလှယ်များနှင့် ကော်မတီများ၏ အခက်အခဲမှာ အစိုးရအဖွဲ့က ငွေစာရင်း ရှင်းလင်းမှုများနှင့် ပတ်သက်ပြီး မေးမြန်းရန် လိုအပ်သည့်အချိန်တွင် ဌာနများ၏ ပြန်လည်ဖြေကြားမှုကို မရရှိခြင်းပင်ဖြစ်သည်။

“အခု စာရင်းစစ် အစီရင်ခံမှာတော့ ငွေသုံးထားတဲ့ဟာတွေကို တွေ့ တာပေါ့။ ကျွန်တော်တို့ ပြည်သူ့ငွေ စာရင်းကလည်း အစီရင်ခံစာတွေ လွှတ်တော်ကို တင်တယ်။ တွေ့ရှိချက်တွေပေါ့။ အဲဒီမှာ ဘာအခက်အခဲဖြစ် လဲဆိုတော့ ကိုယ်စားလှယ်တွေက မေးစရာ ထပ်ရှိလာပြီဆိုရင် ဌာနတွေ ဘက်က ပြောခွင့်မရဘူး။ အဲဒီတော့ ကိုယ်စားလှယ်တွေ ထပ်သိချင်တာ တွေရှိလာတော့ မေးမရတော့ဘူး” ဟု ပြည်သူ့ငွေစာရင်းကော်မတီဥက္ကဌ ပုဇွန်တောင်မြို့နယ် တိုင်းဒေသကြီး လွှတ်တော်ကိုယ်စားလှယ် ဦးတင့် လွင် (ခ) မောင်လွင်မွန်(ကသာ) က ပြောကြားသည်။

ရန်ကုန်တိုင်းဒေသကြီး အစိုးရ အဖွဲ့၏ အောင်မြင်မှု မရှိသေးသည့် စီမံကိန်းတစ်ခုတွင် အပါအ၀င်ဖြစ်သည့် ရန်ကုန်ညဈေးတန်းကြောင့် ပြည်သ့ဘဏ္ဍာငွေများ အလဟဿ ဆုံးရှုံးမှုများ ဖြစ်ပေါ်ခဲ့သည်။

“ရန်ကုန်ညဈေးစီမံချက်မှာ ကျပ်သိန်းပေါင်း ၁၈၀၀၀ သုံးစွဲထား တာ တွေ့ရသော်လည်း မြေပြင်ကွင်း ဆင်းကြည့်တဲ့အခါမှာ ဘာကြောင့် ဒီလောက်ငွေကြေးတွေ ကုန်သွားရ ကြောင်း ဆက်စပ်လို့မရအောင် ဖြစ် ရပါတယ်။ ယင်းအတွက် ကုန်ကျစရိတ် ကျပ်သိန်း ၁၈၀၀၀ ကျော်ရဲ့ အသေးစိတ်စာရင်းကို မြို့တော်စည် ပင် တာဝန်ရှိသူများက လွှတ်တော်ကို အမြန်ဆုံးရှင်းလင်း တင်ပြပေးရန် လွှတ်တော်မှ တောင်းဆိုပါတယ်” ဟု မရမ်းကုန်းမြို့နယ် မဲဆန္ဒနယ်(၁)တိုင်းဒေသကြီး လွှတ်တော်ကိုယ်စား လှယ် ဦးရန်ရှင်းက ဆိုသည်။

မြေပြင်အခြေအနေကို စူးစမ်းလေ့လာမှုမရှိဘဲ လုပ်ဆောင်ခြင်း၊ ပြည်သူ့ကိုယ်စားလှယ်များဖြစ်သည့် လွှတ်တော်ကိုယ်စားလှယ်များနှင့် ဆွေးနွေးခြင်းမရှိဘဲ လုပ်ဆောင်ခဲ့ခြင်း မရှိသဖြင့် လက်ရှိရန်ကုန် ညဈေးတန်းမှာ ပျက်စီးနေပြီဖြစ်သည်။

ရန်ကုန်မြစ်ရေ မြင့်တက်ပါက ဈေးဆိုင်များအထိ ရေနစ်မြုပ်ခြင်း၊ လမ်းဘေးတွင် ရှိသဖြင့် ကွန်တိန်နာ ယာဉ်များ မကြာခဏ တိမ်းမှောက် ခြင်းနှင့် ယာဉ်တိုက်မှုများ မကြာခဏ ဖြစ်ပွားနေသဖြင့် ရန်ကုန်ညဈေးမှာ အောင်မြင်မှု မရှိဘဲ ပြည်သူ့ဘဏ္ဍာငွေများ ဆုံးရှုံးခဲ့ပြီဖြစ်သည်။

“လုပ်နည်းလုပ်ဟန် တွေကလည်း မေးခွန်းထုတ်စရာတွေ ဖြစ်နေသလို လက်ရှိမှာလည်း အစ်မတို့ကတော့ ထောက်ပြဝေဖန်နေတုန်းပဲ” ဟု ဒေါ်ကြည်ပြာကဆိုသည်။

လက်ရှိအချိန်တွင် ဈေးသည်ပေါင်း ၂၀၀ ခန့်သာ ကမ်းနားလမ်း ညဈေးတွင် ရောင်းချလျက်ရှိသည်။

တိုးကောက်ထားတဲ့အခွန်၊ ၁၃၄ ဘီလျံနဲ့ အကြွေးတင်နေတဲ့ ရန်ကုန်အစိုးရရဲ့ စီးပွားရေး

ရန်ကုန်မြို့ ကမ်းနားလမ်း ညဈေးတန်းတွင် မိုးရွာပြီးနောက် ဈေးသည်များ ရေထဲတွင် ဈေးရောင်းနေရစဉ် (ဓာတ်ပုံ-ကြည်နိုင်)

ရန်ကုန်တိုင်းဒေသကြီး အစိုးရအဖွဲ့က စီးပွားရေး လုပ်ငန်းများတွင် ၀င်ရောက် လုပ်ကိုင်ရန်အတွက် ကျပ် ၁၃၄ ဘီလျံကို သုံးစွဲထားသည်။

ယင်း ၁၃၄ ဘီလျံမှာ Yangon Metropoliton Development Public Co., Ltd တွင် ၅၄ ဘီလျံ၊ New Yangon Development Co., Ltd တွင် ၁၀ ဘီလျံ၊ ရန်ကုန်ဘတ်စ်ကား အများနှင့်သက်ဆိုင်သော ကုမ္ပဏီလီမိတက် (YBPC) တွင် ၃၅ ဘီလျံ၊ ရန်ကုန်မြို့ပြ အများပြည်သူ သယ်ယူပို့ဆောင်ရေး အများနှင့်သက်ဆိုင်သော ကုမ္ပဏီလီမိတက် (YUPT) တွင် ၃၅ ဘီလျံ စုစုပေါင်း ကျပ် ၁၃၄ဘီလျံကို ရင်းနှီးမြှုပ်နှံထားသည်ဟု စာရင်းစစ်ချုပ် အစီရင်ခံစာအရ သိရသည်။

ထို့ပြင် YBS ယာဉ်ဝယ်ယူရာ တွင် ငွေကြေးလုံလောက်မှု မရှိသဖြင့် ဧရာဝတီဘဏ်မှ ချေးယူထားသည့် ကျပ် ရှစ်ဘီလျံနှင့် ကျောင်းကားများ ၀ယ်ယူရန် ကမ္ဘောဇဘဏ်မှ ချေးယူ ထားသည့် ကျပ်သန်း ၅၅၀၀ နှင့် ပေါင်းလိုက်မည်ဆိုပါက ရန်ကုန် တိုင်းအစိုးရအဖွဲ့၏ စီးပွားရေးလုပ် ငန်းများအတွက် ရင်းနှီးမြုပ်နှံထားမှု မှာ ကျပ် ဘီလျံ ၂၀၀ ကျော်ရှိလာပြီ ဖြစ်သည်။

ယင်းတို့အနက် ဘဏ်များမှ ချေးယူထားသည့် ငွေများသာမက ရင်းနှီးမြှုပ်နှံထားသည့် ကျပ် ၁၃၄ ဘီလျံမှာ တိုင်းဒေသကြီးလွှတ်တော် သို့ ပွင့်လင်းမြင်သာစွာချပြထားခြင်း မရှိသည့် ငွေကြေးများဖြစ်သည်။

ယခုထွက်ရှိလာသည့် တိုင်းဒေသကြီး စာရင်းစစ်ချုပ်၏ အစီရင်ခံ စာမှာလည်း အသေးစိတ် စစ်ဆေး နိုင်ခြင်းမရှိသေးသည့် အစီရင်ခံစာ ဖြစ်သည်။

အကြောင်းမှာ ကုမ္ပဏီပုံစံဖွဲ့ စည်းထားခြင်းဖြစ်သဖြင့် ပြင်ပစာ ရင်းစစ်အနေဖြင့်သာ စစ်ဆေးထား ခြင်းဖြစ်ပြီး ပြည်ထောင်စုစာရင်း စစ်ချုပ် ဥပဒေနှင့်အညီ တာဝန်ပေး အပ်လာပါက ပြန်လည်စစ်ဆေးမည် ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့ စာရင်းစစ်ချုပ် ဒေါ်ခင် သန်းလှက ရန်ကုန်တိုင်းဒေသကြီး လွှတ်တော်တွင် ပြောကြားထား သည်။

ပြည်ထောင်စု စာရင်းစစ်ချုပ် ဥပဒေပုဒ်မ ၂၅(င) အရ ပြည်ထောင် စု စာရင်းစစ်ချုပ်က ဖြစ်စေ၊ တိုင်း ဒေသကြီး၊ ပြည်နယ်ဝန်ကြီးချုပ်က ဖြစ်စေ၊ ဥပဒေနှင့်အညီ ပေးအပ် သည့် အခြားတာဝန်များထမ်း ဆောင်ခြင်း၊ ပုဒ်မ ၂၅ (စ)  သက်ဆိုင် ရာ တိုင်းဒေသကြီး သို့မဟုတ် ပြည် နယ်အဆင့် အဖွဲ့အစည်းများ၊ အစိုးရဌာန၊ အစိုးရ အဖွဲ့အစည်းများ၏ လုပ်ငန်းအကောင်အထည်ဖော် ဆောင်ရွက်မှုများကို စစ်ဆေးရန် တိုင်းဒေသကြီး သို့မဟုတ် ပြည်နယ် လွှတ်တော်မှ တာဝန်ပေးအပ်ပါက စစ်ဆေး၍ တိုင်းဒေသကြီးသို့ မဟုတ် ပြည်နယ်လွှတ်တော်များသို့ အစီရင်ခံစာ တင်ပြခြင်း၊ ပုဒ်မ ၂၅ (ဇ) အရ နိုင်ငံပိုင် ရေ၊ လေ၊ မြေ၊ သယံဇာတများကို အသုံးပြုပြီး အကျိုးခံစားခွင့်ပေးသည့် သက်ဆိုင်ရာ တိုင်းဒေသကြီး သို့မဟုတ် ပြည် နယ်အစိုးရအဖွဲ့နှင့် စာချုပ်ပုံစံအမျိုးမျိုး၊ နည်းစနစ် အမျိုးမျိုးဖြင့် ဖက်စပ်လုပ်ကိုင်ဆောင်ရွက်သည့် လုပ်ငန်းများ၏ လုပ်ငန်းနှင့် စာရင်း များကို လိုအပ်၍ တာဝန်ပေးအပ်လာပါ စစ်ဆေးခြင်းဟု ဖော်ပြထားသည်။

လက်ရှိထက် ပိုမိုတိကျသည့် စာရင်းများကို ရရှိလိုပါက သက်ဆိုင် ရာ တိုင်းဒေသကြီးနှင့် ပြည်နယ် လွှတ်တော်များက တိုင်းဒေသကြီး စာရင်းစစ်ချုပ်အား တာဝန်ပေးအပ်ရန် လိုအပ်သည်။

အခြားတစ်ဖက်တွင်လည်း ယခုနှစ်တွင် ရန်ကုန်တိုင်းဒေသကြီး အတွင်းသွားလာနေသည့် မော်တော် ယာဉ်ဘီးခွန်များကိုလည်း တိုးမြှင့်ကောက်ခံလျက်ရှိသည်။

မတ် ၂၁ ရက်တွင် ရန်ကုန်တိုင်းဒေသကြီး လွှတ်တော်သို့ တင်သွင်းခဲ့ သည့်  အခွန်အခဥပဒေကြမ်းမှာ အတည်ပြုခဲ့ပြီးနောက်တွင် ရန်ကုန် တိုင်းအတွင်းသွားလာနေသည့် မော် တော်ယာဉ်အများစုမှာ ဘီးခွန်အား တန်ချိန်ဖြင့် ကောက်ခံနေသည့် အစား အင်ဂျင်ပါဝါပေါ်မူတည်ကာ ပြောင်းလဲကောက်ခံခဲ့သည်။

ယင်းသို့ တိုးမြှင့်ကောက်ခဲ့ခြင်း ကြောင့် တိုင်းဒေသကြီးအစိုးရအနေ ဖြင့် ယခင်က တစ်နှစ်လျှင် ကျပ် နှစ် ဘီလျံခန့်မှ ခန့်မှန်း ၁၅ ဆခန့်အထိ တိုးကာ ကျပ်ဘီလျံ ၃၀ ခန့်အထိ ပိုမိုရရှိမည်ဖြစ်သည်။

ဘီးခွန်အနိမ့်ဆုံးနှုန်းထားပေး ရသည့် မော်တော်ဆိုင်ကယ်ဆိုလျှင် ယခင်က တစ်နှစ် ၉၃၅ ကျပ်သာ ရှိခဲ့သော်လည်း စနစ်သစ်တွင် အနိမ့်ဆုံးအဖြစ် တစ်ရက်ကျပ် ၁၀၀ နှုန်း ဖြင့် တစ်နှစ်အတွက် ၃၆၅၀၀ ကျပ် အထိ ကျသင့်မည်ဖြစ်သည်။

အင်ဂျင်ပါဝါဖြင့် ပြောင်းလဲ လိုက်သည့် စနစ်သစ်တွင်  ၆၆၀ စီစီ မှ ၁၃၀၀ စီစီအထိ တစ်ရက် ကျပ် ၁၅၀ သတ်မှတ်ထားသဖြင့် တစ်နှစ်လျှင် ကျပ် ၅၄၇၅၀ ကုန်ကျမည်ဖြစ်သည်။

တန်ချိန်အမြင့်ဆုံးယာဉ်များ ပေးဆောင်ခဲ့ရသည့် နှုန်းထားကို ကြည့်မည်ဆိုပါက  ၄၀၀၀ စီစီ အထက်ကို တစ်နှစ်ကျပ် ၂၀၄၀ ကောက်ခံရာကနေ အခုစနစ်သစ်မှာ ၄၃၀၁ စီစီအထက်ဆိုပါက တစ်ရက် ကျပ် ၃၀၀ နှုန်းဖြင့် တစ်နှစ်ကျပ် ၁၀၉၅၀၀ အထိ ပေးဆောင်ရ မည် ဖြစ်သည်။

ရန်ကုန်မြို့တွင် ၂၀၁၇-၂၀၁၈ ဘဏ္ဍာနှစ် ဇူလိုင်လကုန်အထိ ယာဉ် စီးရေ ၅၂၉၄၃၇ စီးရှိသဖြင့် မော် တော်ယာဉ်မှ အခွန်ရရှိမှုမှာ ကျပ် ဘီလျံ လေးဆယ်ခန့် တိုးမြင့်ရရှိမည် ဖြစ်သည်။

ယင်းသို့ တိုးမြင့်ရရှိလာသည့် အခွန်ငွေများကို မည်သည့် နေရာ တွင် သုံးစွဲခဲ့သည်ဆိုသည်ကိုပြည်သူ များအား ပွင့်လင်းမြင်သာစွာချပြရန် လိုအပ်လာမည်ဖြစ်သည်။

ဘဏ္ဍာရေး စည်းမျဉ်းစည်း ကမ်းများကိုကျော်လွန်ကာ လူပုဂ္ဂိုလ်အရ ချေးယူထားသည့် ငွေကြေးများ အား ပြန်လည်ပေးဆပ်ရန် လွှတ် တော်တွင် တာဝန်မရှိကြောင်း လွှတ် တော်ကိုယ်စားလှယ်များက စာရင်း စစ်ချုပ်အစီရင်ခံစာ ဆွေးနွေးမှုတွင် ပြောကြားထားကြသည်။

ယင်းကြောင့် ပြည်သူများထံမှ ရရှိသည့် အခွန်ငွေကြေးများကို ဖွံ့ဖြိုးရေးလုပ်ငန်းများတွင် အသုံးမပြုဘဲ ချေးငွေပေးဆပ်ခြင်းများတွင် အသုံးမပြုနိုင်စေရန် စောင့်ကြည့်ရမည်ဖြစ်သည်။

ဖွဲ့စည်းပုံ အခြေခံဥပဒေကို ဖောက်ဖျက်နေသည့် ရန်ကုန်အစိုးရ ဖြေဆိုရမည့် မေးခွန်းများ

အသေးစိတ် စစ်ဆေးထားခြင်း မရှိသေးသည့် စာရင်းစစ်ချုပ် အစီရင်ခံစာ ထွက်ပေါ်လာပြီး နောက်ပိုင်းတွင် လွှတ်တော်ကိုယ်စားလှယ်များမှ ဝေဖန်မှုများ ဆက်တိုက်ထွက်ပေါ် လာခဲ့သည်ကို တွေ့ရသည်။

အများစု ဝေဖန်ထောက်ပြသည့် အကြောင်းအရာမှာ ရန်ကုန်တိုင်းဒေသကြီး အစိုးရအဖွဲ့၏ လွှတ်တော်သို့ တင်ပြခြင်း မရှိသည့် လုပ်ဆောင်မှုများဖြစ်သည်။

“အစီရင်ခံစာက အသေးစိတ် မကျသေးဘူး။ ထပ်သိရအောင် လုပ်ရဦးမယ်။ အခုထွက်လာတဲ့ အချိန်မှာ ဥပဒေနဲ့ မညီတာတွေ အများကြီးပဲ” ဟု ဦးကျော်ဇေယျက ဆိုသည်။

အလားတူ စီမံကိန်းများ လုပ်ဆောင်ရာတွင်လည်း လွှတ်တော်၏ သဘောထား မေးမြန်းခြင်း၊ ဆွေးနွေးခြင်းများ မရှိဘဲ လုပ်ဆောင်ခဲ့သည့် ဖြစ်စဉ်များလည်းရှိသည်။

ထင်ရှားသည့် သာဓက တစ်ခုမှာ YBS စနစ်စတင်ချိန်တွင် လွှတ်တော်ကိုယ်စားလှယ်များအား ကြိုတင်အသိပေး ညှိနှိုင်းမှုများ ပြုလုပ်မှုမရှိခြင်း၊ ပုဂ္ဂလိကဘဏ်များမှ ချေးငွေရယူခြင်း၊ အမြန်လမ်းမကြီး သုံးမိုင်တစ်ဖာလုံ လှည်းကူးမြို့နယ်ရှိ ဧက ၁၄၀၀ ကျော်တွင် Eco Green City အိမ်ရာစီမံကိန်း အကောင်အထည်ဖော်ရန် ဆောင်ရွက်ခြင်း၊ ရန်ကုန်မြို့သစ် စီမံကိန်းနှင့် ပတ်သက်ပြီး လွှတ်တော်တွင် အသေးစိတ် ချပြနိုင်မှုမရှိခြင်း စသည်တို့ ဖြစ်သည်။

လက်ရှိတွင် သမ္မတရာထူး ရယူထားသည့် ဦးဝင်းမြင့်မှာ ပြည်သူ့လွှတ်တော်ဥက္ကဋ္ဌတာဝန် ထမ်းဆောင်စဉ်က ရန်ကုန်တိုင်းရှိ လွှတ်တော်ကိုယ်စားလှယ်များနှင့် တွေ့ဆုံစဉ် စီမံကိန်းမှန်သမျှ လွှတ်တော်သို့ မဖြတ်ဘဲ အကောင်အထည်ဖော်ခွင့် မပြုနိုင်ကြောင်း ပြောကြားထားသည်။

ဖွဲ့စည်းပုံ ပြင်ဆင်မည်ဟု ကြွေးကြော်ကာ အာဏာရယူခဲ့သည့် အမျိုးသားဒီမိုကရေစီ အစိုးရလက်ထက်တွင် ပြင်ဆင်မှု မပြုနိုင်သေးသည့် ကာလတွင် ပြဋ္ဌာန်းချက်များကို လေးစားလိုက်နာရမည်ဖြစ်သည်။

ရန်ကုန်တိုင်းဒေသကြီး အစိုးရအဖွဲ့ လက်ရှိလုပ်ကိုင် ဆောင်ရွက်နေမှုများမှာ ဖွဲ့စည်းပုံ အခြေခံဥပဒေအား ကျော်လွန်နေပြီး မေးခွန်းထုတ်စရာ များစွာကျန်နေကြောင်း လွှတ်တော်ကိုယ်စားလှယ်ဟောင်း ဒေါ်ညိုညိုသင်းက ဆိုသည်။

“အခုတင်နေတဲ့အကြွေးကို ဘယ်သူကဆပ်မှာလဲ။ ကားတစ်စီး ၄၀၀၀ ပေးရတဲ့ငွေတွေက ဘယ်ရောက်နေလဲ။ စာရင်းထဲမှာ ကျန်နေတာ ဘယ်လောက်လဲ။ သုံးစွဲတာတွေကရော ဘယ်နေရာမှာလဲ။ အဲဒါတွေက မေးခွန်းတွေ မေးရမှာ ဖြစ်သလို အဂတိတွေ ကင်းရှင်းရဲ့လား ဆိုတာလည်း မေးရတော့မယ်” ဟု ဒေါက်တာဒေါ်ညိုညိုသင်းက ပြောကြားသည်။

လက်ရှိတွင် ရန်ကုန်တိုင်းဒေသကြီး အစိုးရအဖွဲ့၏ ငွေစာရင်း အစီရင်ခံစာမှာ ကျော်စောသတင်း ဖြစ်နေပြီဖြစ်သည်။ ကော်ထိုင်ခုံ တစ်လုံးလျှင် ကျပ် ခုနစ်သောင်းဟု ဖော်ပြထားခြင်းအား လွှတ်တော်ကိုယ်စားလှယ်က ဝေဖန်ထောက်ပြမှသာ စာရိုက်မှားယွင်းခြင်း ဖြစ်ကြောင်း အစိုးရအဖွဲ့က လွှတ်တော်တွင် ပြန်လည်ဖြေဆိုခဲ့သည်။

ယင်းကဲ့သို့ အခြေအနေများ တွင် ကွာဟနေသည့် ငွေကြေးများ မရှိစေရန် စာရင်းစစ်အဖွဲ့အား တာ ၀န်ပေးအပ်ရန် လိုအပ်သလို ကျော်စောသတင်းအဖြစ် သတ်မှတ်ကာ အဂတိလိုက်စားမှု တိုက်ဖျက်ရေး ကော်မရှင် အနေဖြင့်လည်း စောင့်ကြည့်ရမည့် အခြေအနေတစ်ခု ဖြစ်သည်။

“ပထမနှစ်မှာ မြတ်တယ်လို့ ပြောထားတယ်။ အခုဒီနှစ်မှာ ရှုံးနေတယ်လို့ပြောတဲ့ YBS က နောက်ကွယ်မှာ ဘာတွေရှိမလဲ။ အဲဒါကို စောင့်ကြည့်ရမယ်” ဟု ဒေါ်ညိုညိုသင်းက ပြောကြားသည်။

အလားတူ ဆုံးရှုံးသွားသည့် ဘဏ္ဍာငွေများအတွက် မည်သူက တာဝန်ယူမှု၊ တာဝန်ခံမှု အပြည့်ဖြင့် လုပ်ဆောင်မည် ဆိုသည်မှာလည်း မေးခွန်းထုတ်ရမည့် အခြေအနေ ဖြစ်သည်။

 

အနည်းဆုံးလုပ်ခနှုန်းအတိုင်း လစာမရသော YRTA ၀န်ထမ်းများ စုပေါင်းလက်မှတ်ရေးထိုး၍ အနည်းဆုံးလုပ်ခပေးချေရန် တောင်းဆို

အနည်းဆုံး လုပ်ခလစာနှုန်းအတိုင်း  လစာမရရှိခြင်းမရှိသော YRTA ၀န်ထမ်းများ စုပေါင်းလက်မှတ်ထိုး၍  အနည်းဆုံး လုပ်ခလစာပေးချေရန် တောင်းဆိုလျက်ရှိသည်။

အဆိုပါ YRTA ၀န်ထမ်း ၁၁၁ ဦး စုပေါင်းထိုးထားသည့် လက်မှတ်များကို ဇွန် ၁ ရက် ညနေပိုင်းတွင် တာမွေအလုပ်ရုံ၊ အလုပ်သမား ဥပဒေစစ်ဆေးရေးဦးစီးဌာနသို့ သွားရောက်ပေးပို့၍ အနည်းဆုံး လုပ်ခအတိုင်းပေးရန် တောင်းဆိုထားကြောင်း သိရသည်။

“မ.ထ.သ ကနေ YRTA ပြောင်းလိုက်တဲ့ ၂၀၁၇ တစ်လပိုင်း ၁၆ ရက်ကတည်းက အခုအထိ အနည်းဆုံးလစာမရဘူး။ မထသ လက်ထက်တုန်းက ကျွန်တော်က ဂိတ်မှူး၊ လစာက ၁၀၅၀၀၀ ရတယ်။ ကျွန်တော့်အောက်က လူတွေထဲမှာ ခုနစ်သောင်းလောက်ပဲရတဲ့ လူတောင်ရှိတယ်။ အဲဒီလစာတွေက အခုချိန်အထိ မပြောင်းလဲဘူး။ အစိုးရက ၄၈၀၀ ပြောင်းသွားလဲ ကျွန်တော်တို့လစာတွေမတိုးဘူး။ အရင်အတိုင်းပဲရတယ်” ဟု YRTA ယာဉ်စည်းကမ်းထိန်းသိမ်းရေးဌာနတွင် တာဝန်ထမ်းဆောင်နေသော ဦးနေလင်းက ပြောကြားသည်။

အဆိုပါဝန်ထမ်းများသည် ယခင်အနည်းဆုံးလုပ်ခလစာ ကျပ် ၃၆၀၀ မရသည့်အပြင် မေ ၁၄ ရက်က  ထပ်မံ အတည်ပြုသတ်မှတ်ခဲ့သည့် အနည်းဆုံးလုပ်ခလစာ ကျပ် ၄၈၀၀ နှုန်းထားကိုလည်း ရရှိခြင်းမရှိသဖြင့် ယင်းကဲ့သို့ လက်မှတ်ရေးထိုး တောင်းဆိုခြင်းဖြစ်ကြောင်း သိရသည်။

“YRTA  မှာ ဖွဲ့စည်းပုံမဆွဲရသေးတဲ့အတွက် အနည်းဆုံးလစာမပေးနိုင်ဘူးလို့ အရင် မထသ ဥက္ကဋ္ဌ ဦးလှအောင်က ကျွန်တော်တို့ကို အစည်းအဝေးခေါ်ပြီးပြောတယ်” ဟု ဦးနေလင်းက ပြောကြားသည်။

ယင်းကိစ္စနှင့်ပတ်သက်၍ယခင် မ.ထ. သ (ဗဟို) ဥက္ကဋ္ဌ လက်ရှိ YRTA အဖွဲ့ဝင် တစ်ဦးဖြစ်သူ ဦးလှအောင်က “အနည်းဆုံးလုပ်ခ လစာမပေးနိုင်ဘူးလို့ ကျွန်တော်တစ်ခွန်းမှ မပြောခဲ့ဘူး။ ကျွန်တော်တို့လစာနဲ့ ပတ်သက်ပြီး YRTA က မထသ၀န်ထမ်းတွေကို လွှဲပြောင်းရယူပြီးတဲ့နောက် ရသင့်ရထိုင်တာတွေ၊ လုပ်သက်ဆုကြေးတွေ ခွင့်ပြုပေးတဲ့အပြင် မထသတုန်းက ခံစားခွင့်တွေကို ဆက်လက်ခံစား ခွင့်ပြုထားပါတယ်” ဟု ပြောကြားသည်။

 

 

 

 

 

 

၂၀၁၄ ခုနှစ် မော်တော်ယာဉ်များ စနစ်တကျပြေးဆွဲရေး ဥပဒေသည် လက်ရှိအခြေအနေနှင့် ကိုက်ညီမှုမရှိသဖြင့် YRTA နှင့်ပတ်သက်ပြီး ဥပဒေအသစ်ပြန်လည်ရေးဆွဲရန် ပြုလုပ်နေဟု ဆို

YBS ယာဉ်စီးနင်းရန် စောင့်ဆိုင်းနေသူများကို တွေ့ရစဉ် (ဓာတ်ပုံ-ကျော်ဇင်ဖြိုး)

၂၀၁၄ ခုနှစ် မော်တော်ယာဉ်များ စနစ်တကျပြေးဆွဲရေးဥပဒေသည် လက်ရှိခရီးသည်သယ်ယူပို့ဆောင်ရေးအတွက် အများပိုင်ကုမ္ပဏီယာဉ်များ၊ ကုမ္ပဏီများ ကြီးကြပ်မှုစနစ်များနှင့် ကိုက်ညီမှုမရှိတော့သည့်အတွက် YRTA နှင့် ပတ်သက်၍ ဥပဒေအသစ် ပြန်လည်ရေးဆွဲရန် ပြုလုပ်နေကြောင်း ရန်ကုန်တိုင်းဒေသကြီးအစိုးရအဖွဲ့ လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ဇွန် ၁ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေးတွင် ပြောကြားသည်။

အဆိုပါကိစ္စအား တာမွေမြို့နယ် မဲ ဆန္ဒနယ်အမှတ် (၂) မှ တိုင်းဒေသကြီးလွှတ်တော်ကိုယ်စားလှယ် ဦးသိန်းမြင့်က “YBS စနစ်မှာ ဥပဒေမရှိဘဲဆောင်ရွက်နေခြင်းမှ ဥပဒေတစ်ခုရေးဆွဲပြီး စနစ်တကျဆောင်ရွက်ပေးရန် အစီအစဉ် ရှိ မရှိ၊ YRTA နှင့် ပတ်သက်၍ ဥပဒေတစ်ခုရေးဆွဲပြီး ဖွဲ့စည်းဆောင်ရွက်ပေးခြင်းဖြင့် YBS ၊ Water Taxi ၊ Taxi များကို စနစ်တကျထိန်းသိမ်းဆောင်ရွက်ခြင်း ရှိ မရှိ သိရှိလိုကြောင်း မေးခွန်းနှင့် ပတ်သက်ပြီး ၀န်ကြီးက ပြန်လည်ဖြေကြားရာတွင် ထည့်သွင်းပြောကြားခဲ့ခြင်း ဖြစ်သည်။

“YBS က YRTA ရဲ့စီမံမှုအောက်က ပြည်သူလူထု သယ်ယူပို့ဆောင်ရေးဝန်ဆောင်မှု လုပ်ငန်းဖြစ်ပါတယ်။ ၁၉၆၂ ခုနှစ်မှ စတင်ပြီးတော့ မော်တော်ယာဉ်လိုင်းပေါင်းစုံ ထိန်းသိမ်းရေးကော်မတီ မထသကို တည်ဆဲဥပဒေများနှင့်အညီ ဖွဲ့စည်းဆောင်ရွက်ခဲ့ပြီး ၂၀၁၇ ဇန်န၀ါရီ ၁၆ ရက်မှာ မထသကို ဖျက်သိမ်းပြီး YBS စနစ်ကို တည်ဆဲဥပဒေနဲ့အညီ ဖော်ဆောင်ခဲ့ပါတယ်။ ၂၀၁၄ ခုနှစ် မော်တော်ယာဉ်များ စနစ်တကျပြေးဆွဲရေး ဥပဒေနဲ့အညီ ပြောင်းလဲဖော်ဆောင်တဲ့ နေရာမှာ၊ အများပိုင်ကုမ္ပဏီပိုင်ယာဉ်များ၊ ကုမ္ပဏီများကြီးကြပ်မှု စနစ်များက ၂၀၁၄ ခုနှစ်တွင် ပြဋ္ဌာန်းခဲ့တဲ့ ဥပဒေသတ်မှတ်ချက်များနဲ့ မညီညွတ်တော့တဲ့အတွက် လက်ရှိအကောင်အထည်ဖော်မှုနှင့် ညီညွတ်တဲ့ဥပဒေပြဋ္ဌာန်းမှုများ လိုအပ်လျက်ရှိပါတယ်။ စနစ်သစ်သို့ ဖော်ဆောင်ရတဲ့အတွက် ဥပဒေတစ်ရပ် ပြဋ္ဌာန်းနိုင်ရေးကို လိုအပ်မှုများလေ့လာခြင်း၊ ဆွေးနွေးညှိနှိုင်းခြင်းများ ဆောင်ရွက်လျက်ရှိပါတယ်” ဟု ပြောကြားသည်။

ထိုသို့စီမံဆောင်ရွက်နေသည့် အချိန်တွင် ရန်ကုန်တိုင်းဒေသကြီးအစိုးရအဖွဲ့က နေ့စဉ် စီမံဆောင်ရွက်လျက်ရှိသော အများပြည်သူသယ်ယူပို့ဆောင်မှုကို စီမံဆောင် ရွက်ပေးနိုင်ရန် YBS က YRTA အဖွဲ့ကို ဖွဲ့စည်းတာဝန်ပေးအပ်ပြီး YBS သည် YRTA အောက်ရှိ အများပြည်သူ သယ်ယူပို့ဆောင်ရေး ၀န်ဆောင်မှုလုပ်ငန်းဖြစ်ကြောင်း၊ ဥပဒေပြဋ္ဌာန်းရန် စီစဉ်ဆောင်ရွက်နေစဉ်အတွင်း YRTA သည် အာဏာသက်ရောက်နိုင်ရန် နာယကအဖြစ် ရန်ကုန်တိုင်းဒေသကြီး ၀န်ကြီးချုပ်၊ ဥက္ကဋ္ဌအဖြစ် ရန်ကုန်တိုင်းဒေသကြီး လမ်းပန်းဆက်သွယ်ရေးဝန်ကြီးနှင့် အဖွဲ့ဝင်များအဖြစ် မြို့တော်ဝန်အပါအ၀င် တိုင်းဒေသကြီး ၀န်ကြီးများ၊ ဌာနဆိုင်ရာတာဝန်ရှိသူများဖြင့် ဖွဲ့စည်းထားသည့် YRTA အဖွဲ့ရှိကြောင်း ၎င်းက ပြောကြားသည်။

“YRTA နဲ့ ပတ်သက်ပြီး ဥပဒေများ ရေးဆွဲဆောင်ရွက်တဲ့အခါမှာ လိုအပ်ချက်အရ YBS နဲ့ အခြားသယ်ယူပို့ဆောင်ရေး လုပ်ငန်းများအတွက်လည်း စီမံဆောင်ရွက်သွားမှာ ဖြစ်ပါတယ်။ ထိုသို့ ဥပဒေကို ဆောင်ရွက်နေစဉ်ကာလမှာ Water Bus နဲ့ Taxi ကဲ့သို့သော သယ်ယူပို့ဆောင်ရေး လုပ်ငန်းများကိုလည်း အမိန့်ညွှန်ကြားချက်တွေ၊ လိုအပ်တဲ့ ဥပဒေ၊ နည်းဥပဒေတွေကို စီစဉ်ဆောင်ရွက်သွားမှာ ဖြစ်ပါတယ်” ဟု ၀န်ကြီးက ပြောကြားသည်။

YRTA ကပြေးဆွဲမည့် ကျောင်းကားခဈေးနှုန်းမှာ တစ်လလျှင် ကျပ်လေးသောင်းမှ ကျပ်ခုနစ်သောင်းအထိရှိနိုင်ပြီး သတ်မှတ်လမ်းကြောင်းတွင် မရှိသည့် ကျောင်းသားများအတွက် အခက်အခဲများစွာရှိနေကြောင်း သိရ

YRTA ကပြေးဆွဲမည့် ကျောင်းကားခဈေးနှုန်းမှာ တစ်လလျှင် ကျပ်လေးသောင်းမှ ကျပ် ခုနစ်သောင်းအထိရှိနိုင်ပြီး သတ်မှတ်လမ်းကြောင်းတွင်မရှိသည့် ကျောင်းသားများအတွက် အခက်အခဲများစွာရှိနေကြောင်း သိရသည်။

ယခုနှစ်တွင် စတင်ပြေးဆွဲမည့် YRTA ကျောင်းကား တစ်စီးလုံး၏ တစ်လပျမ်းမျှ ကျောင်းကားခ ကျပ်သိန်း ၂၀ ခန့်ဖြစ်နေသဖြင့် ခရီးစဉ်လမ်းကြောင်းပေါ်မူတည်ပြီး ကျောင်းသားတစ်ဦးလျှင် ကျောင်းကားခ ကျပ်လေးသောင်းမှ ခုနစ်သောင်းခန့်ထိရှိနိုင်ကြောင်း သတင်းများထွက်ပေါ်နေခြင်း ဖြစ်သည်။ ရန်ကုန်တိုင်းဒေသကြီးအစိုးရက ၀ယ်ယူထားသည့် ကျောင်းကားအစီး ၂၀၀ အနက် ၁၀၀အား ယခုနှစ်ကျောင်းဖွင့်ချိန်တွင် ရန်ကင်းနှင့် ကမာရွတ် TTC  ကျောင်းများတွင် စတင်ပြေးဆွဲမည် ဖြစ်သည်။

“သူတို့တောင်းတဲ့ဈေးက လေးသောင်းကနေ ငါးသောင်း၊ ခြောက်သောင်း၊ ခုနစ်သောင်းလောက်တော့ရှိတယ်။ တကယ်ပေါက်ဈေးကတော့ သေချာမသိသေးတော့ ပြောလို့မရသေးဘူး။ ကြားထားတာပေါ့။ ပြည်လမ်း TTC ကနေ အစ်မမိတ်ဆွေတစ်ယောက် ပြောတာကတော့ ပြည်လမ်း TTC  ကနေ မြောက်ဒဂုံကို ခုနစ်သောင်းလို့တော့ ပြောတယ်။ ရန်ကင်း TTC  ကနေကျတော့ ငါးသောင်းလို့ပြောတယ်။ အစ်မတို့တောင် ကြားကြားချင်း လန့်သွားတယ်။ ခုနစ်သောင်း နဲ့ဆိုရင် အယောက် ၃၀ တင်မယ်ပေါ့လေ။ ငါးသောင်းနဲ့ သမားက အယောက်လေးဆယ်တင်မယ်ပေါ့။ သူတို့ရဲ့ တစ်စီးကို ပျမ်းမျှက သိန်း ၂၀ လောက်မှန်းထားပုံပေါ်တယ်။ အဲဒီလိုတွေကြားတယ်” ဟု ပုဂ္ဂလိကကျောင်းကားပြေးဆွဲသည့် ယာဉ်ပိုင်ရှင်တစ်ဦးဖြစ်သည့် ဒေါ်စောမြတ်စိုးက  ပြောကြားသည်။

ထို့ပြင် သတ်မှတ်ထားသည့် မူဝါဒနှင့် မကိုက်ညီခြင်းအပါအ၀င် အခြားသောအချက်များကြောင့် ယခင်နှစ်က တစ်ဦးကျောင်းကား ပြေးဆွဲမှုအနေဖြင့် အစီးရေ ၇၀ ကျော် ရှိခဲ့သော်လည်း ယခုနှစ်တွင် အစီးရေ ၄၀ ခန့်သာကျန်ရှိနိုင်ပြီး အဆိုပါ တစ်ဦးကျောင်းကား ပြေးဆွဲသူများတွင် အရှုံးပေါ်ကာ အခက်အခဲများစွာ ဖြစ်ပေါ်နေကြောင်း သိရသည်။

အလားတူ YRTA  မှ ရောင်းချမည်ဟု ပြောကြားထားသည့် ကျောင်းကားများမှာ တစ်စီးလျှင် ကျပ်သိန်း ၅၀၀ ခန့်အထိရှိသဖြင့် ကျောင်းကားလုပ်ကိုင်သူအများစုမှ ၀ယ်ယူနိုင်ခြင်းမရှိကြောင်း၊ လက်ရှိတွင် ကျောင်းကားလုပ်ငန်းလုပ်ကိုင်သူများအနေဖြင့် အခက်တွေ့လျက်ရှိကြောင်း သိရသည်။

“အခုလက်ရှိဈေးကိုလည်း အဲဒီလောက်နဲ့ မတိမ်းမယိမ်းလောက်ပဲ မှန်းထားပါတယ်။ နေရာကိုလိုက်ပြီးတော့ ကွာတာပေါ့။ သူတို့ သတ်မှတ်တဲ့ မူဘောင်နဲ့ သတ်မှတ်ချက်နဲ့ ညီ တဲ့ကားနဲ့ ဘယ်မောင်း ညာဖွင့်တွေလေ။ အ၀ါရောင်ပြောင်းတာတို့ လုပ်ငန်းလိုင်စင်လုပ်တာတို့ လုပ်နေရတာပေါ့။ သူတို့ရောင်းချတဲ့ ကားတွေက သိန်းငါးရာကျော်ဆိုတော့ မ၀ယ်နိုင်ကြဘူးလေ။ သိန်းငါးရာကျော်ရင်းဖို့ကျတော့  မိဘတွေအနေနဲ့လည်း မတတ်နိုင်ကြဘူး။ ကျွန်မတို့ကလည်း မ၀ယ်နိုင်ဘူး။ အဲဒီတော့ လက်ရှိကျောင်းကားကိုပဲ သူတို့သတ်မှတ်ထားတဲ့ မူဝါဒတွေကို လိုက်နာလိုက်တယ်လေ။ အခက်အခဲတွေက လက်ရှိညာပေါက်ကားတွေကို ခွင့်မပြုတော့ဘူးဆိုတော့ ငိုတဲ့ သူကငို။ အကြွေးတွေက မကျေသေးဘူးလေ။ ဘယ်မောင်းကတွေလည်း လိုက်ဝယ်ဖို့ကို ရန်ကုန်လိုင်စင်က ရှားသွားပြီလေ။ ဂျပန်ကားတွေကို ခွင့်ပြုလိုက်တယ်ဆိုတာကလည်း သမားရိုးကျ ခွင့်ပြုတာမျိုး မဟုတ်ဘူးလေ။ မူဝါဒတွေအတိုင်း လုပ်ရမယ်ဆိုတော့ ဒီရှစ်လလေး ပဲလုပ်ရမှာကို အကုန်လိုက်လုပ်ရတော့ ဒုက္ခတွေရောက်ကုန်တာပေ့ါ။ တော်တော်ဒုက္ခ ရောက်ပါတယ်။ တချို့ဆို ထမင်းအိုးကွဲသွားတယ်။ ဆက်မလိုက်နိုင်တော့ဘူး။ မနှစ်က အစီး ၇၀ ကျော်ရှိတာ ဒီနှစ်ဆို ၄၀လောက်ပဲ ကျန်တော့တယ်။ ဈေးနှုန်းက သူတို့က ဈေးကိုမဖွင့်ပေးတော့၊ အစ်မတို့ကလည်း ဈေးကိုသတ်မှတ်လို့ မရသေးဘူး။ ဈေးသတ်မှတ်ဖို့ကို ကျောင်းရောက်တဲ့အခါ ခန့်မှန်းဈေးတွေ ရေးပေးခဲ့ပါလို့ပြောတယ်။ ခန့်မှန်းဈေးတွေဆိုတာ အခုဆို ဆီဈေးက တက်နေတယ်လေ။ ငါးထောင်လောက်ထိ တိုးယူမလားစဉ်းစားတယ်လေ။ သူတို့ကလည်း တိုးခိုင်းတယ်။ အစ်မတို့က နဂို တစ်သောင်းခွဲသမားကို နှစ်သောင်းယူဖို့၊ နှစ်သောင်းသမားကို နှစ်သောင်းခွဲလောက် ယူဖို့ ခန့်မှန်းထားတယ်” ဟု ရန်ကင်းမြို့နယ် တစ်ဝိုက်တွင်ပြေးဆွဲမည့် တစ်ဦးချင်းကျောင်းကားပြေးဆွဲသည့် ကားပိုင်ရှင်တစ်ဦးက ပြောကြားသည်။

YRTA ကျောင်းကားများကို လမ်းကြောင်းသုံးခု သတ်မှတ်ပြေးဆွဲမည်ဟု သိရပြီး သတ်မှတ်ထားသည့် လမ်းကြောင်းပေါ်တွင်မရှိသည့် ကျောင်းသားများအနေဖြင့် အခက်အခဲများစွာရှိနေကြောင်း ကျောင်းသားမိဘများ၏ ပြောကြားချက်များအရ သိရသည်။

ရန်ကုန်တိုင်းဒေသကြီးအစိုးရက ကျောင်းကား အစီးရေ ၁၀၀ ဖြင့် ယခုနှစ်တွင် ရန်ကင်းနှင့်ကမာရွတ် TTC ကျောင်းများ၌  စတင်ပြေးဆွဲမည်ဖြစ်သော်လည်း ကျောင်းကားခကြီးမြင့်မည်ကို စိုးရိမ်နေခြင်း၊ သတ်မှတ်လမ်းကြောင်းပေါ်မှ စုရပ်သို့ သွားရောက်စီးနင်းရန် အခက်အခဲရှိခြင်းစသည့် အခက်အခဲများကြောင့် ယခင်စီးနင်းနေကျ ကျောင်းကားများကိုသာ ဆက်လက်စီးနင်းရန် အစီအစဉ်ရှိကြောင်း ရန်ကင်း TTC သို့ ကျောင်းလာရောက်အပ်နှံသည့် ကျောင်းသားမိဘများထံမှ သိရသည်။

“အန်တီတို့က ရှစ်မိုင်မှာနေတာဆိုတော့ လမ်းကြောင်းပေါ်မှာ မရှိဘူး။ အဲဒီတော့ အခက်အခဲရှိတော့ အရင်စီးတဲ့ ကျောင်းကားကို ပဲပြန်စီးဖို့ရှိတယ်။ ပြီးတော့ သူတို့က ဈေးဘယ်လောက်သတ်မှတ်မလဲ မသိသေးဘူး” ဟု ရန်ကင်း TTC ကျောင်းသို့ မေ ၂၈ ရက် နံနက်ပိုင်းတွင် ကျောင်းလာရောက်အပ်နှံသည့် မူလတန်းကျောင်းသူတစ်ဦး၏ မိခင်ဖြစ်သူက ပြောကြားသည်။

ရန်ကင်းTTC ကျောင်းသို့ သွားရောက်စုံစမ်းမေးမြန်းမှုအရ YRTA ကျောင်းကား စီးနင်းမည့် ကျောင်းသားများအား စာရင်းပေးခိုင်းထားပြီး ယခင်နှစ်များတွင် စီးနင်းခဲ့သည့် ဖယ်ရီများကို ပြန်လည်စီးနင်းသူများအနေဖြင့် စာရင်းပေးရန် မလိုကြောင်း ကျောင်းသားမိဘများ၏ ပြောကြားချက်အရ သိရသည်။

YRTA ကျောင်းကားခများနှင့် တစ်ဦးချင်းပြေးဆွဲမည့် ကျောင်းကားများ၏ ကျောင်းကားခများကို မေ ၃၀ ရက်တွင် အစည်းအဝေးပြုလုပ်၍ တရားဝင်သတ်မှတ်ဆုံးဖြတ်မည်ဖြစ်ကြောင်းသိရပြီး လက်ရှိတွင် ခန့်မှန်းကျောင်းကားခများသာ ထွက်ပေါ်လျက်ရှိကြောင်း သိရသည်။

ကျောင်းကြိုပို့ကားများအားလုံးကို ကုန်းလမ်းပို့ဆောင်ရေး ညွှန်ကြားမှုဦးစီးဌာနက ကားအရောင် အ၀ါရောင်နှင့်၊ ဘယ်မောင်း၊ ယာဉ်၏ညာဘက်တွင် အတက်အဆင်း တံခါးပေါက်နှင့် လုံခြုံစိတ်ချရသည့် သော့စနစ်တပ် ဆင်ရမည်ဖြစ်ကြောင်း၊ ကျောင်းကားများ၏ အရှေ့နှင့် အနောက်ဘက်တွင် Schook Bus စာသား၊ ကျောင်းအမည်နှင့် တယ်လီဖုန်းနံပါတ်များ ရေးထားရမည်ဖြစ်ကာ ကျောင်းသား ၁၀ ဦးနှင့် အထက်တင်ဆောင်နိုင်ကြောင်း၊ ထိုင်ခုံများတွင် ခါးပတ်ပါရမည်ဖြစ်ပြီး ရှေးဦးသူနာပြုသေတ္တာ၊ မီးသတ်ဆေးဘူး၊ ယာဉ်မောင်းအနေဖြင့် ယာဉ်မောင်းလိုင်စင် (ဃ) လိုင်စင်ရှိရမည်ဖြစ်ကာ တစ်နာရီလျှင် ကီလိုမီတာ ၄၀ ထက် ကျော်လွန်မောင်းနှင်ခြင်းမပြုရန် သတ်မှတ်ထားကြောင်း သိရသည်။

ရန်ကုန်တိုင်းဒေသကြီးအတွင်း ကျောင်းကားပြေးဆွဲရန် အစိုးရနှင့် သဘောတူထားသည့် ကုမ္ပဏီမှ ကျောင်းကြိုပို့ယာဉ်များကို အစိုးရထံ ပြန်အပ်

ရန်ကုန်တိုင်းဒေသကြီးအတွင်း ကျောင်းကားပြေးဆွဲမည့် ကုမ္ပဏီက ကျောင်းကြိုပို့ယာဉ်များကို အစိုးရထံ ပြန်လည်အပ်နှံခဲ့ပြီး YRTA မှ ကြီးကြပ်၍ ပြေးဆွဲမည်ဖြစ်ကြောင်း YRTA အတွင်းရေးမှူး ဒေါက်တာမောင်အောင်က မေ ၁၇ ရက်တွင် ပြောကြားသည်။

ကျောင်းကားစီးနင်းသည့် ကျောင်းသား ကျောင်းသူများ၏ လုံခြုံရေးအတွက် နောက်ပွင့်ယာဉ်များဖြင့် ကျောင်းကားပြေးဆွဲခြင်းအား ခွင့်ပြုတော့မည်မဟုတ်ကြောင်း လွန်ခဲ့သောတစ်နှစ်ကျော်ခန့်က ရန်ကုန်တိုင်းဒေသကြီးအစိုးရအဖွဲ့က ညွှန်ကြားထားခဲ့ခြင်းဖြစ်သည်။

ယင်းသို့ဆောင်ရွက်ရာတွင် အစိုးရမှ ပုဂ္ဂလိကကုမ္ပဏီတစ်ခုဖြစ်သည့် Golden Hand ကုမ္ပဏီနှင့် သဘောတူညီခဲ့သော်လည်း လက်ရှိတွင် အဆိုပါကုမ္ပဏီတွင် အားနည်းချက်များ ရှိနေသည်ဟုဆိုကာ ကျောင်းကားပြေးဆွဲခြင်းအား ရုပ်သိမ်းခဲ့ပြီး ကျောင်းကားများကို YRTA မှ တာဝန်ယူပြေးဆွဲပေးမည်ဖြစ်ကြောင်း ဒေါက်တာမောင်အောင်က ပြောကြားသည်။

“လောလောဆယ်တော့ YRTA က ကြီးကြပ်ပြီးတော့ ပြေးမှာပါ။ သူတို့ဘက်က အားနည်းချက်တွေ အများကြီးရှိတယ်လေ။ တခြားကုမ္ပဏီကိုလွှဲဖို့ လောလောဆယ်တော့ မရှိသေးပါဘူး” ဟု YRTA အတွင်းရေးမှူး ဒေါက်တာမောင်အောင်က ဆက်လက်ပြောကြားသည်။

ကျောင်းကားပြေးဆွဲမှုအား ယခင်စာသင်နှစ်တွင် စတင်ဆောင်ရွက်ရန် စီစဉ်ခဲ့သော်လည်း အခက်အခဲများကြောင့် ပြေးဆွဲခြင်းမပြုနိုင်ခဲ့ကြောင်း သိရသည်။

ကျောင်းကားအစီး ၂၀၀ ၀ယ်ယူရာတွင် ကျပ် ၁၀ ဘီလျံကျော်ကုန်ကျခံ၍ ၀ယ်ယူခဲ့ခြင်းဖြစ်ပြီး ယခုစာသင်နှစ်တွင် ကျောင်းကြိုပို့ယာဉ်များအဖြစ် မီနီဘတ်စ်နှင့် မိုက်ခရိုဘတ်စ်များကိုသာ ပြေးဆွဲခွင့်ပြုမည်ဖြစ်ပြီး အခြားယာဉ်များဖြင့် ပြေးဆွဲခွင့်မပြုကြောင်း ရန်ကုန်တိုင်းဒေသကြီး သယ်ပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့မှ သိရသည်။

ရန်ကုန်မြို့တွင် ယာဉ်ကြောကြပ်တည်းမှုများ ဖြေလျှော့နိုင်ရန်အတွက် ကျောင်းကားများကို ပြေးဆွဲရန် စီစဉ်ခြင်းဖြစ်ကြောင်း ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်မှုအာဏာပိုင်အဖွဲ့မှ ပြောကြားထားသော်လည်း လက်ရှိတွင် ကျောင်းအများစုတွင် ပြေးဆွဲနိုင်ခြင်း မရှိသေးကြောင်း သိရသည်။

ကျောင်းကား စတင်ပြေးဆွဲနိုင်ရန် ဆောင်ရွက်စဉ်က ကျောင်းများတွင် ပြေးဆွဲနေသည့် ကျောင်းကားများ၊ မိဘများနှင့် သက်ဆိုင်ရာ ကျောင်းတာဝန်ရှိသူများ တွေ့ဆုံဆွေးနွေးမှုများ ပြုလုပ်ခဲ့ကြောင်း သိရသည်။

ကျောင်းကြိုပို့ကားများအား အ၀ါရောင်သတ်မှတ်ထားပြီး ဘယ်မောင်း၊ ယာဉ်၏ညာဘက်တွင် အတက်အဆင်းတံခါးပေါက်နှင့် လုံခြုံစိတ်ချရသော သော့စနစ်များ တပ်ဆင်ရမည်ဖြစ်ကြောင်း ကုန်းလမ်းပို့ဆောင်ရေး ညွှန်ကြားမှုဦးစီးဌာနမှ သတ်မှတ်ထားကြောင်း သိရသည်။

အလားတူ ကျောင်းကားများအရှေ့နှင့် အနောက်ဘက်တွင် School Bus စာသား၊ ကျောင်းအမည်နှင့် တယ်လီဖုန်းနံပါတ်များ ရေးထားရမည်ဖြစ်ပြီး ကျောင်းသား ၁၀ ဦးအထက် တင်ဆောင်နိုင်ကြောင်း သိရသည်။ ထိုင်ခုံများတွင် ခါးပတ်ပါရမည်ဖြစ်ပြီး ရှေးဦးသူနာပြုသေတ္တာနှင့် မီးသတ်ဆေးဘူးများ ပါဝင်ရမည်ဖြစ်ကြောင်း သိရသည်။

School Bus မောင်းနှင်မည့် ယာဉ်မောင်းအနေဖြင့် ယာဉ်မောင်းလိုင်စင် ‘ဃ’ လိုင်စင်ဖြစ်ပြီး ယာဉ်မောင်းနှင်နှုန်းကို ၁ နာရီ ၄၀ ကီလိုမီတာထက် ကျော်လွန်မောင်းနှင်ခြင်း မပြုရကြောင်း သိရသည်။

ရန်ကုန်မြို့လမ်းမများပေါ်တွင် ရာခိုင်နှုန်း ၇၀ အထိ သုံးစွဲနေသည်မှာ ကိုယ်ပိုင်ယာဉ်များဖြစ်ပြီး အများပြည်သူ သယ်ယူပို့ဆောင်ရေးမှာ ရာခိုင်နှုန်း ၃၀ သာရှိကြောင်း ရန်ကုန်တိုင်းဝန်ကြီးချုပ် ပြောကြား

ရန်ကုန်မြို့တွင် ပြေးဆွဲလျက်ရှိသော YBS ယာဉ်များကို ၂၀၁၈ ခုနှစ် ဧပြီလအတွင်းက တွေ့ရစဉ် (ဓာတ်ပုံ – ကြည်နိုင်)

ရန်ကုန်မြို့တွင် ယာဉ်ကြောကျပ်တည်းမှုများစွာရှိကြောင်း၊ လမ်းမများ၏ ရာခိုင်နှုန်း ၇၀ အထိသုံးစွဲနေသည်မှာ ကိုယ်ပိုင်ကားများဖြစ်ပြီး အများပြည်သူသယ်ယူပို့ဆောင်ရေးမှာ ရာခိုင်နှုန်း ၃၀ သာရှိကြောင်း၊ YBS အဲကွန်းကားများကို ပြည်သူလူထုအားလုံး၊ ချမ်းသာသည့်သူများပါ စီးနိုင်မည့်အဆင့်ဖြစ်ပြီဆိုပါက ယာဉ်ကြောကျပ်တည်းမှုများ လျော့ကျသွားမည်ဖြစ်ကြောင်း ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းက ဆိုသည်။

“ရန်ကုန်မြို့မှာ ယာဉ်ကြောကျပ်တည်းမှုများစွာရှိပါတယ်။ ဒီယာဉ်ကြောကျပ်တည်းမှု များစွာရှိတဲ့အပေါ်မှာ လမ်းမတွေအပေါ်မှာ ကြည့်မယ်ဆိုရင် ဒီလမ်းမတွေအပေါ်မှာ ၇၀ ရာခိုင်နှုန်း လမ်းမကို စိုးမိုးထားတာက ကိုယ်ပိုင်ကားများဖြစ်ပါတယ်။ အများပြည်သူသယ် ယူပို့ဆောင်ရေးဟာ ဒီလမ်းမရဲ့ ၃၀ ရာခိုင်နှုန်းကိုပဲ သုံးစွဲခွင့်ရတာဖြစ်ပါတယ်။ ဒါတောင်မှ တစ်ခါတလေမှာ ကိုယ်ပိုင်ကားနဲ့ တက္ကစီကားတွေကနေ ဘတ်စ်ကားမှတ်တိုင်မှာ ရပ်ထားတာတွေ ရှိပါသေးတယ်။ ဒါကြောင့်မို့ အများပြည်သူ သယ်ယူပို့ဆောင်ရေးကို ကျွန်တော်တို့ အဆင့်မြှင့်တင်နိုင်မယ်ဆိုရင် ရန်ကုန်မြို့ပေါ်မှာ ကိုယ်ပိုင်ကားတွေ သုံးစွဲနေမှုကို လျော့ကျသွားမှာဖြစ်ပါတယ်” ဟု ၀န်ကြီးချုပ် ဦးဖြိုးမင်းသိန်းက ပြောကြားသည်။

ရန်ကုန်တိုင်းဒေသကြီးအစိုးရအဖွဲ့အသစ်တာဝန်ယူပြီးချိန်တွင် မထသစနစ်ကို ရပ်ဆိုင်းခဲ့ကြောင်း၊ မထသစနစ်မှ YRTA(Yangon Regional Transport Authority) ထူထောင်ပြီး Yangon Bus Services ကို စတင်ဆောင်ရွက်ခဲ့ကြောင်း သိရသည်။

ယင်းကဲ့သို့ စတင်ဆောင်ရွက်ခဲ့သည့်အတွက် ရန်ကုန်မြို့၏ သယ်ယူပို့ဆောင်ရေးစနစ်သည် အတိုင်းအတာတစ်ခုအထိ မြှင့်တင် ဆောင်ရွက်နိုင်ခဲ့ပြီဖြစ်ကြောင်း၊ ရန်ကုန်မြို့၏ ဘတ်စ်ကား သယ်ယူပို့ဆောင်ရေးစနစ်ကို လက်ရှိထက်ပိုမိုကောင်းမွန်အောင် ဆောင်ရွက်သွားမည်ဖြစ်ကြောင်း ၀န်ကြီးချုပ်ဦးဖြိုးမင်းသိန်းက ပြောကြားသည်။

“ဒီနေရာမှာ အခုနောက်ဆုံးကြိုးစားနေတဲ့ စနစ်ကတော့ ကတ်စနစ်တစ်ခုကျင့်သုံးနိုင်ဖို့ဖြစ်ပါတယ်။ ကတ်စနစ်ကိုကျင့်သုံးချင်တဲ့ ကျွန်တော်တို့ရဲ့ရည်ရွယ်ချက်ဟာ ဘတ်စ်ကားစီးဖို့ သက်သက်မဟုတ်ပါဘူး။ ကျွန်တော်တို့ နိုင်ငံမှာရှိတဲ့ ပြည်သူလူထုကို ဘဏ်စနစ်နဲ့ နီးစပ်စေဖို့ဖြစ်ပါတယ်။ ကျွန်တော်တို့ရဲ့ဘဏ်နဲ့ ဆက်သွယ်ဆောင်ရွက်နိုင်တဲ့ အချိုးကိုကြည့်ရင် အလွန်နည်းပါးနေသေးတာ တွေ့ရပါတယ်။ အလွန်နည်းပါးတဲ့ အချိုးလောက်ပဲ ဘဏ်နဲ့ဆက်သွယ်ဆောင်ရွက်နေတာတွေ့ရပါတယ်” ဟု ၎င်းက ဆိုသည်။

“ကျွန်တော်တို့ဆီမှာ အများပြည်သူ အများစုဟာ လူဦးရေရဲ့ ၂ ဒသမ ၅ သန်းဟာ ဘတ်စ်ကား စီးနေပါတယ်။၂ ဒသမ ၅ သန်း သော ပြည်သူတွေသာ ဘဏ်စနစ်ကို သုံးစွဲနိုင်ပြီဆိုရင် ကျွန်တော်တို့အဆင့်တစ်ဆင့်ကို တက်နိုင်မှာဖြစ်ပါတယ်” ဟု ၀န်ကြီးချုပ်ဦးဖြိုး မင်းသိန်းက ဆိုသည်။

ထို့ကြောင့် ဘတ်စ်ကားများအတွက် သုံးစွဲမည့် ကတ်ပြားသည် အခြားသော ၀ယ်ယူ အသုံးပြုနိုင်မည့် ကတ်များဖြစ်ရန်လိုအပ်ကြောင်း သိရသည်။

“ကျွန်တော်တို့ YRTA ရဲ့ YBS စနစ်ကြီးဟာအခု လမ်းမပေါ်မှာ အဲကွန်းကားတွေ ကို တွေ့မြင်နေရမှာဖြစ်ပါတယ်။ ဒီအဲကွန်းကားတွေကိုသာ ပြည်သူလူထုအားလုံးက စီးနိုင်မယ့်အဆင့်၊ ချမ်းသာတဲ့သူတွေပါ ဘတ်စ်ကားစီးနိုင်တဲ့အဆင့်ဖြစ်ပြီဆိုရင် ကျွန်တော် တို့ရဲ့လမ်းမပေါ်မှာ တအားကျပ်တည်းနေတဲ့ အခြေအနေဟာ လျော့ကျသွားမှာဖြစ်ပါတယ်။ အားလုံးက ကိုယ်ပိုင်ကားကို စီးချင်လို့ စီးနေကြတာတော့မဟုတ်ပါဘူး။ အများပြည်သူ သယ်ယူပို့ဆောင်ရေးဟာ အလွန်အင်မတန်ကို ညံ့ဖျင်းခဲ့တဲ့အတွက် ကိုယ်ပိုင်ကားကို စီးကြရတာဖြစ်ပါတယ်။ အများပြည်သူသယ်ယူ ပို့ဆောင်ရေးကိုသာ မြှင့်တင်နိုင်မယ်ဆိုရင် ကိုယ်ပိုင်ကားစီးမှုဟာ လျော့ကျသွားနိုင်တယ်” ဟု ၀န်ကြီးချုပ်ဦးဖြိုးမင်းသိန်းက ပြောကြားသည်။

 

 

သင်္ကြန်ကာလအတွင်း Complain Center မှတစ်ဆင့် YBS ယာဉ်လိုင်းများအား တိုင်ကြားမှု ၇၁ မှုအထိရှိ

သင်္ကြန်အတွင်း Complain Center မှတစ်ဆင့် YBS ယာဉ်များအားတိုင်ကြားမှု ၇၁ မှုရှိပြီး ယာဉ်စီးခ ပိုမိုကောက်ခံမှုကြောင့် တိုင်ကြားသည့်အမှု အများဆုံးဖြစ်ကြောင်း YRTA အဖွဲ့ဝင် ဦးလှအောင်က ပြောကြားသည်။

“သင်္ကြန်ရက်တွေမှာ သတ်မှတ်နှုန်းထားထက် ပိုတောင်းတယ်ဆိုကာ တိုင်ကြားခံထားရတဲ့ ယာဉ်လိုင်းတွေကို လတ်တလောမှာ စစ်ဆေးနေဆဲဖြစ်ပါတယ်။ Complain Center ကိုတိုင်တဲ့ ခရီးသည်တွေဘက်ကိုလည်း မှန်ကန်မှုရှိ မရှိ ပြန်လည်စိစစ်နေပါတယ်။ ခရီးသွားပြည်သူတွေဘက်ကပဲ စိစစ်ကြပ်မတ်မှုတွေ လုပ်ဆောင်သွားမှာဖြစ်ပါတယ်” ဟု ဦးလှအောင်က ပြောကြားသည်။

သင်္ကြန်ကာလအတွင်း ပြေးဆွဲသည့် YBS ယာဉ်လိုင်းအချို့သည် ကျပ် ၃၀၀၊ ကျပ် ၅၀၀ စသဖြင့် တိုးမြှင့်ကောက်ခံခဲ့ကြောင်း သင်္ကြန်တွင်း ခရီးသွားပြည်သူအချို့၏ ပြောကြားချက်အရ သိရသည်။ ထို့ပြင် အချို့လိုင်းကားမဟုတ်သော မီနီဘတ်စ်၊ လိုက်ထရပ်ကဲ့သို့ ယာဉ်များဖြင့် သင်္ကြန်တွင်း ကြားကားအဖြစ် ပြေးဆွဲမှုများလည်းရှိခဲ့ကြောင်း သိရသည်။

ရန်ကုန်မြို့နေ ပြည်သူများ သွားလာရေး အဆင်ပြေစေရန် ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့စီမံမှုဖြင့် ရန်ကုန်မြို့တွင် ပြေးဆွဲနေသော YBS ယာဉ်လိုင်း ၆၁ လိုင်း၊ ယာဉ်စီးရေ ၇၆၉ စီးဖြင့် ပုံမှန်ပြေးဆွဲလမ်းကြောင်းအတိုင်း သတ်မှတ်ယာဉ်စီးခနှုန်းထားဖြင့် ပြေးဆွဲမည်ဖြစ်ကြောင်း ရန်ကုန်တိုင်းဒေသကြီး အများပြည်သူသယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့က သင်္ကြန်ကာလမတိုင်မီ ထုတ်ပြန်ခဲ့ကြောင်း သိရသည်။

ယင်းကဲ့သို့ သင်္ကြန်ကာလအတွင်း ပြေးဆွဲနေသည့် ခရီးသည်တင်ယာဉ်များအနေဖြင့် ယာဉ်စီးခ ပိုမိုတောင်းခံခြင်းမပြုရန် မထသ လက်ထက်ကလည်း ယာဉ်လိုင်းပိုင်ရှင်များကို အသိပေးပြောကြားမှုများ ရှိခဲ့သော်လည်း ယာဉ်စီးခ ပိုမိုကောက်ခံခြင်းသည် ကြုံတွေ့နေကျဖြစ်ကြောင်း သိရသည်။

၂၀၁၅ ခုနှစ် သင်္ကြန်ကာလအတွင်း ယာဉ်စီးခ ပိုမိုကောက်ခံမှုကြောင့် တိုင်ကြားမှု ၄၀ ခန့်ရှိပြီး ၂၀၁၆ ခုနှစ် သင်္ကြန်ကာလအတွင်း တိုင်ကြားမှု ၅၅ မှုရှိကြောင်း၊ ၂၀၁၇ ခုနှစ် သင်္ကြန်ကာလအတွင်း YBS ယာဉ်လိုင်းများနှင့် ပတ်သက်ပြီး ခရီးသည်တိုင်ကြားမှု ၃၈ မှုရှိခဲ့ကြောင်း သိရသည်။

တစ်နှစ်တစ်ခါ အိမ်ပြန်ရတဲ့ ဒုက္ခ

အောင်မင်္ဂလာကားဝင်းအတွင်း ကားလက်မှတ်ရရှိရန် တန်းစီစောင့်ဆိုင်းနေသူများကို တွေ့ရစဉ်

“မုံရွာသွားမှာလား အစ်ကို။ ကားလက်မှတ်တစ်စောင် ၂၂၀၀၀ နဲ့ရမယ်”

အခုအချိန်မှာ မိတ်ဆွေတို့အနေနဲ့ အောင်မင်္ဂလာအဝေးပြေး ကားဝင်းထဲကိုရောက်ရင် ကားလက်မှတ်လိုက်ရောင်းနေတဲ့ အသံတွေကို နေရာတိုင်းမှာကြားရမှာပါ။ သင်္ကြန်နားနီးချိန်မို့ အောင်မင်္ဂလာအဝေးပြေးကားဝင်းထဲက လမ်းတွေပေါ်မှာ ပုံသဏ္ဌာန်မျိုးစုံ၊ အရွယ်မျိုးစုံ ပွဲစားတွေက ကားလက်မှတ်တွေကို မှောင်ခိုလိုက်ရောင်းနေကြတာ ဖြစ်ပါတယ်။

ကားဂိတ်က လက်မှတ်အရောင်းကောင်တာတွေမှာ မုံရွာလက်မှတ်ခက ပုံမှန်ဆို ကျပ် ၁၂၀၀၀ လောက်ပဲရှိပေမယ့် သင်္ကြန်နားနီးတဲ့အချိန်မို့ ပွဲစားတွေက ကားဂိတ်တွေက၀ယ်ထားပြီး နယ်ပြန်မယ့်သူတွေကို ဈေးတင်ရောင်းရင်းနဲ့ လက်မှတ်ခက ကျပ် ၂၀၀၀၀ ကျော်အထိ ဖြစ်နေပါတယ်။ ဒါက မုံရွာခရီးစဉ် တစ်ခုတည်းမဟုတ်ပါဘူး။ ဘယ်အရပ် ဘယ်ဒေသကိုဖြစ်ဖြစ် ကားလက်မှတ်ခဈေးတွေက ပုံမှန်ထက် နှစ်ဆပေးမှ ၀ယ်လို့ရပါတယ်။

ကားလက်မှတ်ရောင်းတဲ့ ဂိတ်တွေက လက်မှတ်တွေကို ရက်အလိုက် ကြိုရောင်းပေးချိန်မှာ ပွဲစားတွေက လက်မှတ်တွေဝယ်ယူထားပြီး နယ်ပြန်ဖို့ လက်မှတ်လာဝယ်တဲ့သူတွေကို ဈေးတင်ရောင်းတဲ့အတွက် လက်မှတ်ဈေးတွေက ကြီးမြင့်နေတာ ဖြစ်ပါတယ်။

လက်မှတ်တွေကို ဂိတ်တွေက ရက်အလိုက် ကြိုရောင်းထားတဲ့အတွက် ဂိတ်အတော်များများမှာ ကားလက်မှတ်တွေ မရှိတော့ပါဘူး။ နယ်ပြန်ဖို့ လက်မှတ်ကြိုဖြတ်ထားသူအတွက်တော့ ကိစ္စမရှိပေမယ့် အနားနီးမှ လက်မှတ်လိုချင်သူတွေအတွက်တော့ ပွဲစားတွေဆီမှာ ဈေးနှစ်ဆပေးပြီးဝယ်မှ ကားလက်မှတ်ရမယ့် အနေအထားမျိုးပါ။

ရန်ကုန်တိုင်းဒေသကြီးမှာ လူဦးရေခုနစ်သန်းကျော်ရှိတဲ့အနက် အခြားပြည်နယ်နဲ့ တိုင်းဒေသကြီးတွေကနေ အလုပ်အကိုင်၊ လက်ထပ်ခြင်း၊ မိသားစုလိုက်ပြောင်းရွှေ့ခြင်းနဲ့ အခြားသောအကြောင်းအရာတွေကြောင့် ပြောင်းရွှေ့လာတဲ့ လူဦးရေသုံးသန်းနီးပါးရှိတယ်လို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနကနေ ၂၀၁၅ ခုနှစ်မှာ ကောက်ယူခဲ့တဲ့ လုပ်သားစစ်တမ်းမှာ ဖော်ပြထားပါတယ်။

ဒီနှစ်ကစလို့ အစိုးရက သင်္ကြန်ပိတ်ရက်ကို ၁၀ ရက်ကနေ ငါးရက်အထိ လျှော့ချလိုက်ပေမယ့်လည်း အလုပ်သမားတွေကတော့ မိမိနယ်ကို ပြန်ကြမှာဖြစ်ပါတယ်။ လှိုင်သာယာ၊ ရွှေပြည်သာ စတဲ့စက်မှုဇုန်တွေမှာ အလုပ်လုပ်နေတဲ့ အလုပ်သမားတွေအနေနဲ့ သင်္ကြန်ပိတ်ရက် ၁၀ ရက်ရဖို့ ဖေဖော်ဝါရီလကတည်းက အချိန်ပိုတွေကြိုဆင်းပြီး ငါးရက်စာ ပိတ်ရက်ထပ်ရဖို့ ကြိုးစားခဲ့ရတာပါ။

ရန်ကုန်တက်လာပြီး အထည်ချုပ်မှာအလုပ်လုပ်နေတာ ခုနစ်နှစ်လောက်ကြာပြီဖြစ်တဲ့ မမာမာခိုင်က သင်္ကြန်ကာလရောက်တိုင်း သူ့မိဘတွေရှိတဲ့နယ်ကိုပြန်ရာမှာ လက်မှတ်ခကို မူရင်းဈေးထက်ပိုပေးပြီး ၀ယ်ခဲ့ရတယ်လို့ ဆိုပါတယ်။

“နတ်မောက်ကို ပြန်ဖို့အတွက် သုံးလပိုင်းကတည်းက လက်မှတ်ကြိုဝယ်ထားရတယ်။ ပုံမှန်ဈေးက ကျပ် ၉၀၀၀ ပဲရှိတာကို အောင်မင်္ဂလာဝင်းထဲက ကားဂိတ်မှာ ကျပ်တစ်သောင်းခွဲ ပေးဝယ်ခဲ့ရတယ်။ ဈေးမတက်ဘူးပြောထားပေမယ့် သင်္ကြန်ရောက်တိုင်း ဈေးတက်တာပါပဲ။ ညီမတို့လည်း သူတို့တောင်းတဲ့ဈေးကိုပဲ ၀ယ်လာရတယ်။ မ၀ယ်ခဲ့ရင် အိမ်ပြန်လို့မရတော့ဘူးလေ။ ဈေးပိုပေးပြီးဝယ်ရတဲ့အတွက် ပိုက်ဆံတော့ နှမြောတာပေါ့။ ဒါပေမဲ့ အိမ်ပြန်ချင်နေတော့လည်း သူတို့တောင်းတဲ့ဈေးသာ မပေးခဲ့ရင် ဒီနှစ်လက်မှတ်ရလိုက်မှာ မဟုတ်ဘူး” လို့ မမာမာခိုင်က ပြောပါတယ်။

လွန်ခဲ့တဲ့ ၂၀၁၂ ခုနှစ်က နတ်မောက်မြို့ကနေ ရန်ကုန်မြို့ကို မမာမာခိုင်တစ်ယောက် ပြောင်းရွှေ့လုပ်ကိုင်ခဲ့ပါတယ်။ မိသားစုထဲမှာ အကြီးဆုံးဖြစ်တဲ့အတွက် နယ်မှာလယ်လုပ်ရတာ အဆင်မပြေတာကြောင့် ရန်ကုန်မြို့ လှိုင်သာယာမြို့နယ်က အဆောင်တစ်ခုမှာ ငှားရမ်းနေထိုင်ပြီး အထည်ချုပ်အလုပ်ဝင်လုပ်ခဲ့တာပါ။

သူ့လိုပဲ နယ်ကနေ ရန်ကုန်တက်လာပြီး အလုပ်လာလုပ်တဲ့သူတွေ အများကြီးရှိပါတယ်။ အထူးသဖြင့် ဧရာဝတီတိုင်းနဲ့ မကွေးတိုင်းကနေ ရန်ကုန်ကို အလုပ်လာလုပ်တဲ့သူတွေ ပိုများပါတယ်။ နယ်ကနေ အလုပ်လာလုပ်ကြသူ အများစုက သင်္ကြန်ပိတ်ရက်တိုင်း ကိုယ့်အရပ်ကိုယ့်ဒေသကို ပြန်ကြပါတယ်။

“ကျွန်တော့်မိသားစုနဲ့ ကျုံပျော်ကိုပြန်မလို့ ဧပြီ ၅ ရက်က အောင်မင်္ဂလာဝင်းထဲက ကားဂိတ်တစ်ခုမှာ လက်မှတ်သွားဖြတ်တယ်။ နဂိုက ကျပ် ၂၀၀၀ ပဲပေးရတဲ့ခရီးကို ကျပ် ၄၀၀၀ တဲ့။ ဈေးနှစ်ဆပေးပြီး ၀ယ်ခဲ့ရတယ်။ လက်မှတ်ထဲမှာတော့ ကျပ် ၂၀၀၀ လို့ပဲရေးထားပြီး တကယ်ပေးခဲ့ရတာက ကျပ် ၄၀၀၀ ပါ။ ဒါဟာမဖြစ်သင့်ဘူးလေ။ မရိုးသားရာကျပါတယ်။ သင်္ကြန်နယ်ပြန်မှာဆိုတော့ မ၀ယ်လို့လည်းမဖြစ်တော့ ၀ယ်ခဲ့ရတာပေါ့” လို့ ရန်ကုန်ကနေ ဧရာဝတီတိုင်း ကျုံပျော်ကို သင်္ကြန်ကာလအတွင်းပြန်မယ့် ကိုထက်ကြီးက ကားလက်မှတ်ဈေးကြီးပေးဝယ်ခဲ့ရတဲ့ အခြေအနေကို ပြောပြပါတယ်။

လက်မှတ်ရောင်းတဲ့ ကားဂိတ်တချို့ကတော့ နယ်ပြန်ဖို့ လက်မှတ်လာဝယ်သူတွေကို “လက်မှတ်တွေကုန်ပြီ” လို့လိမ်ပြောပြီး သင်္ကြန်အလုပ်ပိတ်ရက်ကပ်မှ လက်မှတ်လာဝယ်တဲ့သူတွေကို ဈေးတင်ရောင်းတာတွေ ရှိပါတယ်။ ဒီလိုအခြေအနေတွေကို ထိန်းနိုင်ဖို့ ရန်ကုန်တိုင်းဒေသကြီး သယ်ယူပို့ဆောင်ရေးကြီးကြပ်ကွပ်ကဲမှု အာဏာပိုင်အဖွဲ့ (အဝေးပြေး) ရဲ့ တာဝန်ရှိသူတွေက ဖေဖော်ဝါရီလကစပြီး အောင်မင်္ဂလာအဝေးပြေးဝင်း အတွင်းနဲ့ ဒဂုံဧရာအဝေးပြေးဝင်းအတွင်းမှာရှိတဲ့ ယာဉ်လိုင်းတာဝန်ခံတွေကို သင်္ကြန်မှာ လက်မှတ်ခတွေ ဈေးပိုမရောင်းဖို့ တရားဝင်အသိပေးညွှန်ကြားစာ ထုတ်ထားပါတယ်။

“သင်္ကြန်ကာလအတွက် ဘာတွေဖြစ်လာနိုင်သလဲဆိုတာ ဖေဖော်ဝါရီလကတည်းကစပြီး စဉ်းစားတယ်။ ဂိတ်တွေမှာ ဖြစ်နိုင်တာက ဂိတ်တွေမှာ လက်မှတ်တွေကို ဈေးပိုရောင်းတာဖြစ်နိုင်တယ်။ နောက်ပြီး လက်မှတ်တွေကုန်ပြီလို့ပြောပြီး နောက်မှ လက်သိပ်ထိုးရောင်းတာမျိုးတွေ ဖြစ်လာနိုင်တယ်။ အဲဒါကြောင့် ဖေဖော်ဝါရီလမှာ အောင်မင်္ဂလာဝင်းထဲက ဂိတ်တွေနဲ့ အစည်းအဝေးလုပ်တယ်။ တာဝန်ခံတစ်ယောက် ဒဂုံဧရာကိုသွားပြီး ဂိတ်တွေက တာဝန်ခံတွေနဲ့တွေ့တယ်။ သင်္ကြန်ကာလမှာ လက်မှတ်ခတွေ ပိုမရောင်းဖို့နဲ့ ကုန်ပြီလို့မပြောဘဲ အမှန်တကယ်ရောင်းချပေးဖို့ ယာဉ်လိုင်းတာဝန်ခံတွေကို ပြောခဲ့တယ်။ စာနဲ့လည်း တရားဝင်ညွှန်ကြားချက်ထုတ်ခဲ့တယ်” လို့ ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့(အဝေးပြေး)မှ တာဝန်ရှိသူတစ်ဦးက ပြောပါတယ်။

သင်္ကြန်ကာလမှာ ကားလက်မှတ်ခတွေ ဈေးမတက်ဖို့ တာဝန်ရှိသူတွေက တရားဝင်ညွှန်ကြားထားပေမယ့် နယ်ကနေ အလုပ်လာလုပ်ကြတဲ့သူတွေအနေနဲ့ သင်္ကြန်ကာလမှာအိမ်ပြန်ဖို့ ကားလက်မှတ်ဖြတ်တဲ့အခါမှာ လက်မှတ်ခကို ဈေးကြီးပေးဝယ်ကြရပါတယ်။ လက်ရှိအချိန်မှာ နယ်ပြန်မယ့်လူတွေအနေနဲ့ ကားဂိတ်တွေက ဈေးတင်ရောင်းတဲ့ ကားလက်မှတ်ကိုဝယ်မှာလား ဒါမှမဟုတ် ပွဲစားတွေဆီက ဈေးကြီးပေးရတဲ့ ကားလက်မှတ်ကိုဝယ်မှာလား ရွေးချယ်ဖို့က ဒီနှစ်မျိုးပဲရှိပါတယ်။

“သက်ဆိုင်ရာတာဝန်ရှိသူတွေ ပြောနေတဲ့ တာဝန်ယူမှု၊ တာဝန်ခံမှုတို့ ပွင့်လင်းမြင်သာမှုတို့ဆိုတာ သူတို့ပါးစပ်ထဲမှာပဲရှိတာလား။ ဒီစကားတွေပြောပြီးရင် အောက်ခြေကိုဆင်းပြီး ပြည်သူတွေရဲ့အသံကို နားထောင်သင့်တယ်။ အများကြီး မလုပ်ပါနဲ့ဦး။ အခုချိန် အောင်မင်္ဂလာအဝေးပြေးဝင်းထဲမှာ ခရီးသည်တစ်ယောက်လိုလာပြီး လက်မှတ်ဝယ်ကြည့်သင့်တယ်။ ဒါမှလည်း အောက်ခြေက ပြည်သူတွေ ဘယ်လိုအခက်အခဲတွေ ခံစားနေရလဲဆိုတာသိမှာပေါ့” လို့ သင်္ကြန်တွင်း နေရပ်ပြန်မယ့် ကိုထက်ကြီးက သူ့အမြင်ကို ပြောပါတယ်။

သင်္ကြန်ကာလမှာ ကားလက်မှတ်ခတွေ ဈေးတက်တာနဲ့ ပတ်သက်လို့ ရွှေမန်းသူကားဂိတ်မှ တာဝန်ရှိသူတစ်ဦးဖြစ်တဲ့ ကိုလှမြင့်နိုင်က “သင်္ကြန်တွင်းစက်ရုံမှာ အလုပ်လုပ်တဲ့ကလေးမတွေ အကုန်လုံးအိမ်ပြန်ကြတော့ ခရီးသည်က အုံကျလာတယ်။ မပြန်မဖြစ် ပြန်ကြတာဖြစ်တော့ ဈေးဘယ်လောက်ဖြစ်ဖြစ် ပြန်နေကြတာပေါ့။ တချို့ဂိတ်တွေက ပုံမှန်ဈေးပဲရောင်းတယ်။ ကျွန်တော်တို့ဂိတ်ကတော့ ဈေးတင်ရောင်းတာမျိုးမရှိပါဘူး။ တချို့ဂိတ်တွေက ဈေးတင်ရောင်းတယ်။ ဒါပေမဲ့ ပွဲစားတွေလက်ထဲ လက်မှတ်တွေရောက်သွားရင် သူတို့ကဈေးတင်ပြီး ပြန်ရောင်းတော့တာပဲ။ အဲဒါတွေကြောင့် ကားလက်မှတ်တွေက နှစ်ဆလောက်အထိ ဈေးတက်ကုန်တာ” လို့ပြောပါတယ်။

မနှစ်က အောင်မင်္ဂလာအဝေးပြေး ယာဉ်ရပ်နားစခန်းမှာ ယာဉ်လိုင်းပေါင်း ၂၃၆ လိုင်းရှိပြီး ကားအစီးရေ ၂၇၀၀ ကျော်ရှိသလို ဒဂုံဧရာအဝေးပြေး ယာဉ်ရပ်နားစခန်းမှာလည်း ယာဉ်လိုင်းပေါင်း ၂၀၇ လိုင်းရှိပြီး ကားစီးရေ ၉၀၀ ကျော်ရှိပေမယ့် သင်္ကြန်ကာလအတွင်း နယ်ပြန်သူများတာကြောင့် ကားအစီးရေက လုံလောက်မှုမရှိခဲ့ပါဘူး။

ဒီနှစ်မှာတော့ ရန်ကုန်တိုင်းဒေသကြီး သယ်ယူပို့ဆောင်ရေးကြီးကြပ်ကွပ်ကဲမှု အာဏာပိုင်အဖွဲ့ (YRTA) ရဲ့ အစီအမံနဲ့ ရန်ကုန်မြို့တွင်း ပြေးဆွဲနေတဲ့ YBS ယာဉ်လိုင်း ၆၁ လိုင်း၊ ယာဉ်စီးရေ ၇၆၉ စီးကို ပုံမှန်ပြေးဆွဲလမ်းကြောင်းအတိုင်း သတ်မှတ်ယာဉ်စီးခနှုန်းထားနဲ့ ပြေးဆွဲသွားမှာဖြစ်တယ်လို့ YRTA က ကြေညာချက် ထုတ်ပြန်ထားပါတယ်။

ရန်ကုန်ကနေ အခြားပြည်နယ်နဲ့ တိုင်းဒေသကြီးတွေကို ပြန်ကြမယ့်ပြည်သူတွေအတွက် ဧပြီ ၁၁ ရက်ကနေ ၁၃ ရက်အထိ ရန်ကုန်-ပုသိမ် ခရီးစဉ်တွေကို ဒဂုံဧရာအဝေးပြေး ယာဉ်ရပ်နားစခန်းမှာ အားဖြည့်ပြေးဆွဲပေးမှာဖြစ်ပြီး ဧပြီ ၁၁ ရက်ကနေ ၁၃ ရက်အထိ လက်ပံတန်း-မင်းလှ ခရီးစဉ်နဲ့ ဧပြီ ၁၁ ရက်ကနေ ၁၂ ရက်တွေမှာ ရန်ကုန်-ပဲခူး-ညောင်လေးပင်-တောင်ငူ-နေပြည်တော် ခရီးစဉ်တွေကို အောင်မင်္ဂလာအဝေးပြေး ယာဉ်ရပ်နားစခန်းကနေ ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ (YRTA) အောက်ကယာဉ်လိုင်းတွေကနေ ခရီးသည်ယာဉ်တွေနဲ့ အားဖြည့်ပြေးဆွဲသွားမယ်လို့ YRTA ရဲ့ ထုတ်ပြန်ချက်ထဲမှာ ဖော်ပြထားပါတယ်။

ရန်ကုန်ကို အလုပ်လာလုပ်နေကြတဲ့ နယ်ကအလုပ်သမားတွေကို သင်္ကြန်ကာလအတွင်း နယ်ပြန်ဖို့ ကားလက်မှတ်ဖြတ်ရတဲ့ဒုက္ခက နှိပ်စက်ခဲ့တာ နှစ်ပေါင်းများစွာကြာခဲ့ပါပြီ။ ဒီပြဿနာကို အရင်အစိုးရအဆက်ဆက်က မဖြေရှင်းခဲ့သလို လက်ရှိ NLD အစိုးရလက်ထက်မှာလည်း ဖြေရှင်းပေးနိုင်ခြင်း မရှိသေးပါဘူး။

ဒီကိစ္စနဲ့ပတ်သက်လို့ မြန်မာ့မော်တော်ယာဉ်ထုတ်လုပ်ရေးနဲ့ ဖြန့်ဖြူးရောင်းချရေး လုပ်ငန်းရှင်များအသင်းဥက္ကဋ္ဌ ဒေါက်တာစိုးထွန်းက “မှောင်ခိုလက်မှတ်ရောင်းရင် ဖမ်းမယ်ဆိုတာကလည်း တကယ်ဖြေရှင်းတဲ့ နည်းလမ်းအမှန်မဟုတ်ဘူး။ ဖြေရှင်းတဲ့နည်းလမ်းအမှန်က ကားအရေအတွက်နဲ့ ခရီးသည်မမျှ ဖြစ်နေတဲ့အချိန်မှာ ကားလိုသလောက် ထပ်ဖြည့်ပေးမယ်ဆိုရင် မှောင်ခိုဈေးကွက်က ရှိမှာမဟုတ်တော့ဘူး။ အရေးယူမယ်ဆိုတာကလည်း ဘယ်လိုအရေးယူမလဲ။ သူ့ပစ္စည်းသူ ရောင်းတယ်။ ၀ယ်တဲ့လူများလို့ ဈေးတင်ရောင်းတယ်။ ဘာပုဒ်မနဲ့ အရေးယူမလဲ” လို့ သုံးသပ်ပြောကြားပါတယ်။

သင်္ကြန်ကာလအတွင်း အဝေးပြေးခရီးစဉ် ယာဉ်လိုင်း ၂၅ လိုင်းမှ ပိတ်ရက်မရှိ ပြေးဆွဲမည်ဖြစ်ကြောင်း YRTA ထုတ်ပြန်

သင်္ကြန်ကာလအတွင်း အဝေးပြေးခရီးစဉ် ယာဉ်လိုင်း ၂၅ လိုင်းမှ ပိတ်ရက်မရှိ ပြေးဆွဲမည်ဖြစ်ကြောင်း ရန်ကုန်တိုင်းဒေသကြီး သယ်ယူပို့ဆောင်ရေးကြီးကြပ်ကွပ်ကဲမှု အာဏာပိုင်အဖွဲ့ (YRTA) မှ ထုတ်ပြန်ချက်အရ သိရသည်။

ထုတ်ပြန်ချက်တွင် ရန်ကုန်မြို့တော်နေ ပြည်သူများ သွားလာရေးအဆင်ပြေစေရန်အတွက် ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှုအာဏာပိုင် အဖွဲ့စီမံမှုဖြင့် ရန်ကုန်မြို့တွင် ပြေးဆွဲနေသော YBS ယာဉ်လိုင်း ၆၁ လိုင်း၊ ယာဉ်စီးရေ ၇၆၉ စီးဖြင့် ပုံမှန်ပြေးဆွဲလမ်းကြောင်းအတိုင်း သတ်မှတ်ယာဉ်စီးခနှုန်းထားဖြင့် ပြေးဆွဲသွားမည်ဖြစ်ကြောင်း သိရသည်။

ထို့ပြင် ရန်ကုန်တိုင်းဒေသကြီးမှ အခြားတိုင်းဒေသကြီး ပြည်နယ်များသို့ ပြေးဆွဲမည့် အဝေးပြေးခရီးသည်ယာဉ်လိုင်းများသည် ဧပြီ ၈ ရက်အထိ ပုံမှန်ပြေးဆွဲပြီး ဧပြီ ၉ ရက်မှ ၁၆ ရက်အထိ အောင်မင်္ဂလာအဝေးပြေး၊ ဒဂုံဧရာအဝေးပြေးယာဉ်ရပ်နားစခန်းများမှ ထွက်ရှိသည့် ခရီးသည်တင်ယာဉ်များအနေဖြင့် အလှည့်ကျရပ်နားခြင်း၊ ပြေးဆွဲခြင်းများ ပြုလုပ်ပြီး အောင်မင်္ဂလာအဝေးပြေး ယာဉ်ရပ်နားစခန်းမှ ရန်ကုန်တိုင်းဒေသကြီး အခြေပြုယာဉ်လိုင်း ၁၀ လိုင်း၊ အခြားတိုင်းဒေသကြီးနှင့် ပြည်နယ်များအခြေပြုယာဉ်လိုင်း ရှစ်လိုင်း၊ ဒဂုံဧရာအဝေးပြေး ယာဉ်ရပ်နားစခန်းမှ ရန်ကုန်တိုင်းဒေသကြီး အခြေပြုယာဉ်လိုင်းလေးလိုင်း၊ အခြားတိုင်းဒေသကြီးနှင့် ပြည်နယ်များ အခြေပြုယာဉ်လိုင်း သုံးလိုင်းတို့ကို ပိတ်ရက်မရှိ ပြေးဆွဲမည်ဖြစ်ကြောင်း သိရသည်။

ထို့ပြင် ရန်ကုန်တိုင်းဒေသကြီးမှ အခြားတိုင်းဒေသကြီးများသို့ သွားရောက်မည့် ခရီးသွားများအတွက် ဧပြီ ၁၁ ရက်မှ ၁၃ ရက်အထိ ရန်ကုန်-ပုသိမ်ခရီးစဉ်တို့အား ဒဂုံဧရာအဝေးပြေးယာဉ်ရပ်နားစခန်းမှလည်းကောင်း၊ ဧပြီ ၁၁ ရက်မှ ၁၃ ရက်အထိ လက်ပံတန်း-မင်းလှခရီးစဉ်နှင့် ဧပြီ ၁၁ ရက်နှင့် ၁၂ ရက်တို့တွင် ရန်ကုန်-ပဲခူး-ညောင်လေးပင်-တောင်ငူ-နေပြည်တော်ခရီးစဉ်များကို အောင်မင်္ဂလာအဝေးပြေး ယာဉ်ရပ်နားစခန်းမှလည်းကောင်း ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့၏ စီမံမှုအောက်ရှိ ယာဉ်လိုင်းများမှ ခရီးသည်ယာဉ်များဖြင့် အားဖြည့်ပြေးဆွဲမည်ဖြစ်ကြောင်း သိရသည်။

ရန်ကုန်တိုင်းဒေသကြီး ရန်ကုန်မြို့တွင် ပြေးဆွဲနေသော YBS ခရီးသည်တင်ယာဉ်လိုင်းများနှင့် ရန်ကုန်တိုင်းဒေသကြီးနှင့် အခြားတိုင်းဒေသကြီး၊ ပြည်နယ်များမှ အဝေးပြေးခရီးသည်ယာဉ်လိုင်းအားလုံးသည် ဧပြီ ၁၇ ရက်တွင် ပုံမှန်အတိုင်း ပြန်လည်ပြေးဆွဲမည်ဖြစ်ကြောင်း ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ (YRTA) မှ ထုတ်ပြန်သည်။

ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်မှုအာဏာပိုင်အဖွဲ့ တွဲဖက်အတွင်းရေးမှူး ဦးသန်းဝင်း နုတ်ထွက်စာတင်ထားကြောင်း သိရ

ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ (YRTA) မှ တွဲဖက်အတွင်းရေးမှူး ဦးသန်းဝင်း နုတ်ထွက်စာတင်ထားကြောင်း စုံစမ်းသိရသည်။

ဦးသန်းဝင်းက YRTA မှ နုတ်ထွက်စာအား ရန်ကုန်တိုင်းဒေသကြီးအစိုးရ အဖွဲ့ထံသို့ လွန်ခဲ့သည့် လေး၊ ငါးလခန့်မှ တင်ထားခြင်းဖြစ်သော်လည်း လက်ရှိအချိန်အထိ နုတ်ထွက်ခွင့်မပြုသေးကြောင်း သိရသည်။

YRTA အတွင်းရေးမှူး ဦးသန်းဝင်းသည် ရန်ကုန်ဘတ်စ်ကားပို့ဆောင်ရေးဝန်ဆောင်မှု YBS စတင်အကောင်အထည်ဖော်ချိန်ကတည်းက ပညာရှင်အဖြစ် တာဝန်ထမ်းဆောင်နေခြင်းဖြစ်ပြီး ပြည်သူ့ရင်ပြင်တွင် ရန်ကုန်တိုင်းဒေသကြီးအစိုးရအဖွဲ့မှ တည်ဆောက်ထားသည့် Control Center ၌ စည်းကမ်းမဲ့မောင်းနှင်သည့် ယာဉ်များအား ထိန်းချုပ်ခြင်းလုပ်ငန်းများကို ဆောင်ရွက်နေသူဖြစ်ကြောင်း သိရသည်။

ထို့ပြင် ဖေဖော်ဝါရီလအတွင်းကလည်း YBS CEO ဦးစောဘိုဘိုသည် ကျန်းမာရေး မကောင်းဟုဆိုကာ နုတ်ထွက်စာတင်ခဲ့ကြောင်း သိရသည်။

ဦးစောဘိုဘိုအား ရန်ကုန်တိုင်းဒေသကြီးအစိုးရအဖွဲ့က YBS ယာဉ်လိုင်းများကို စည်းကမ်းပိုင်းနှင့်ပတ်သက်ပြီး လုပ်ကိုင်နိုင်ရန် ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှုအာဏာပိုင်အဖွဲ့ YRTA ၏ အုပ်ချုပ်မှုဒါရိုက်တာ CEO အဖြစ် ခန့်အပ်ထားခြင်းဖြစ်ပြီး ငါးလခန့် တာဝန်ယူပြီးနောက်တွင် နုတ်ထွက်စာတင်ခဲ့ခြင်းဖြစ်ကြောင်း သိရသည်။

ဦးစောဘိုဘိုကို YRTA တွင် တာဝန်ထမ်းဆောင်ရန် ၂၀၁၇ ခုနှစ် စက်တင်ဘာလက ခန့်အပ်ခဲ့ပြီး YBS ယာဉ်လိုင်းကုမ္ပဏီများကို စည်းကမ်းထိန်းသိမ်းမှုများအပြင် အများပိုင်ကုမ္ပဏီ ဖြစ်မြောက်ရေးအတွက်လည်း တာဝန်ယူလုပ်ကိုင်နေသူဖြစ်ကြောင်း သိရသည်။

YBS စနစ် စတင်အကောင်အထည်ဖော်ပြီး တစ်နှစ်ကျော်အကြာတွင် တွဲဖက်အတွင်းရေးမှူးအနေဖြင့် ယခုကဲ့သို့ နုတ်ထွက်စာတင်ခဲ့ခြင်းဖြစ်ကြောင်း သိရသည်။