၂၀၁၈-၂၀၁၉ ဘဏ္ဍာနှစ်အတွက် ပြဋ္ဌာန်းမည့် အခွန်အကောက်ဥပဒေတွင် သွင်းကုန်အစားထိုး ထုတ်လုပ်မှုလုပ်ငန်းနှင့် ပို့ကုန်လုပ်ငန်းများကို ကုန်သွယ်ခွန်ကင်းလွတ်ခွင့်နှင့် မက်လုံးအဖြစ် ၀င်ငွေအလွှာအလိုက် ၀င်ငွေခွန်သတ်မှတ်ပေးရန် တောင်းဆို

Tax Amnesty သုံးရာခိုင်နှုန်းနှင့် ငါးရာခိုင်နှုန်း မပြဋ္ဌာန်းပါက ၂၀၁၈ ခုနှစ် ဧပြီ ၁ ရက်တွင် ဆောက်လုပ်ရေးလုပ်ငန်းများ ပြိုလဲပြီး မြန်မာ့စီးပွားရေးပြိုကျသွားနိုင်ကြောင်း လုပ်ငန်းရှင်များ ရှင်းလင်းခဲ့မှုအခမ်းအနားကို တွေ့ရစဉ်

လာမည့်၂၀၁၈-၂၀၁၉ ဘဏ္ဍာနှစ်အတွက် ပြဋ္ဌာန်းမည့် ပြည်ထောင်စု၏ အခွန်အကောက်ဥပဒေတွင် သွင်းကုန်အစားထိုးထုတ်လုပ်မှုလုပ်ငန်းနှင့် ပို့ကုန်လုပ်ငန်းများကို ကုန်သွယ်ခွန်ကင်းလွတ်ခွင့်ပေးရန်နှင့် မက်လုံးအဖြစ် ၀င်ငွေအလွှာအလိုက် ၀င်ငွေခွန်သတ်မှတ်ပေးပါရန် ကုန်သည်စက်မှု အသင်းချုပ်မှတောင်းဆိုထားကြောင်း သိရသည်။

ပြည်တွင်းကုန်ထုတ်လုပ်ငန်းများနှင့် SMEs များအနေဖြင့် ပြည်ပမှတင်သွင်းလာသည့် ကုန်ပစ္စည်းများနှင့် ယှဉ်ပြိုင်နိုင်ခြင်းမရှိသည့် အခြေအနေရောက်လာသဖြင့် ပြည်ပကုန်စည်များကို ကြပ်မတ်ပေးရန် လိုအပ်နေပြီး ကုန်သွယ်လုပ်ငန်းခွန် ငါးရာခိုင်နှုန်းကင်းလွတ်ခွင့်ပေးရန်နှင့် ၀င်ငွေခွန်ကိုမူ မက်လုံးသဘောအဖြစ် ၀င်ငွေအလွှာအလိုက် ရာခိုင်နှုန်း ၂၀၊ ၂၂ ရာခိုင်နှုန်း၊ ၂၅ ရာခိုင်နှုန်းစသည်ဖြင့် လျှော့ချသတ်မှတ်စေလိုကြောင်း ကုန်သည်စက်မှုအသင်းချုပ်ဒုတိယဥက္ကဋ္ဌ ဦးရဲမင်းအောင်က နိုင်ငံတော်ဒုတိယ သမ္မတ ဦးမြင့်ဆွေကို တင်ပြထားသည်။

ပြည်တွင်းကုန်ထုတ်လုပ်ငန်းများ၊ ပြည်တွင်းတွင် ရင်းနှီးမြှုပ်နှံထားသော နိုင်ငံခြား ရင်းနှီးမြှုပ်နှံမှုလုပ်ငန်းများနှင့် ပြည်တွင်းမှ SMEs များအနေဖြင့် နိုင်ငံခြားမှတင်သွင်းလာသည့် ကုန်ပစ္စည်းများနှင့် ယှဉ်ပြိုင်နိုင်ခြင်းမရှိသော အခြေအနေဖြစ်ပေါ်နေသဖြင့် ပြည်တွင်းထုတ်လုပ်မှုနှင့် စားသုံးမှုပမာဏ၊ တင်သွင်းရန်လိုအပ်မှုပမာဏ၊ အရေးကြီးကုန်စည် နှင့် မသုံးမဖြစ်ကုန်စည်၊ အစားထိုးကုန်စည်စသည့် သဘောတရားများကို အခြေခံတွက်ချက်ပြီး Minimum Access စနစ် ၊ Tariff Rate နှင့် Quota စနစ်များ သတ်မှတ်ကျင့်သုံးပေးရန် လိုအပ်နေကြောင်း ဦးရဲမင်းအောင်က ဆက်လက်ပြောကြားသည်။

ထို့ပြင် ယင်းစနစ်များ ဆောင်ရွက်ရာ၌ Quota အတွင်းမှဖြစ်ပါက နှုန်းတစ်မျိုး (နှုန်း နိမ့်) နှင့် Quota ပြင်ပမှဖြစ်ပါက နှုန်းတစ်မျိုး (မြင့်) သတ်မှတ်ပေးစေလိုသည်ဟု ဦးရဲမင်းအောင်က နိုင်ငံတော်ဒုတိယသမ္မတ ဦးမြင့်ဆွေဦးဆောင်သည့် ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီသို့ တင်ပြထားကြောင်း သိရသည်။

ထို့ပြင် စက်မှုကုန်ကြမ်းများတင်သွင်းပြီး ပြည်တွင်းတွင် ကုန်ချောထုတ်စက်ရုံ၊ အလုပ်ရုံများ တည်ဆောက်ရင်းနှီးမြှုပ်နှံသည့် ကုန်ထုတ်လုပ်ငန်းများအနေဖြင့် ကုန်ချောတင်သွင်းသူများနှင့် ယှဉ်ပြိုင်နိုင်ရန် ကုန်ချောတင်သွင်းမှုဆိုင်ရာ မူဝါဒများကို ပြန်လည်သုံးသပ်ပေးရန် လိုအပ်ကြောင်း ယင်းက ဆက်လက်ပြောကြားသည်။

ထို့ပြင် အာလူး၊ ပန်းမျိုးစုံစသည့် လယ်ယာစိုက်ပျိုးရေးထွက်ကုန်များနှင့် ဟင်းသီး ဟင်းရွက်သီးနှံများ တရားမ၀င်ဝင်ရောက်နေမှုအပေါ် ထိရောက်စွာတားဆီးပေးနိုင်ရန်အတွက် အပင်ပိုးမွှား၊ ရောဂါနှင့် သီးနှံကာ ကွယ်ရေးဆိုင်ရာ စံချိန်စံညွှန်းများကို ချမှတ်ပေးရန်နှင့် Quota စနစ်ဖြင့် ဆောင်ရွက်ရာတွင်လည်း မိမိနိုင်ငံသီးနှံပေါ်ချိန်၊ ရှားပါးချိန်၊ ဈေးကြီးချိန်စသည့် ရာသီချိန်များနှင့် လိုက်ဖက်အောင် ညှိနှိုင်းဆောင်ရွက်ပေးစေလိုသည်ဟု ဦးရဲမင်းအောင်က ပြောကြားသည်။

အခွန်နှုန်းလျှော့ချမှုနှင့် ပတ်သက်ပြီး ၂၀၁၈ ဘဏ္ဍာနှစ်ခြောက်လအတွက် Tax Amnesty ပေးနိုင်ရန် ယခင်စီမံ / ဘဏ္ဍာဝန် ကြီးဦးကျော်ဝင်း ဦးဆောင်ကြိုးပမ်းခဲ့ပြီး အဆိုပါ အခွန်လွတ်ငြိမ်းကင်းလွတ်ခွင့်မှာ ငွေမည်းခ၀ါချမှုနှင့် အကြမ်းဖက်မှုအပေါ် ငွေကြေးထောက်ပံ့မှုများ စီးဝင်လာနိုင်သည်ဟု ကန့်ကွက်မှုများရှိနေသဖြင့် ရပ်ဆိုင်းကာ ဥပဒေ တစ်ရပ်အဖြစ်ပြဋ္ဌာန်းရန် ဆုံးဖြတ်ထားသည်။ သို့သော် Tax Amnesty အဖြစ် သတ်မှတ်ထားသည့် ၀င်ငွေခွန် သုံးရာခိုင်နှုန်းနှင့် ငါးရာခိုင်နှုန်းမှာ နည်းပါးလွန်းနေကြောင်းနှင့် လက်ရှိကောက်ခံနေသည့် အခွန်နှုန်းထားများမှာ များပြားနေ၍ ထိုက်သင့်သည့် နှုန်းထားအဖြစ် ဆွေးနွေးလျှော့ချသင့်ကြောင်း မူဝါဒဆိုင်ရာ စီးပွားရေးပညာရှင် ဒေါက်တာအောင်ကိုကိုက ပြောကြားသည်။

 

နှေးကွေးနေသည့် စီးပွားရေးနိုးထရန် Capital Injection လိုအပ်နေသော်လည်း Tax Amnesty တစ်ခုတည်း လိုအပ်နေခြင်းမဟုတ်ဘဲ ပုံစံမျိုးစုံစဉ်းစားရန် လိုအပ်ဟုဆို

မျက်မှောက်မြန်မာ့စီးပွားရေး အလားအလာ ပြန်လည်သုံးသပ်ခြင်း ဆွေးနွေးပွဲကျင်းပမှုကို တွေ့ရစဉ်

နှေးကွေးနေသည့် စီးပွားရေးနိုးထလာရန် Capital Injection လိုအပ်နေသော်လည်း Tax Amnesty တစ်ခုတည်း လိုအပ်နေခြင်း မဟုတ်ဘဲ ပုံစံမျိုးစုံဖြင့် စဉ်းစားရန် လိုအပ်နေကြောင်း စီးပွားရေးပညာရှင်နှင့် ရခိုင်ပြည်နယ်အတွင်းလူသားချင်းစာနာမှု အကူအညီ အထောက်အပံ့ပေးရေး၊ ပြန်လည်နေရာချထားရေး၊ ဖွံ့ဖြိုးရေးစီမံကိန်း (UEHRD) ၏ ညှိနှိုင်းရေးမှူးချုပ် ဒေါက်တာအောင်ထွန်းသက်က မျက်မှောက်မြန်မာ့စီးပွားရေး အလားအလာ ပြန်လည်သုံးသပ်ခြင်း ဆွေးနွေးပွဲတွင် သုံးသပ်ပြောကြားသည်။

Tax Amnesty နှင့် ပတ်သက်၍ ပြောကြားရာတွင် စီးပွားရေး Theory အရ ပြောကြားခဲ့ခြင်းဖြစ်ပြီး What, How နှင့် Why မေးခွန်းသုံးခွန်းနှင့် နှိုင်းယှဉ်ပြောခဲ့ခြင်းဖြစ်သည်။

“တို့နိုင်ငံ အခုအချိန်မှာ ဘာလိုနေလဲ။ Injection လိုနေတယ်။ နှေးတဲ့စီးပွားရေးကို နိုးထအောင် ဘယ်လိုလုပ်မလဲမေးမယ်ဆိုရင် Capital Injection လိုနေတယ်။ ထရမ့်ပ်လည်း ဒီလိုပဲ လုပ်တာပဲ။ သူ့နိုင်ငံစီးပွားရေးတက်အောင်။ Injection လိုတယ်ဆိုတာကို Why ကိုသိရင် ဘယ်လိုလုပ်မလဲဆိုတဲ့ Why ရယ် ဘာလုပ်မလဲဆိုတဲ့ What က လွယ်သွားတယ်။ အခုက အခြေခံမေးခွန်းတွေ မမှန်တော့ အားလုံးကတစ်ယောက်နဲ့ တစ်ယောက် အပြန်အလှန် ဖြစ်နေတယ်။ တကယ်တမ်းလိုနေတာ Tax မဟုတ်ဘူး။ Tax Amnesty မဟုတ်ဘူး။ တကယ်တမ်း လိုနေတာ သုံး၊ လေး၊ ငါး မဟုတ်ဘူး။ တကယ်တမ်းလိုနေတာက ကိုယ့်နိုင်ငံရဲ့ စီးပွားရေးနိုးလာအောင် ဘယ်လိုလုပ်မလဲ။ ဆရာတို့ခေါ်တဲ့ Stimulas။ နိုင်ငံကြီးကို အားရှိအောင် ဘယ်လိုလုပ်မလဲ။ အဲဒါစဉ်းစားလိုက်ရင် Tax Amnesty တစ်ခုတည်း မဟုတ်ဘူး။ ပုံစံတွေအများကြီး စဉ်းစားလို့ရတယ်။ ဆရာ ပြောသလိုပဲ။ Theory နည်းနည်းလေးခေါက်မိရင် လုပ်ရကိုင်ရတာ နည်းနည်းလေးလွယ်မယ်ထင်တယ်။ Why နဲ့ မစဘဲ What နဲ့ ပြောနေတော့ တစ်ယောက်နဲ့တစ်ယောက် ငြင်းနေရတယ်။ လုပ်သင့်တယ်၊ မလုပ်သင့်ဘူးက အရေးမကြီးဘူး။ ဘာကြောင့်လုပ်လဲဆိုတာ အရေးကြီးတယ်။ ဘာကြောင့်လုပ်လဲသိရင် ကျန်တာအဖြေရှာလို့ရတယ်” ဟု ဒေါက်တာအောင်ထွန်းသက်က ဆိုသည်။

၂၀၁၈ ခုနှစ် ပြည်ထောင်စု၏ အခွန်အကောက်ဥပဒေကြမ်းတွင် စည်းကြပ်မှုမှ လွတ်ကင်းနေသော ၀င်ငွေများနှင့် အခြေပစ္စည်းများ တရားဝင်ဖြစ်လာစေရန် အခွန်နှုန်း သုံးရာခိုင်နှုန်းနှင့် ငါးရာခိုင်နှုန်းပေးသွင်းရမည်ဟု သတ်မှတ်ဖော်ပြခဲ့ပြီး အဆိုပါနှုန်းမှာ နှစ်စဉ်ပုံမှန်ထမ်းဆောင်နေသူများအတွက် အခွန်ရှောင်လိုသော အလေ့အထ စဉ်းစားလာစေနိုင်ခြင်း၊ အခွန်ရှောင်ခဲ့သူများကို ဦးစားပေးသလို ဖြစ်စေနိုင်ခြင်း၊ အစ္စလာမ္မစ် အစွန်းရောက် အဖွဲ့အစည်းများနှင့် အကြမ်းဖက် အဖွဲ့အစည်းများ၏ ငွေများစီးဝင်လာနိုင်ခြင်း၊ စစ်ဆေးကြပ်မတ်ရမည့် အဖွဲ့အစည်းများ၏ တာဝန်များကို ဖော်ပြနိုင်မှုမရှိခြင်းစသည့် ဝေဖန်မှုများ ရှိခဲ့ပြီးနောက် အဆိုပါ ပုဒ်မကို ပယ်ဖျက်ခဲ့သည်။

ထို့သို့ အခွန်လွတ်ငြိမ်းခွင့်အတွက် လက်ရှိသတ်မှတ်ထားသည့် သုံးရာခိုင်နှုန်းနှင့် ငါးရာခိုင်နှုန်းမှာ နည်းပါးနေကြောင်း ရန်ကုန်စီးပွားရေးတက္ကသိုလ်၊ ဘောဂဗေဒဌာနမှ ပါမောက္ခ၊ ဌာနမှူး ဒေါက်တာသီတာကြူက ပြောကြားသည်။

အခွန်လွတ်ငြိမ်းချမ်းသာခွင့် ပုဒ်မ ၂၅ ကြောင့် အခွန်စာရင်းမပြခဲ့သည့်ငွေများ စီးပွားရေးလောကသို့ ထုထည်ကြီးစွာဝင်လာပါက တစ်ပတ်ကြာဝင်လာလျှင်ပင် အကျိုးရှိမည်ဖြစ်ကြောင်းနှင့် ငွေမည်းများဝင်မလာရန် ပြည်ထဲရေးဝန်ကြီးဌာနနှင့် စိစစ်ကာ အခွန်လွတ်ငြိမ်းချမ်းသာခွင့်ပေးရေး ဆက်လက်လုပ်ဆောင်မည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။