နိုင်ငံ့ဝန်ထမ်းများ Passport လျှောက်ထားခွင့်နှင့် Visa ကင်းလွတ်ခွင့်ပြုထားသောနိုင်ငံများသို့ ခရီးသွားလာလိုလျှင် ပြည်ပထွက်ခွာခွင့် Ex-Myanmar Leave အား နေပြည်တော်ရုံးချုပ်အထိ တင်ရခြင်းမှ ကင်းလွတ်ခွင့်ပြုရန် ပြည်သူ့လွှတ်တော်တွင် မေးမြန်း

နေပြည်တော်၌ သြဂုတ် ၈ ရက်က ပြုလုပ်သော ဒုတိယအကြိမ် ပြည်သူ့လွှတ်တော် န၀မပုံမှန်အစည်းအဝေး ကျင်းပစဉ်

နိုင်ငံ့ဝန်ထမ်းများ Passport လျှောက်ထားခွင့်နှင့် Visa ကင်းလွတ်ခွင့်ပြုထားသော နိုင်ငံများသို့ ခရီးသွားလာလိုလျှင် ပြည်ပထွက်ခွာခွင့် Ex-Myanmar Leave အား နေပြည်တော်ရုံးချုပ်အထိ တင်ရခြင်းမှ ကင်းလွတ်ခွင့်ပြုရန် အစီအစဉ်ရှိ မရှိ ပြည်သူ့လွှတ်တော်တွင် မေးမြန်းခဲ့ကြောင်း သိရသည်။

နေပြည်တော်၌ သြဂုတ် ၈ ရက်က ပြုလုပ်သော ဒုတိယအကြိမ် ပြည်သူ့လွှတ်တော် န၀မပုံမှန်အစည်းအဝေး သတ္တမနေ့တွင် ကလေးမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါ်အေးအေးမူ (ခ) ဒေါ်ရှားမီးက အထက်ပါအတိုင်း မေးခွန်းမေးမြန်းခဲ့ခြင်း ဖြစ်သည်။

“အများပြည်သူတွေအနေနဲ့ နိုင်ငံခြား သွားလာခွင့် လွယ်လွယ်ကူကူ ခွင့်ပြုခဲ့တာ နှစ်အတော်ကြာပါပြီ။ အိမ်နီးချင်းနိုင်ငံတွေကို ဈေးဝယ်ထွက်ကြ၊ ဆေးကုသွားကြနဲ့ တချို့တတ်နိုင်တဲ့သူတွေဆိုရင် နှာစေး၊ ချောင်းဆိုးကအစ ဆေးသွားကုကြပါတယ်။ နိုင်ငံခြားဧည့်သည် ၀င်ရောက်လာတဲ့နှုန်းကလည်း နှစ်စဉ်နဲ့အမျှ တိုးတက်များပြားလာတာ တွေ့ရပါတယ်။ အဆင့်မြင့်ဝန်ထမ်းတွေနဲ့ အစိုးရအဖွဲ့ဝင်တွေကလည်း အလုပ်ကိစ္စ ပေါင်းစုံနဲ့ သွားလာနေကြတာ တွေ့ရပါတယ်။ ပြည်သူတွေ နိုင်ငံခြားအတွေ့အကြုံ များလာတာနဲ့အမျှ နိုင်ငံခြားမှာ အစိုးရ၀န်ထမ်းတွေက ပြည်သူတွေကို ဆက်ဆံတဲ့ပုံစံနဲ့ အခွင့်အရေးမျိုး လိုချင်လာကြပါတယ်။ ဒါပေမဲ့ ပြည်သူတွေနဲ့ တိုက်ရိုက်ဆက်ဆံရတဲ့ သာမန်ဝန်ထမ်းတွေကတော့ နိုင်ငံခြားသွားခွင့် လုံးဝမလွယ်ကူကြတာကြောင့် နိုင်ငံတကာ အတွေ့အကြုံ မရှိကြလို့ ပွတ်တိုက်မှုတွေ တစ်နေ့တခြား များလာတာ တွေ့ရပါတယ်” ဟု ဒေါ်အေးအေးမူ (ခ) ဒေါ်ရှားမီးက ပြောကြားသည်။

ထို့ပြင် ယခုအချိန်အထိ ၀န်ထမ်းများ အနေဖြင့် Passport လျှောက်၍ မရသေးကြောင်းသိရပြီး နိုင်ငံခြားသွားလိုပါက အနည်းဆုံး ညွှန်ကြားရေးမှူးအဆင့်မှ ရာထူးကြီးသူဆိုပါက ၀န်ကြီးအဆင့်အထိ ခွင့်တောင်းရကြောင်း၊ တချို့ဝန်ကြီးဌာနများသည် နေပြည်တော်ရုံးချုပ်အထိ လူကိုယ်တိုင်လာ၍ ခွင့်တင်ရကြောင်း၊ ခွင့်စာတင်ချိန်မှစပြီး ခွင့်ကျသည်အထိ တစ်လခန့်ကြာကြောင်း၊ ဥပဒေတစ်ခုသည် မျှတမှုရှိပြီး လေးစားလိုက်နာကြပါမှ အာဏာသက်ရောက်မှု ရှိမည်ဖြစ်သည့်အတွက် ၀န်ထမ်းများကို ကန့်သတ်မှုများသည့် အတွက် ၀န်ထမ်းမဟုတ်သူအဖြစ် Passport လျှောက်ခြင်း၊ ကိုင်ဆောင်ခြင်း၊ ဌာနအကြီး အကဲမသိဘဲ နိုင်ငံခြားသို့ ခိုးထွက်ကြခြင်းများ ဖြစ်လာနိုင်ကြောင်းနှင့် အထူးသဖြင့် ဆေးကုသလိုသူတွေ အနေဖြင့် ခွင့်တင်ရမည့်ရက်ကို မစောင့်နိုင်၍ ခိုးသွားခြင်းများ ဖြစ်လာနိုင်ကြောင်း ၎င်းက ဆက်လက်ပြောကြားသည်။

အဆိုပါ မေးခွန်းနှင့်ပတ်သက်၍ ပြည်ထဲရေးဝန်ကြီးဌာန ဒုတိယ၀န်ကြီး ဗိုလ်ချုပ်အောင်သူက ပြန်လည်ဖြေကြားရာတွင် နိုင်ငံ့ဝန်ထမ်းများသည် ကိုယ်ရေးကိုယ်တာကိစ္စဖြင့် ပြည်ပနိုင်ငံများသို့ သွားရောက်လိုပါက မြန်မာနိုင်ငံကူးလက်မှတ် ရရှိရေး လျှောက်ထားရပြီး ထိုသို့ လျှောက်ထားရာတွင် နိုင်ငံသားစိစစ်ရေးကတ်ပြား၊ အိမ်ထောင်စုစာရင်းတို့၏ မူရင်း/မိတ္တူများ အပါအ၀င် သက်ဆိုင်ရာဝန်ကြီးဌာန၏ ပြည်ပခံစားခွင့်မူရင်းနှင့် မိတ္တူတို့အား မြန်မာနိုင်ငံကူးလက်မှတ် ထုတ်ပေးရေးအဖွဲ့ရုံးရှိ လူဝင်မှုကြီးကြပ်ရေးဦးစီးဌာနကောင်တာ၌ စစ်ဆေးမှုခံယူကာ စစ်ဆေးပြီးကြောင်း ဖြတ်ပိုင်းနှင့်အတူ ထုတ်ပေးသော ကိုယ်ရေးလျှောက်လွှာပုံစံတွင် ဖော်ပြထားသော အချက်များကို ပြည့်စုံစွာ ဖြည့်စွက်၍ မြန်မာနိုင်ငံကူးလက်မှတ် ထုတ်ပေးရေး အဖွဲ့ရုံးရှိ မြန်မာ့စီးပွားရေးဘဏ်တွင် ကျပ် ၂၅၀၀၀ ပေးသွင်းရကြောင်း၊ ထိုသို့ပေးသွင်းပြီးပါက နိုင်ငံသားစိစစ်ရေးကတ်ပြားနှင့် အိမ်ထောင်စုစာရင်းတို့၏ မူရင်း၊ မိတ္တူ၊ ဘဏ်ငွေသွင်းပြီးကြောင်း ပြေစာများနှင့်အတူ မြန်မာနိုင်ငံကူးလက်မှတ် စိစစ်ရေးအဖွဲ့ရုံးရှိ ကိုယ်ရေးအချက်အလက်များ ရေးသွင်းရေးဌာနစိတ်တွင် စိစစ်မှုခံယူခြင်း၊ ဓာတ်ပုံရိုက်ခြင်း၊ လက်ဗွေနှိပ်ခြင်း၊ လက်မှတ်ရေးထိုးခြင်းတို့ကို ဆောင်ရွက်ပြီး နိုင်ငံကူးလက်မှတ် ထုတ်ပေးရေးအဖွဲ့က လက်ခံပြေစာဖြတ်ပိုင်းကို ထုတ်ပေးကြောင်း၊ ထိုပြေစာထုတ်ပေးသည့်နေ့မှ ၁၀ ရက်ပြည့်ပါက လက်ခံပြေစာဖြင့် Passport စာအုပ်ကို ထုတ်ယူရကြောင်းနှင့် Passport စာအုပ်ကို ပြည်ပသို့သွားရောက်ပြီး မြန်မာနိုင်ငံသို့ ပြန်လည်ရောက်ရှိပါက သက်ဆိုင်ရာဝန်ကြီးဌာနမှ ထိန်းသိမ်းထားရှိရန် ပြည်ထဲရေးဝန်ကြီးဌာန၏ ၂၀၁၈ ခုနှစ် ဇန်န၀ါရီ ၂၄ ရက် ရက်စွဲပါစာဖြင့် ၀န်ကြီးဌာန အားလုံးကို အကြောင်းကြားထားကြောင်း ပြောကြားသည်။

“နိုင်ငံဝန်ထမ်းတွေ ပြည်ပကိုသွားရောက်ရာမှာ ပြည်ပမှာကြုံတွေ့နိုင်တဲ့ အခက်အခဲတွေနဲ့ အခြားအုပ်ချုပ်မှုဆိုင်ရာ ကိစ္စရပ်တွေကို သက်ဆိုင်ရာဝန်ကြီးဌာနတွေက ဖြေရှင်းရမှာဖြစ်တဲ့အတွက် သက်ဆိုင်ရာဝန်ကြီးဌာနရဲ့ အဖွဲ့အစည်း အကြီးအမှူးတို့က တာဝန်ခံပြီး ပြင်ပခံစားခွင့် Ex-Myanmar Leave ကို ခွင့်ပြုပေးတာဟာ ပိုမိုသင့်လျော်ကြောင်း စိစစ်တွေ့ရှိရပါတယ်။ စိစစ်တွေ့ရှိချက်အရ မြန်မာနိုင်ငံကူးလက်မှတ် ထုတ်ပေးရေးအဖွဲ့ အနေနဲ့ နိုင်ငံဝန်ထမ်းတွေ နိုင်ငံကူးလက်မှတ် လျှောက်ထားရာမှာ ပြည်ပခံစားခွင့် Ex-Myanmar Leave ပါရှိရန် မူဝါဒ ချမှတ်ထားခြင်း ဖြစ်ပါတယ်။ ဒါကြောင့် ပြည်ပနိုင်ငံကို အကြောင်းအမျိုးမျိုးကြောင့် သွားရောက်ရတဲ့ နိုင်ငံ့ဝန်ထမ်းတွေ လွယ်ကူအဆင်ပြေစေရန် နိုင်ငံဝန်ထမ်းဥပဒေ နည်းဥပဒေပါ ခွင့်အမျိုးအစား ၁၀ မျိုးနဲ့ လုပ်သက်ခွင့်(သို့) လစာမဲ့ခွင့်တွေကို သက်ဆိုင်ရာဝန်ကြီးဌာနနဲ့ အဖွဲ့အစည်း အကြီးအမှူးတို့က တာဝန်ခံ ခွင့်ပြုပေးလျက် ရှိပါတယ်။ ဒါကြောင့် နိုင်ငံ့ဝန်ထမ်းများ Passport လျှောက်ထားခွင့်နှင့် Visa ကင်းလွတ်ခွင့်ပြုထားသော နိုင်ငံများသို့ ခရီးသွားလာလိုလျှင် ပြည်ပထွက်ခွာခွင့် Ex-Myanmar Leave အား သက်ဆိုင်ရာဝန်ကြီး ဌာနသို့ တင်ပြရခြင်းမှ ကင်းလွတ်ခွင့်ပြုပါရန် အစီအစဉ် မရှိပါကြောင်း သက်ဆိုင်ရာဝန်ကြီးဌာနများရဲ့ ဖြေကြားချက်ကို ပေါင်းစပ်ဖြေကြားပါတယ်” ဟု ဒုတိယ၀န်ကြီးက ပြောကြားသည်။