၂၁ ရာစုပင်လုံ တတိယအစည်းအဝေးကျင်းပနိုင်ရေးအတွက် NCA ထိုးထားသော တိုင်းရင်းသားလက်နက်ကိုင်အဖွဲ့များ အစည်းအဝေး ရက်ပိုင်းအတွင်းပြုလုပ်မည်ဖြစ်ပြီး ညီလာခံတွင် လုံခြုံရေးကဏ္ဍဆိုင်ရာ DDR/SSR ကိစ္စရပ်များ ဆွေးနွေးရန်သဘောတူထား

မေ ၃၁ ရက်က ရန်ကုန်မြို့၌ ပြုလုပ်ခဲ့သည့် လုံခြုံရေးကဏ္ဍဆိုင်ရာ အလွတ်သဘောဆွေးနွေးပွဲအား တွေ့ရစဉ် (ဓာတ်ပုံ-Myo Win Facebook)

ပြည်ထောင်စုငြိမ်းချမ်းရေးညီလာခံ- ၂၁ ရာစုပင်လုံ တတိယအစည်းအဝေးအား ယခုလကုန်တွင် ကျင်းပနိုင်ရေးအတွက် NCA ရေးထိုးထားသော တိုင်းရင်းသားလက်နက်ကိုင်အဖွဲ့များ၏ အစည်းအဝေးကို ထိုင်းနိုင်ငံ ချင်းမိုင်မြို့၌ ယခုရက်ပိုင်းအတွင်း ပြုလုပ်မည်ဖြစ်ကြောင်း ပအိုဝ်းအမျိုးသားလွတ်မြောက် ရေးအဖွဲ့ချုပ် (PNLO) နာယက ဗိုလ်မှူးကြီး ခွန်ဥက္ကာက ပြောကြားသည်။

အဆိုပါအစည်းအဝေးကို ဇွန် ၁၁ ရက်၌ ပြုလုပ်ရန် လျာထားပြီး အစည်းအဝေးတွင်  ငြိမ်းချမ်းရေးညီလာခံကျင်းပမည့်ရက်ကို အဆုံးအဖြတ်ပေးမည်ဖြစ်ကြောင်း ၎င်းကပြောကြားသည်။

“အလွတ်သဘောအဖွဲ့က သဘောတူထားပြီးသားဆိုတော့ ကျွန်တော်တို့က တရားဝင်အတည်ပြုပေးရုံပါပဲ။ အလွတ်သဘောမှာ တွေ့တယ်။ ရတဲ့အချက်ကို တရားဝင်ဖြစ်အောင် လုပ်ပေးတယ်။ ဒါပါပဲ။ သိပ်တော့ ပြောင်းလဲဖို့ မရှိပါဘူး။ ကြားထဲမှာတော့ UPDJC အလုပ်တွေရှိမယ်။ တရားဝင်က UPDJC က ဒီပွဲတွေကို ကွပ်ကဲရတာကိုး။ အဲဒါကြောင့် UPDJC ရဲ့ အတွင်းရေးမှူးအဖွဲ့ အစည်းအဝေး၊ UPDJC တစ်ခုလုံးရဲ့အစည်း အဝေး၊ လမ်းညွှန်ချက်ပြီးတော့ အဲဒီ UPDJC အောက်မှာရှိတဲ့ ကဏ္ဍငါးရပ်ရဲ့ လုပ်ငန်းကော်မတီဆိုတာ ရှိသေးတယ်။ အဲဒီလုပ်ငန်း ကော်မတီကလည်း ၁၅ ရက်လိုတယ်။ နှစ်ပတ်အချိန်တောင်းတယ်။ သူတို့က ရရှိလာတဲ့ ခေါင်းစဉ်တွေကို အကျေအလည်ဆွေးနွေးပြီးတော့ တော်တော်လေးနီးစပ်မှ ညီလာခံကို တင်တာပေါ့ဗျာ။ အဲဒီအလုပ်အတွက် သူတို့ကလည်း ၁၅ ရက် တောင်းတာရှိတယ်။ ဒါကြောင့် အားလုံးကိုတော့ ခပ်သုတ်သုတ် ခပ်သွက်သွက်လုပ်မှ ဒီလ ၃၀ မှာ (ညီလာခံလုပ်ဖို့) မီမှာပေါ့ဗျာ” ဟု ဗိုလ်မှူးကြီး ခွန်ဥက္ကာက ပြောကြားသည်။

၂၁ ရာစု ပင်လုံတတိယအစည်းအဝေး ကျင်းပနိုင်ရေးအတွက် အစိုးရနှင့် NCA လက်မှတ်ရေးထိုးထားသော တိုင်းရင်းသား လက်နက်ကိုင်အဖွဲ့များ၏ တတိယအကြိမ် အလွတ်သဘော တွေ့ဆုံဆွေးနွေးရေးအဖွဲ့တို့ မေ ၃၀ ရက် နှင့် ၃၁ ရက်တွင် ရန်ကုန်မြို့ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) ၌ တွေ့ဆုံဆွေးနွေးခဲ့ကြပြီး အဆိုပါအစည်းအဝေးတွင် ညီလာခံကျင်းပမည့်ရက်ကို နှစ်ဖက်သဘောထားများ စုစည်းနိုင်ခဲ့ကာ ယခုကျင်းပမည့်ညီလာခံတွင် လုံခြုံရေးဆိုင်ရာ ပြန်လည်ပေါင်းစည်းရေးကဏ္ဍ (DRR/SSR) ကို အစုံလိုက် ဆွေးနွေးရန် ကနဦးသဘောတူညီချက်ရရှိထားကြောင်း သိရသည်။

“DDR/SSR ကို တစ်စုံလုံးကို ဆွေးနွေးမယ်လို့ သဘောထားကြပါတယ်။ အရင်တုန်းက တိုင်းရင်းသားတွေက SSR ပဲဆွေးနွေးမယ်။ တပ်မတော်က DDR ပဲ ဆွေးနွေးမယ်။ အခု အဲဒီနှစ်ခုပေါင်းလိုက်ပြီးတော့ DDR ရော SSR တစ်ပြိုင်နက်တည်း ဆွေးနွေးပွဲ အာဂျင်ဒါမှာထည့်ပြီးတော့ ဆွေးနွေးသွားမယ်။ သဘောတူညီချက်ယူတာတို့ အကောင်အထည်ဖော်တာတို့ကျတော့ လိုအပ်တဲ့အခြေအနေ လိုအပ်တဲ့အနေအထားမှာ လုပ်မယ်။ ဆွေးနွေးတာကတော့ အားလုံးဆွေးနွေးမယ်” ဟု ဗိုလ်မှူးကြီးခွန်ဥက္ကာက ပြောကြားသည်။

လုံခြုံရေးဆိုင်ရာ ပြန်လည်ပေါင်းစည်းရေး၊ လုံခြုံရေးဆိုင်ရာ ပြုပြင်ပြောင်းလဲရေးတွင် DDR (Disarmament Demobilization Reintegration) SSR (Security Sector Reform) နှင့်ပတ်သက်၍ လက်နက်ကိုင်တပ်များ လျှော့ချရေး၊ လက်နက်ဖျက်သိမ်းရေးနှင့် တပ်အသွင်ကူးပြောင်းရေးတို့ ပါဝင်ကြောင်း သိရသည်။

ယခုလကုန်ပိုင်းတွင် ကျင်းပရန် လျာထားသည့် ၂၁ ရာစုပင်လုံ တတိယအစည်းအဝေးတွင် ပြည်ထောင်စု၏ အစိတ်အပိုင်း ဟူသမျှသည် ပြည်ထောင်စုနယ်မြေမှ မည်သည့်အခါမျှ ခွဲမထွက်ရဟူသော အချက်နှင့် ပတ်သက်၍ ဆွေးနွေးခြင်းမရှိဘဲ ကျော်လွန်သွားမည်ဖြစ်သော်လည်း ဆက်လက်ကျင်းပမည့် ညီလာခံများတွင်မူ ပြန်လည်ညှိနှိုင်းဆွေးနွေးရမည်ဖြစ်ကာ ဖက်ဒရယ်အခြေခံမူစစ်စစ်ထဲတွင် ခွဲထွက်ခွင့်နှင့်ပတ်သက်၍ ပါဝင်ခြင်း မရှိကြောင်း ဗိုလ်မှူးကြီးခွန်ဥက္ကာက ပြောကြားသည်။

“တကယ်တော့ ဖက်ဒရယ်အခြေခံမူ စစ်စစ်ထဲမှာတော့ ခွဲမထွက်ရတာတို့ ခွဲထွက်ခွင့်ရှိသည်တို့က မပါဘူးဗျာ။ ဖက်ဒရယ်မူထဲမှာ ဒါက အကျုံးမ၀င်ဘူး။ ဒီခွဲထွက်ခွင့် မရှိတာတို့၊ ခွဲမထွက်ရတာတို့က နိုင်ငံရေး လိုအပ်ချက်အရ တောင်းဆိုချက်တွေပဲဖြစ်တယ်။ ဖက်ဒရယ်မူစစ်စစ်မှာတော့ ဖက်ဒရယ်ပြည်ထောင်စုမှာ ဘယ်လိုပူးပေါင်းနေထိုင်မလဲ။ ဘယ်လိုအာဏာခွဲဝေမလဲဆိုတာပဲ ရှိတာကိုး။ အဲဒီတော့ ဖက်ဒရယ်မူစစ်စစ်တွေကိုပဲ စုမယ်ဆိုရင်တော့ အဲဒီအချက်တွေကို ချန်ထားဖို့လိုတယ်။ သို့သော်လည်းပဲ ဖက်ဒရယ်အခြေခံမူမှာပါတဲ့ ပြည်ထောင်စုအဖွဲ့ဝင်ပြည်နယ်များရဲ့ လုပ်ပိုင်ခွင့်တွေကတော့ အခြေခံမူထဲပါတယ်။ ဒါကြောင့် ပြည်ထောင်စုအဖွဲ့ဝင် ပြည်နယ်တွေရဲ့ လုပ်ပိုင်ခွင့်ကို ကျွန်တော်တို့က ခွဲမထွက်ရနဲ့ သွားချိတ်တဲ့အခါကျတော့ နည်းနည်းကမောက်ကမ ဖြစ်သွားတာပေါ့။ အဲဒါကြောင့် နှစ်ခုစလုံးက ချန်ထားရမလို ဖြစ်သွားတာ။ နောက် နားလည်သဘောပေါက်လာရင်တော့ အဆင်ချောသွားမှာပါ။ ဖက်ဒရယ်မူချည်းပဲလိုချင်ရင် ဖက်ဒရယ်မူချည်းပဲချ။ ပြည်နယ်အခွင့်အရေးတွေလည်းချ။ အကယ်၍ နိုင်ငံရေးအရ အာမခံထားရမယ်ဆိုရင်လည်း နိုင်ငံရေးအာမခံဖြစ်တဲ့ ကျွန်တော်တို့က ခွဲမထွက်ရတို့၊ ခွဲထွက်ပိုင်ခွင့် မရှိစေရလို့ ဆိုတဲ့ဟာကို နိုင်ငံရေးအာမခံချက်ထဲမှာထည့်။ ဖက်ဒရယ်မူထဲမှာတော့ မထည့်နဲ့ပေါ့ဗျာ။ နည်းနာကတော့ ရှာကြရမှာပဲ” ဟု ဗိုလ်မှူးကြီးခွန်ဥက္ကာက ပြောကြားသည်။

၂၁ ရာစု ပင်လုံတတိယအစည်းအဝေးကို NCA ရေးထိုးထားသည့် တိုင်းရင်းသား လက်နက်ကိုင်အဖွဲ့အချို့၏ အမျိုးသားအဆင့် နိုင်ငံရေးဆွေးနွေးပွဲ ပြုလုပ်နိုင်ခြင်းမရှိသေးသည့် အခြေအနေအပါအ၀င်အကြောင်း အမျိုးမျိုးကြောင့် ကျင်းပနိုင်ခြင်းမရှိသေးဘဲ အကြိမ်ကြိမ်ရွှေ့ဆိုင်းထားရခြင်း ဖြစ်သည်။

ပြည်တွင်းငြိမ်းချမ်းရေးအတွက် ရှမ်းပြည်နယ်အတွင်းရှိ NCA လက်မှတ်ထိုးနိုင်ခြင်း မရှိသေးသော လက်နက်ကိုင် အဖွဲ့များနှင့် တွေ့ဆုံဆွေးနွေးပြီး ကြိုးပမ်းဆောင်ရွက်နေဟုဆို

ပြည်တွင်းငြိမ်းချမ်းရေးအတွက် ရှမ်းပြည်နယ်အတွင်းရှိ NCA လက်မှတ်ရေးထိုးနိုင်ခြင်း မရှိသေးသော လက်နက်ကိုင် အဖွဲ့များနှင့် တွေ့ဆုံဆွေးနွေးပြီး ကြိုးပမ်းဆောင်ရွက်မှုများ ပြုလုပ်နေဟု ရှမ်းပြည်နယ် နယ်လုံဝန်ကြီးက သတင်းစာ ရှင်းလင်းပွဲတွင် ပြောကြားသည်။

ရှမ်းပြည်နယ် အစိုးရအဖွဲ့၏ ဒုတိယသက်တမ်း တစ်နှစ်တာ ဆောင်ရွက်ခဲ့မှု အခြေအနေများကို မီဒီယာများနှင့် သတင်းစာ ရှင်းလင်းခြင်းကို တောင်ကြီးမြို့ မြို့တော်ခန်းမတွင် မေ ၂၅ ရက် မွန်းလွဲ ၁ နာရီတွင် စတင်ပြုလုပ်ခဲ့ပြီး သတင်းမီဒီယာများနှင့် အပြန်အလှန် မေးခွန်းများ ဖြေဆိုခဲ့ခြင်း ဖြစ်သည်။

“NCA လက်မှတ် ရေးထိုးထားခြင်း မရှိသေးတဲ့ အဖွဲ့တွေနဲ့ ဆွေးနွေးနေတာတွေ ရှိပါတယ်။ ထိုနည်းတူစွာပဲ ကျွန်တော်တို့ကိုယ်တိုင် လိုက်ပါပြီးတော့ NCA လက်မှတ်မထိုးထားတဲ့ နေရာတွေမှာ NCA လက်မှတ်ရေးထိုးဖို့အတွက် လိုအပ်တဲ့ ဒေသပိုင်းဆိုင်ရာ ညှိနှိုင်းဆောင်ရွက်မှုတွေ၊ ငြိမ်းချမ်းရေးသွားမယ့် လမ်းစဉ်တွေကို ဆွေးနွေးပြီး ဆောင်ရွက်လျက် ရှိပါတယ်။ လက်ရှိ NCA လက်မှတ်ရေးထိုးတာ ရှစ်ဖွဲ့ကနေ ထပ်တိုးတင်ပြလိုက်တာ နှစ်ဖွဲ့ဆိုတော့ စုစုပေါင်း ၁၀ ဖွဲ့ဖြစ်ခဲ့တာ ဖြစ်ပါတယ်။ စေ့စပ်ညှိနှိုင်းမှုတွေ ဆောင်ရွက်နေပါတယ်လို့ ဖြေကြားလိုပါတယ်” ဟု လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး နိုင်ဝင်းအောင်က ပြောကြားသည်။

ထို့ပြင် ရှမ်းပြည်နယ်အတွင်းရှိ ပြည်သူလူထုများ ငြိမ်းချမ်းစွာ နေထိုင်ရေးနှင့် တရားဥပဒေစိုးမိုးရေး ကိစ္စရပ်များသည် ၀န်ကြီးချုပ် တာဝန်ယူ ဆောင်ရွက်နေစဉ် ကာလအတွင်း အကြီးမားဆုံးသော စိန်ခေါ်မှု တစ်ရပ်လည်း ဖြစ်ကြောင်း ဒေါက်တာလင်းထွဋ်က သတင်းထောက်တစ်ဦး၏ မေးမြန်းမှုကို ပြန်လည် ဖြေကြားသည်။

“ရှမ်းပြည်နယ်အတွင်း နေထိုင်ကြသော ပြည်သူလူထု တစ်ရပ်လုံးအတွက် ငြိမ်းချမ်းစွာ နေထိုင်ရေးနဲ့ တရားဥပဒေ စိုးမိုးရေးက အကြီးမားဆုံးနဲ့ အခက်ခဲဆုံး ဖြေရှင်းနေရတဲ့ အခက်အခဲ အတားအဆီး လုပ်ငန်းတာဝန်တစ်ခု ဖြစ်ပါတယ်ဆိုတာ ပြောချင်ပါတယ်” ဟု ရှမ်းပြည်နယ် ၀န်ကြီးချုပ် ဒေါက်တာလင်းထွဋ်က ပြောကြားသည်။

 

၂၁ ရာစု ပင်လုံအစည်းအဝေးများကို သတ်မှတ်ချိန်အတိုင်း ကျင်းပခြင်းထက် ထွက်ပေါ်လာမည့် ရလဒ်များသည် အရေးကြီးသဖြင့် ဆွေးနွေးဖက်များအကြား သဘောတူညီချက်များရရှိရေး အကျေအလည် ဆွေးနွေးရန် လိုအပ်ဟု UPDJC အတွင်းရေးမှူးများ သုံးသပ်

အစိုးရနှင့် NCA ထိုးထားသည့် တိုင်းရင်းသားလက်နက်ကိုင်အဖွဲ့တို့ မေ ၁၉ ရက်က နေပြည်တော်တွင် ဒုတိယအကြိမ် လုံခြုံရေးကဏ္ဍ အလွတ်သဘောဆွေးနွေးပွဲ ပြုလုပ်နေစဉ် (ဓာတ်ပုံ-Myo Win)

ပြည်ထောင်စုငြိမ်းချမ်းရေးညီလာခံ-၂၁ ရာစု ပင်လုံအစည်းအဝေးများကို သတ်မှတ်ချိန်အတိုင်း ကျင်းပနိုင်ခြင်း၊ မကျင်းပနိုင်ခြင်းထက် ညီလာခံမှထွက်ပေါ်လာမည့် ရလဒ်များသည် အလွန်အရေးကြီးပြီး အလွတ်သဘော ဆွေးနွေးကြမည့် ဆွေးနွေးဖက်များ ကြားသဘောတူညီချက်များ ရရှိရေးအတွက် အကျေအလည်ညှိနှိုင်းဆွေးနွေးရန် လိုအပ်ကြောင်း ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အတွင်းရေးမှူးများက သုံးသပ်ပြောကြားသည်။

၂၁ ရာစု ပင်လုံအစည်းအဝေးများကို တစ်နှစ်လျှင် နှစ်ကြိမ်ပြုလုပ်ရန် အစိုးရအဖွဲ့က စီစဉ်ထားသော်လည်း တစ်နှစ်လျှင်တစ်ကြိမ်သာ ပြုလုပ်နိုင်သေးပြီး တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ရေးထိုးထားသော တိုင်းရင်းသားလက်နက်ကိုင် အဖွဲ့အစည်းအချို့၏ အမျိုးသားအဆင့် နိုင်ငံရေးဆွေးနွေးပွဲများ ပြုလုပ်ရန် ကန့်သတ်ခံရမှုသည်လည်း သတ်မှတ်ချိန်အတိုင်း ညီလာခံကျင်းပနိုင်ရေးကို အခက်အခဲဖြစ်စေသည်ဟု UPDJC အတွင်းရေးမှူးများက ပြောကြားသည်။

“နိုင်ငံရေးဆွေးနွေးမှုရဲ့ အဓိကအခြေခံကတော့ ကျွန်တော်တို့ အကျေအလည် ညှိနှိုင်းဆွေးနွေးမှုတွေနဲ့ နိုင်ငံရေးဆွေးနွေးကြတာဖြစ်တဲ့အတွက် နိုင်ငံရေးပြဿနာတွေ ငြိမ်းချမ်းစွာဖြေရှင်းဖို့လို့ ပြောတဲ့အတွက် အကျေအလည် ညှိနှိုင်းဖြေရှင်းမှုကို အခြေခံရမှာဖြစ်ပါတယ်။ အဲဒီတော့ ဒါကလည်း ကျွန်တော်တို့ အကျေအလည် ညှိနှိုင်းဆွေးနွေးမှုတွေနဲ့ သွားမယ်ဆိုတာကိုလည်း နှစ်ဖက်စလုံးမှာ နဂိုကတည်းက သဘောတူခဲ့ကြတာ ဖြစ်ပါတယ်။ အခုကတော့ အကျေအလည် ညှိနှိုင်းဆွေးနွေးမှုတွေဖြစ်ဖို့ အဲဒါဟာ အဓိကအချက်ပါပဲ” ဟု တိုင်းရင်းသားလက်နက်ကိုင်များ အစုအဖွဲ့မှ UPDJC အတွင်းရေးမှူးအဖွဲ့ဝင် ဦးခွန်မြင့်ထွန်းက ပြောကြားသည်။

၂၁ ရာစု ပင်လုံတတိယအစည်းအဝေးအား အောင်မြင်စွာ ကျင်းပနိုင်ရေးအတွက် ပြည်ထောင်စု၏ အစိတ်အပိုင်းဟူသမျှသည် နိုင်ငံတော်မှ မည်သည့်အခါမျှ ခွဲမထွက်ရဆိုသည့်အချက်ကို အစိုးရနှင့် တပ်မတော်က ပြည်ထောင်စုသဘောတူစာချုပ် အစိတ်အပိုင်းတွင် ထည့်သွင်းလိုသော်လည်း တိုင်းရင်းသားများက လက်မခံနိုင်ကြောင်း၊ သို့သော် အဆိုပါအချက်ကို လက်ခံမှသာ အစိုးရနှင့် တပ်မတော်က တိုင်းရင်းသားများ လိုလားသည့် လူမျိုးရေးတန်းတူမှုနှင့် ကိုယ်ပိုင်ပြဋ္ဌာန်းခွင့်ကို လက်ခံမည်ဖြစ်သည့်အတွက် အဆိုပါကိစ္စတွင် အကျေအလည်ညှိနှိုင်းဆွေးနွေးရန် လိုအပ်နေသည်ဟု ဦးခွန်မြင့်ထွန်းက ပြောကြားသည်။

NCA စာချုပ်တွင် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှု မပြိုကွဲရေး စသည့် ဒို့တာဝန်အရေးသုံးပါးကို NCA စာချုပ်အား လက်မှတ်ရေးထိုးစဉ်ကတည်းကပင် တိုင်းရင်းသားလက်နက်ကိုင် အဖွဲ့အစည်းများက လက်ခံထားပြီးသားဖြစ်သည့်အတွက် ပြည်ထောင်စုသဘောတူစာချုပ် အစိတ်အပိုင်းတွင် ခွဲမထွက်ရဆိုသည့်အချက်ကို ထည့်သွင်းရန် မလိုအပ်တော့ဟု နိုင်ငံရေးပါတီအစုအဖွဲ့မှ UPDJC အတွင်းရေးမှူးအဖွဲ့ဝင် ဒေါက်တာမနာမ်တူးဂျာက ပြောကြားသည်။

“တပ်မတော်က ခုနကပြောတဲ့စာသား (ခွဲမထွက်ရ) ကို ထည့်ကိုထည့်ရမယ်ပေါ့။ တိုင်းရင်းသားတွေက ခွဲထွက်ရေးမူကို စွဲကိုင်ထားတာ မရှိပါဘူး။ ခွဲထွက်ရေးမူမပါတဲ့ ဖက်ဒရယ်ပြည်ထောင်စုဆိုပြီး ပြောလာတယ်။ ပထမအစည်းအဝေးမှာလည်း ခွဲထွက်ရေးမပါဘူး။ ဒါက ဒို့တာဝန်အရေးသုံးပါးကို လက်ခံတဲ့သဘောပေါ့။ ဒါပေမဲ့ တပ်မတော်နဲ့အစိုးရကတော့ ခုနကစကားလုံးပါမှ စိတ်ချရမယ့်သဘောယူဆနေတယ်။ ဒါက နောက်တော့ ဖြေရှင်းလို့ ရတန်ကောင်းပါတယ်။ ဒီတိုင်းသွားနေလို့လည်း မဖြစ်ဘူးလေ” ဟု ဒေါက်တာမနာမ်တူးဂျာက ပြောကြားသည်။

၂၁ ရာစုပင်လုံအစည်းအဝေးများကို တစ်နှစ်လျှင်နှစ်ကြိမ် ကျင်းပခြင်း၊ မကျင်းပခြင်းထက် ပြည်ထောင်စုငြိမ်းချမ်းရေးညီလာခံမှ အားလုံးသဘောတူလက်ခံသော ပြည်ထောင်စုသဘောတူညီချက် အစိတ်အပိုင်းများ ရရှိရေးကသာလျှင် ပိုမိုအရေးကြီးကြောင်း နိုင်ငံရေးပါတီအစုအဖွဲ့မှ UPDJC အတွင်းရေးမှူးအဖွဲ့ဝင် ဦးစိုင်းကျော်ညွန့်က ပြောကြားသည်။

“နိုင်ငံရေးဖြစ်စဉ်မှာလုပ်နေတဲ့ အမျိုးသားအဆင့် နိုင်ငံရေးတွေ့ဆုံပွဲတို့၊ လူထုတွေ့ဆုံပွဲတို့ဆိုတာ ဘယ်လိုလဲဆိုတာ ဟိုဘက်ဒီဘက် နားလည်တာမတူဘူး။ မတူတော့ ဒီဘက်ကလုပ်ရင် ဟိုဘက်က ပိတ်တယ်ပေါ့ဗျာ။ အဲ့ဒီတော့ ပြောချင်တာက ဒီအခက်အခဲအကျပ်အတည်းတွေကို ဖြေရှင်းဖို့လိုတယ်။ မဖြေရှင်းဘဲနဲ့ ညီလာခံကို လုပ်လိုက်မယ်ဆိုရင်လည်း ညီလာခံမှာသွားပြီးတော့ တိုင်းသိ၊ ပြည်သိ ငြင်းခုံနေကြလို့လည်း ဘာထူးမလဲ။ အဲဒီတော့ ကြားထဲမှာရှိနေတဲ့ အခက်အခဲတွေ ဖြေရှင်းဖို့လိုတယ်။ နောက်ပြီးတော့ လုံခြုံရေးပိုင်းဆိုင်ရာမှာဆိုရင်လည်း တစ်ခုတည်းသော တပ်မတော်ဆိုတာ ဘယ်လို၊ ပြည်ထောင်စုတပ်မတော်ဆိုတာ ဘယ်လိုပေါ့။ ဒီဟာတွေကလည်း ဆွေးနွေးညှိနှိုင်းမှုတွေမရှိဘူး။ မရှိဘဲနဲ့ ဟိုမှာသွားပြီး ရန်ဖြစ်နေကြရင်လည်း ဘာထူးမှာလဲ။ ဟိုဘက်က DDR ပြောတယ်။ ဒီဘက်က SSR ပြောတယ်။ ဟိုဘက်က DDR ပဲ ဆွေးနွေးမယ်။ SSR လုံးဝမဆွေးနွေးဘူး။ အဲဒါမျိုးတွေကအစ ဒါတွေက ပွဲမလုပ်ခင်ကတည်းက အပြင်မှာ ကြေကြေညက်ညက်ဖြစ်ဖို့လိုတယ်။ ဒါကြောင့်မို့ တိုင်းရင်းသားလက်နက်ကိုင်တွေအနေနဲ့ အစိုးရနဲ့ လာပြီးဆွေးနွေးတယ်။ အလွတ်သဘော နှစ်ခါဆွေးနွေးတယ်။ ဒါပေမဲ့ သဘောတူညီမှုမရသေးဘူး။ ဒီအလွတ်သဘောကတော့ များများတွေ့ဖို့လိုတယ်။ အလွတ်သဘောတွေက ပြေလည်ခါနီးပြီး အဖြေတွေထွက်ဖို့လိုတယ်” ဟု ဦးစိုင်းကျော်ညွန့်က ပြောကြားသည်။

၂၁ ရာစုပင်လုံ တတိယအစည်းအဝေး ကျင်းပနိုင်ရေးအတွက် အစိုးရနှင့် NCA လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့များ ယခုလကုန်ပိုင်းတွင် အလွတ်သဘော ပြန်လည်ဆွေးနွေးကြမည်ဖြစ်ပြီး နှစ်ဖက်အဖွဲ့အစည်းများအကြား ညှိနှိုင်းမှုအဆင်ပြေမှသာ ညီလာခံကျင်းပမည်ဟု အစိုးရနှင့် အလွတ်သဘော တွေ့ဆုံဆွေးနွေးရေးအဖွဲ့တွင် ပါဝင်ခဲ့သူ ဦးခွန်မြင့်ထွန်းက ပြောကြားသည်။

တရုတ်နိုင်ငံ၏ အခန်းကဏ္ဍသည် မြန်မာနိုင်ငံ၏ တည်ငြိမ်အေးချမ်းမှု၊ ငြိမ်းချမ်းရေးနှင့် ဖွံ့ဖြိုးတိုးတက်ရေးတို့တွင် အရေးပါပြီး ပြည်တွင်း လက်နက်ကိုင်ပဋိပက္ခ ဖြစ်စေသည့် အဖွဲ့အစည်းများအပေါ် အားပေးကူညီမှု မရှိဟုဆို

တရုတ်နိုင်ငံ၏ အခန်းကဏ္ဍသည် မြန်မာနိုင်ငံ၏ တည်ငြိမ်အေးချမ်းမှု၊ ငြိမ်းချမ်းရေးနှင့် ဖွံ့ဖြိုးတိုးတက်ရေးတို့တွင် အရေးပါပြီး ပြည်တွင်း လက်နက်ကိုင်ပဋိပက္ခ ဖြစ်စေသည့် အဖွဲ့အစည်းများအပေါ် အားပေးကူညီမှု မရှိကြောင်း နိုင်ငံတော်အတိုင်ပင်ခံရုံး ၀န်ကြီးဌာန ညွှန်ကြားရေးမှူးချုပ် ဦးဇော်ဌေး က ပြောကြားသည်။

ပြန်ကြားရေးဝန်ကြီးဌာနတွင် မေ ၂၃ ရက်က ပြုလုပ်သည့် နိုင်ငံတော်အစိုးရ၏ ပြည်သူ့အတွက် ဒုတိယ တစ်နှစ်တာကာလအတွင်း ဆောင်ရွက်မှုများနှင့် ပတ်သက်၍ သတင်းစာရှင်းလင်းပွဲ၌ ဦးဇော်ဌေးက အထက်ပါကဲ့သို့ ပြောကြားခဲ့ခြင်း ဖြစ်သည်။

လက်ရှိ မြန်မာနိုင်ငံအနေဖြင့် ပြည်တွင်း လက်နက်ကိုင်ပဋိပက္ခများ ဖြစ်ပွားနေသည့်အပြင် ဖွံ့ဖြိုးဆဲနိုင်ငံ ဖြစ်နေသည့်အတွက် တရုတ်နိုင်ငံကဲ့သို့ အခြားအိမ်နီးချင်းနိုင်ငံများသည် အရေးကြီးကြောင်း ဦးဇော်ဌေးက ဆိုသည်။

၎င်းက “တရုတ်နိုင်ငံရဲ့အခန်းကဏ္ဍက ကျွန်တော်တို့ မြန်မာနိုင်ငံလို နိုင်ငံမျိုး ပြည်တွင်းလက်နက်ကိုင် ပဋိပက္ခတွေ မပြီးသေးဘူး။ ဖွံ့ဖြိုးဆဲနိုင်ငံ ဖြစ်တယ်။ ဒီမိုကရေစီ ကူးပြောင်းရေးဆိုတဲ့ နိုင်ငံမျိုးမှာ အိမ်နီးချင်းနိုင်ငံတွေ အရေးကြီးပါတယ်။ အိမ်နီးချင်းက ငါးနိုင်ငံစလုံး အရေးကြီးတယ်။ တကယ့် တရုတ်နိုင်ငံရဲ့ အခန်းကဏ္ဍက အရေးကြီးတယ်။ မြန်မာနိုင်ငံ တည်ငြိမ်အေးချမ်းရေး၊ ငြိမ်းချမ်းရေး၊ ဖွံ့ဖြိုးတိုးတက်ရေး အားလုံးမှာ အရေးပါပါတယ်”ဟု ပြောကြားသည်။

မြန်မာနိုင်ငံ ငြိမ်းချမ်းရေးဖြစ်စဉ်တွင် တရုတ်နိုင်ငံမှ အထူးကိုယ်စားလှယ် ထားရှိဆောင်ရွက်နေပြီး ပြီးခဲ့သည့် ၂၁ ရာစု ဒုတိယအကြိမ် ပင်လုံညီလာခံ၌ မြောက်ပိုင်းအဖွဲ့ ခုနစ်ဖွဲ့အား ညီလာခံ တက်နိုင်ရန် ဆောင်ရွက်နိုင်ခဲ့ကြောင်း သိရသည်။

“အခုလည်း မြောက်ပိုင်း ခုနစ်ဖွဲ့နဲ့ တွေ့တယ်။ ကျွန်တော်တို့လည်း ပြောတယ်။ မူဆယ်ဖြစ်စဉ် ဖြစ်တဲ့အချိန်မှာ TNLA က လာတိုက်တာ အရပ်သားတွေ သေတယ်။ တရုတ်နိုင်ငံသားတွေ သေသွားတယ်။ တရုတ်ဘက်ကလည်း သူတို့ရဲ့ စိုးရိမ်ပူပန်မှုကိစ္စကို အစိုးရကို ပြောတယ်။ သူတို့ကလည်း ပြန်ပြောတယ်။ ဒီဘက်ကတော့ ကျွန်တော်တို့ ပြည်သူလူထုတွေ သေတယ်။ လာပြီးသတ်တဲ့ အခါကျတော့ ကာကွယ်တာရှိတယ်။ အစိုးရ စစ်တပ်ကတော့ ကာရမှာပဲ။ လူထုကို အန္တရာယ်ပေးလာပြီဆိုရင် အဲဒီအနေအထားကို ပြောတော့ သူတို့ဘက်ကိုလည်း ထိန်းထိန်းသိမ်းသိမ်း လုပ်ခိုင်းတဲ့အတွက် သူတို့လည်း လုပ်နေတယ်ပေါ့။ သို့သော် ကျန်ခဲ့တဲ့ မြန်မာပဋိပက္ခပိုင်းမှာ ကျန်ခဲ့တဲ့နေရာတွေ ကြည့်လိုက်ရင် တရုတ်၊ မြန်မာ နယ်စပ်တောက်လျှောက်ပါ။ အဲဒီကို အခြေခံပြီး လှုပ်ရှားတာတွေ ရှိတယ်”ဟု ဦးဇော်ဌေးက ဆိုသည်။

တရုတ် ဗဟိုအစိုးရအနေဖြင့် မြန်မာနိုင်ငံ၏ ပြည်တွင်းလက်နက်ကိုင် ပဋိပက္ခဖြစ်စေသည့် အဖွဲ့များအား ထောက်ခံခြင်း မရှိသလို အားပေးကူညီမှု မရှိကြောင်း ဦးဇော်ဌေးက ဆိုသည်။

၎င်းက “သို့သော် အောက်ခြေမှာကျတော့ နယ်နိမိတ်ပိုင်း ဟိုဘက်ဒီဘက် ကူးလူးဆက်ဆံမှုတွေမှာ နည်းနည်းလေးတွေ ရှိတယ်။ အဲဒီတော့ တရုတ်နိုင်ငံရဲ့ အခန်းကဏ္ဍက အရေးကြီးပါတယ်။ သို့သော် သူသည် မြန်မာနိုင်ငံအစိုးရက လုပ်နေတဲ့ ငြိမ်းချမ်းရေးဖြစ်စဉ်ကို ပံ့ပိုးကူညီတဲ့ သဘောနဲ့ပဲ သူတို့လုပ်တာပါ”ဟု ဆက်လက် ပြောကြားသည်။

ထို့ပြင် NCA အား အစိုးရသဘောဖြင့် ပြင်ဆင်၍ မရဘဲ NCA တွင် မပါသည့်ကိစ္စများ ပေါ်ပါက အခြေခံမူဘောင်အတိုင်းသာ သွားရမည်ဖြစ်ကြောင်း ဦးဇော်ဌေး ဆိုသည်။

မေ ၂၃ ရက်က ပြန်ကြားရေးဝန်ကြီးဌာနတွင် ပြုလုပ်သည့် နိုင်ငံတော်အစိုးရ၏ ပြည်သူ့အတွက် တစ်နှစ်တာအတွင်း ဆောင်ရွက်မှုများနှင့် ပတ်သက်၍ သတင်းစာရှင်းလင်းပွဲတွင် သတင်းထောက်တစ်ဦးက “အစိုးရအနေဖြင့် “၀” ဘက်မှ တောင်းဆိုလာပါက NCA အား ပြင်ပေးမလား ” ဟုမေးမြန်းမှုအပေါ် ဦးဇော်ဌေးက အထက်ပါကဲ့သို့ ပြန်လည် ဖြေကြားခဲ့ခြင်း ဖြစ်သည်။

“ NCA က အစိုးရကပဲ ပိုင်တာ မဟုတ်ဘူး။ NCA က Joint Ownership ဖြစ်ပါတယ်။ NCA သည် EAO နဲ့ အစိုးရ။ အစိုးရပိုင်းမှာ အစိုးရ၊ တပ်မတော်၊ လွှတ်တော် ပါတယ်။ NCA ကို အစိုးရသဘောနဲ့ ပြင်လို့မရဘူး။ NCA ရဲ့ သဘောတရား။ သို့သော် NCA ပြဋ္ဌာန်းချက်မှာ ပြန်ကြည့်လိုက်ရင် NCA ပြင်ဆင်ခြင်းဆိုတာ မပါဘူး။ NCA သဘောတူစာချုပ်မှာ လွှမ်းခြုံနိုင်ခြင်းမရှိတဲ့ ကိစ္စတွေပေါ်လာရင် ဆိုလိုတာက စာချုပ်ထဲမှာ မပါတဲ့ကိစ္စတွေ ပေါ်လာရင် ဘယ်လိုလုပ်မလဲဆိုတဲ့ဟာ ပါတယ်။ အဲဒါက NCA ရဲ့ ပြင်ဆင်ခြင်း အပါအ၀င် ကျန်တဲ့ကိစ္စတွေကို စဉ်းစားတဲ့အခါမှာ ဆွဲယူလို့ရတဲ့ဟာ။ အဲဒါက နံပါတ် ၁ အချက်ပေါ့”ဟု ဦးဇော်ဌေးက ပြောကြားသည်။

ဆက်လက်၍ “ NCA ပြင်ပေးမှာလား ဆိုရင် အစိုးရသဘောနဲ့ ပြင်လို့မရဘူး။ NCA ထိုးပြီးသား ၁၀ ဖွဲ့ရှိတယ်။ ၁၀ ဖွဲ့ရဲ့ သဘောထားနဲ့ ပြင်ဆင်ခြင်းအခန်း မပါဘူးဆိုတာကို ကျွန်တော်တို့က ပြင်ချင်ပါတယ်လို့ ပြောတာ မဟုတ်ဘူး။ အဲဒီအဖွဲ့တွေနဲ့လည်း ဆွေးနွေးရမယ်။ NCA ပြင်သင့်၊ မပြင်သင့်။ အဲဒီ NCA က လွှမ်းခြုံမှုမရှိတဲ့ ဒီလိုကိစ္စတွေပေါ်လာရင် ဘယ်လိုလုပ်မလဲ။ သို့သော် အဲဒီလိုမျိုး ဆွေးနွေးနိုင်မှုသည် NCA ထဲရောက်မှရမယ်။ NCA အပြင်ကနေ ဒီ NCA ကြီး ဒါပြင်ပေးပါဆိုရင် ကျွန်တော်တို့ အစိုးရသဘောနဲ့ ပြောလို့မရဘူး။ NCA ထဲ ရောက်လာပြီဆိုရင် အဲဒီမှာရှိတဲ့ ခေါင်းဆောင်တွေနဲ့ ထိုးပြီးသား အဖွဲ့တွေရော သူတို့နဲ့ပေါင်းပြီးတော့ အစိုးရနဲ့ပေါင်းပြီးတော့ NCA က လွှမ်းခြုံမှုမရှိတဲ့ ကိစ္စတွေပေါ်လာရင် ညှိနှိုင်းဆွေးနွေးမယ်ဆိုရင် NCA မှာပါတယ်။ ခေါင်းဆောင်တွေ ညှိနှိုင်းဆွေးနွေးရမယ်။ နှစ်ဖက် ညှိနှိုင်းဆွေးနွေးရမယ်။ ဆွေးနွေးဖို့ပဲ ရှိတယ်။ အဲဒါက NCA ပြင်ပေးမလားဆိုရင် ကျွန်တော်တို့ အစိုးရသဘောတည်းနဲ့ ပြင်လို့မရဘူး။ NCA မပါတဲ့ ကိစ္စတွေပေါ်လာရင် ဘယ်လိုလုပ်မလဲဆိုတဲ့ Frame Work က ရှိပြီးသား ဒီတိုင်းသွားရမယ်”ဟု ပြောကြားသည်။

ယခု ၂၈ ရက်မှ ၃၀ ရက်အထိ EAO နှင့် နိုင်ငံရေး၊ လုံခြုံရေး အလွတ်သဘော ဆွေးနွေးမှုနှစ်ပွဲ ပြုလုပ်မည်ဖြစ်ပြီး တွေ့ဆုံမှုအပေါ် မူတည်ပြီး ၂၁ ရာစုပင်လုံ တတိယအကြိမ် အစည်းအဝေးပြုလုပ်ရန် ဆွေးနွေးမည် ဖြစ်ကြောင်း သိရသည်။

“၂၁ ပင်လုံ တတိယအစည်းအဝေး ဘယ်တော့လုပ်မလဲ ဆိုတော့ ကျွန်တော်တို့ အစတုန်းက ဇန်န၀ါရီလ မှန်းထားတယ်။ မဖြစ်လာဘူး။ JICM ဆုံးဖြတ်ချက် ရှိတယ်။ ပြီးခဲ့တဲ့ အလွတ်သဘောမှ မေလကုန်ဆိုပြီး ထပ်လုပ်တယ်။ အဲဒါ အဆင်မပြေဘူး။ ဒီလ ၂၈၊ ၂၉ ၊ ၃၀ မှာ EAO နဲ့ နိုင်ငံရေး၊ လုံခြုံရေး အလွတ်သဘော နှစ်ပွဲတွေ့မယ်။ တွေ့တဲ့အပေါ်မှာ မူတည်ပြီးတော့ ညီလာခံ ကျင်းပရက်ကို ကျွန်တော်တို့ဘက်ကတော့ ဇွန်လထဲမှာ လုပ်စေချင်တယ်။ ဒါပေမဲ့ ရက်တော့ မသတ်မှတ်နိုင်သေးဘူး။ ဇွန်လထဲကတော့ ဖြစ်အောင် ကျွန်တော်တို့ ကြိုးစားမယ်”ဟု ဦးဇော်ဌေးက ပြောကြားသည်။

 

KIA အနေဖြင့် NCA စာချုပ်တွင် ပါဝင်လက်မှတ်ရေးထိုးပြီး နိုင်ငံရေးအခွင့်အရေးများနှင့် ပတ်သက်၍ အစိုးရ၊ တပ်မတော်တို့နှင့် တွေ့ဆုံဆွေးနွေး အဖြေရှာရန် ကချင်ပြည်နယ်အခြေစိုက် တိုင်းရင်းသားအဖွဲ့အချို့ တောင်းဆို

ကချင်တိုင်းရင်းသားလက်နက်ကိုင်အဖွဲ့ (KIA) အနေဖြင့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) တွင် ပါဝင်လက်မှတ်ရေးထိုးပြီး နိုင်ငံရေးအခွင့်အရေး၊ အမျိုးသားရေးအခွင့်အရေး တောင်းဆိုမှုများနှင့် ပတ်သက်၍ အစိုးရ၊ တပ်မတော်တို့နှင့် တွေ့ဆုံဆွေးနွေးအဖြေရှာရန် ကချင်ပြည်နယ်အခြေစိုက် မြန်မာပြည်မြောက်ပိုင်း ရှမ်းမျိုးနွယ်စုရေးရာအဖွဲ့၊ ကချင်အထူးဒေသ (၁) ထာဝရငြိမ်းချမ်းရေးအဖွဲ့ချုပ်နှင့် လီဆူတိုင်းရင်းသား စာပေယဉ်ကျေးမှုစောင့်ရှောက်ရေးအဖွဲ့တို့က မေ ၁၉ ရက်တွင် ပူးတွဲကြေညာချက် ထုတ်ပြန်ကာ တောင်းဆိုခဲ့သည်။

နိုင်ငံရေး အကျိုးကျေးဇူးလိုလားမှုနှင့် အမျိုးသားအကျိုးကျေးဇူး လိုလားမှုမှန်သမျှသည် ဒီမိုကရေစီမူဝါဒကျင့်သုံးပြီး ဆွေးနွေး အဖြေရှာခြင်းဖြင့်သာလျှင် ဖော်ဆောင်နိုင်ကြောင်း၊ ငြိမ်းချမ်းသည့် လူ့အဖွဲ့အစည်းနှင့် ယဉ်ကျေးသိမ်မွေ့သော ပူးပေါင်းဆောင်ရွက်မှုကသာလျှင် မှန်ကန်သင့်မြတ်သော ငြိမ်းချမ်းရေးကို ဖြစ်ပေါ်စေနိုင်ကြောင်း မြန်မာပြည်မြောက်ပိုင်း ရှမ်းမျိုးနွယ်စုရေးရာအဖွဲ့၊ ကချင်အထူးဒေသ (၁) ထာဝရငြိမ်းချမ်းရေးအဖွဲ့ချုပ်နှင့် လီဆူတိုင်းရင်းသား စာပေယဉ်ကျေးမှု စောင့်ရှောက်ရေးအဖွဲ့တို့၏ ပူးတွဲကြေညာချက်တွင် ဖော်ပြထားသည်။

KIO/KIA ခေါင်းဆောင်များအနေဖြင့် လက်ရှိရင်ဆိုင်နေရသည့် လက်နက်ကိုင်ပဋိပက္ခများသည် မိသားစုအတွင်းဖြစ်သည့် ပဋိပက္ခအဖြစ်မှတ်ယူ၍ NCA လက်မှတ်ရေးထိုးကာ ငြိမ်းချမ်းရေးဆွေးနွေးပွဲများဖြင့် ဖြေရှင်းရန် မျှော်လင့်ယုံကြည်ကြောင်း၊ နိုင်ငံရေး ဂုဏ်သိက္ခာ၊ အမျိုးသားရေးဂုဏ်သိက္ခာများနှင့် ပတ်သက်၍ နိုင်ငံရေးဆွေးနွေးပွဲများဖြင့် အဖြေရှာကာ မြှင့်တင်နိုင်ကြောင်းလည်း အဆိုပါ ကြေညာချက်တွင် ဖော်ပြခဲ့သည်။

အဆိုပါ ကြေညာချက်နှင့်ပတ်သက်၍ “ဒီထဲမှာ လှုပ်ရှားနေတဲ့ အဖွဲ့အစည်းတွေဆိုတော့ ကျွန်တော်တို့ဘက်ကနေ သီးခြားပစ်မှတ်ထားပြီးတော့ တုံ့ပြန်တာမျိုးတွေလုပ်မှာ မဟုတ်ပါဘူး။ သူတို့ရဲ့နောက်ကွယ်မှာ ပံ့ပိုးတဲ့သူတွေ၊ ထောက်ပံ့တဲ့သူတွေရှိတယ်။ သူတို့ကို ပစ်မှတ်သွားထားရင် အားလုံးနစ်နာမယ်လေ။ ဒါကြောင့်မို့ သူတို့ကို ပစ်မှတ်မထားဘူး။ သူတို့ရဲ့နောက်ကွယ်မှာ သပ်လျှိုတာတွေ၊ သွေးခွဲတာတွေရှိတယ်။ မီးမောင်းထိုးပြတာတွေရှိတယ်။ အဲဒါကြောင့် ကျွန်တော်တို့ကလည်း အဲဒါမျိုးတွေကို စစ်ရေးအရ၊ နိုင်ငံရေးအရ၊ လူမျိုးရေးအရ အရေးယူတာမျိုး မဟုတ်ဘဲနဲ့ သူတို့အချင်းချင်း ဖာထေးစေချင်တာမျိုးပေါ့။ အဲဒါမျိုးပဲ လုပ်ပါတယ်။ တရားဝင် သူတို့ကိုပစ်မှတ်ထား တုံ့ပြန်တာမျိုး မရှိသေးပါဘူး” ဟု မြစ်ကြီးနားအခြေစိုက် KIO နည်းပညာအကြံပေးအဖွဲ့ရုံး ပြောရေးဆိုခွင့်ရှိသူ ဦးဒေါင်ခါးက ပြောကြားသည်။

မည်သည့်နိုင်ငံတွင်ဖြစ်စေ စစ်ရေးပဋိပက္ခ အချိန်ကြာမြင့်လာပါက အောက်ခြေလူတန်းစားများ အနေဖြင့် နိုင်ငံရေးအဖြေရခြင်း၊ မရခြင်းသည် ၎င်းတို့နှင့်သက်ဆိုင်မှုမရှိကြောင်း၊ ပဋိပက္ခကြောင့် ၎င်းတို့ခံစားနေရသည့် အနိဋ္ဌာရုံများကို အမြန်ဆုံး ကွယ်ပျောက်စေလိုကြောင်းနှင့် လူမှုကူညီထောက်ပံ့မှုများကို ရလိုကြောင်းကို ပြသလိုသည့်အနေဖြင့် ယခုကဲ့သို့သော ကြေညာချက်မျိုးဖြင့် ဖော်ပြကြောင်း ဦးဒေါင်ခါးက ဆက်လက်ပြောကြားသည်။

ငြိမ်းချမ်းရေးရယူရန် နစ်နာဆုံးရှုံးမှုများ ပြီးဆုံးပြီး ပြည်သူလူထု ဒုက္ခအ၀၀မှ လွတ်မြောက်ရေးအတွက် KIO/KIA ခေါင်းဆောင်များ အနေဖြင့် NCA စာချုပ်တွင် လက်မှတ်ထိုးရန် ကချင်ပြည်နယ်အခြေစိုက် ပူးပေါင်းအဖွဲ့က တိုက်တွန်းထားပြီး ရန်သူဖြစ်သည့် လက္ခဏာရှိလာပါက အမြစ်ပြတ်တိုက်ခိုက်၍ ပြည်သူများ၏ အသက်နှင့်ဘ၀ကို ကာကွယ်ပေးရန် အစိုးရနှင့်တပ်မတော်ကို တောင်းဆိုကြောင်း အဆိုပါအဖွဲ့က ကြေညာခဲ့သည်။

KIA ရွေးရတော့မယ့်လမ်း

တနိုင်းဒေသတွင် တိုက်ပွဲများဖြစ်ပွားနေခြင်းကြောင့် အနီးတစ်ဝိုက်ရှိ ကျေးရွာအချို့မှ ဒေသခံများ ဧပြီလအတွင်းက ဘေးလွတ်ရာသို့ ရွှေ့ပြောင်းနေကြစဉ် (Photo: AFP)

၂၀၁၆ ခုနှစ် နိုဝင်ဘာ ၂၆ ရက်က မြန်မာ့ငြိမ်းချမ်းရေးခရီးအတွက် ထိတ်လန့်စရာ အဖြစ်အပျက်တစ်ခု ဖြစ်ပွားခဲ့ပါတယ်။ အဲဒါကတော့ တပ်မတော်ရဲ့ထိုးစစ်ကို ပြန်တုံ့ပြန်တယ်ဆိုပြီး ကေအိုင်ကေ၊ ကိုးကန့်နဲ့ တအန်း စတဲ့ မြောက်ပိုင်းလက်နက်ကိုင်အဖွဲ့တွေက မူဆယ် ၁၀၅ မိုင် ကုန်သွယ်ရေးဇုန်အပါအ၀င် ရှမ်းမြောက်ဒေသ နေရာတော်တော်များများကို ၀င်ရောက်တိုက်ခိုက်ခဲ့တာပါ။

ဒီကိစ္စအပေါ် နိုဝင်ဘာ ၂၃ ရက်က အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) မှ ဥက္ကဋ္ဌဖြစ်သူ ဒေါ်အောင်ဆန်းစုကြည်က ကြေညာချက်တစ်စောင် ထုတ်ပြန်ခဲ့ပါတယ်။

အဲဒီထုတ်ပြန်ချက်ထဲမှာ လက်နက်ကိုင်ပဋိပက္ခတွေ အမြန်ဆုံးချုပ်ငြိမ်းနိုင်ပြီး ရေရှည်တည်တံ့တဲ့ ငြိမ်းချမ်းရေးအတွက် ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံကသာ တစ်ခုတည်းသောလမ်းကြောင်းဖြစ်တဲ့အပြင် ငြိမ်းချမ်းရေးဖြစ်စဉ်မှာ ပါဝင်သင့် ပါဝင်ထိုက်သူအားလုံး ပါဝင်နိုင်ရေးအတွက် ငြိမ်းချမ်းရေးတံခါးများ အစဉ်အမြဲဖွင့်လှစ်ထားတယ်လို့ ရေးသားထားပါတယ်။

ဒါ့အပြင် NCA လက်မှတ်ရေးထိုးခြင်းမရှိသေးတဲ့ တိုင်းရင်းသားလက်နက်ကိုင် အဖွဲ့အစည်းများကိုလည်း လက်မှတ်ရေးထိုးပြီး ငြိမ်းချမ်းရေးဖြစ်စဉ်မှာ အမြန်ဆုံးပါဝင်ဖို့ တိုက်တွန်းတယ်လို့ ဒေါ်အောင်ဆန်းစုကြည်က ဆိုပါတယ်။

အကြမ်းဖက်အဖွဲ့အစည်းအဖြစ် သတ်မှတ်

ရှမ်းပြည်နယ် အရှေ့မြောက်ဒေသ သိန္နီ၊ ကွတ်ခိုင်၊ မူဆယ်၊ နမ့်ခမ်း၊ နမ္မတူနဲ့ ၁၀၅ မိုင် ကုန်သွယ်ရေးဇုန်ကို မြောက်ပိုင်းလက်နက်ကိုင်အဖွဲ့တွေက ၀င်ရောက်တိုက်ခိုက်တဲ့အပေါ် လွှတ်တော်က စိုးရိမ်ကြောင်း အရေးကြီးအဆိုကို ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ မိတ္ထီလာမဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဒေါက်တာမောင်သင်းက နိုဝင်ဘာ ၂၉ ရက်မှာ ပြည်သူ့လွှတ်တော်ကို တင်သွင်းခဲ့ပါတယ်။

အရေးကြီးအဆိုကို ဒီဇင်ဘာ ၂ ရက်က ကျင်းပတဲ့ ပြည်သူ့လွှတ်တော် အစည်းအဝေးမှာ ဆက်လက်ဆွေးနွေးရာမှာ KIA၊ TNLA၊ MNDAA နဲ့ AA အဖွဲ့ကို အကြမ်းဖက်အဖွဲ့အစည်းများအဖြစ် လွှတ်တော်က သတ်မှတ်ပေးသင့်တယ်လို့ ကာကွယ်ရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီးစိန်ဝင်းနဲ့ တပ်မတော်သားကိုယ်စားလှယ် ဗိုလ်မှူးကြီးသန်းအောင်တို့က ထည့်သွင်းဆွေးနွေးခဲ့ပါတယ်။

“ယခုဖြစ်ပွားခဲ့တဲ့ အပြစ်မဲ့ပြည်သူတွေ ဥပဒေမဲ့သတ်ဖြတ်ခြင်း၊ အများပြည်သူအသုံးပြုတဲ့ ဆက်သွယ်ရေးလမ်းကြောင်း၊ သံကူကွန်ကရစ်တံတားများ ဖောက်ခွဲဖျက်ဆီးခြင်းနဲ့ မြို့ရွာများရှိ စစ်ရေးပစ်မှတ်မဟုတ်သည့် အရပ်သားများနှင့် အခြေခံအဆောက်အအုံများ ပစ်မှတ်ထားပြီး ဆောင်ရွက်ခဲ့ကြတဲ့အပြင် ဒို့တာဝန်အရေးသုံးပါးကို ထိပါးနှောင့်ယှက်လာတဲ့အတွက် ယခုဖြစ်ပွားနေတဲ့ဖြစ်စဉ်မှာ အဓိကတာဝန်ရှိသူများဖြစ်တဲ့ UNFC ဥက္ကဋ္ဌ အင်ဘန်လ၊ KIA မှ ဂမ်ရှောင်၊ TNLA မှ မိုင်းအိုက်ဖုန်း (ခေါ်) တာအိုက်ဖုန်း၊ MNDAA မှ ဖုန်ကြားရှင်နှင့် ဖုန်တာရွှင်၊ AA မှ ထွန်းမြတ်နိုင်တို့အပါအ၀င် ပြစ်မှုကျူးလွန်သူကိုလည်း အကြမ်းဖက်တိုက်ဖျက်ရေး ဥပဒေအပါအ၀င် တည်ဆဲဥပဒေများနှင့်အညီ ထိရောက်ပြင်းထန်စွာ အရေးယူပြီးတော့ သူတို့ရဲ့လုပ်ရပ်များအပေါ် အကြမ်းဖက်အဖွဲ့အစည်းအဖြစ် ဆန့်ကျင်ချေမှုန်းသင့်ပါတယ်။ ဒါကြောင့်အဆိုပါ KIA၊ TNLA၊ MNDAA နှင့် AA အဖွဲ့များကို အကြမ်းဖက်အဖွဲ့အစည်းများအဖြစ် လွှတ်တော်မှ သတ်မှတ်ပေးပါရန် လေးစားစွာ တင်ပြလိုပါတယ်။ တစ်ဆက်တည်းမှာပဲ နိုင်ငံတကာမှ လူသားချင်းစာနာထောက်ထားမှုအရ အဆိုပါအကြမ်းဖက်အဖွဲ့များကို ရိက္ခာပစ္စည်း ထောက်ပံ့ပေးခြင်း၊ ဆေးဝါးကုသပေးခြင်းများကိုလည်း တားမြစ်ရပ်ဆိုင်းစေသင့်ပါတယ်” လို့ ဗိုလ်မှူးကြီးသန်းအောင်က ဆွေးနွေးပါတယ်။

ကာကွယ်ရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး စိန်ဝင်းကတော့ “အပြစ်မဲ့အရပ်သားများအား အကြောင်းမဲ့ သေကျေဒဏ်ရာရစေခြင်း၊ စစ်ဘက်ပစ်မှတ်မဟုတ်သည့် အခြေခံအဆောက်အအုံများ၊ ယာဉ်များဖျက်ဆီးခြင်း၊ ပြည်သူတို့၏ စီးပွားဥစ္စာပျက်စီးစေခြင်းတို့ကြောင့် KIA၊ TNLA၊ MNDAA နှင့် AA အဖွဲ့များကို အကြမ်းဖက်အဖွဲ့အစည်းများအဖြစ် လွှတ်တော်မှ သတ်မှတ်သင့်သည်ဟု ယူဆပါကြောင်း တင်ပြပါတယ်” လို့ ဆွေးနွေးခဲ့ပါတယ်။

ဒီအရေးကြီးအဆိုကို ပြည်သူ့လွှတ်တော် ကိုယ်စားလှယ် ၁၂ ဦးက ဆွေးနွေးခဲ့ပြီး မဲခွဲဆုံးဖြတ်ရာ ထောက်ခံဆန္ဒမဲ ၁၄၁ မဲ၊ ကန့်ကွက်မဲ ၂၄၄ မဲ၊ ကြားနေဆန္ဒမဲ ခုနစ်မဲဖြစ်တာကြောင့် လွှတ်တော်က မှတ်တမ်းတင်ခဲ့ပါတယ်။

ပြည်သူ့လွှတ်တော်မှာ မှတ်တမ်းတင်ထားရှိခဲ့တဲ့ အဆိုနည်းတူ အဆိုတစ်ခုကို ဒုတိယအကြိမ် ရှမ်းပြည်နယ်လွှတ်တော် အရေးပေါ်အစည်းအဝေး ဒုတိယနေ့အစီအစဉ်မှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ လားရှိုးမြို့နယ် မဲဆန္ဒနယ်အမှတ် (၂) လွှတ်တော်ကိုယ်စားလှယ် ဦးအောင်သူက တင်သွင်းခဲ့ပါတယ်။

အဆိုကို လွှတ်တော်ကိုယ်စားလှယ် တစ်ဦးက ထောက်ခံခဲ့ပေမယ့် ကလောမြို့နယ် မဲဆန္ဒနယ် လွှတ်တော်ကိုယ်စားလှယ်က အဆိုကို လက်ခံဆွေးနွေးဖို့မသင့်ဘူးလို့ ကန့်ကွက်ခဲ့တာကြောင့် မဲခွဲဆုံးဖြတ်ရာ ထောက်ခံမဲများတဲ့အတွက် လက်ခံဆွေးနွေးဖို့ လွှတ်တော်က ဆုံးဖြတ်ခဲ့ပါတယ်။

ရှမ်းပြည်နယ်လွှတ်တော် ဒုတိယအကြိမ် အရေးပေါ်အစည်းအဝေး တတိယနေ့ကို ဒီဇင်ဘာ ၇ ရက်က ကျင်းပဆွေးနွေးရာမှာ ကန့်ကွက်မှုတွေ ရှိခဲ့ပါတယ်။

“အကြမ်းဖက်အဖွဲ့အစည်းအဖြစ် သတ်မှတ်လိုက်ရုံဖြင့် တိုင်းပြည်အေးချမ်းလာမည်လည်း မဟုတ်ကြောင်း၊ ကောင်းကျိုးထက် ဆိုးကျိုး ပိုမိုများလာမည်လားဟု ထင်မြင်မိပါကြောင်း၊ တိုင်းရင်းသားအရေးဖြစ်သဖြင့် အင်မတန် သိမ်မွေ့နက်နဲသော ကိစ္စဖြစ်သဖြင့် ပြည်နယ်တစ်ခုတည်းမှ မဆုံးဖြတ်သင့်ကြောင်း၊ ဤကဲ့သို့ရှုတ်ချမည့်အစား အပစ်အခတ်ရပ်စဲရေးနှင့် ငြိမ်းချမ်းရေးရရှိမည့် နည်းလမ်းများကို ၀ိုင်းဝန်းစဉ်းစား အဖြေရှာသင့်ပါကြောင်း၊ လွှတ်တော်ကိုယ်စားလှယ်များမှာ အလုပ်များစွာရှိပါကြောင်း တင်ပြအပ်ပါတယ်” လို့ ကချင်တိုင်းရင်းသားရေးရာဝန်ကြီး ဦးဇုတ်ဒေါင်က အဆိုကို ကန့်ကွက်ဆွေးနွေးခဲ့ပါတယ်။

ဒါ့အပြင် မြောက်ပိုင်းတိုင်းရင်းသား လက်နက်ကိုင်အဖွဲ့အစည်းတွေကို အကြမ်းဖက်အဖွဲ့အစည်းအဖြစ် သတ်မှတ်လိုက်ပါက နိုင်ငံတော်ရဲ့ ရည်မှန်းချက်ဖြစ်တဲ့ ငြိမ်းချမ်းရေးလုပ်ငန်းစဉ်တွေ နှောင့်နှေးကြန့်ကြာသွားမှာစိုးတဲ့အတွက် အဆိုကို အတည်မပြုဖို့နဲ့ မှတ်တမ်းအဖြစ်သာ ထားရှိပေးဖို့ကို ရပ်စောက် မဲဆန္ဒနယ်အမှတ် (၁) မှ ဦးခိုင်ညီညီကျော်က တင်သွင်းကန့်ကွက်ခဲ့ပါတယ်။

ဒီလို ကန့်ကွက်ဆွေးနွေးမှုတွေ ရှိခဲ့ပေမယ့် မဲခွဲဆုံးဖြတ်ရာမှာတော့ ကန့်ကွက်မဲ ၄၅ မဲ၊ ကြားနေမဲ ခုနစ်မဲနဲ့ ထောက်ခံမဲ ၆၃ မဲ ရရှိတာကြောင့် အဆိုကို ရှမ်းပြည်နယ်လွှတ်တော်က အတည်ပြုခဲ့ပါတယ်။

အဆိုကို ရှမ်းပြည်နယ်လွှတ်တော်ကနေ အတည်ပြုလိုက်တဲ့အတွက် အဲဒီအဖွဲ့မှာပါနေတဲ့ ကချင်လက်နက်ကိုင်တပ်ဖွဲ့ (KIA) ကလည်း အကြမ်းဖက်အဖွဲ့အစည်းအဖြစ် သတ်မှတ်ခံထားရပါတယ်။ မြောက်ပိုင်းတိုင်းရင်းသား လက်နက်ကိုင်အဖွဲ့တွေအပေါ်မှာ အကြမ်းဖက်အဖွဲ့အစည်းအဖြစ် ရှမ်းပြည်နယ်လွှတ်တော်က အတည်ပြုလိုက်တာနဲ့ ပတ်သက်လို့ ကန့်ကွက်ဝေဖန်မှုတွေလည်း ရှိခဲ့ပါတယ်။

အကြမ်းဖက်အဖွဲ့အစည်းအဖြစ် သတ်မှတ်လိုက်ခြင်းကြောင့် တိုင်းရင်းသားအချင်းချင်း ယုံကြည်မှု လျော့နည်းသွားနိုင်တယ်လို့ သိန္နီမဲဆန္ဒနယ် (၁) မှ ပြည်နယ်လွှတ်တော် ကိုယ်စားလှယ် ဒေါ်နန်းခင်ထားရီက သုံးသပ်ပါတယ်။

“အကြမ်းဖက်အဖွဲ့အစည်း သတ်မှတ်လိုက်ခြင်းအားဖြင့် ပြည်တွင်းစစ်ကြီး နှစ်ပေါင်း ၆၀ လောက်ဖြစ်နေတဲ့ ပြည်တွင်းစစ်က ငြိမ်းချမ်းသွားမှာလား။ ဒါက အဓိကပေ့ါနော်။ သတ်မှတ်လိုက်ခြင်းဖြင့် မလိုလားအပ်တဲ့ ပြဿနာတွေ ပိုကြီးထွားလာမယ်လို့ ထင်ပါတယ်။ ငြိမ်းချမ်းရေး အလှမ်းဝေးသွားမှာလည်း စိုးပါတယ်။ အိမ်ကြီးတစ်အိမ်မှာ နေထိုင်ကြတဲ့ မိဘပြည်သူ မောင်နှမတစ်တွေပါ။ ဒါဆိုဘာကြောင့် ဒီလိုဖြစ်ရလဲဆိုပြီး မိဘအနေနဲ့ သုံးသပ်ဖို့လိုတယ်။ မိဘဖြစ်သူက သားသမီးတွေကို မုန့်ဖိုးပေးတာ မညီမျှလို့လား။ ကျောသားရင်သား ခွဲခြားလို့လား။ ဒါကို ဆန်းစစ်ဖို့လိုပါတယ်။ ဒီလိုအကြမ်းဖက်အဖွဲ့ သတ်မှတ်လိုက်ခြင်းဖြင့် ပြည်တွင်းစစ်ကြီး ငြိမ်းချမ်းသွားမှာ မဟုတ်ပါဘူးလို့ ထင်ပါတယ်။ အမျိုးသားစည်းလုံးညီညွတ်ရေးကိုလည်း စိုးရိမ်ပါတယ်။ တိုင်းရင်းသားအချင်းချင်း ယုံကြည်ဖို့လိုပါတယ်။ ယုံကြည်မှုရှိမှ ငြိမ်းချမ်းရေး တည်ဆောက်လို့ရမှာပါ။ အခုအဲဒီလို အကြမ်းဖက်အဖွဲ့အဖြစ် သတ်မှတ်လိုက်ခြင်းအားဖြင့် ယုံကြည်မှု လျော့နည်းသွားလိမ့်မယ်လို့ ထင်ပါတယ်” လို့ ဒေါ်နန်းခင်ထားရီက ဆိုပါတယ်။

ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီ အထွေထွေအတွင်းရေးမှူး ဦးစိုင်းညွန့်လွင်က “ကျွန်တော်တို့ ဒါကိုကန့်ကွက်ခဲ့ပါတယ်။ ငြိမ်းချမ်းရေးဖြစ်စဉ်က နည်းနည်းပိုခက်သွားမယ်။ စကားပြောရတာ။ အထူးသဖြင့် KIA ကို လုပ်တယ်ဆိုတော့ ပိုပြီးတော့ နည်းနည်းခက်မယ်။ အဲဒါကြောင့် ကျွန်တော်တို့က ဒါကိုမကြိုက်ဘူး။ ငြိမ်းချမ်းရေးရချင်တယ်။ ငြိမ်းချမ်းရေးရချင်တဲ့အတွက် ဒါကို အသိအမှတ်မပြုဖို့ပေါ့။ ဒါကို တောင်းဆိုတာပါ။ အမှန်တော့ ငြိမ်းချမ်းရေးလုပ်နေတယ်ဆို ဒါတွေက ဖြစ်လာစရာအကြောင်းမရှိဘူး။ မလုပ်သင့်ဘူးပေါ့။ ငြိမ်းချမ်းရေးအောင်မြင်အောင် လုပ်မယ်ဆိုတဲ့အခါကျရင် ဒါမျိုးတွေကို မလုပ်သင့်ဘူး” လို့ပြောပါတယ်။

UNFC က ထွက် FPNCC ထဲဝင်

အကြမ်းဖက်အဖွဲ့အစည်းအဖြစ် အတည်ပြုပြီးနောက်ပိုင်းမှာ ကချင်လွတ်မြောက်ရေးအဖွဲ့ (KIO) အနေနဲ့ ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) ရဲ့ အဖွဲ့ဝင်အဖြစ်ကနေ နုတ်ထွက်ခဲ့ပါတယ်။

ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) ရဲ့ ၂၀၁၇ ခုနှစ် မေ ၂၂ ရက်နဲ့ ၂၃ ရက်ကကျင်းပခဲ့တဲ့ အလုပ်အမှုဆောင် အရေးပေါ်အစည်းအဝေးမှာ KIO က တရားဝင်အသိပေးခဲ့တာပါ။

ထိုင်းနိုင်ငံ ချင်းမိုင်မြို့မှာ ဇွန်လကကျင်းပတဲ့ ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ (UNFC) တတိယနေ့အစည်းအဝေးမှာတော့ နုတ်ထွက်ခွင့်တင်ထားတဲ့ KIO အပါအ၀င် အဖွဲ့လေးဖွဲ့ကို နုတ်ထွက်ခွင့်ပြုခဲ့ပါတယ်။

အဲဒီနောက်မှာတော့ ကချင်လွတ်မြောက်ရေးအဖွဲ့ (KIO) အနေနဲ့ ‘၀’ လက်နက်ကိုင်တပ်ဖွဲ့ (UWSA) ဦးဆောင်တဲ့ ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ (FPNCC) ထဲကို ၀င်ရောက်ခဲ့ပါတယ်။

၂၀၁၇ ခုနှစ် ဧပြီ ၁၅ ရက်ကနေ ၁၉ ရက်အထိ တိုင်းရင်းသားလက်နက်ကိုင်တော်လှန်ရေး အဖွဲ့အစည်းခေါင်းဆောင်တွေရဲ့ စတုတ္ထအကြိမ် မျက်နှာစုံညီအစည်းအဝေးကို အထူးဒေသ (၂)၊ ‘၀’ ပြည်နယ်အစိုးရဌာနချုပ် ပန်ခမ်းမြို့မှာ ကျင်းပခဲ့ပါတယ်။

ဒီအစည်းအဝေးကို ‘၀’ ပြည်သွေးစည်းညီညွတ်ရေးပါတီ။ ‘၀’ ပြည်သွေးစည်းညီညွတ်ရေးတပ်မတော် (UWSP/UWSA) ကနေ ကမကထပြု ကျင်းပခဲ့တာဖြစ်ပြီး ရက္ခိုင့်အမျိုးသားအဖွဲ့ချုပ်/ ရက္ခိုင့်တပ်မတော် (ULA/AA)၊ ကချင်လွတ်လပ်ရေးအဖွဲ့/ ကချင်လွတ်လပ်ရေးတပ်မတော် (KIO/KIA)၊ မြန်မာနိုင်ငံ အမှန်တရားနှင့် မျှတမှုအမျိုးသားပါတီ/ မြန်မာအမျိုးသား ဒီမိုကရေစီမဟာမိတ်တပ်ဖွဲ့ (MNTJP/MNDAA)၊ ပလောင်ပြည်နယ် လွတ်မြောက်ရေးတပ်ဦး/ တအန်းအမျိုးသား လွတ်မြောက်ရေးတပ်မတော် (PSLF/TNLA)၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA)၊ ငြိမ်းချမ်းရေးနှင့် စည်းလုံးရေးကော်မတီ/ ရှမ်းပြည်နယ်အရှေ့ပိုင်း အမျိုးသားဒီမိုကရေစီ မဟာမိတ်တပ်ဖွဲ့ (PSC/NDAA)၊ ‘၀’ ပြည်သွေးစည်းညီညွတ်ရေးပါတီ။ ‘၀’ ပြည် သွေးစည်းညီညွတ်ရေးတပ်မတော် (UWSP/UWSA) စတဲ့ တိုင်းရင်းသားလက်နက်ကိုင်တပ်ဖွဲ့ ခုနစ်ဖွဲ့ကနေ ကိုယ်စားလှယ် ၂၇ ယောက် တက်ရောက်ခဲ့ပါတယ်။

ပန်ခမ်းအစည်းအဝေးကနေ ‘နိုင်ငံရေးဆွေးနွေးရေးကော်မတီ’ ကို ‘ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ’ အဖြစ် တရားဝင်သတ်မှတ်လိုက်ပြီး ငြိမ်းချမ်းရေးဆွေးနွေးတဲ့အခါမှာ ‘ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ’ အနေနဲ့ တစ်ဖွဲ့ချင်းဆွေးနွေးမှာမဟုတ်ဘဲ ကော်မတီအမည်နဲ့သာ ဆွေးနွေးသွားမယ်ဆိုတဲ့ အချက်တွေအပါအ၀င် အချက်ရှစ်ချက်ပါတဲ့ ကြေညာချက်တစ်စောင်ကို ဧပြီ ၁၉ ရက်က ထုတ်ပြန်ခဲ့ပါတယ်။

၂၀၁၇ ခုနှစ် ဖေဖော်ဝါရီလတုန်းကလည်း ပန်ခမ်းမှာ ညီလာခံတစ်ရပ်ကျင်းပခဲ့ပြီး ပြင်တွင်းငြိမ်းချမ်းရေးဆောင်ရွက်ရာမှာ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးဆိုင်ရာ သဘောတူညီချက်စာချုပ် (NCA) ရဲ့ ပြင်ပနည်းလမ်းကိုရှာဖွေဖို့ မူဝါဒချမှတ်ခဲ့ပါတယ်။

ဒါကြောင့်လည်း စတုတ္ထမျက်နှာစုံညီ အစည်းအဝေးက ပြည်တွင်းငြိမ်းချမ်းရေး ဆောင်ရွက်ရာမှာ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူညီချက်စာချုပ် (NCA) ရဲ့ ပြင်ပနည်းလမ်းကို ရှာဖွေဖို့ ချမှတ်ခဲ့တဲ့ မူဝါဒအတိုင်း ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီတစ်ရပ်ကို ဖွဲ့စည်းခဲ့တာပါ။

ပင်လုံမှာ ပထမဆုံးအကြိမ်ပြုလုပ်ခဲ့တဲ့ ပြည်ထောင်စုနေ့အခမ်းအနားမှာ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က လက်မှတ်မထိုးရသေးတဲ့ တိုင်းရင်းသားအစုအဖွဲ့တွေအနေနဲ့ သတ္တိရှိရှိ လက်မှတ်ထိုးဖို့ မေတ္တာရပ်ခံထားပါတယ်။

“ကျွန်မအနေနဲ့ အထူးပဲ ငြိမ်းချမ်းရေးစာချုပ်ကို လက်မှတ်မထိုးရသေးတဲ့ တိုင်းရင်းသားအစုအဖွဲ့တွေကို မေတ္တာရပ်ခံချင်ပါတယ်။ သတ္တိရှိရှိနဲ့ ကိုယ့်ကိုယ်ကိုယ် ယုံကြည်စွာနဲ့ လက်မှတ်ထိုးလိုက်ပါ၊ ကျွန်မတို့ရဲ့ ၂၁ ရာစုပင်လုံထဲမှာ ပါဝင်လိုက်ကြပါ” လို့ ဒေါ်အောင်ဆန်းစုကြည်က ဆိုပါတယ်။

NCA လက်မှတ်မထိုးရသေးတဲ့ တိုင်းရင်းသားလက်နက်ကိုင်အဖွဲ့တွေကို NCA လက်မှတ်ထိုးဖို့ တံခါးဖွင့်ဖိတ်ခေါ်နေချိန်မှာ NCA လမ်းကြောင်းကနေမဟုတ်ဘဲ တခြားလမ်းကြောင်းကနေ ငြိမ်းချမ်းရေးလုပ်မယ်ဆိုတဲ့ ‘၀’ ဦးဆောင်တဲ့ ကော်မတီအသစ်ကြောင့် အစိုးရအတွက်တော့ ခေါင်းကိုက်စရာပါ။

ဒါ့အပြင် ငြိမ်းချမ်းရေးဆွေးနွေးမယ့် လက်နက်ကိုင်တိုင်းရင်းသားအဖွဲ့တွေအနေနဲ့ တည်ဆဲဥပဒေတွေနဲ့ ၂၀၀၈ ဖွဲ့စည်းပုံကို လိုက်နာရမယ်ဆိုတဲ့ တပ်မတော်ရဲ့ မူခြောက်ချက်က ဆွေးနွေးပွဲတွေအတွက် အဖုအထစ်တစ်ခု ဖြစ်နေတယ်လို့ တိုင်းရင်းသားအဖွဲ့တွေက ထောက်ပြကြပါတယ်။

ပြည်ထောင်စုငြိမ်းချမ်းရေးညီလာခံ- ၂၁ ရာစုပင်လုံ (ပထမအကြိမ်)အခမ်းအနား ကျင်းပတုန်းက တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က နုတ်ခွန်းဆက် အမှာစကားပြောကြားရာမှာ မူခြောက်ချက်နဲ့ ပတ်သက်လို့ ထည့်သွင်းပြောကြားသွားတာကို တွေ့ရပါတယ်။

“လက်ရှိအမျိုးသားပြန်လည်သင့်မြတ်ရေးနဲ့ ငြိမ်းချမ်းရေးလုပ်ငန်းစဉ်များ ဆောင်ရွက်ရာမှာလည်း တပ်မတော်အနေနဲ့ ဒို့တာဝန်အရေးသုံးပါးအပေါ် အခြေခံပြီး နိုင်ငံရဲ့ ပကတိလိုအပ်ချက်ဖြစ်တဲ့ တည်ငြိမ်အေးချမ်းရေး၊ တိုင်းရင်းသားစည်းလုံးညီညွတ်ရေးနဲ့ ဖွံ့ဖြိုးတိုးတက်ရေး မူဝါဒသုံးရပ်အပေါ်မှာ ရပ်တည်ပြီး အဖွဲ့အစည်းမျိုးစုံနဲ့ လက်တွဲပူးပေါင်း ပါဝင်လုပ်ဆောင်နေတာ ဖြစ်ပါတယ်။ တပ်မတော်အနေနဲ့ ဒီလုပ်ငန်းရပ်များအောင်မြင်ဖို့ အစွမ်းကုန်ဆောင်ရွက်သွားပါမယ်။ ဖြစ်နိုင်သည်များအားလုံးလည်း ညှိနှိုင်းဆောင်ရွက်သွားပါမယ်။ တပ်မတော်ရဲ့ ငြိမ်းချမ်းရေးမူဝါဒ ခြောက်ရပ်ဟာဆိုရင်လည်း ကျွန်တော်တို့ဖြတ်သန်းခဲ့ရတဲ့ အတိတ်သမိုင်းကြောင်း တစ်လျှောက်မှာ တွေ့ကြုံသိမြင် ခံစားခဲ့ရတာတွေကို လက်ရှိအခြေအနေတွေနဲ့ယှဉ်ပြီး သုံးသပ်ဖော်ထုတ်ထားတာဖြစ်လို့ နှစ်ဖက်စလုံးက လိုက်နာလုပ်ဆောင်သင့်တဲ့ အခြေခံအချက်အလက်များပဲ ဖြစ်ပါတယ်” လို့ ဗိုလ်ချုပ်မှူးကြီး မင်းအောင်လှိုင်က ဆိုပါတယ်။

ငြိမ်းချမ်းရေးလုပ်ငန်းစဉ်နဲ့ ပတ်သက်လို့ တပ်မတော်ရဲ့ သဘောထားကတော့ NCA လမ်းကြောင်းအတိုင်းသွားမှာဖြစ်ပြီး ငြိမ်းချမ်းရေးလုပ်ငန်းစဉ်တွေကို ဆောင်ရွက်ရာမှာလည်း တပ်မတော်ချမှတ်ထားတဲ့ မူခြောက်ချက်အတိုင်း လုပ်ဆောင်ရမှာ ဖြစ်ပါတယ်။ ဒါကြောင့် ငြိမ်းချမ်းရေးလုပ်ငန်းစဉ်တွေနဲ့ ပတ်သက်ရင် NCA လမ်းကြောင်းကနေမဟုတ်ဘဲ တခြားလမ်းကြောင်းကနေ ငြိမ်းချမ်းရေးလုပ်မယ်ဆိုတဲ့ ‘၀’ ဦးဆောင်တဲ့ ကော်မတီသစ်ရဲ့ သဘောထားနဲ့ တပ်မတော်ရဲ့ရပ်တည်ချက်က ပြဒါးတစ်လမ်း သံတစ်လမ်းလို ဖြစ်နေပါတယ်။

“အဓိကပြဿနာကတော့ ညှိနှိုင်းလို့မရတဲ့ ပြဿနာလို့ပဲ ပြောရမှာပေါ့” လို့ နိုင်ငံရေးနဲ့ ငြိမ်းချမ်းရေးလေ့လာသူ ဦးမောင်မောင်စိုးက မှတ်ချက်ပြုပါတယ်။

KIO ခေါင်းဆောင်အပြောင်းအလဲ

၂၀၁၇ ခုနှစ် ဒီဇင်ဘာမှာတော့ ကချင်ပြည်လွတ်မြောက်ရေးအဖွဲ့ (KIO) ထဲမှာ ခေါင်းဆောင်ပိုင်း အပြောင်းအလဲဖြစ်ခဲ့ပါတယ်။

ကချင်ပြည်လွတ်မြောက်ရေးအဖွဲ့ (KIO) ဥက္ကဋ္ဌ ဦးဇောင်းဟရား အနားယူပြီး တာဝန်အပြောင်းအလဲလုပ်ရာမှာ အရင်ဒုဥက္ကဋ္ဌတာဝန် ယူထားသူ ဗိုလ်ချုပ်ကြီး အင်ဘန်လက နိုင်ငံရေးနဲ့ အုပ်ချုပ်ရေးပိုင်းခေါင်းဆောင်မှုကို တာဝန်ယူခဲ့ပါတယ်။

နိုင်ငံရေးအဖွဲ့ (KIO) နဲ့ အုပ်ချုပ်ရေးအဖွဲ့ (KIC) (ကချင်ပြည်လွတ်မြောက်ရေးကောင်စီ) ဥက္ကဋ္ဌတာဝန်တွေကို ဗိုလ်ချုပ်ကြီး အင်ဘန်လက တာဝန်ယူခဲ့ပေမယ့် စစ်ဘက်တာဝန်ဖြစ်တဲ့ ကချင်ပြည်တွင်း လွတ်မြောက်ရေးတပ်မတော် (KIA) ခေါင်းဆောင်မှုပိုင်းမှာတော့ အပြောင်းအလဲမရှိဘဲ စစ်ဦးစီးချုပ်အဖြစ် ဗိုလ်ချုပ်ကြီးဂမ်ရှောင်က တာဝန်ယူပါတယ်။

သဘောထားတင်းမာသူလို့ လေ့လာသူတချို့က သုံးသပ်ထားတဲ့ ဗိုလ်ချုပ်ကြီး အင်ဘန်လဟာ ‘၀’ လက်နက်ကိုင်အဖွဲ့ (UWSA) ဥက္ကဋ္ဌ ဦးပေါက်ယူချမ်း ဥက္ကဋ္ဌအဖြစ် တာဝန်ယူထားတဲ့ မြောက်ပိုင်းလက်နက်ကိုင် ခုနစ်ဖွဲ့ရဲ့ ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ (FPNCC) မှာလည်း ပူးတွဲဥက္ကဋ္ဌတာဝန်ကို ယူထားသူပါ။

ခေါင်းဆောင်မှု အပြောင်းအလဲအရ KIA စစ်ဦးစီးချုပ် ဗိုလ်ချုပ်ကြီးဂမ်ရှောင်ဟာ KIO ဒုဥက္ကဋ္ဌ (၁) ဖြစ်လာပြီး KIO ငြိမ်းချမ်းရေးဆွေးနွေးရေး အဖွဲ့ခေါင်းဆောင် ဦးဆွမ်လွတ်ဂမ်က ဒုဥက္ကဋ္ဌ (၂) ဖြစ်လာပါတယ်။

အုပ်ချုပ်ရေးပိုင်းမှာတော့ KIC ဒုဥက္ကဋ္ဌ (၁) အဖြစ် ဗိုလ်ချုပ်ဂွန်မော်ကို ရွေးချယ်ခဲ့ပြီး KIC ဒုဥက္ကဋ္ဌ (၂) တာဝန်ကို ဗိုလ်မှူးချုပ် ဇုန်းဘုတ်ထန်းက တာဝန်ယူခဲ့ပါတယ်။ ဗိုလ်ချုပ်ဂွန်မော်ဟာ အရင်က KIA ဒုစစ်ဦးစီးချုပ် တာဝန်ယူခဲ့သူဖြစ်ပြီး တစ်နိုင်ငံလုံး အပစ်အခတ်ရပ်စဲရေးစာချုပ် (NCA) ရရှိရေးအပါအ၀င် အစိုးရနဲ့ဆွေးနွေးမှုတွေမှာ KIO ကိုယ်စားလှယ်အဖြစ် ဦးဆောင်ပါဝင်ခဲ့သူတစ်ဦးလည်း ဖြစ်ပါတယ်။

ဒီလို KIO ထဲမှာ ခေါင်းဆောင် အပြောင်းအလဲဖြစ်လာတဲ့အတွက် ငြိမ်းချမ်းရေးဖြစ်စဉ်မှာ ဘယ်လိုအကျိုးသက်ရောက်မှုတွေ ရှိလာမလဲဆိုပြီး နိုင်ငံရေးလေ့လာသူတွေက စောင့်ကြည့်နေကြပါတယ်။

ပြင်းထန်လာတဲ့ လက်နက်ကိုင်ပဋိပက္ခ

ကချင်လက်နက်ကိုင်တပ်ဖွဲ့ (KIA) ဟာ ၁၉၆၃ ခုနှစ်မှာ တော်လှန်ရေးကောင်စီနဲ့ တစ်ကြိမ်၊ ၁၉၇၂ ခုနှစ်မှာ တစ်ကြိမ်၊ ၁၉၈၀၊ ၈၁ ခုနှစ်မှာ မဆလပါတီဥက္ကဋ္ဌ ဦးနေ၀င်း၊ နိုင်ငံတော်သမ္မတဦးစန်းယုနဲ့ တစ်ကြိမ်စီ တွေ့ဆုံဆွေးနွေးခဲ့ပေမယ့်လည်း အောင်မြင်မှုမရခဲ့ပါဘူး။

၁၉၉၄ ခုနှစ် ဖေဖော်ဝါရီမှာ န၀တအစိုးရနဲ့ အပစ်အခတ်ရပ်စဲရေးစာချုပ် ချုပ်ဆိုနိုင်ခဲ့ပေမယ့် အပစ်အခတ်ရပ်စဲရေး ကာလအတွင်းမှာ နိုင်ငံရေးညှိနှိုင်းဆွေးနွေးမှုများ မပြုလုပ်နိုင်ခဲ့တာကြောင့် အချိန်ကာလ ကြာလာတာနဲ့အမျှ အဆိုးဘက်ကိုပဲ ဦးတည်ခဲ့ပါတယ်။

“၁၇ ခုနှစ် ကျွန်တော်တို့ Cease-fire လုပ်ခဲ့တယ်။ ကျွန်တော်တို့မျှော်မှန်းတဲ့ ပေါ်လက်တစ်ကယ် ဒိုင်ယာလော့ဘက် မရောက်ဘူး။ တိုက်ပွဲပြန်ဖြစ်လာတယ်။ ဒီတိုက်ပွဲဖြစ်ရခြင်းက Cease-fire လုပ်ခြင်း၊ မလုပ်ခြင်းနဲ့မဆိုင်ဘဲနဲ့ နိုင်ငံရေး အဖြေထုတ်ခြင်း၊ မထုတ်ခြင်းက ရှိ၊ မရှိအပေါ်မှာ အခြေခံတယ်လို့ပဲ နားလည်တယ်” လို့ KIO နည်းပညာ အထောက်အကူပြုအဖွဲ့ (TAT) ပြောရေးဆိုခွင့်ရှိသူ ဦးဒေါင်ခါးက သုံးသပ်ပါတယ်။

၂၀၁၁ ခုနှစ် ဇွန်လမှာတော့ ၁၇ ခုနှစ်တာ အပစ်အခတ်ရပ်စဲရေးဟာ အစိုးရနဲ့ KIO ကြားမှာ ပျက်ပြယ်ခဲ့ရပါတယ်။ တိုက်ပွဲတွေ ပြင်းထန်လာတာကြောင့် ၂၀၁၁ ခုနှစ် ဇွန်မှာ KIO ထိန်းချုပ်နယ်ဖြစ်တဲ့ လဂျားယန်မှာ အစိုးရနဲ့ တွေ့ဆုံဆွေးနွေးမှုတွေ ပြုလုပ်ခဲ့ပေမယ့် ပဋိပက္ခတွေကတော့ သိသိသာသာ လျော့နည်းသွားခြင်းမရှိပါဘူး။

တရုတ်နိုင်ငံ ယူနန်ပြည်နယ် ရွှေလီမြို့မှာ ၂၀၁၁ ခုနှစ် နိုဝင်ဘာက ပြည်ထောင်စုအဆင့် ငြိမ်းချမ်းရေးဆွေးနွေးရေးအဖွဲ့တွေနဲ့ KIO က ဆွေးနွေးနိုင်ခဲ့ပေမယ့် ၂၀၁၁ ခုနှစ်ကနေ တစ်ကျော့ပြန် ပြန်ဖြစ်လာတဲ့ လက်နက်ကိုင်ပဋိပက္ခမီးဟာ တပ်မတော်နဲ့ ကချင်လွတ်မြောက်ရေးအဖွဲ့ (KIO) ကြားမှာ ပိုမိုကြီးထွားလာပါတယ်။ လက်ရှိအချိန်အထိလည်း အရှိန်အဟုန်ကောင်းကောင်းနဲ့ တောက်လောက်နေဆဲ ဖြစ်ပါတယ်။

တပ်မတော်နဲ့ ကချင်လက်နက်ကိုင်တပ်ဖွဲ့ (KIA) တို့အကြား လက်နက်ကိုင်ပဋိပက္ခဖြစ်ပွားမှုက ၂၀၁၈ ခုနှစ် ဇန်န၀ါရီမှာ ၂၃ ကြိမ်၊ ဖေဖော်ဝါရီမှာ ရှစ်ကြိမ်၊ မတ်မှာ ကိုးကြိမ်နဲ့ ဧပြီမှာ ၃၈ ကြိမ်အထိ တဖြည်းဖြည်း မြင့်တက်လာတယ်လို့ မြန်မာ့ငြိမ်းချမ်းရေးနှင့်လုံခြုံရေးအင်စတီကျု (Myanmar Institute for Peace and Security) ၏ အစီရင်ခံစာက ဆိုပါတယ်။ ဒါပေမဲ့ အမှန်တကယ် မြေပြင်ထိတွေ့မှု အရေအတွက်ဟာ MIPS က မှတ်တမ်းတင်ထားတဲ့ အရေအတွက်ထက် ပိုများပြားနိုင်ပါတယ်။

တပ်မတော်နဲ့ KIA ကြားဖြစ်ပွားခဲ့တဲ့ လက်နက်ကိုင်ပဋိပက္ခတွေမှာ အကြီးစားထိတွေ့မှုတွေဖြစ်ခဲ့ပြီး လက်နက်ကြီးအသုံးပြုခြင်း (ဒါမှမဟုတ်) လက်နက်ကြီးပစ်ကူ၊ လေကြောင်းတိုက်ခိုက်မှုများ (ဒါမှမဟုတ်) လေကြောင်းပစ်ကူရယူမှုများ ပါဝင်ခဲ့တဲ့အပြင် ရာချီတဲ့တပ်မတော်သားတွေက KIA စခန်းတွေကို သိမ်းပိုက်ဖို့အားထုတ်ခဲ့တယ်လို့ သိရကြောင်း အစီရင်ခံစာက ဆိုပါတယ်။

မြန်မာ့ငြိမ်းချမ်းရေးနှင့် လုံခြုံရေးအင်စတီကျု (MIPS) ရဲ့ မြို့နယ်အဆင့် ပဋိပက္ခစောင့်ကြည့်ရေး အချက်အလက်ဒေတာဘေ့စ် (Township-based Conflict Monitoring System Database) မှတ်တမ်းတွေအရ ဧပြီလအတွင်းမှာ မြန်မာနိုင်ငံထဲက မြို့နယ် ၂၁ မြို့နယ်မှာ လက်နက်ကိုင်ထိတွေ့မှု ၅၃ ကြိမ်နဲ့ ဒေသန္တရလက်လုပ်မိုင်း အသုံးပြုတိုက်ခိုက်မှု အကြိမ် ၂၀ ဖြစ်ပွားခဲ့ပါတယ်။

ဧပြီလထဲမှာ လက်နက်ကိုင်ပဋိပက္ခ ဖြစ်ပွားမှုနှုန်းထား အများဆုံးကြုံတွေ့ရတဲ့ မြို့နယ်ကတော့ ကချင်ပြည်နယ် တနိုင်းမြို့နယ်ဖြစ်ပြီး ၀ိုင်းမော်၊ ဖားကန့်၊ မူဆယ်မြို့နယ်တွေမှာလည်း အနည်းဆုံးငါးကြိမ်လောက် ဖြစ်ပွားခဲ့တယ်လို့ ဖော်ပြထားပါတယ်။

တပ်မတော်နဲ့ KIO အကြားဖြစ်ပွားခဲ့တဲ့ လက်နက်ကိုင်ပဋိပက္ခတွေကြောင့် ဧပြီလဆန်းပိုင်းစတင်ပြီး ကချင်ပြည်နယ်အတွင်း စစ်ဘေးရှောင်ပြည်သူ ၆၈၀၀ ကျော် အသစ်ထပ်မံ နေရပ်စွန့်ခွာ တိမ်းရှောင်းခဲ့ရတယ်လို့ လူသားချင်းစာနာမှုဆိုင်ရာ ညှိနှိုင်းရေးရုံး (OCHA Myanmar) က ခန့်မှန်းထားပါတယ်။ လက်နက်ကိုင်ပဋိပက္ခဖြစ်ပွားတဲ့ ဒေသတွေကတော့ တနိုင်း၊ ဖားကန့်၊ မိုးမောက်၊ မိုးကောင်း၊ အင်ဂျာယန်၊ ချီဖွေနဲ့ လိုင်ဇာဒေသတို့ဖြစ်ပါတယ်။ တချို့နေရာတွေမှာ ပဋိပက္ခတွေ ရပ်တန့်သွားပေမယ့် အင်ဂျာယန်နဲ့ ချီဖွေဒေသမှာတော့ ဧပြီ ၂၉ ရက်အထိ တိုက်ပွဲတွေ ဆက်လက်ဖြစ်ပွားခဲ့ပါတယ်။

ဒါ့အပြင် တနိုင်း၊ ဖားကန့်၊ အင်ဂျာယန်ဒေသက အရပ်သားတွေအနေနဲ့ ပဋိပက္ခဖြစ်ပွားရာ နေရာတွေကနေ ထွက်ခွာနိုင်ခြင်းမရှိသေးဘူးလို့ လူသားချင်းစာနာမှုဆိုင်ရာ ညှိနှိုင်းရေးရုံး (OCHA Myanmar) က ဆိုပါတယ်။

တပ်မတော်နဲ့ KIO ခေါင်းဆောင်သစ် တွေ့ဆုံမှု

ကချင်မှာ လက်နက်ကိုင်ပဋိပက္ခ အရှိန်မြင့်တက်လာတဲ့အပေါ် တရုတ်နိုင်ငံ အာရှရေးရာ အထူးသံတမန်ရဲ့ ကြားဝင်စေ့စပ်မှုနဲ့ ၂၀၁၈ ခုနှစ် ဖေဖော်ဝါရီ ၁ ရက်က တရုတ်နိုင်ငံ ယူနန်ပြည်နယ် တာလီမြို့မှာ တပ်မတော်နဲ့ KIO တွေ့ဆုံခဲ့ပါတယ်။

တပ်မတော်ဘက်က ကာကွယ်ရေးဦးစီးချုပ်ကိုယ်စား ဒုတိယဗိုလ်မှူးကြီး ထွန်းထွန်းနောင်နဲ့ KIO ဘက်က ဗဟိုကော်မတီဥက္ကဋ္ဌ ဗိုလ်ချုပ်ကြီးအင်ဘန်လတို့ တွေ့ဆုံခဲ့ကြတာပါ။

KIO ဘက်ကဖြစ်ပွားနေတဲ့ တိုက်ပွဲကိစ္စအပါအ၀င် ဒေသတည်ငြိမ်ရေး၊ တိုက်ပွဲများ လျှော့ချရေး၊ ငြိမ်းချမ်းရေးဆောင်ရွက်ရာမှာ အားလုံးပါဝင်ရေးနဲ့ ပင်လုံစာချုပ် ကတိက၀တ်တွေနဲ့အညီ ဖက်ဒရယ်ပြည်ထောင်စု တည်ဆောက်ရေးကို ဆွေးနွေးခဲ့ပြီး တပ်မတော်ဘက်က KIA တပ်ရင်း (၁၄) ဌာနချုပ်အပါအ၀င် တပ်စခန်းတွေကို ဖယ်ရှားပေးဖို့နဲ့ KIA ရဲ့ တချို့တပ်မဟာတွေကို အသိအမှတ်မပြုဘူးလို့ ဖိအားပေးဆွေးနွေးခဲ့ကြောင်း ကချင်လွတ်မြောက်ရေးအဖွဲ့ (KIO) က ဖေဖော်ဝါရီ ၂ ရက်က ထုတ်ပြန်ခဲ့ပါတယ်။

ဒီတွေ့ဆုံမှုမှာ နှစ်ဦးနှစ်ဖက် ကတိက၀တ်ပြုတဲ့ သဘောတူညီမှု တစုံတရာမရရှိခဲ့ပေမယ့် ထပ်မံတွေ့ဆုံဆွေးနွေးသွားဖို့ နှစ်ဖက်စလုံးက သဘောဆန္ဒရှိတယ်လို့လည်း ထုတ်ပြန်ချက်မှာ ဖော်ပြထားပါတယ်။

“ဒါက ထိပ်သီးဆွေးနွေးပွဲဖြစ်တယ်။ တစ်နိုင်ငံလုံး အပစ်အခတ်ရပ်စဲရေးကို လုပ်ရအောင်။ တပ်မတော်ဘက်က ထိုးစစ်ဆင်တာတွေကို ရပ်ပါ။ KIO ဘက်ကလည်း တံတားဖောက်ခွဲတာမျိုးတို့၊ ချုံခိုတိုက်တာမျိုးတို့၊ ပြောက်ကျားတိုက်တာမျိုးတို့ကို မလုပ်တော့ဘူး ရပ်မယ်။ အဲဒီအဆင့်အထိ ကျွန်တော်တို့ ညှိနှိုင်းခဲ့တာ ရှိပါတယ်။ တိုက်ပွဲကို ကျွန်တော်တို့ နားလည်တဲ့ဟာက NCA ထိုးခြင်း၊ မထိုးခြင်းနဲ့ မဆိုင်တော့ဘူး” လို့ KIO နည်းပညာအထောက်အကူပြုအဖွဲ့ (TAT) ပြောရေးဆိုခွင့်ရှိသူ ဦးဒေါင်ခါးက ဆိုပါတယ်။

KIO အနာဂတ်

“KIA က NCA လမ်းကြောင်းပေါ် တက်လာမှပဲရမယ်။ တက်မလာဘူးဆိုရင် နိုင်ငံတော်အစိုးရကို လက်နက်ကိုင်ပြီး တော်လှန်ပုန်ကန်နေသူတွေအဖြစ် သတ်မှတ်ပြီး အစွမ်းကုန်ရှင်းမှာပဲ”

ဒီစကားကို မြောက်ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ်တေဇကျော်က ၂၀၁၈ ခုနှစ် မေ ၁၁ ရက်က မီဒီယာတွေနဲ့ တွေ့ဆုံရာမှာ ပြောကြားခဲ့တာပါ။ ကချင်ပြည်နယ်ကို သွားရောက်ခဲ့တဲ့ သတင်းမီဒီယာအဖွဲ့ကနေ ကချင်ပြည်နယ်အတွင်း စစ်ဆင်ရေးလုပ်ခဲ့ရတဲ့ အကြောင်းအရင်း၊ တပ်မတော်ရဲ့ သဘောထားနဲ့ နေရပ်စွန့်ခွာသူတွေအတွက် ဆောင်ရွက်ပေးနိုင်မယ့် အခြေအနေတွေကို မေးမြန်းရာမှာ ဗိုလ်ချုပ်တေဇကျော်က ထည့်သွင်းပြောကြားခဲ့တာ ဖြစ်ပါတယ်။

ဒီလို မြောက်ပိုင်းတိုင်းစစ်ဌာနချုပ် တိုင်းမှူးရဲ့ ပြောကြားချက်နဲ့ပတ်သက်လို့ တပ်မတော်က KIA ကို ရာဇသံပေးလိုက်တာလို့လည်း နိုင်ငံရေးလေ့လာသူတွေက သုံးသပ်ကြပါတယ်။ ဘာကြောင့်လဲဆိုတော့ မီဒီယာတွေ မေးမြန်းရာမှာ တပ်မတော်ရဲ့ သဘောထားဆိုတာပါနေတဲ့အတွက် တိုင်းမှူးရဲ့စကားက တပ်မတော်သဘောထားဖြစ်ဖို့ ရာနှုန်းပြည့်နီးပါး သေချာနေပါတယ်။

“အပြုတ်တိုက်မလား။ မတိုက်ဘူးလား ဆိုတာကတော့ တော်တော်ပြောရခက်တယ်။ ဒါကလည်း ကျွန်တော်တို့ နှစ် ၇၀ အတွင်းမှာ အတွေ့အကြုံအရတော့ အပြုတ်တိုက်လို့ ရတယ်ဆိုရင်တော့ အနှစ် ၇၀ မကြာဘူး။ တကယ်လို့သာ အခုအခြေအနေကတော့ အပြုတ်တိုက်လို့မရလို့ ကျွန်တော်တို့မှာ အခြေအနေက ကြာပြီးတော့ ပြဿနာတွေ ဖြစ်နေတယ်လို့ပဲ ပြောရမှာပေါ့။ ဒါပေမဲ့ အပြုတ်တိုက်လို့ရတယ် မရတယ်ဆိုတာထက် ဆွေးနွေးဖြေရှင်းမယ့် သဘောထားမရှိဘူးဆိုရင်တော့ ကျွန်တော်တို့က ဘာတွက်ရမလဲဆိုတော့ လက်နက်ကိုင်ပဋိပက္ခတွေ ပိုပြီးတော့ ဆိုးရွားလာတာတွေ့ရမယ်လို့ ထင်ပါတယ်” လို့ နိုင်ငံရေးနဲ့ ငြိမ်းချမ်းရေးလေ့လာသူ ဦးမောင်မောင်စိုးက သုံးသပ်ပါတယ်။

တပ်မတော်ရဲ့ ငြိမ်းချမ်းရေးရပ်တည်ချက်နဲ့ ပတ်သက်လို့ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က “တပ်မတော်ရဲ့ ငြိမ်းချမ်းရေးရပ်တည်ချက်ကတော့ ကျွန်တော်တို့နိုင်ငံရဲ့ ငြိမ်းချမ်းရေးမဟာဗျူဟာဖြစ်တဲ့ NCA လမ်းကြောင်းပေါ်မှာ မသွေမဖည် ခိုင်ခိုင်မာမာ ရပ်တည်လုပ်ဆောင်သွားမှာ ဖြစ်ပါတယ်။ NCA လမ်းကြောင်းကို လျှောက်လှမ်းရာမှာလည်း တပ်မတော်ရဲ့ ငြိမ်းချမ်းရေးမူ ခြောက်ရပ်နဲ့အညီ ခိုင်မာစွာ ရပ်တည်လုပ်ဆောင်သွားမှာ ဖြစ်ပါတယ်” လို့ ပြည်ထောင်စုငြိမ်းချမ်းရေးညီလာခံ (၂၁) ရာစုပင်လုံ (ဒုတိယအကြိမ်) အစည်းအဝေး နှုတ်ခွန်းဆက်အမှာစကားမှာ ထည့်သွင်းပြောကြားထားပါတယ်။

တစ်ဖက်မှာလည်း ‘၀’ တပ်ဖွဲ့ (UWSA) အပါအ၀င် မြောက်ပိုင်းမဟာမိတ် တိုင်းရင်းသားလက်နက်ကိုင်အဖွဲ့တွေကို တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) မှာ ပါဝင်လက်မှတ်ရေးထိုးကြဖို့ တရုတ်နိုင်ငံက တိုက်တွန်းနေပါတယ်။

“အစကတည်းက တိုက်တွန်းနေတာပေါ့လေ။ ဒါကတော့ ဘယ်လိုပြောရမလဲ။ ထိုးခိုင်းစေချင်တဲ့သဘောပေါ့ဗျာ။ ကျွန်တော် သိသလောက်ကတော့ နယ်စပ်ဒေသ တည်ငြိမ်ဖို့အတွက် အဲဒီ NCA ထိုးဖို့ တိုက်တွန်းတာပေါ့” လို့ ‘၀’ တပ်ဖွဲ့ (UWSA) ပြောရေးဆိုခွင့်ရှိသူ လားရှိုးဆက်ဆံရေးရုံးတာဝန်ခံ ဦးညီရန်းက ပြောကြားပါတယ်။

တရုတ်ပြည်သူ့သမ္မတနိုင်ငံ အာရှရေးရာ အထူးကိုယ်စားလှယ် Mr.Sun Guoxiang (မစ္စတာဆွန်ကော်ရှန်း) ရဲ့ ဖိတ်ကြားချက်အရ ၂၀၁၈ ခုနှစ် မေ ၁၈ ရက်က တရုတ်နိုင်ငံ ကူမင်းမြို့မှာ ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) အဖွဲ့ ကိုယ်စားလှယ်ခေါင်းဆောင်တွေ သွားရောက်တွေ့ဆုံ ဆွေးနွေးခဲ့ပါတယ်။

ဒီလိုတွေ့ဆုံဆွေးနွေးရာမှာ FPNCC အဖွဲ့ဝင်တွေအနေနဲ့ တရုတ်-မြန်မာနယ်စပ် တည်ငြိမ်ရေးအတွက် ၀ိုင်းဝန်းပူးပေါင်းဆောင်ရွက်ကြဖို့၊ လက်ရှိဖြစ်ပျက်နေတဲ့ နိုင်ငံရေး၊ ဒေသတည်ငြိမ်ရေး ပြဿနာတွေကို လက်နက်ကိုင်နည်းလမ်းနဲ့ မဖြေရှင်းဘဲ တွေ့ဆုံဆွေးနွေးအဖြေရှာကြဖို့ တိုက်တွန်းအကြံပြုချက်တွေအပေါ် ရင်းနှီးပွင့်လင်းစွာ ဆွေးနွေးဖလှယ်ခဲ့ကြတယ်လို့ ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) က သတင်းထုတ်ပြန်ခဲ့ပါတယ်။

ဒါ့အပြင် ၂၁ ရာစု တတိယအကြိမ် ပင်လုံအစည်းအဝေးကို FPNCC အဖွဲ့ဝင်တွေ တက်ရောက်ဖို့အတွက် ဖိတ်ကြားလာပါက တက်ရောက်ကြဖို့ကိုလည်း အာရှရေးရာ အထူးကိုယ်စားလှယ်က တိုက်တွန်းခဲ့ကြောင်းနဲ့ လက်ရှိဖြစ်နေတဲ့ နိုင်ငံရေး၊ စစ်ရေးပြဿနာ၊ နယ်စပ်ဒေသ တည်ငြိမ်ရေးကိစ္စရပ်တွေကို တွေ့ဆုံဆွေးနွေးအဖြေရှာဖို့ FPNCC အဖွဲ့ဝင်တွေအနေနဲ့ အဆင်သင့်ရှိတယ်လို့ ဆွေးနွေးခဲ့ကြောင်း ထုတ်ပြန်ချက်မှာ ဖော်ပြထားပါတယ်။

ဒီထုတ်ပြန်ချက်အရ မြန်မာ့ငြိမ်းချမ်းရေးလုပ်ငန်းစဉ်မှာ တရုတ်နိုင်ငံရဲ့ ကြားဝင်လုပ်ဆောင်ပေးမှုကြောင့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) ရဲ့ သဘောထား ပျော့ပျောင်းလာမှုကိုလည်း တွေ့နေရပါတယ်။

ဒါ့အပြင် NCA လက်မှတ်ရေးထိုးနိုင်ရေးအပါအ၀င် ဒေသဖွံ့ဖြိုးရေးဆိုင်ရာကိစ္စရပ်တွေ ဆွေးနွေးဖို့အတွက် ငြိမ်းချမ်းရေးကော်မရှင် ကိုယ်စားလှယ်အဖွဲ့နဲ့ ‘၀’ တပ်ဖွဲ့ (UWSA)၊ မိုင်းလားအဖွဲ့ (NDAA) က ထိပ်ပိုင်းခေါင်းဆောင်တွေကြားမှာ တွေ့ဆုံဆွေးနွေးမှုတွေက အဆင်ပြေချောမွေ့နေတယ်လို့လည်း သတင်းတွေထွက်နေပါတယ်။

လက်ရှိအချိန်မှာ ငြိမ်းချမ်းရေးကော်မရှင်အနေနဲ့ ‘၀’ တပ်ဖွဲ့ (UWSA) နှင့် မိုင်းလားအဖွဲ့ (NDAA) တို့အပြင် ကရင်နီ အမျိုးသားတိုးတက်ရေးပါတီ (KNPP) နဲ့ ရှမ်းပြည်တိုးတက်ရေးပါတီ (SSPP) တို့နဲ့လည်း NCA လက်မှတ်ရေးထိုးနိုင်ရေးအတွက် တွေ့ဆုံညှိနှိုင်းမှုများ ပြုလုပ်နေတာကြောင့် တကယ်လို့သာ ‘၀’ တပ်ဖွဲ့ (UWSA) နှင့် မိုင်းလားအဖွဲ့ (NDAA) တို့က NCA မှာ လက်မှတ်ထိုးဖို့ ခေါင်းညိမ့်လိုက်မယ်ဆိုရင် KIA အတွက်တော့ တကယ့်အကျပ်အတည်းကာလတစ်ခုကို ရောက်လာနိုင်ပါတယ်။ လက်ရှိ တပ်မတော်နဲ့ ဖြစ်ပွားနေတဲ့ လက်နက်ကိုင် ပဋိပက္ခဖြစ်စဉ်တွေမှာလည်း KIO ဘက်က စခန်းတော်တော်များများကို စွန့်လွှတ်လိုက်ရတယ်လို့ KIO နည်းပညာ အထောက်အကူပြုအဖွဲ့ (TAT) ပြောရေးဆိုခွင့်ရှိသူ ဦးဒေါင်ခါးက ဆိုပါတယ်။

“ကျွန်တော်တို့ ရှေ့တန်းစခန်းတွေ တော်တော်လေး စွန့်လွှတ်လိုက်ရတဲ့ အနေအထားရှိတယ်။ စွန့်လွှတ်လိုက်ရတာကလည်း ကျွန်တော်တို့က မဆုတ်တမ်း ခံစစ်တိုက်လို့မရဘူး။ လက်နက်ကြီးပိုင်းကို ကျွန်တော်တို့ ယှဉ်လို့မရဘူး။ လေကြောင်းစစ်ဆင်ရေးကို ကျွန်တော်တို့ခုခံဖို့ အခက်အခဲရှိတယ်။ ဒါကြောင့် ကျွန်တော်တို့ဘက်ကနေ ဒီမတန်တရာ ထိုးစစ်ဆင်တဲ့အပေါ်မှာ မဆုတ်တမ်းခံစစ်လုပ်ပြီးတော့ အသေခံပြီးတော့ ကျွန်တော်တို့က တိုက်ပွဲဆင်နွှဲလို့မရဘူး။ ဒါက ကျွန်တော်တို့ဘက်က ပကတိအနေအထားပဲ။ ဒါပေမဲ့လည်း ရေရှည်တိုက်ပွဲကတော့ ဖြစ်သွားမှာပဲ” လို့ သူက ဆိုပါတယ်။

ဒါကြောင့် ကချင်လွတ်မြောက်ရေးအဖွဲ့ (KIO) အနေနဲ့ လက်ရှိအချိန်မဟုတ်ရင်တောင် ‘၀’ ဘက်က အပြောင်းအလဲတစ်ခုခု ဖြစ်ပေါ်လာခဲ့ရင်တော့ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ထီးရိပ်အောက်ကို ၀င်မလား ဒါမှမဟုတ် ဒီအတိုင်းပဲ လက်နက်ကိုင်ပဋိပက္ခကို ဆက်သွားမလား KIA အနေနဲ့ အနာဂတ်ကို ဘယ်လိုဆုံးဖြတ်သွားမလဲဆိုတာ ဆက်လက်စောင့်ကြည့်ရမယ့် အနေအထားမျိုး ဖြစ်နေပါတယ်။

ဒီကိစ္စနဲ့ပတ်သက်လို့ နိုင်ငံရေးနဲ့ ငြိမ်းချမ်းရေးလေ့လာသူ ဦးမောင်မောင်စိုးက “ငြိမ်းချမ်းရေးလုပ်ငန်းစဉ်တစ်ခုလုံးမှာ ပြောရရင် တပ်မတော်က ငြိမ်းချမ်းရေးလုပ်ငန်းစဉ်တစ်ခုလုံးကို မငြင်းပယ်ဘူး။ ငြိမ်းချမ်းရေးလုပ်ငန်းစဉ်မှာ ကျန်တဲ့အဖွဲ့အစည်း၊ လက်မှတ်ထိုးထားတဲ့ အဖွဲ့အစည်းနဲ့ ငြိမ်းချမ်းရေးဆွေးနွေးပွဲလုပ်နေပေမဲ့ တစ်ဖက်ကလည်း ဒီလေးဖွဲ့ကို အကြမ်းဖက်သောင်းကျန်းသူအဖြစ် သဘောထားပြီးတော့ လက်နက်ကိုင်ပြီးတော့ ဖြေရှင်းမယ်ဆိုတဲ့ သဘောထားကို တွေ့နေရတယ်။ အဲဒီအခြေခံအောက်မှာတော့ KIA နဲ့ တပ်မတော်ကြားမှာ မပြေလည်မှုတွေဟာ လက်နက်ကိုင်ပဋိပက္ခတွေ ဆက်လက်ရှိနေတယ်လို့ ပြောရမယ်” လို့ သုံးသပ်ပါတယ်။

NCA လက်မှတ်ရေးထိုးထားသော RCSS နှင့် PNLO တို့ ကဒူးကြီးဒေသတွင် ပစ်ခတ်တိုက်ခိုက်မှုဖြစ်ပွား

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားကြသော ရှမ်းပြည်ပြန်လည်ထူထောင်ရေးကောင်စီ (RCSS) နှင့် ပအို့ဝ်အမျိုးသားလွတ်မြောက်ရေးအဖွဲ့ချုပ် (PNLO) တို့ ရှမ်းပြည်နယ် (တောင်ပိုင်း)၊ မောက်မယ်မြို့နယ် ကဒူးကြီးဒေသ မန့်စီရွာအနီးတွင် မေ ၁၁ ရက် နံနက်ပိုင်းက တိုက်ပွဲဖြစ်ပွားခဲ့ကြောင်း နှစ်ဖက်တပ်ဖွဲ့ထံမှ သိရသည်။

ရှမ်းပြည်ပြန်လည်ထူထောင်ရေးကောင်စီ (RCSS) တပ်ဖွဲ့ဝင်များ နယ်မြေကျွံလာသည့်အတွက် နှစ်ဖက်ရင်ဆိုင် တိုက်ပွဲဖြစ်ပွားခဲ့ခြင်းဖြစ်ပြီး ပစ်ခတ်တိုက်ခိုက်မှုသည် ၁၅ မိနစ်ခန့်ကြာမြင့်ခဲ့ကာ တိုက်ပွဲကြောင့် ထိခိုက်ဒဏ်ရာ ရရှိမှုများရှိခဲ့သည်ဟု ပအို့အမျိုးသားလွတ်မြောက်ရေးအဖွဲ့ချုပ် (PNLO) ၏ နာယကဗိုလ်မှူးကြီး ခွန်ဥက္ကာက ပြောကြားသည်။

သို့သော်လည်း ကဒူးကြီးဒေသတွင်ရှိသည့် RCSS တပ်စခန်းတစ်ခုကို PNLO က ၀င်ရောက်တိုက်ခိုက်ခြင်းကြောင့်သာ တိုက်ပွဲဖြစ်ပွားခဲ့ခြင်းဖြစ်ပြီး နှစ်ဖက်သွားလာလှုပ်ရှားမှုများနှင့် ပတ်သက်၍ တစ်ဖက်နှင့်တစ်ဖက် အသိပေး၍ လှုပ်ရှားသွားလာခြင်းဖြင့် ပစ်ခတ်တိုက်ခိုက်မှုများကို ရှောင်ရှားနိုင်ကြောင်း RCSS ပြောရေးဆိုခွင့်ရှိသူ တောင်ကြီးဆက်ဆံရေးရုံးတာဝန်ခံ ဒုတိယဗိုလ်မှူးကြီး စိုင်းဦးက ပြောကြားသည်။

“အောက်ခြေမှာ သူတို့အချင်းချင်း သိနေကြတာပဲ။ နှစ်ဖက်တိုက်ပွဲမဖြစ်တာလည်း ကြာနေပြီလေ။ နောက်ပြီးတော့ JMC မှာလည်း သူတို့ကတွေ့နေကြတာပဲ။ နှစ်ဖက်တပ်တွေ တွေ့ဖြစ်ကြတယ်ပေါ့။ အဲဒီတော့ ကျွန်တော်တို့က တိုက်ပွဲဖြစ်တယ်လို့ ကြားတော့တောင် အံ့သြနေသေးတယ်။ ဘယ်လိုဖြစ်တာလဲပေါ့။ အဲဒီတော့ ကျွန်တော်တို့အထက်လူကြီးက တစ်ဖက်နဲ့တစ်ဖက် သတင်းပေးပြီးသွားနေကြတာပဲ။ မဖြစ်သင့်ဘူးလို့ ပြောတာပေါ့” ဟု ဒုတိယဗိုလ်မှူးကြီး စိုင်းဦးက ပြောကြားသည်။

ပစ်ခတ်တိုက်ခိုက်မှုဖြစ်ပွားခဲ့သည့် လက်နက်ကိုင်အဖွဲ့အစည်း နှစ်ဖွဲ့သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် ပါဝင်လက်မှတ်ရေးထိုးထားကြသော တိုင်းရင်းသားလက်နက်ကိုင် အဖွဲ့အစည်းများဖြစ်ကြသည့်အတွက် ယခုပစ်ခတ်တိုက်ခိုက်မှုနှင့် ပတ်သက်၍ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) တွင် တင်ပြဆွေးနွေးသွားမည်ဖြစ်ကြောင်း သိရသည်။

ပြီးခဲ့သည့် ၂၀၁၇ ခုနှစ်အတွင်းက ကဒူးကြီးဒေသ နာဟီးကျေးရွာဘက်တွင် ဖြစ်ပွားခဲ့သော RCSS နှင့် PNLO တို့၏တိုက်ပွဲကြောင့် ဒေသခံ ၂၀၀ ကျော် နေရပ်စွန့်ခွာ ထွက်ပြေးတိမ်းရှောင်ခဲ့ရပြီး ယခုဖြစ်စဉ်တွင်မူ နေရပ်စွန့်ခွာ ထွက်ပြေးတိမ်းရှောင်ရသူများ မရှိကြောင်း သိရသည်။

ငြိမ်းချမ်းရေးလုပ်ငန်းစဉ်တွင် အခက်အခဲ ကြုံတွေ့နေရမှုများ ဆွေးနွေးရန် တိုင်းရင်းသားလက်နက်ကိုင်အဖွဲ့ အသီးသီးမှ ထိပ်သီးခေါင်းဆောင်များ ပါဝင်သော ညီလာခံ ပြုလုပ်မည်

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) အရ ငြိမ်းချမ်းရေးလုပ်ငန်းစဉ် အကောင်အထည်ဖော်ရာတွင် အခက်အခဲများ ကြုံတွေ့နေသည့်အပေါ် တွေ့ဆုံဆွေးနွေးကြရန်အတွက် တိုင်းရင်းသားလက်နက်ကိုင် အဖွဲ့အစည်း အသီးသီးမှ ထိပ်သီးခေါင်းဆောင်များ ပါဝင်သော ညီလာခံတစ်ရပ် ခေါ်ယူပြုလုပ်သွားမည်ဖြစ်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) နာယက ဗိုလ်မှူးကြီး ခွန်ဥက္ကာက ပြောကြားသည်။

NCA လက်မှတ်ရေးထိုးထားသော တိုင်းရင်းသားလက်နက်ကိုင် အဖွဲ့များမှ ထိပ်ပိုင်းခေါင်းဆောင်များဖြင့် ဖွဲ့စည်းထားသည့် ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) ၏ အစည်းအဝေးကို ထိုင်းနိုင်ငံ ချင်းမိုင်မြို့တွင် မေ ၉ ရက်မှ ၁၁ ရက်အထိ သုံးရက်ကြာပြုလုပ်ခဲ့ပြီး အဆိုပါ အစည်းအဝေးတွင် ထိုသို့ ဆွေးနွေးခဲ့ခြင်းဖြစ်သည်ဟု ဗိုလ်မှူးကြီး ခွန်ဥက္ကာက မေ ၁၂ ရက်တွင် The Daily Eleven သတင်းစာသို့ ပြောကြားသည်။

မေလနောက်ဆုံးပတ်တွင် ပြုလုပ်ရန်လျာထားသည့် ပြည်ထောင်စုငြိမ်းချမ်းရေးညီလာခံ ၂၁-ရာစု ပင်လုံတတိယအစည်းအဝေး အပြီးတွင် တိုင်းရင်းသားလက်နက်ကိုင် အဖွဲ့အစည်း အသီးသီး၏ ထိပ်သီးခေါင်းဆောင်များ ပါဝင်သည့် ညီလာခံကို ထိုင်းနိုင်ငံ ချင်းမိုင်မြို့၌ပင် ပြုလုပ်ဖွယ်ရှိကြောင်း ဗိုလ်မှူးကြီး ခွန်ဥက္ကာက ပြောကြားသည်။

“ပြည်ထောင်စုငြိမ်းချမ်းရေး ညီလာခံအပြီး ဇွန်လ ဒါမှမဟုတ် ဇူလိုင်လလောက်မှာ ဒီညီလာခံကို လုပ်ဖို့ရှိတယ်။ မြန်မြန်လုပ်နိုင်လေ မြန်မြန်ကောင်းလေပဲ။ မြန်မြန်အကျိုးရှိတာပေါ့ဗျာ” ဟု ၎င်းက ပြောကြားသည်။

ထို့ပြင် အစိုးရနှင့် နိုင်ငံရေး၊ လုံခြုံရေးကိစ္စရပ်များ တွေ့ဆုံဆွေးနွေးရန်အတွက် အလွတ်သဘော တွေ့ဆုံဆွေးနွေးရေးကော်မတီအဖွဲ့ ထိပ်ပိုင်းခေါင်းဆောင် အပြောင်းအလဲကိုလည်း ယခုပြုလုပ်ခဲ့သည့် PPST အစည်းအဝေးတွင် ပြုလုပ်ခဲ့ပြီး အသစ်ဖွဲ့စည်းခဲ့သည့် အလွတ်သဘော တွေ့ဆုံဆွေးနွေးရေးကော်မတီ၏ အဖွဲ့ခေါင်းဆောင်အဖြစ် ကရင်အမျိုးသားအစည်းအရုံး (KNU) အထွေထွေအတွင်းရေးမှူး ပဒိုစောတာဒိုမူးကို တာဝန်ပေးအပ်ခဲ့ကြောင်း သိရသည်။

ပြည်ထောင်စုငြိမ်းချမ်းရေး ညီလာခံ ၂၁- ရာစုပင်လုံတတိယ အစည်းအဝေးတွင် ရလဒ်ကောင်းများ ရရှိရန်အတွက် အစိုးရ၊ တပ်မတော်နှင့် အလွတ်သဘော တွေ့ဆုံဆွေးနွေးရေးကော်မတီတို့ အလွတ်သဘော တွေ့ဆုံဆွေးနွေးသွားကြမည်ဖြစ်ပြီး လာမည့် မေ ၁၄ ရက်နှင့် ၁၅ ရက်တွင် အလွတ်သဘော တွေ့ဆုံဆွေးနွေးရန် အစိုးရဘက်က NCA လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့များကို ကမ်းလှမ်းထားကြောင်း ဗိုလ်မှူးကြီး ခွန်ဥက္ကာက ဆိုသည်။

စစ်၏အနိဋ္ဌာရုံကို ခါးစည်းခံနေရသူများမှာ ပြည်သူများသာဖြစ်သည့်အတွက်ကြောင့် စစ်ပွဲများ အမြန်ရပ်ဆိုင်းရန်လိုအပ်ကြောင်း JMC – U ဒုတိယဥက္ကဋ္ဌ (၁) KNU မှ ဗိုလ်ချုပ်စောအိုင်းဇက်ဖိုး တိုက်တွန်း

JMC ဒုတိယအကြိမ် မျက်နှာစုံညီအစည်းအဝေးဖွင့်ပွဲ၌ အမှာစကားပြောကြားနေသည့် KNU မှ ဗိုလ်ချုပ်စောအိုင်းဇက်ဖိုးအား တွေ့ရစဉ် (ဓာတ်ပုံ-ချမ်းဝေစိုး)

စစ်၏ အနိဋ္ဌာရုံကို ခါးစည်းခံနေရသူများမှာ ပြည်သူများသာဖြစ်သည့်အတွက်ကြောင့် စစ်ပွဲများ အမြန်ရပ်ဆိုင်းရန်လို အပ်ကြောင်း ပြည်ထောင်စုအဆင့် ပစ်ခတ်တိုက်ခိုက်မှုရပ်စဲ ရေးဆိုင်ရာပူးတွဲစောင့်ကြည့်ရေးကော်မတီ (JMC -U ) ဒုတိယဥက္ကဋ္ဌ (၁)  ကရင်အမျိုးသား အစည်းအရုံး(KNU) မှ ဗိုလ်ချုပ်စောအိုင်းဇက်ဖိုးက တိုက်တွန်းပြောကြားသည်။

ရန်ကုန်မြို့ရှိ LOTTE ဟိုတယ်တွင် မေ ၈ ရက်ကစတင်ပြုလုပ်သည့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ (JMC) အဆင့်ဆင့်မှ ကိုယ်စားလှယ်များပါဝင်သော JMC ဒုတိယအကြိမ် မျက်နှာစုံညီ အစည်းအဝေးနှုတ်ခွန်းဆက် အဖွင့်မှာစကားပြောကြားရာတွင် ဗိုလ်ချုပ်စောအိုင်းဇက်ဖိုးက ထိုကဲ့သို့ ထည့်သွင်းပြောကြားခြင်း ဖြစ်သည်။

“မြန်မာပြည်တွင်းစစ်ကြောင့် လူတွေ သေကျေပျက်စီးရသလို စစ်ရဲ့အနိဋ္ဌာရုံကို ခါးစည်းခံနေရသူများဟာ ပြည်သူလူထုများသာဖြစ်တဲ့ အတွက်ကြောင့် စစ်ပွဲတွေကို အမြန်ရပ်ဆိုင်းဖို့ လိုအပ်ပါတယ်။ စစ်ပွဲတွေ ရပ်ဆိုင်းပြီးမှ အားလုံးလက်နက်ကိုင်အဖွဲ့များ NCA မှတစ်ဆင့် JMC အတွင်း ပါဝင်နိုင်ဖို့နဲ့ JMC ရဲ့အကောင်အထည်ဖော်မှုများမှာ အားလုံးယုံကြည်စိတ်ချစွာ ပါဝင်လာနိုင်အောင် ဆက်လက်ကြိုးစားရမှာ ဖြစ်ပါတယ်” ဟု ဗိုလ်ချုပ်စောအိုင်းဇက်ဖိုးက ပြောကြားသည်။

လက်ရှိတွင် ကချင်ပြည်နယ်၌ တပ်မတော်နှင့် ကချင်လက်နက်ကိုင်အဖွဲ့ (KIA/KIO) တို့ ပစ်ခတ်မှုများဖြစ်ပွားနေသကဲ့သို့ ရခိုင်ပြည်နယ်နှင့် ချင်းပြည်နယ်အစပ်ရှိ ပလက်ဝမြို့နယ်တွင်လည်း တပ်မတော်နှင့် ရခိုင်လက်နက်ကိုင်အဖွဲ့ (AA) တို့ ထိတွေ့မှုများ ဖြစ်ပွားနေသည်။

ထို့အတူ ရှမ်းပြည်နယ်တွင် NCA မရေးထိုးရသေးသော တိုင်းရင်းသားလက်ကိုင်အဖွဲ့များဖြစ်သည့် ရှမ်းပြည်တိုးတက်ရေးပါတီ (SSPP) နှင့် တအန်းလက်နက်ကိုင်အဖွဲ့ (TNLA) တို့ လတ်လောတွင်တိုက်ပွဲများ ဖြစ်ပွားထားပြီး တပ်မတော်နှင့်တိုင်းရင်းသား လက်နက်ကိုင်အဖွဲ့များကြားတွင်လည်း ရှမ်းပြည်နယ်၌ ရံဖန်ရံခါတိုက်ပွဲများ ဖြစ်ပွားလေ့ရှိသည်။

ထို့ပြင် JMC လုပ်ငန်းများကို လက်တွေ့အကောင်အထည်ဖော်လာသည့် နှစ်နှစ်ကျော်ကာလတွင်  လက်နက်ကိုင်ပဋိပက္ခများ လျော့ကျရပ်စဲရေးကို အကောင်အထည်ဖော်လာခဲ့ရာ၌ အောင်မြင်မှု ရှိ မရှိကို တိုင်းတာရာတွင် မြေပြင်၌ဖြစ်ပေါ်နေသည့် ဖြစ်စဉ်များဖြင့် တိုင်းတာရမည်ဖြစ်ကြောင်း၊ အောင်မြင်မှုရှိပါက ဆက်လက်အကောင်အထည်ဖော်ဆောင်သွားမည်ဖြစ်ပြီး အောင်မြင်မှုမရှိပါက အပြန်အလှန်သုံးသပ်ရမည်ဖြစ်ကြောင်း ဗိုလ်ချုပ်စောအိုင်းဇက်ဖိုးက ပြောကြားသည်။

“သုံးသပ်တဲ့နေရာမှာလည်း ပြဿနာအကြောင်း အငြင်းပွား၍ အချင်းချင်းအပြစ်ဖို့ခြင်းထက် ပြဿနာရဲ့အရင်းအမြစ်ကို ဖော်ထုတ်ပြီး အဖြေကို ညှိနှိုင်းဖော်ထုတ်ရမှာ ဖြစ်ပါတယ်။ ညှိနှိုင်းခြင်းသည် JMC ရဲ့အခြေခံမူတွင် အဓိကဖြစ်ပြီး လက်နက်ကိုင်ထိ တွေ့မှုကို ကာကွယ်ရန်နှင့်ဖြေရှင်းရန် တစ်ခုတည်းသော နည်းလမ်းကောင်းတစ်ခု ဖြစ်ပါတယ်။ ဘယ်လက်နက်ကိုင် ပဋိပက္ခဖြစ်စဉ်မှာမဆို ပဋိပက္ခချုပ်ငြိမ်းရေးအတွက် ယုံကြည်မှု တည်ဆောက်ခြင်းဟာ အဓိကဖြစ်ပါတယ်” ဟု ဗိုလ်ချုပ်စောအိုင်းဇက်ဖိုးက ပြောကြားသည်။

ထိုကြောင့် လက်နက်ကိုင်နှစ်ဘက်အကြား တစ်ဖက်နှင့်တစ်ဖက် ယုံကြည်မှု ပျက်ပြားစေမည့် အပြုအမူမျိုးကို လက်နက်ကိုင်နှစ်ဘက်စလုံးက တွန်းလှန်ရမည်ဖြစ်ကြောင်း၊ တာဝန်ယူမှု၊ တာဝန်ခံမှုနှင့်တကွ JMC လုပ်ငန်းများ အကောင်အထည်ဖော်ရာမှာလည်း JMC ၏ အခြေခံမူတွင် ဖော်ပြချက်အတိုင်း ပွင့်လင်းမြင်သာမှု၊ တန်းတူညီမျှမှုနှင့် ဂုဏ်သိက္ခာရှိမှုကိုလည်း အခြေခံရန်လိုအပ်ကြောင်း ၎င်းက ပြောကြားသည်။

“JMC လုပ်ငန်းအကောင်အထည်ဖော်မှု အောင်မြင်ရန်အတွက် အစုအဖွဲ့သုံးဖွဲ့စလုံးမှာ တာဝန်ရှိပါတယ်။ အကောင်အထည်ဖော်မှု အောင်မြင်ခြင်းသည် အစုအဖွဲ့သုံးခုလုံး၏ အောင်မြင်မှုဖြစ်သလို ဆုတ်ယုတ်ခြင်းသည်လည်း အစုအဖွဲ့သုံးခုလုံးရဲ့ ဆုတ်ယုတ်ခြင်းသာ ဖြစ်ပါတယ်။ JMC လုပ်ငန်း အကောင်အထည်ဖော်မှု ဆုတ်ယုတ်ခြင်းရဲ့ ရလဒ်မှာ နှစ်ဖက်တပ်ဗိုလ် ၊ တပ်မှူးများ ထိခိုက်ကျဆုံးခြင်းဖြစ်ပေါ်စေရုံမက အထူးသဖြင့် နယ်မြေခံလူထုများမှာလည်း စစ်ရှောင်ဒုက္ခသည်များအနေနဲ့ အတိဒုက္ခရောက်ရတယ်ဆိုတာ လက်တွေ့ဖြစ်စဉ်တွေကနေ ဖော်ပြနေပါတယ်။ ဒါကိုလည်း အထူးသတိမူရမှာ ဖြစ်ပါတယ်” ဟု ဗိုလ်ချုပ်စောအိုင်းဇက်ဖိုးက ပြောကြားသည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) အရ ဖွဲ့စည်းထားသည့် JMC တွင် ပြည်ထောင်စုအဆင့် (JMC- U) ၊ တိုင်းဒေသကြီးနှင့် ပြည်နယ်အဆင့် (JMC –S) နှင့် ဒေသအဆင့် (JMC- L) ဟူ၍ ဖွဲ့စည်းထားပြီး အဆိုပါကော်မတီ အဆင့်ဆင့်တွင် အစိုးရကိုယ်စားလှယ်၊ တိုင်းရင်းသား လက်ကိုင်အဖွဲ့ကိုယ်စားလှယ်နှင့် နှစ်ဘက်လက်ခံသော အရပ်သားကိုယ်စားလှယ်များ ပါဝင်သည်။

မွန်လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲသို့ NCA မရေးထိုးရသေးသည့် KNPP အပါအ၀င် ကယားပြည်နယ်ရှိ အဖွဲ့အစည်းများ လာရောက်လေ့လာ

မွန်လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲသို့ လာရောက်လေ့လာသည့် ကယားပြည်နယ်မှ ကိုယ်စားလှယ်များအား တွေ့ရစဉ်

မွန်ပြည်နယ် ရေးမြို့တွင် မေ ၅ ရက်မှ စတင်ပြုလုပ်ခဲ့သည့် မွန်လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲသို့ ကရင်နီ အမျိုးသားတိုးတက်ရေးပါတီ (KNPP) အပါအ၀င် ကယားပြည်နယ်အတွင်းရှိ တိုင်းရင်းသားလက်နက်ကိုင်အဖွဲ့အစည်းများ၊ နိုင်ငံရေးပါတီများနှင့် အရပ်ဘက်လူမှုအဖွဲ့အစည်းများ မေ ၇ ရက် (နောက်ဆုံးနေ့) တွင် ဆွေးနွေးပွဲ ပြုလုပ်ရာနေရာများသို့ လာရောက်လေ့လာခဲ့သည်။

ယခုလေ့လာမှုခရီးစဉ်တွင် ကယားပြည်နယ်အတွင်းရှိ တိုင်းရင်းသားလက်နက်ကိုင် အစုအဖွဲ့၊ ကယားပြည်နယ်အခြေစိုက် နိုင်ငံရေးပါတီ အစုအဖွဲ့နှင့် ကယားပြည်နယ်အခြေစိုက် အရပ်ဘက်လူမှုအဖွဲ့အစည်း အစုအဖွဲ့တို့မှ စုစုပေါင်း ကိုယ်စားလှယ် ၃၀ ခန့် ပါဝင်လာကြောင်း သိရသည်။

မိမိတို့အနေဖြင့် NCA စာချုပ်တွင် လက်မှတ်ထိုးခြင်း မထိုးခြင်းသည် တစ်ပိုင်း ဖြစ်ကြောင်း၊ သို့သော် တိုင်းပြည်တွင်သွားနေသည့် နိုင်ငံရေးဖြစ်စဉ်တွင် မိမိတို့လည်း သိသင့်သိထိုက်၊ ပြင်ဆင်သင့် ပြင်ဆင်ထိုက်သည်များကို ပြင်ဆင်ရမည်ဟု ခံယူထားသည့်အတွက် မိမိတို့ပြည်နယ်တွင်လည်း တတ်နိုင်သမျှ စုဖွဲ့လုပ်ဆောင်နေခြင်းများလည်းရှိကြောင်း၊ တိုင်းရင်းသားများအနေဖြင့် နိုင်ငံရေးရည်မှန်းချက်ကို ပြောရမည်ဆိုပါက  ဖက်ဒရယ်စနစ်ကို အခြေခံခြင်းသည် အားလုံးတူညီကြောင်း၊ ထို့ပြင် အမျိုးသားအဆင့် နိုင်ငံရေးဆွေးနွေးပွဲများ ကျင်းပပြီးမှ ပြည်ထောင်စု အဆင့်ဆွေးနွေးသည့်အခါတွင် မိမိတို့ တိုင်းရင်းသားများကြား၌ အခြေခံမူများကွဲလွဲနေ၍ မရကြောင်း၊ သို့ဖြစ်၍ ကြိုတင်ပြင်ဆင်နေသည့် နည်းတူ ယခု မွန်ပြည်နယ်တွင်ပြုလုပ်နေသည့် အမျိုးသားအဆင့် နိုင်ငံရေးဆွေးနွေးပွဲ၌ ပြင်ဆင်နေသော ကဏ္ဍငါးရပ်၏ အခြေခံအပိုင်းများကို မည်သို့ စဉ်းစားနေကြသည်ကို မိမိတို့ လာရောက်လေ့လာခြင်းဖြစ်ကြောင်း KNPP အထွေထွေအတွင်းရေးမှူး ဦးရွှေမျိုးသန့်က ပြောကြားသည်။

“ကျွန်တော်တို့ တိုင်းရင်းသားတွေအနေနဲ့ ဖက်ဒရယ်ပြည်ထောင်စုတစ်ခု တည်ဆောက်မယ်ဆိုတဲ့ ခံယူချက်အပေါ်မှာ အစောပိုင်းကတည်းက ကျွန်တော်တို့ကြားထဲမှာ လက်တွေ့ကျတဲ့ ပူးပေါင်းဆောင်ရွက်မှုတွေ လုပ်ဆောင်ပြီးသွားပြီ။ ဖက်ဒရယ်နိုင်ငံရေး စနစ်တွေ၊ ပြည်နယ် ဖွဲ့စည်းပုံအခြေခံဥပဒေတွေ ကျွန်တော်တို့ကြားမှာ အစောကြီးကတည်းက လက်တွေ့ကျကျလေ့လာတာ၊ ဆည်းပူးတာ၊ အတူတကွပူးပေါင်းဆောင်ရွက်တာတွေက ရှိပြီးသားပါ။ ဒီတော့အခု အမျိုးသားအဆင့် နိုင်ငံရေးဆွေးနွေးပွဲကို ကြည့်လိုက်ရင် ကြီးကြီးမားမားကွဲလွဲတာ ဘာမှမရှိဘူး။ မတွေ့ရဘူး။ အခြေခံကြောရိုးတွေက ကျွန်တော်တို့ ကြားထဲမှာ အတူတူပဲ ဖြစ်ပါတယ်။ ဒီမှာဆွေးနွေးတာ အားရစရာကောင်းသလို လက်တွေ့လည်းဆန်ပါတယ်။ ဖက်ဒရယ်စနစ်အခြေခံ တည်ဆောက်မယ့်  အဓိကကြောရိုးတွေဖြစ်တဲ့ အချုပ်အခြာအာဏာတွေ၊ နိုင်ငံတော်တည်ဆောက်ရေးစနစ်တွေ ပြည်နယ်အခြေ ခံအယူအဆတွေ၊ အခွင့်အရေးဆိုင်ရာကိစ္စရပ်တွေ ဒါတွေ ကျွန်တော်တို့ကြားထဲမှာ ကြီးမားတဲ့ ကွဲပြားခြားနားမှုမရှိဘူး။ အားလုံးက အတူတူပါပဲ” ဟု KNPP အထွေထွေအတွင်းရေးမှူး ဦးရွှေမျိုးသန့်က ပြောကြားသည်။

လက်ရှိတွင် KNPP သည် NCA မရေးထိုးနိုင်သေးသည့် ကာလဖြစ်သောကြောင့် မိမိတို့ပြည်နယ်တွင် တရားဝင်နိုင်ငံရေး ဆွေးနွေးပွဲများ ကျင်းပခွင့်မရှိသေးဘဲ အကယ်၍ လက်မှတ်ရေးထိုးခဲ့ပါက လက်ရှိငြိမ်းချမ်းရေး ဖြစ်စဉ်၏ အနေအထားအရ အခြားသောပြည်နယ်များမှ တိုင်းရင်းသားညီအစ်ကိုများက မည်သို့သဘောထားအနေအထားရှိသည်ကို မိမိတို့လေ့လာသုံးရန် စီစဉ်၍လာခြင်းဖြစ်ကြောင်း ကယန်းအရပ်ဘက်အဖွဲ့အစည်းမှ ကိုယ်စားလှယ် ဦးကျော်ထင်အောင်က ပြောကြားသည်။

“ကျွန်တော်တို့ကတော့ ဒါသည် လေ့လာသင့်တယ်။ ဘာကြောင့်လဲဆိုတော့ မွန်လူမျိုးတွေကလည်း လက်မှတ်သာထိုးသွားတယ်။ အောက်ခြေအဆင့်မှာ လူ ၃၀ ထက် မပိုရဆိုတဲ့ အမိန့်ပေးခြင်းတွေခံရတယ်။ တကယ်တမ်း လွတ်လွတ်လပ်လပ် လုပ်ကိုင်ခွင့်မရဘူး။ အခုလိုမျိုး ရေးမြို့မှာဆိုရင်လည်း တော်တော်လေးကို အခက်အခဲကြားထဲကနေ အချိန်အတိုင်းအတာကနေ နောက်ဆုတ်နောက် ဆုတ်လာရတယ်ဆိုတော့ ဒီလိုမျိုး အနေအထားတွေကိုလည်း ကျွန်တော်တို့က လေ့လာဖို့လိုအပ်တယ်။ ဒါပေမဲ့ ဒီလေ့လာမှုခရီးစဉ်သည် ကျွန်တော်တို့ပြည်နယ်မှာရှိနေတဲ့ အစုအဖွဲ့သုံးစုရဲ့ လေ့လာမှုခရီးစဉ်ပဲဖြစ်ပြီးတော့ KNPP တစ်ဖွဲ့တည်းရဲ့ သဘောထားတော့ မဟုတ်ပါဘူး” ဟု ဦးကျော်ထင်အောင်က ပြောကြားသည်။

ထို့ပြင် KNPP ပါဝင်သည့် လေ့လာရေးအဖွဲ့နှင့် မွန်လူမျိုးအလိုက်အမျိုးသားအဆင့် နိုင်ငံရေးဆွေးနွေးပွဲ ကျင်းပရေးကော်မတီတို့သည် ယနေ့ (မေ ၈ ရက်) တွင် တွေ့ဆုံဆွေးနွေးမည်ဖြစ်ကြောင်း သိရသည်။