တပ်မတော်နှင့် RCSS အကြား ဖြစ်ပွားနေသောပဋိပက္ခများ ဖြေရှင်းရေးအတွက် ဆုံးဖြတ်ချက်ချမှတ်နိုင်သော နှစ်ဖက်ခေါင်းဆောင်များ တွေ့ဆုံဆွေးနွေးမည်

(JMC – U) ၏ (၁၈) ကြိမ်မြောက် အစည်းအဝေးကို ရန်ကုန်မြို့ ရွှေလီလမ်းရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် စက်တင်ဘာ ၁၄ ရက်ကပြုလုပ်အပြီး သတင်းစာရှင်းလင်းစဉ်

တပ်မတော်နှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားသော တိုင်းရင်းသားလက်နက်ကိုင် အဖွဲ့အစည်းတစ်ခုဖြစ်သည့် ရှမ်းပြည်ပြန်လည်ထူထောင်ရေးကောင်စီ (RCSS) တို့အကြား ဖြစ်ပွားနေသော ပဋိပက္ခများကို ဖြေရှင်းနိုင်ရေးအတွက် ဆုံးဖြတ်ချက်ချမှတ်နိုင်သော နှစ်ဖက်ခေါင်းဆောင်များ တွေ့ဆုံဆွေးနွေးကြမည်ဖြစ်ကြောင်း ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ (JMC-U) အတွင်းရေးမှူး (၁) ဒေါက်တာရွှေခါးရ်က ပြောကြားသည်။

ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ၏ (၁၈) ကြိမ်မြောက် အစည်းအဝေးကို ရန်ကုန်မြို့ ရွှေလီလမ်းရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် စက်တင်ဘာ ၁၂ ရက်မှ ၁၄ ရက်အထိ ကျင်းပခဲ့ပြီး ယင်းအစည်းအဝေးအပြီး ပြုလုပ်သည့် သတင်းစာရှင်းလင်းပွဲတွင် JMC-U အတွင်းရေးမှူး (၁) ဒေါက်တာရွှေခါးရ်က ထိုသို့ ပြောကြားခဲ့ခြင်း ဖြစ်သည်။

“RCSS ရဲ့ ကိစ္စနဲ့ပတ်သက်လို့ကလည်း ကျွန်တော်တို့ ဆွေးနွေးကြပါတယ်။ တော်တော်လေးကို ကျွန်တော်တို့ ဆွေးနွေးကြပါတယ်။ နှစ်ဖက်စလုံးကလည်း လောလောဆယ်မှာတော့ နှစ်ခု ကျွန်တော်တို့ စီစဉ်ထားတာပေါ့။ ပထမတစ်ခုကတော့ ကျွန်တော်တို့ ဒီဆုံးဖြတ်ချက်ချနိုင်တဲ့ နှစ်ဖက်ခေါင်းဆောင်များ တွေ့ဆုံဖို့ အရေးကြီးတယ်။ ကိစ္စတစ်ခုတည်း မဟုတ်ဘူး။ ကိစ္စတော်တော်များပါတယ်။ အဲဒါကိုလည်း နှစ်ဖက်စလုံးကလည်း လက်ခံထားပါတယ်။ လောလောဆယ်က ချင်းမိုင်မှာလည်း တစ်လောတုန်းက ငြိမ်းချမ်းရေးကောင်စီဘက်ကနေ တွေ့ဆုံတာ ရှိပါတယ်။ အဲဒီတုန်းကလည်း အဲဒီကိစ္စ ဆွေးနွေးတာကို ရှင်းပြပါတယ်။ လောလောဆယ်မှာတော့ ဒီ RCSS ဘက်ကလည်း အဲဒီလိုမျိုး တကယ့်ဆုံးဖြတ်ချက်ချနိုင်တဲ့ ခေါင်းဆောင်ကြီးများ တွေ့ဆုံနိုင်ဖို့အတွက် စာရေးထားပြီး ဖြစ်ပါတယ်။ ဆိုတော့ ကျွန်တော်တို့ ထင်ပါတယ်။ အဲဒါမျိုးဆိုရင် မကြာခင်မှာ တွေ့ဆုံနိုင်မယ်လို့ ယူဆရပါတယ်” ဟု ဒေါက်တာ ရွှေခါးရ်က ပြောကြားသည်။

အဆိုပါအစီအစဉ်အား နှစ်ဖက်ခေါင်းဆောင်များက လက်ခံထားသော်လည်း တွေ့ဆုံဆွေးနွေးမည့်အချိန်ကိုမူ အတိအကျ မသတ်မှတ်ရသေးကြောင်း ၎င်းကဆိုသည်။

အစိုးရနှင့် တိုင်းရင်းသားလက်နက်ကိုင် အဖွဲ့ရှစ်ဖွဲ့တို့ ၂၀၁၅ ခုနှစ်တွင် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးပြီးနောက် နယ်မြေအများစုတွင် လက်နက်ကိုင်ပဋိပက္ခ ရပ်စဲသွားသော်လည်း နယ်မြေအနည်းငယ်တွင် လက်နက်ကိုင်ပဋိပက္ခ ဆက်လက်ရှိနေကာ လက်နက်ကိုင်ပဋိပက္ခရပ်စဲရေးတွင် နှစ်ဖက်မြေပြင်တပ်မှူးများ တွေ့ဆုံမှုသည်လည်း အရေးပါခဲ့ကြောင်း JMC- U အတွင်းရေးမှူး (၁) ဒေါက်တာရွှေခါးရ်က ပြောကြားသည်။

ထို့ကြောင့် တပ်မတော်နှင့် RCSS အကြားတွင် ဖြစ်ပွားနေသော လက်နက်ကိုင် ပဋိပက္ခများ ချုပ်ငြိမ်းရေးနှင့်ပတ်သက်၍ နှစ်ဖက်မြေပြင်တပ်မှူးများ တွေ့ဆုံဆွေးနွေးရန် စီစဉ်ထားပြီး ယင်းအစီအစဉ် အကောင်အထည်ဖော်ရေးနှင့်ပတ်သက်၍ တပ်မတော်နှင့် RCSS ခေါင်းဆောင်များအကြား အဆင်သင့် ရှိနေကြောင်း JMC-U အတွင်းရေးမှူး (၁) ဒေါက်တာရွှေခါးရ်က ပြောကြားသည်။

ရှမ်းပြည်ပြန်လည်ထူထောင်ရေးကောင်စီ (RCSS)  အနေဖြင့် ၂၀၁၅ ခုနှစ် အောက်တိုဘာတွင် NCA စာချုပ် လက်မှတ်ရေးထိုးခဲ့ပြီးနောက် သုံးနှစ်နီးပါးကာလအတွင်း တပ်မတော်နှင့် RCSS တို့အကြား တိုက်ပွဲပေါင်း ၈၀ ကျော် ဖြစ်ပွားခဲ့ကြောင်း သိရသည်။

 

ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ (JMC-U) ၏ (၁၈) ကြိမ်မြောက် အစည်းအဝေး ရန်ကုန်မြို့တွင် စတင်ကျင်းပ

ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ၏ (၁၈) ကြိမ်မြောက် အစည်းအဝေး ပြုလုပ်စဉ် (ဓာတ်ပုံ- ကြည်နိုင်)

ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ၏ (၁၈) ကြိမ်မြောက် အစည်းအဝေးကို ရန်ကုန်မြို့ ရွှေလီလမ်းရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် စက်တင်ဘာ ၁၂ ရက်မှ ၁၄ ရက်အထိ သုံးရက်ကြာ ပြုလုပ်လျက်ရှိပြီး အစည်းအဝေး ပထမနေ့တွင် JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်၊ ဒုတိယဥက္ကဋ္ဌ (၁) ဗိုလ်ချုပ် စောအိုင်းဇက်ဖိုးနှင့် ဒုတိယဥက္ကဋ္ဌ (၂) ဦးစိုင်းမျိုးသန့်တို့က အဖွင့်အမှာစကား ပြောကြားခဲ့ကြောင်း သိရသည်။

“ငြိမ်းချမ်းရေးလုပ်ငန်းစဉ်ဟာ ကျွန်တော်တို့ အလွန်သိမ်မွေ့ ခက်ခဲနက်နဲတဲ့အတွက် JMC လုပ်ငန်းတွေကို အကောင်အထည်ဖော် ဆောင်ရွက်သူတွေအနေနဲ့ ရှောင်ကြဉ်ရမယ့် အချက်တွေ၊ ထိလွယ် ရှလွယ်ဖြစ်စေမယ့် စကားလုံး အသုံးအနှုန်းတွေ၊ ကိုယ်ဟန်အမူအရာတွေကို ကျွန်တော်တို့ ထိန်းသိမ်း ရှောင်ရှားပြီးတော့မှ အမှန်တကယ် ငြိမ်းချမ်းရေး ရရှိစေလိုတဲ့ ဆန္ဒအမှန်နဲ့ ပူးပေါင်း ဆောင်ရွက်သွားကြဖို့ ကျွန်တော့်အနေနဲ့ တင်ပြလိုပါတယ်” ဟု JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က အဖွင့်အမှာစကားတွင် ထည့်သွင်း ပြောကြားခဲ့သည်။

ထို့နောက် ဒုတိယဥက္ကဋ္ဌ (၁) ဗိုလ်ချုပ် စောအိုင်းဇက်ဖိုးက အဖွင့်အမှာစကား ပြောကြားရာတွင် “မြေပြင်မှာ လက်နက်ကိုင် ထိတွေ့မှုဖြစ်တိုင်း အတိဒုက္ခရောက်နေတဲ့ သူတွေကတော့ ဒေသခံပြည်သူတွေဖြစ်လို့ မြေပြင်မှာ တိုက်ပွဲတွေ မပေါ်ပေါက်အောင် နှစ်ဖက်လက်နက်ကိုင်တပ်များက ထိန်းသိမ်းရမှာ ဖြစ်ပါတယ်။ ပဋိပက္ခတွေ ဖြစ်ပေါ်လာတိုင်း တစ်ဦးအပေါ်တစ်ဦး ပြစ်တင်ရှုတ်ချခြင်းဟာလည်း ပြဿနာရဲ့ အဖြေ မဟုတ်သလို ပြဿနာကို ပိုမိုကြီးထွားစေပြီး ရန်လိုစိတ်၊ မုန်းတီးစိတ်တွေကိုပဲ တိုးပွားစေမှာ ဖြစ်ပါတယ်။ ဒါကြောင့် ပြဿနာ အရင်းအမြစ်တွေကို စေတနာမှန်မှန်ဖြင့် ပွင့်ပွင့်လင်းလင်း ဝေဖန်သုံးသပ် ထောက်ပြနိုင်တဲ့ အလွတ်သဘော ဆွေးနွေးမှုများကိုလည်း မကြာခဏ လုပ်နိုင်ဖို့ လိုအပ်မယ်လို့ ထင်ပါတယ်” ဟု ပြောကြားသည်။

ထို့နောက် ဒုတိယဥက္ကဋ္ဌ(၂) ဦးစိုင်းမျိုးသန့်က “အခု ကျွန်တော်တို့ JMC ရဲ့ Union Level၊ State Level ဖွဲ့စည်းပြီးတော့မှ နောက်ဆုံး ကျွန်တော်တို့ LCM လို့ခေါ်တဲ့ Local Civilian Monitors တွေကို ဆက်လက်ဖွဲ့စည်းဖို့ စီစဉ်ဆောင်ရွက်နေပါပြီ။ အဲဒီ LCM ကနေပြီးတော့မှ ကျွန်တော်တို့ လူမှုအဖွဲ့အစည်း၊ လူမှုအသင်းအဖွဲ့တွေ အားလုံးကနေ ပူးပေါင်းပါဝင်ပြီးတော့မှ ကျွန်တော်တို့ JMC ယန္တရားကြီးကို ပိုမိုသွက်လက် မြန်ဆန်စွာ လည်ပတ်နိုင်ဖို့ ကျွန်တော်တို့ မျှော်လင့်ထားပါတယ်” ဟု အဖွင့်အမှာစကား ပြောကြားရာတွင် ထည့်သွင်းပြောကြားခဲ့သည်။

ယခုအစည်းအဝေးတွင် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) တွင် ပါရှိသည့် ဝေါဟာရများအနက် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) ဆိုင်ရာ အဓိပ္ပာယ်ဖွင့်ဆိုခြင်း (မူကြမ်း) အား ဆွေးနွေးအတည်ပြုမည်ဖြစ်ကြောင်း အစည်းအဝေး အစီအစဉ် (မူကြမ်း) အရ သိရသည်။

ထို့ပြင် ပြည်ပနိုင်ငံ ငြိမ်းချမ်းရေး လေ့လာရေးခရီးစဉ်များဖြစ်သည့် နော်ဝေနိုင်ငံ၏ ငြိမ်းချမ်းရေး ဆောင်ရွက်မှုဆိုင်ရာ လေ့လာရေး ခရီးစဉ်၊ နီပေါနိုင်ငံ ငြိမ်းချမ်းရေးဆိုင်ရာ လေ့လာရေးခရီးစဉ်နှင့် ဖိလစ်ပိုင်နိုင်ငံ ငြိမ်းချမ်းရေးဆိုင်ရာ လေ့လာရေးခရီးစဉ်များကို တင်ပြ ဆွေးနွေးကြမည်ဖြစ်ကြောင်းလည်း အစည်းအဝေး အစီအစဉ် (မူကြမ်း) အရ သိရသည်။

သတ်မှတ်နယ်မြေကျူးကျော်လာသည့် မည်သည့်လက်နက်ကိုင်မဆို လုံခြုံရေးဆောင်ရွက်သည့်အခါ တွေ့ရှိပါက ချေမှုန်းသွားမည်ဖြစ်ကြောင်း JMC –U အဖွဲ့ဝင် တပ်မတော်သားကိုယ်စားလှယ် ပြောကြား

(၁၇) ကြိမ်မြောက် ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC – U) အစည်းအဝေး ပြုလုပ်နေပုံအား တွေ့ရစဉ် (ဓာတ်ပုံ-မောင်ထူး)

သတ်မှတ်နယ်မြေ ကျူးကျော်လာသည့် မည်သည့်လက်နက်ကိုင်ကိုမဆို လုံခြုံရေးဆောင်ရွက်သည့်အခါ တွေ့ရှိပါက ချေမှုန်းသွားမည်ဖြစ်ကြောင်း ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC – U) အဖွဲ့ဝင် တပ်မတော်သားကိုယ်စားလှယ် ဒုတိယ ဗိုလ်ချုပ်ကြီးသန်းထွန်းဦးက ပြောကြားကြောင်း သိရသည်။

သတ်မှတ်နယ်မြေကျူးကျော်လာသည့် မည်သည့်လက်နက်ကိုင်ကိုမဆို တပ်မတော်က ချေမှုန်းသွားမည်ဖြစ်ကြောင်း NCA ရေးထိုးထားသည့်  ရှမ်းပြည်ပြန်လည်ထူထောင်ရေးကောင်စီ (RCSS) အဖွဲ့ပိုင် သတင်းဌာနဖြစ်သော  Tai – Freedom နှင့် အခြားသတင်း ဌာနအချို့တွင် သတင်းဖော်ပြမှုများ ပြုလုပ်ခဲ့သည်။

ရန်ကုန်မြို့ရှိ  အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် (၁၇) ကြိမ်မြောက် JMC – U အစည်းအဝေးကို ဇူလိုင် ၃ ရက်မှ ၅ ရက်အထိ ပြုလုပ်ခဲ့ပြီး အဆိုပါအစည်းအဝေးကာလအတွင်း RCSS အဖွဲ့က JMC – U ထံ ၎င်းတို့၏ မူးယစ်ဆေးဝါးတိုက်ဖျက်ရေးအဖွဲ့ဝင် ခြောက်ဦး ဖမ်းဆီးခံရသည့် ကိစ္စအပါအ၀င် တိုင်ကြားစာများနှင့်ပတ်သက်၍ ဆွေးနွေးချိန်တွင် ဒုတိယဗိုလ်ချုပ်ကြီး သန်းထွန်းဦးက ထိုသို့ ပြန်လည်ပြောကြားခြင်းဖြစ်ကြောင်း သိရသည်။

JMC – U အစည်းအဝေးတွင် တိုင်ကြားစာများနှင့်ပတ်သက်၍ တပ်မတော်သားကိုယ်စားလှယ် ဒုတိယဗိုလ်ချုပ်ကြီးသန်းထွန်းဦးက RCSS  အနေဖြင့် သတ်မှတ်ထားသည့် နယ်မြေကို ကျော်လွန်သွားပါက ၎င်းတို့နီးစပ်ရာ တပ်မတော်ထံ အကြောင်းကြားရမည်ဖြစ်ကြောင်း၊ ထိုသို့ သတ်မှတ်ထားသည့်နယ်မြေတွင် နေထိုင်ပါက မှဲ့တစ်ပေါက်မစွန်းအောင် လုံခြုံရေးတာဝန်ယူပေးမည်ဖြစ်ကြောင်း၊ သတ်မှတ်ထားသည့် နယ်မြေအတွင်းမှ ကျူးကျော်လာသော လက်နက်ကိုင်ဆောင်လာသည့် မည်သည့်လက်နက်ကိုင်ကိုမဆို ချေမှုန်းသွားမည်ဟု ဒုတိယဗိုလ်ချုပ်ကြီးသန်းထွန်းဦးက ပြောကြားခဲ့ကြောင်း Tai –Freedom သတင်းဖော်ပြချက်တွင် ပါရှိသည်။

သတ်မှတ်နယ်မြေနှင့်ပတ်သက်ပြီး တပ်မတော်နှင့် RCSS အကြားတွင် အဓိပ္ပာယ်ဖွင့်ဆိုချက် ကွဲလွဲနေသည်မှာ အချိန်ကြာပြီဖြစ်ကြောင်း၊ တပ်မတော်က နားလည်ထားသည်မှာ မိုင်းတုံနှင့်မိုင်းဆတ်သည် RCSS အဖွဲ့တစ်ခုလုံး၏ နေရာဖြစ်ရမည်ဖြစ်ပြီး RCSS က နားလည်ထားသည်မှာ မိုင်းတုံနှင့် မိုင်းဆတ်သည် ၎င်းတို့၏ ဗဟိုဌာနချုပ်နေ ရာသာဖြစ်ကြောင်း၊ ဒုတိယဗိုလ်ချုပ်ကြီး သန်းထွန်းဦးပြောကြားသည်မှာ RCSS အနေဖြင့် သတ်မှတ်နေရာတွင် မနေပါက ချေမှုန်းမည်ဟု ပြောဆိုခြင်းမျိုးမဟုတ်ဘဲ သတ်မှတ်နေရာ တွင်မနေဘဲ ၎င်းတို့ လုံခြုံရေးတာဝန်ထမ်းဆောင်သည့်အခါ တွေ့ရှိပါက ချေမှုန်းမည်ဟု ပြောကြားခြင်းသာဖြစ်ကြောင်း JMC – U အဖွဲ့ဝင်တစ်ဦးဖြစ်သူ ABSDF ဗဟိုဦး ဆောင်ကော်မတီဝင် ဆလိုင်းယောအောင်က ရှင်းပြသည်။

“ခင်ဗျားတို့ သတ်မှတ်ပေးထားတဲ့နေရာမိုင်းတုံ၊ မိုင်းဆတ်ဖြစ်တယ်။ အဲဒီတော့ ခင်ဗျားတို့ အဲဒီမှာနေမယ်ဆိုရင်တော့ ဘာမှပြဿနာ မရှိဘူး။ ကျွန်တော်တို့နဲ့လည်း ထိတွေ့မှု ဖြစ်မှာမဟုတ်ဘူး။ ကျွန်တော်တို့ကလည်း အဲဒီနယ်မြေလာရင် ခင်ဗျားတို့ဆီ အကြောင်းကြားမှာပေါ့။ အကြောင်းကြားရမယ့် တာဝန်ရှိတယ်။ ခင်ဗျားတို့က သတ်မှတ်နေရာမှာ မနေဘူး။ သတ်မှတ်နေရာမှာ မနေတဲ့အခါကျတော့ ကျွန်တော်တို့တပ်တွေကလည်း လုံခြုံရေးအရ တာဝန်ထမ်းဆောင်တယ်။ ထမ်းဆောင်တဲ့ အခါကျရင် တွေ့ရင်လည်း ချေမှုန်းသွားမယ် အဲဒါပဲ သူက ( ဒုတိယဗိုလ်ချုပ်ကြီး သန်းထွန်းဦး) ပြောတာလေ။ RCSS ကလည်း မိုင်းတုံ၊ မိုင်းဆတ်ဆိုတာ သူတို့ရဲ့ ဗဟိုဌာနချုပ်ရဲ့နေရာလို့ နားလည်ထားတယ်။ အဲဒီလို နားလည်ထားတဲ့အခါကျတော့ အခုထိတွေ့မှုရှိတဲ့နေရာမှာ RCSS ရှိနေဦးမှာပဲ။ ဘာကြောင့်လဲဆိုတော့ အဲဒါက နှစ်ဦးနှစ်ဖက်ပေါ့။ Bilateral Agreement မထိုးခင်ကတည်းကိုက RCSS က သူ့နယ်မြေဆိုပြီး သတ်မှတ်ထားတာ။ ဒါပေမဲ့ တစ်ဖက်က စစ်တပ်ကကျတော့ ဒါက RCSS နယ်မြေမဟုတ်ဘူးလို့ သတ်မှတ်ထားတာ။ သတ်မှတ်ထားတဲ့အတွက် RCSS က ဒီမှာ ဆက်ရှိမယ်။ အစိုးရကလည်း သူက လုံခြုံရေးအရ ဆောင်ရွက်တယ်ဆိုရင် ၀င်ရင်တော့ ထိတွေ့မှုတွေ ဖြစ်ကြဦးမှာပဲ” ဟု ဆလိုင်းယောအောင်က ပြောကြားသည်။

ယင်းကိစ္စနှင့်ပတ်သက်ပြီး JMC – U တွင်  အဖွဲ့ဝင်အဖြစ် ပါဝင်နေသည့် RCSS ကိုယ်စားလှယ် စိုင်းလျန်းထံ ဆက်သွယ်ရာတွင် ၎င်းအနေဖြင့် နေပြည်တော်တွင်ပြုလုပ်သော လုပ်ငန်းကော်မတီအစည်းအဝေးကို တက်ရောက်နေသည့်အတွက် JMC – U အစည်းအဝေးကို တက်ရောက်နိုင်ခြင်းမရှိကြောင်း၊ ယင်းသို့ တက်ရောက်ခြင်းမရှိသည့်အတွက် ဒုတိယဗိုလ်ချုပ်ကြီးသန်းထွန်းဦး ပြောကြားချက်ကို မသိရှိကြောင်း၊ RCSS အဖွဲ့မှ JMC – U အစည်းအဝေးတက်ရောက်သည့် ပုဂ္ဂိုလ်မှာလည်း RCSS ကို ကိုယ်စားပြု၍ ပြောရေးဆိုခွင့်မရှိကြောင်း စိုင်းလျန်းက ဇူလိုင် ၆ ရက်တွင် ပြောကြားသည်။

အဆိုပါကိစ္စနှင့်ပတ်သက်ပြီး JMC – U အတွင်းရေးမှူးများထံ ဆက်သွယ်ခဲ့သော်လည်း တပ်မတော်သားကိုယ်စားလှယ် အတွင်းရေးမှူး (၂) ဗိုလ်မှူးကြီးဝဏ္ဏအောင်က မအားမလပ်ဖြစ်နေသည့်အတွက် မဖြေကြားနိုင်သေးကြောင်း၊ အတွင်းရေးမှူး (၁) ဒေါက်တာရွှေခါးရ်က ဗိုလ်မှူးကြီးဝဏ္ဏအောင်အား မေးမြန်းသည်က ပိုမိုကောင်းမွန်မည်ဖြစ်ကြောင်း အသီးသီးပြန်လည်ဖြေကြားသည်။

ထိန်းချုပ်နယ်မြေ၊ အပစ်ရပ်နယ်မြေနှင့် သတ်မှတ်နယ်မြေဟူသည့် စကားလုံးများမှာ တပ်မတော်နှင့် တိုင်းရင်းသားလက်ကိုင်အဖွဲ့များအကြားတွင် ညှိနှိုင်းရန် ခက်ခဲနေသည့် စကားလုံးဖြစ်သည်။